1 Samuel 1
1
Dupade chisíome Ána ipotigátique disi ome
1Iji efraíngosode ore achamini uté nanique ga jnani déji uje i tu Elcána. Ga uté idai u ore idai Ramá uje déji cucarãte ujai nanique. Enga Jeroham ujnacare uté. Jé basa ga jnani bajai Eliú ájnape uté to. Ga Eliú uté dai i u Tóhu nanique. Enga jnani bajai Tóhu dai u efráingosi uté uje i tu Zuf. 2Enga Elcána uté acotedie gare ore nanique. Enga acotedie uña i tu Ána. Jé basa uña i tu Penína. Penína abode cuse, mu Ána que atique cus. 3Iji siqueredie jnese ga jecucha Elcána uté chicáji ore idai Sílo nanique jeta tẽrája Pangarádejnai Dupa pujnuéngaisṍre iji uté. Enga Dupade iroguipísi Elí abode déji uté to uje ore chátaja dayé ome Dupade adode úringane pipesucho enga uñai i tu Ófni, jé uñai i tu Finees ga Dupade iroque ore to ga ore pésu cuchade aja quigode to iji Dupade iguíjnai.
4Uje Elcána chise Sílo nanique ga tẽra dachidode cuchiso uñane ome Pangarádejnai Dupade, ga tẽrája dacoté Penína ome dẽrapáidode cuchiso arione petígo, ga chisi ome cucha arione ome uaté, ore abode, ore abidie ore to. 5Mu gueranone cucha jiépiso ome Ána uje edójnariepíse gu. Pangarádejnai Dupade jé ipesute jeta jé ca Ána atique cuse to, mu que cucha gotique ome Elcána uje chijnorapise dacoté Ána gu. 6Penína chetaque Ána ga chayóji úringa aberé yui ome ga cosa dáringa abechugué ome dajõra. Gaidi u gu ujetiga pésu Ána ujuredie.
7Jecucha isocai u iji siqueredie jnese uje ore chicáji Dupade Iguíjnai iji Sílo ga Penína pésu Ana ujuredie iji uté. Enga chirarese Ana ga que tagu cucha pibotique to. 8Enga jé u uje abai Elcána jecucha chojningame dacoté nanique: "Ana, ¿gotique gu a uje babo? ¿Gotique gu a uje bo báyugu ua ga que aque to?" Ga chojningame dacoté: "¿Gotique uje bajnusi jeta batígo cuse? Ga bajnei tu yijnoraquei ome ua ga edu bajnei tuté yijnoraquei ome ua ga aya o báyugu ua. Enga bajnei yijnoraquei sué yape diécerigo gai iji ua jeta cusirase."
9Uje qué ore déji ore idai Sílo nanique ga dire uñai enga ore cha chagu ga Ána chague ga jĩraque chicáji Dupade iguíjnai yui. Uje chise Dupade iguíjnai ga chise Dupade iroguipísi iji uté uje i tu Elí enga uté chácariji charipi gai iji Dupade iguíjnai piagoi iquei. 10Ána áyuguhebaté ga educadode tamuta, ga catecã́ri Dupade jeta chisi ome atique ome. 11Ga Ána chisi ome daru iyiejnane ome Dupade ga chojningame: "Pangarádejnai á, Dupa pujnuéngaisṍre ua ome cuchade jnese. Be ga osõre yu uje baraja gu uje aberé yu. Jecute qué yutṍri ua ujeta átaja barogué uyu enga asi ome yatique ome yu. Ujeta asi ome yu, ga jé basa ga a yisiapome ua jne rĩ enga a doi baroquéode quigode jne iji baguíjna cuchábi ajei jé aja deruénique. Iji batigárique jne ga a jé ca yuju uté gatui to jne, ga a uté pijógome ua jne."
