Sukˊseunˊ 78
78
Kati keutawnˊ Eun Peucawoˊ yeuh ri tuilˊ a ri peue kati unˊ keutawnˊ Eun naˊ ce
Leukahˊ sukˊseunˊ eun Asapˊ
1Peue uiˊ naˊ peˊ, leuceng leukahˊ sangsawnˊ uiˊ naˊ.
Leuceng leukahˊ pucti lih hk'aiˊ moeng uiˊ naˊ.
2Uiˊ kaw angˊ moeng ri naˊ lahˊ leukahˊ leupongˊ.
Kaw uiˊ tuhˊ kuˊ moˊ ri tangˊ neum cu leumahˊ
3kuˊ tawn mhawngˊ tawn yawng eˊ,
kuˊ aˊtaˊ aˊya eˊ lahˊ ris ce ingˊ ti cu hawcˊ ti cu naˊ.
4Uiˊ hkuinˊ kaw moˊ ceu nang aenˊ ce ri konˊhk'i ce aˊtaˊ aˊya eˊ naˊ ce.
Daecti, uiˊ kaw lahˊ ris peue kawnˊ kaw ingˊ cu hotˊ naˊ ce mhawngˊ
lawng kanˊ Eun Peucawoˊ kuˊ kuingˊ ri sukˊseunˊ naˊ,
maeeˊ lawng tiˊca Eun naˊ, maeeˊ lawng kuˊ hk'oˊamˊ yeuh Eun naˊ ce.
5Eun tangˊ ri uinˊ leukahˊ ritroe naˊ pun Yakopˊ eun,
maeeˊ tangˊ ritroe hk'aˊnaee peue Iˊsarelaˊ naˊ ce.
Eun tuilˊ leukahˊ ri aˊtaˊ aˊya eˊ naˊ,
kah ce sangsawnˊ konˊhk'i ri naˊ ce.
6Aenˊ a meuh punta konˊhk'i kuˊ kaw ingˊ keutˊ cu hotˊ naˊ
kaw ce pun ri yawng a.
Hawcˊ koˊ, ce kaw suip ri lahˊ ris a heulˊ ti cu hawcˊ ti cu baee naˊ.
7Punta kaw ce papuing hk'aˊnaee Peucawoˊ Eun,
unˊ pil kuˊ yeuh Eun naˊ
maeeˊ hotˊ ri yeuh seunˊ leukahˊ ritroe Eun naˊ.
8Ce hkuinˊ kaw laee meuh seunˊ aˊtaˊ aˊya ce
kuˊ hpumˊ cenˊ lheuˊ leukahˊ, keucu fuin ri,
unˊ hpumˊ maeeˊ Peucawoˊ Eun
maeeˊ citˊ unˊ kati keutawnˊ maeeˊ Peucawoˊ Eun naˊ ce.
9Peue Eˊfraim naˊ ce saecˊ kueˊ kongˊhtanu meuh hk'eung anˊnya naˊ htonnuk koˊ,
hk'aˊnaee yam peuengˊ suikˊ naˊ, ce hpawtˊ ri hk'uih ingˊ hk'aˊkuiˊ ri.
10Ce unˊ roksaˊ kati satˊcaˊ Eun Peucawoˊ naˊ.
Ce unˊ yawmˊ ri aˊyu imˊ hotˊ ritroe Eun naˊ.
11Ce pil kuˊ Peucawoˊ yeuh Eun naˊ.
Ce pil kuˊ hk'oˊamˊ yeuh Eun ri tuilˊ ce nyu naˊ.
12Eun yeuh kuˊ hk'oˊamˊ naˊ nanggalˊ toˊnhaˊ ce aˊtaˊ aˊya ce naˊ
hk'aˊnaee kuingˊ Eˊjiˊtuˊ nang kuingˊ Yoan naˊ.
13Eun gvah mhaˊseumutˊ naˊ maeeˊ teukˊ va ce long hpaˊ a heulˊ.
Eun yuk leuumˊ naˊ dhal ri meuh dal naˊ.
14Eun teukˊ va ce ri putumˊ naˊ peunnyi naˊ
maeeˊ ri ngawl naˊ peunpul naˊ.
