1 Samuel 28

1Dirode udojo quigade ga filistéogosode ore pota jeta ore cho dajocaningame israélgosode ore. Ga e dimane ore ome pocaningai yui. Ga Aquis chojningame David ore:

–A bajorane, ajínaño yoque to jne ujetiga yicoi pocaningai ome uacarasade israélgose ore. Ga barajapise uje yurúo ome ua ica iji taningai ujetiga yo yisoldácho iji uaque to, ga jé u jeta beyoi yijocaningáringo. Jecute a beyoi pocaningane ome uacarasade israélgose dirome jne.–

2David chojninga:

–Uerate arĩa. Ga a quene araja jne uje baroguipísi u yu ga que yucusu yu ome pocaningárique gotique.–

Enga Aquis chojninga:

–A yo yirodisórone soldácho asuté iji ua jne ujetiga ajiripise yi to aja yocajesúode.–

Saúl chiroque chequé daijnéraque jeta tibidi Samuel casica ga chingo Saúl ipesutígome pocaningai yui

3Uje filistéogosode ore doi dajocaningai uté ome israélgosode nanique, ga Samuel e toi ica. Enga e ore cha poji uté ejode, ga e ore chimánaja jnumi uje ore chijóchame iji uté batigai pidai uje i tu Ramá.

Ga Saúl chajna pujopié quedéjnanie irajasórone aja quedéjnane nanique, ga chiroque ore aja purása quedéjnane ore unirone yui nanique. Saúl chiraja uje Dupade que chise pujopié quedéjnanie unétique gu. Ujetiga gosi chatata denomitígo quitígo ga e que toc jeta gosi cho daniri iji israélgosode ore ujade to. Jé adi tu ome udore ore uje ore chiraja jeta ore tibidi ayoré togode ome darasade ujetiga picatecãraite ore, enga e que pujuegate jeta gosi jé chopo daniri iji israélgosode ore ujade to rĩ.

4Filistéogosode ore jno ga ore pésu darengúi ome dajocaningárique yui iji israélgosode ore idai ejoi uje i tu Sunem. Jé basa Saúl chimáta dasoldádode iji ore idai ejoi uje i tu Gilbóa, enga ore chicha darengúi aja uté. 5Uje Saúl chimo filistéogosode ore uatigájnai ga todópisa ore ga chojninga: "E que yujñapejópome filistéogosode ore rĩ." 6Saúl chutṍri Pangarádejnai Dupade ome pocaningai yui jeta chiraja Dupade uté áyipieraque, mu catecã́ri jórogui, mu que Pangarádejnai Dupade chajnai gotique. Pota jóroga jeta Dupade chatata isocáringome iji uritígo mu que chĩ́cara cuchárique. Chicáji Dupade irógode uñai ujetiga chijnime Dupade áyipiedie pijogútodie uje udire uñai i tu Urim. Mu catecã́ri jórogui ome mu que pijoque cucháringome. Ga jé chuságaja Dupade uruode atatasórone ore to ga que toc jeta udore uñeque chiraja Pangarádejnai Dupade áyipie quitique gotique. Ga Saúl que chirajapise dasocáringome pocaningai uté yui. 7Enga Saúl chojningame darógode ore:

–Acueyoi chequéraque uje chiraja jeta tibidi togode ore. Ga ango uaté jogatígaja yu uje yipota jeta yicatecã́ri uaté gu.–

Enga irógode uñai chojninga:

–Chequedíe uña qué déji ore idai En-dor uje chiraja jeta tibidi togode ore.–

8Saúl chécãre daguidedie ga chopise ayoré gajnaréngone iji darasade ore ujade. Ga nóna daroque gárode ore aja chequé uaté iguíjnai iji dejai jeta ore tibágui. Ga que uñeque chiraja uje Saúl u uje chise chequé daijné uaté. Enga Saúl catecã́ri. Ga chojninga:

–Qué yutṍri ua ome bajopié jeta atataba yajnéone cucha dacacho iji yiquei ome yu. Qué yibágui ua to jeta abidábi togode uñeque jeta yicatecã́ri gosi.–

9Ga chequé chojningame Saúl:

–¿Jé ca araja to a? uje que pujuegácho udore gotique rĩ. Yoqueduguéjna cuchábi Saúl e chijócãre daijnane, daijnenie ore jnese iji yocuniri udé údode. ¿Gotique gu uje batṍri yu ome udore? A Saúl chiraja jne ga chujé yu jne.–

10Saúl chojninga:

–Yurúo udojo iji Pangarádejnai Dupade iquei ga a jé ca cuchárique chósi ti iji ua jne ome udore.–

11Chequé daijné chojningame Saúl:

–¿Bapotigátique iji ayoré togode jeta yibidi gosi?–

Saúl chojninga:

