Tuhˊ ri tuilˊ 7
7
Peue 144,000 peue pun ri tawkˊ taˊraˊ
1Hawcˊ awnˊ na, uiˊ pun ri nyu inˊhpom punˊ peue ce cawng hotˊ honˊ ka bhenˊ keuteˊ punˊ honˊ naˊ. Ce jhawpˊ guilˊ punˊ honˊ naˊ. Ce unˊ tuilˊ a puingˊ bhenˊ keuteˊ, mhaˊseumutˊ maeeˊ kleumˊ hkuˊ naˊ ce saecˊ ti kleumˊ. 2Hawcˊ koˊ, uiˊ pun ri nyu inˊhpom seubu puc eun ri lih neum hk'aˊlih seunyi naˊ ti peue. Eun jhawpˊ taˊraˊ Eun Peucawoˊ Cawoˊ aˊyu imˊ naˊ. Eun klawng ri lahˊ lawsˊ a ri inˊhpom punˊ peue kuˊ pun tiˊca kaw yeuh kuˊ lulaic ri bhenˊ keuteˊ naˊ maeeˊ mhaˊseumutˊ naˊ ce, 3“Cu yam unˊ nang tawkˊ uiˊ taˊraˊ ri relˊ ce mhaiˊ Eun Peucawoˊ ye naˊ ce naˊ, paw nang yeuh kuˊ lulaic ri bhenˊ keuteˊ, mhaˊseumutˊ naˊ maeeˊ kleumˊ hkuˊ naˊ ce.” 4Hawcˊ koˊ, uiˊ pun ri mhawngˊ peue pun ri tawkˊ taˊraˊ naˊ kueˊ ce 144,000 peue. Ce ingˊ neum peue ceu Iˊsarelaˊ ku ceu naˊ ce,
5neum ceucat Yuˊdah 12,000 peue,
neum ceucat Ruˊben 12,000 peue,
neum ceucat Gaˊ 12,000 peue,
6neum ceucat Acheu 12,000 peue,
neum ceucat Nataliˊ 12,000 peue,
neum ceucat Manase 12,000 peue,
7neum ceucat Siˊmeˊon 12,000 peue,
neum ceucat Leviˊ 12,000 peue,
neum ceucat Iˊsahka 12,000 peue,
8neum ceucat Yebulun 12,000 peue,
neum ceucat Yoˊsaep 12,000 peue,
neum ceucat Benyamin 12,000 peue.
Peue cuipˊ hk'o dalˊ paing muk heunˊ
9Hawcˊ awnˊ na, uiˊ keueˊ, nanggalˊ uiˊ naˊ a kueˊ peue cum heunˊ unˊ laee eucˊ mhinˊ ce. Ce ingˊ neum kuingˊ naˊ ku kuingˊ, neum peue ceu naˊ ku ceu, neum ceucat naˊ ku ceucat maeeˊ neum leukahˊ naˊ ku ceu. Ce cawng nanggalˊ ka tenceoˊ maeeˊ Konˊyungˊ naˊ. Ce cuipˊ hk'o dalˊ paing. Ce jangˊ kan lhaˊ ka hkeungˊ naˊ. 10Ce klawng ri lahˊ sengˊ lawsˊ,
“Hk'aˊ htut naˊ lih a neum Peucawoˊ eˊ
Cawoˊ mokˊ pang tenceoˊ naˊ Eun
maeeˊ neum Konˊyungˊ naˊ Eun.”
11Tenceoˊ naˊ maeeˊ nang kawt naˊ ce maeeˊ kuˊ aˊyu imˊ punˊ tuˊ naˊ, inˊhpom naˊ ce cawng ri rop a gawmˊeucˊ ri. Ce seukluin ri nghupˊ buh ri naˊ nanggalˊ ka tenceoˊ naˊ. Ce faeeˊ Peucawoˊ Eun. 12Ce lahˊ,
“Amin,
kah leukahˊ sukˊseunˊ naˊ, munhpungˊ naˊ,
peuyhaˊ cuˊyi naˊ, leukahˊ munˊ keuting naˊ, hk'aˊ yumyamˊ naˊ,
tiˊca naˊ maeeˊ kawlˊreng keuting naˊ
kueˊ ri Peucawoˊ eˊ naˊ Eun cotˊcu ri reuˊ.
Amin.”
13Hawcˊ koˊ, nang kawt naˊ eun mhaingˊ uiˊ ti peue, “Peue cuipˊ hk'o dalˊ paing aenˊ ce ciˊ meuh aˊnhawˊ, ce ciˊ ingˊ neum tawngnhawˊ?”
14Uiˊ topˊ a, “Cawoˊ, yawng mi a.” Eun tang lahˊ, “Peue aenˊ meuh ce peue ingˊ neum vang tukhka keuting ri. Ce pun ri saicˊ hk'o dalˊ ri naˊ seungawm paing nang nhamˊ Eun Konˊyungˊ naˊ hawcˊ. 15Kop awnˊ na,
ce utˊ nanggalˊ tenceoˊ Eun Peucawoˊ naˊ.
Ce yeuh mhaiˊ Eun gawmˊ sumˊ gawmˊ seunyi hk'aˊnaee nya hk'oˊ munˊ Eun naˊ.
Cawoˊ mokˊ pang tenceoˊ naˊ Eun kaw uˊpeung hk'aˊpang ce naˊ.
16Ce hkuinˊ kaw laee sumˊ somˊ baee,
hkuinˊ kaw laee sumˊ nyui leuumˊ baee.
Kucˊ reng naˊ maeeˊ haˊ ron naˊ
ce hkuinˊ kaw laee pun ri hkamˊ a baee.
17Kopti Konˊyungˊ utˊ nang ngonˊ ka tenceoˊ naˊ,
kaw Eun meuh Cawoˊ goˊ ce. Eun kaw va ce heulˊ ri keutuiˊ leuumˊ civit imˊ naˊ.
Peucawoˊ Eun kaw otˊ ri tec leuumˊ ngaiˊ lih neum ngaiˊ ce naˊ ku jam ka.”
Currently Selected:
Tuhˊ ri tuilˊ 7: blrPL
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