15Eun gvas seumu naˊ nang vang hk'ohˊhk'oengˊ naˊ.
Eun kah leuumˊ naˊ peuengˊ ri pucti lih heunˊheunˊ seunˊ mhaˊseumutˊ naˊ tuilˊ ce nyui a.
16Eun yeuh leuumˊ naˊ pucti lih neum seumu naˊ,
a lhaeeˊ lih seunˊ klongˊ#78:16 Pucti heulˊ 17:1-7, Nang Hk'i 20:2-13.
17Daecti ce kawnˊ meung yeuh mapˊ ri Heun.
Ce fuin Cawoˊ lhungˊ keuting hk'aiˊ peue naˊ Eun nang vang hk'ohˊhk'oengˊ naˊ.
18Ce paˊtiˊ ri long ri nawk Peucawoˊ Eun,
ce guil ri hk'oˊ kuˊ sumˊ hk'a ri naˊ.
19Ce isˊ Peucawoˊ Eun,
“Peucawoˊ tup kaw Eun cang rangraen ri uinˊ hpuinˊ somˊ nang vang hk'ohˊhk'oengˊ naˊ aw?
20Meuh ka neum, yam peumˊ Eun seumu naˊ, leuumˊ naˊ a peuengˊ ri pucti lih,
klongˊ naˊ a ku lhaeeˊ lih heunˊheunˊ.
Daecti saecˊ kuˊ hk'a naˊ, tup kaw Eun cang tuilˊ a ri eˊ yeut aw?
Tup kaw Eun cang tuilˊ keune ri eˊ yeut aw?”
21Yam Peucawoˊ pun Eun ri mhawngˊ a naˊ, Eun seungeuengˊ nyawkˊ.
Ngawl Eun naˊ a hk'ue Yakopˊ Eun.
Hk'aˊ seungeuengˊ Eun naˊ a peutuh pucti lih ri peue Iˊsarelaˊ naˊ ce.
22Kopti unˊ yumˊ ce Peucawoˊ Eun,
aˊkoˊ unˊ papuing hk'aˊ teumˊkawm Eun naˊ.
23A saecˊ yeuh saˊnhawˊ, Eun tuilˊ leukahˊ ri maoˊ naˊ,
Eun tahˊ leuvaˊ ka kuingˊ pang maoˊ naˊ.
24Eun kah hkawomunˊ manaˊ naˊ hk'uicˊ lih meuh kuˊ hk'a ce.
Eun tuilˊ pliˊ seukuk ka kuingˊ pang maoˊ naˊ ri ce.
25Peue naˊ ce pun ri hk'a kuˊ hk'a ce inˊhpom naˊ.
Eun tuilˊ kuˊ hk'a naˊ hk'oˊ ce sakˊ nhenˊnghosˊ.
26Eun kah guilˊ ka hk'aˊ lih seunyi naˊ puingˊ ri lih neum kuingˊ pang maoˊ naˊ.
Eun ti guilˊ ka hk'aˊ col naˊ ingˊ ri cu Eun tiˊca keuting ri naˊ.
27Eun kupˊ ri puinˊ keune naˊ lih heunˊheunˊ seunˊ peuluing naˊ koˊ.
Aenˊ a meuh cum heunˊheunˊ ka simˊ seunˊ gleunˊ sai keunam ka ba mhaˊseumutˊ naˊ.
28Eun yeuh a hk'uicˊ lih hk'aˊnaee tupˊ plengˊ ce ri utˊ naˊ
maeeˊ nang seunaˊ vang utˊ ce naˊ.
29Kopti tuilˊ Eun a seunˊ kuˊ kuit ce naˊ,
ce pun ri hk'a ri sakˊsakˊ.
30Daecti, nanggalˊ ka yam unˊ nang pun ce ri hk'a ri sakˊ,
yam keune naˊ kawnˊ utˊ a nang moeng ce naˊ,
31hk'aˊ seungeuengˊ Eun Peucawoˊ naˊ a peutuh pucti lih nanggalˊ ce naˊ.