–Abidi Dupade iro casica Samuel.–

12Ga chequé daijné uaté chucué ayoré togode udore ome dajopié ga chuniname eti chimo Samuel iji dáyipie, ga quene chiraja dacatecãraisṍri uté gosi. Ga uaté tṍra re ga agoyé quedéjna ga narare ga chojninga:

–¿Gotique gu a uje bãra yu que? Ga yijose eti ayoré gajnaréngone uña uaque gu. ¡Mu a Saúl jé upúsu ua!–

13Ga Saúl chojninga:

–Jé ca atodo. ¿Amo cuchárique a?–

Ga uaté chojninga:

–Yimo dupárique uje doi guesi ga chicáji guesi yui.–

14Ga Saúl chojningame:

–¿Atígo cho rique que?–

Ga chequé daijné chojninga:

–Jnani choquíjna que, ga chigui daguidé dañoré que.–

Ga Saúl jĩraque jnusina uje a Samuel u ga chichaga dagataidie aja jnumi ga enochai chujépise raja jnumi. 15Ga Saúl chudute darade ga ududigode dara chojningame Saúl:

–¿Gotique gu a uje bapésu yujuredie ga babidi yu iji de?

Ga Saúl chajnai ga chojningame:

–Áyuguhebátaque cuchape yu gu. Uje filistéogosode a ore sué yoquibai jne uje yiraja uje Dupade e que cháta cuchárigaja yu. Uje yucué jórogui Dupade áyipierigui ome yu mu que yiraja yisocáringome uje que chajnai yu gotique. Yijos eti cho yiquique iji yuritígo, jeoga yiraja áyipie quitígo ome uruode júsorone uñeque, mu jé ate uje que chingo dajequitígo ome yu. Jecute yibidi ua jetiga atata yisocáringome yu ome filistéogosode udore ore.–

16Samuel chojninga:

–¿Gotique uje bapota yu a? Uje Pangarádejnai Dupade e cho damajo ua enga e cha cháta cuchade aja ua to. 17Uje jé uyu upúsu ica uje yingo ua uje a Pangarádejnai Dupade chijnime báringai eduguéjna iji ua jne. Ga e yojningane udojo tocade ome ua. Enga e cha báringai eduguéjna ome ua ga chisi ome báringa casé eduguéjna ome bajõrai David. 18Ga Pangarádejnai Dupade aníri u gu uje que bei uru quitique gotique jnese ica uje bajé amaléquegosode ica ga bacha ore eduguéjna cuchábi aja guesi ica. Uje Dupade chojningame ua ica: "Ejnápise amaléquegosode jnese jne, ga ca acha uñeque aja ducunínique jne." Jecute Dupade cho dajuñame ua, ga que nonapo ua aja quedéjnarique to rĩ. 19Pangarádejnai Dupade a tẽra barasade ore, uaque dirome ome filistéogosode dirome ga bajnacarode uaque a agúsoji yari to dirome. Uje a filistéogosode sué israélgosode uacabai dirome, ga gose ua dirome.–

20Ga Saúl chiraja uje ũré Samuel uruode ga cṍraja jnumi ga cho sere iji uté. Uje Samuel uruode chajuguipise aguté jecute Saúl íjnonguiji udore jmainie. Uje que Saúl tagu cuchárique to iji deréjnai údode, jé aja dejai, ga que tiógara dayaguhei gotique.

21Chequé daijné uaté chose Saúl yui ga catecã́ri uje chimo Saúl uje que chiraja dasocáringome re. Ga chojninga:

–Yeduguéjná, e yipésu bojningáiso cucha jnese. Uje yiraja uje pitoringai dimane ome daijnenie uyoque ujetiga yetingaco pujopié quedéjnanie, mu yosõre ua que, ga yi batoquei. 22Uje yangári ua que, ga angarami yu to ga a yipésu cucha pibotique ome ua jne ga agu yipesutique to jne, ga uajate ua jne aja baqui uté.–

23Saúl que pota jetiga tagu. Mu irógode, daijné ore nejepúsu údode ga jé u uje Saúl chojninga: "Apésabu ga yajo." Ga chague iji jnumi ga jno ga chácariji ore mochápi gai.

24Chequé daijné chujé dachidi erámoro quedéjna urojna uje déji daguíjnai ejoi ga chãrei ome ore. Ga pésapo tórtade rĩ uje que chanire bisitígaja. 25Enga chequé daijné jno Saúl, ore posode údi ome ore iji uté jeta Saúl irógode ore tagu jnese. Uje ore cha chagu ga ore niji enga jé u uje ore jno iji dejai uté.

Currently Selected:

1 Samuel 28: Ayore

Highlight

Copy

Compare