1 Samuel 27
27
David, jorane ore cho daniri iji filistéogosode uniri nanique
1Mu David chojninga iji dajei: "Que yiraja dínique jeta qué idája jeta Saúl chujé yu, jeoga idógosi. Jecute a omi tu ujetiga yi ga yicáji filistéogosode ore unirone, garáijnane udore ga yácariji udore, jeta Saúl jé ca chucué yu iji israélgosode ore uyoque yocunirone údode jnese. Uje a chudute jne jeta yugúsi filistéogosode ore gari ga a cha yunerai jne. Enga a yayome uté ga yiquecame uté jne." 2Ga David ore chicáji filistéogosode ore eduguéjna cuchábi uje i tu Aquis. Ore ajéode u jetiga uté cho dasoldácho iji udore ore to. Ga David jorane uje 600 ore ga ore nóna David aja uté to. Ga jnani bajai Maoc ujnacare ore eduguéjna Aquis uté ga uté idai i tu Gat. 3Ga David acoté gáredie udire nóna dabai aja ore uniri uté. Yojninganie u jezreélgoto Ahinoam, jé aja carmélgoto Abigail uje abai toi ica uje i tu Nabal. Ga David ore cho daniri iji Gat uté to ga ore doi eduguéjnai Aquis iroquéode jnese to iji uté. Ga David jorane ore nóna dacotedie, dabode ore to jnese iji ore idai tuté to. 4Uje Saúl chudute to uje David cho daniri iji filistéogosode ore idai to uje i tu Gat, ga que Saúl chucuepoi David gotique rĩ.
5David catecã́ri filistéogosode eduguéjna cuchábi Aquis uté ga chojninga:
–Jeta amesẽre yoque ga ajuégame yoque ga yoco yoquidai iji uaquedai ajámamone uñeque to ujetiga jé ca yocópise yoquidai iji bedáidaté cuchábi udé to. Uje purása quedéjna yoque ga que toc jeta yoco yoquidai iji bedáidatéi udé to.–
6Enga jĩraque ore eduguéjnai Aquis uté juéga ore idai ajámi ome ore uje i tu Síclag. Enga uje David e déji dáringai eduguéjna ga cháta ore idai uté aja danirípisi ga judágosode ore cho dedáji uté to nanique.
7David cho darása iji filistéogosode udore ga guejna siqueré chojmara iji ore uniri ga nóna guedosi gagájnione to nanique. 8Ga jecucha David nóna dajorane jnanío aja quedéjnane ga ore chajnose purása quedéjnane ore ome ore ugúchade gatuaque. Ga ore ajnoñane u gesuréogosode, gezérgosode, jé aja amaléquegosode ore. Ga ore chirõre Egípto ome dajnoñaquéode udore. Ga ore chaca ñane iji ore idáyode Telaim, Shur, Egípto ore ujade. 9Uje ore chachẽre ore idáyode udore ga que ore chicha chequéraque, jnanírique, disírique ore aja ducunínique. Ga ore jno ore gachidedie áyasai, aquirájna ore údi, jé aja burica quedéjnane ore to uje ore íode u caméllo, jé aja ore iguidedie to rĩ. Uje ore chajnésaru daquigade ga ore chicáji eduguéjnai Aquis ujetiga ore chatata cucha dacadode ome uté. 10Ga uté chojningame: "¿Uaquejnatique iji pidáyode que?" David chojninga: "Yoquejnane u ore idáyode que iji judágosode ore uniri eruei iji umusoi garani yui, jé aja jerameélgosode, quenítagosode ore idáyode ore to rĩ."
11Mu David chãra uté ga guejnane u purása quedéjnane iji Aquis uniri uté uécha uñai iji umusoi garani yui. Jecute David chejna chequedíe, disiode, jnanione ore jnese gu uje que pota jeta gosi chapite ga chatata udore ome filistéogosode ore eduguéjna cuchábi Aquis iji idai Gat uté. Uje David chácariji filistéogosode ore ujade ga jecucha ate uje pógu daringaquéode udore ome ore eduguéjnai Aquis uté. 12Aquis irasique David uruode uje chojninga: "Yoquigode u yocujode israélgose ore iji ore uniri Israel uté." Ga Aquis chojningame re: "A e David urasade israélgose ore chetaguipise uté jõ ome jocaningane ome ore, ga yocurásapise David ore jne ga a jecucha yiroque ore jne ome yijocaningane."
Currently Selected:
1 Samuel 27: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