Eun toh kuˊ kawlˊreng keuting ce naˊ ce,
Eun toh nang nhumˊ ce peue Iˊsarelaˊ naˊ ce.
32Ce saecˊ naˊ pun ri nyu ceu nang aenˊ ce gawmˊeucˊ koˊ,
ce kawnˊ meung yeuh ri mapˊ naˊ heulˊ.
Ce saecˊ naˊ pun ri nyu kuˊ hk'oˊamˊ yeuh Eun naˊ koˊ,
ce kawnˊ hkuinˊ nang yumˊ.
33Kop awnˊ na, Eun yeuh seunyi meuyam ce naˊ hk'oˊhk'awngˊ heulˊ.
Eun yeuh chiˊ neum ce naˊ eucˊ ri hk'aˊ hk'oˊlhatˊ naˊ.
34Saecˊ yamnhawˊ yam toh Eun ce naˊ, ce kaw hotˊ ri sok Eun.
Ce kaw tuinˊtung hpawtˊ ri sok Eun baee.
35Ce tang kuit rot ri Peucawoˊ meuh Eun leuangˊ ce naˊ,
maeeˊ Peucawoˊ Cawoˊ lhungˊ hk'aiˊ peue naˊ Eun meuh Cawoˊ htut ce lawtpon.
36Daecti hawcˊ ka naˊ, ce gup kaw sukˊseunˊ Eun ri aiˊ moeng ri naˊ yawo,
ce kaw chiˊlai Eun ri dakˊ ri naˊ.
37Hpumˊ ce naˊ a hkuinˊ meuh maeeˊ Heun.
Ce hkuinˊ kati keutawnˊ ri kati satˊcaˊ Eun naˊ.
38A saecˊ yeuh keutitˊ, hk'aˊ tukyak Eun naˊ a htonnuk.
Eun ploeˊ mapˊ ka hk'aˊ rai ce naˊ.
Eun hkuinˊ yeuh ce lulaic eucˊ.
Eun eutˊ hpumˊ ri ri ce heunˊ htaˊ heunˊ pok,
unˊ va hk'aˊ seungeuengˊ ri naˊ peutuh pucti lih gawmˊeucˊ.
39Eun kuit rot ri gup meuh ce nhamˊ keune yawo,
ce seunˊ guilˊ puingˊ ri fuis heulˊ ti rop yawo unˊ laee keutah ingˊ baee naˊ.
40Ce ciˊ pe fuin Eun nang vang hk'ohˊhk'oengˊ naˊ
maeeˊ ce ciˊ pe yeuh Eun hpumˊ lu nang vang hk'ohˊhk'oengˊ naˊ aˊneng?
41Ce ata Peucawoˊ Eun ti pok hawcˊ ti pok.
Ce tungˊ ri ri Cawoˊ seungaˊ chakˊ ce peue Iˊsarelaˊ naˊ Eun.
42Ce hkuinˊ kuit rot ri tiˊca Eun
hk'aˊnaee seunyi yam teumˊkawm Eun ce lawtpon hk'aiˊ ransu ce naˊ,
43maeeˊ hk'aˊnaee seunyi yam yeuh Eun hetˊ keuting nang kuingˊ Eˊjiˊtuˊ
maeeˊ yam yeuh Eun kuˊ hk'oˊamˊ nang kuingˊ Yoan naˊ.
44Eun plinˊ leuumˊ naˊ keutˊ ri meuh nhamˊ naˊ,
rot ti aˊnhawˊ unˊ laee cang nyui a leuumˊ ka klongˊ awnˊ a pun.
45Eun kah cum ka aˊropˊ naˊ lih kawk ce,
kah cum ka aˊruk naˊ lih yeuh ce lulaic.
46Eun ap tuilˊ kuˊ seumal jheumˊ ce naˊ ri aˊhtul,
ap tuilˊ pliˊ seukuk ce naˊ ri cum ka aˊhtul naˊ.
47Eun yeuh nhulˊ ka pliˊ bui ce naˊ lulaic heulˊ ri aˊhk'elˊ naˊ,
maeeˊ yeuh kleumˊ keutuic ce naˊ lulaic heulˊ ri seudapˊ ca naˊ.