12-13Uje Ána iyajmé iji dacatecãraitigade gai ga Elí chose eti ore jodé yugué Ána uaté. Uje Ána catecã́ri Dupade iji dajei gu ga Elí chimo uje pijnanane cho cuyuc, cuyuc uje catecã́ri Dupade iji dajei. 14Elí chaquĩ́ra Ána ga chojningame:
–¿Cho rique jeta bãrusoringuei íjnonguiji ua ya? Aya óji yote pioi, uje yote pioi u gu uje pésu bãrusoringuéone.–
15Mu Ána chojninga:
–Yuruode gajnesṍri u Dupade. Que ũruso yu gotique. Que yóji ore jodé víno gotique to. Que yójipise ore jódode yote piotique gotique to. Bamo uje áyuguhebaté yu iji dirode udojo ga yingongone u yáyuguhebátigadatéode ome Pangarádejnai Dupade iji diri tudé uje bamo yu iji yutaquéode udojo gai. 16Mu jé ca opo chequé sijnangue iji yu jne rĩ iji de. Bamo uje jé igasique yu iji de mu qué yutṍri Dupade gu uje érãtique yiraja yisocáringome yu.–
17Enga Elí chojningame Ána:
–Bo mu jé ca opo báyugu ua aja bajesúode uje israélgosode yocangureni Dupa a chisi ome bapotigátique cucha ome ua jne.–
18Enga Ána chojninga:
–Urénga, yacaranguipísome ua.–
Enga Ána chajniapója darani rĩ enga jé u uje Ána tṍrai dajñarenie ome cucha pibosode to uje que chopo dáyugu re gotique rĩ. 19Iji Ána icatecãraitíga casica quigaminóri dire enga e chise dirájnanie ga Elcána chimáta dacotedie, dabode ore ga ore catecã́ri Dupade, ga ore cha dacatecãraitigade ga jé u uje ore chajniapója daguíjnai rĩ iji ore idai Ramá. Uje e ore déji dedai tuté ga Ána, abai Elcána ore moji ñane gari iji uté, ga jé u uje Dupade jnusina Ána utoqué casodica uje chutai disíriguiji ica. 20Enga Ána úringa ujningaqué jé u nanique iji udore quigade. Uje Ána abi e chirõre dabatigai ga jé u uje chise diri ga úringai basuque jé u iji daté, ga daté pésu uté i enga chojningame: "A yĩ́care Yutaidi aja uté jne uje yutai diríca gu iji Dupade." Ga uté i tu Samuel nanique ome israélgosode ore uruode quigode.
21Uje e siqueré jé upo rĩ ga Elcána, Penína, abode ore chajniapója Dupade iguíjna cuchábi to rĩ iji ore idai Sílo ujetiga ore tẽrája Dupade iji uté ome dẽrapáitique cuchiso. Jé ore isoca gu iji siqueredie jnese uje ore chicáji Dupade iguíjnai jeta ore tẽrája Dupade iji ore idai Sílo uté. Cuchiyi tupúsu gu uje Elcána chisi ome daru iyiejájnane ome Dupade ga que toc ujetiga ca doi daruode udore ome Dupade to. 22Mu Ána que nóna dabai ore aja to ga chojninga:
–A ca yicáji to iji siqueré tudac. Uje a yiródosi yababi iji yoquiguíjnai uje qué ajámape gu. Mu ujetiga e arégape jne ga a yiji údi aja Dupade iguíjna cuchábi uté ga a jé uté chácariji uté ajei gatuaque jne. Uje jé yurúo ome Dupade gu ujetiga yisi ome Pangarádejnai Dupade uté.–
23Enga Elcána chojningame dacoté Ána:
–Jé be bameserãtique cucha jeta omi ome ua. Ácariji udé jé aja jeta cha chucu bajnanie, ga jé u ujeta ajína yoque to iji ejórique. Dupade a chusípise babi guio jne jeta jé ca baruode toja jne uje bangome ica gu yocabi uté jeta Dupade cho daróguiji.–
Ga jé u uje Ána chácariji dabai ore iguíjnai jeta chusósi dababi guio jé aja jeta cha chucu ijnanie to. 24Uje Ána abi e cha chucu daté ijnanie, ga nóna dabi aja Dupade iguíjnai uje déji ore idai Sílo. Ga ore pésu dẽrapáidode cucha uje ore tẽrája Pangarádejnai Dupade ga ore guẽrapáidode cucha u udojo nanique: aquirájna ujnacare pariguéjnane gadioque, jé basa trígo u to ga lítrodie chise 22 jnese iji trígo, jé basa ga ore chigaru víno gai iji cucha ao aoi ga ore tẽrame Dupade to. 25Uje ore tẽra aquirájna ujnacare pariguéjnane uñai ga quigade ga ore chicáji Elí jeta Ána chisi ome dabi ome Elí iji to. 26Uje Ána ore chise Elí ga Ána chingongara raja Elí enga chojninga:
–Yocacadisṍri á, jé ca ajéngome yu iji bejoi udé. Uje uyu jé u uje yicatecã́ri Dupade ica iji bejoi iji Dupade iguíjnai udé, ga quene yisápo uaque to iji de rĩ. 27Uje yutai disiode iji Pangarádejnai Dupade ica ga gueranámi yababi suté ome yu. Ga dési de. 28Uyu u uje jé yiji yajequigode ome yabi jetiga yẽrame Dupade, ga bo údi jeta cháta basatígo cucha aja ua jne rĩ iji Dupade iguíjnai udé ajei. Uje Pangarádejnai Dupade gajneque yabi gu jé aja deruénique.–
Ga jé u uje ore chichaga dagataidie taja jnumi tiji Pangarádejnai Dupade iquei uje ore chacãre Pangarádejnai Dupade gai ome disabi suté.
Currently Selected:
1 Samuel 1: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
