IINDUMISO 41
41
Umthandazo wesigulana
Umhobe kaDavide; kumbhexeshi-kwayara.
1Hayi uyolo lomntu obonelela amahlwempu;
womhlangula *uNdikhoyo xa yena esengxakini.
2Womkhusela amlondoloze ebomini.
Womthamsanqela emhlabeni,
angamyekeli kwiintshaba zakhe.
3UNdikhoyo womonga xa angaphilanga,
ambuyisele empilweni.
4Ke mna ndathi: “Ndikhoyo, ndenzele inceba!
Ndikonile; nceda ndiphilise!”
5Zahlekisa ngam iintshaba zisithi:
“Uya kufa nini kakade, angabi sakhunjulwa bani?”
6Nabo baze kundivelela abakho ntweni,
bezela nje ukuza kuva ulwimi,
bahambe besasaza intlebendwane.
7Zihamba zindihleba iintshaba zam,
zindinqwenelela okubi.
8Zihamba zisithi: “Ukufa mumosele!
Akanakuba savuka kumandlalo wakhe!”
9Ewe, nesihlobo sam esisenyongweni ebendisithembile,
nditsho kanye eso sabelana ngeqhekeza lesonka,
naso sindivukele.
10Ndikhoyo, ndenzele inceba, ndiphakame,
ndize ndiziphindezele kwiintshaba zam.
11Phofu ke ndiyazi ukuba undikhathalele,
kuba azinakundivuyelela iintshaba zam.
12Uyandinceda kuba ndimsulwa;
undibeka phambi kwakho ngalo lonke ixesha.
13Makabongwe uNdikhoyo,
uThixo kaSirayeli,
ngoku kude kube nini-nini!
Amen, ewe, makube njalo!
Currently Selected:
IINDUMISO 41: XHO96
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1996. Used with permission. All rights reserved.