48Eun ap ri tuilˊ cum aˊmoe ce naˊ ri aˊhk'elˊ naˊ,
maeeˊ ap ri tuilˊ cum satˊ uiiˊ ce naˊ ri peusasˊ naˊ.
49Eun yeuh hk'aˊ seungeuengˊ ri naˊ pucti lih,
yeuh hk'aˊ seungeuengˊ peulel maeeˊ hk'aˊ tukhka ri naˊ lih hk'aˊpang ce.
Aenˊ a meuh muk ce inˊhpom yeuh kuˊ lulaic naˊ ce.
50Eun rangraen ri uinˊ hk'aˊ pun hk'aˊ seungeuengˊ ri naˊ.
Eun hkuinˊ laee uinˊ aˊyu ce naˊ pon,
daecti Eun ti ri tuilˊ ce ri peuyhat aˊnga naˊ.
51Eun toh konˊ aiˊ hk'aˊnaee kuingˊ Eˊjiˊtuˊ naˊ ce gawmˊeucˊ.
Aenˊ a meuh pliˊ nanggalˊ ce peue hk'aˊnaee tupˊ ka Ham naˊ.
52Daecti, Eun ti peue ri naˊ ce pucti lih seunˊ ti cum konˊyungˊ pucti lih naˊ.
Eun va ce heulˊ hpaˊ vang hk'ohˊhk'oengˊ naˊ seunˊ va konˊyungˊ naˊ koˊ.
53Eun va ce heulˊ maeeˊ saˊpasamˊran ri.
Kop awnˊ na, ce hkuinˊ laee lhatˊ.
Daecti leuumˊ ka mhaˊseumutˊ naˊ a dhimˊ htumˊ ransu ce naˊ ce.
54Hawcˊ koˊ, Eun va ce ingˊ rot ri kuingˊ seungaˊ chakˊ ri naˊ,
ri kuingˊ gong kuˊ pun Eun a ri tiˊ aˊtawmˊ ri naˊ.
55Eun ra ri tec peue ceu naˊ ce hk'uih nanggalˊ toˊnhaˊ ce naˊ.
Eun gvah ce isˊ bhenˊ keuteˊ naˊ meuh sinˊ ce.
Eun kah peue ceu Iˊsarelaˊ naˊ ce tangˊ vang utˊ ri hk'aˊnaee nya ce peue awnˊ ce.
56Daecti ce kawnˊ meung ata ri Peucawoˊ Eun, toˊtamˊ fuin Cawoˊ lhungˊ keuting hk'aiˊ peue naˊ Eun.
Ce hkuinˊ laee yawmˊ ri hotˊ ri yeuh seunˊ leukahˊ ritroe Eun naˊ.
57Ce seunˊ aˊtaˊ aˊya ri naˊ ce.
Ce hkuinˊ laee hpumˊ maeeˊ Peucawoˊ Eun,
ce hkuinˊ kati keutawnˊ.
Ce hpawtˊhpaetˊ ri seunˊ kongˊ htanu naˊ koˊ,
ce unˊ hk'oˊ tahˊ hpumˊ.
58Ce yeuh Peucawoˊ Eun seungeuengˊ ri vang faeeˊ utˊ vang lhungˊ naˊ.
Ce yeuh Peucawoˊ Eun hk'awng ye ri ruphtu heunˊ ceu ce naˊ.
59Yam Peucawoˊ pun Eun ri mhawngˊ a naˊ, Eun seungeuengˊ nyawkˊ.
Eun tecla peue Iˊsarelaˊ naˊ ce.
60Eun tecla saˊla vang hk'oˊ munˊ ka veng Chiloh
kuˊ tangˊ Eun a meuh tupˊ nang seunaˊ peue naˊ.
61Eun taeˊ ce lakˊ ti teuk kati satˊcaˊ ri naˊ heulˊ.
Eun yuk ri tuilˊ munhpungˊ ri naˊ hk'uicˊ nang dak tiˊ ce ransu naˊ.
62Eun yeuh peue ri naˊ ce hk'uicˊ hk'aˊnaee moeng ka leungawng naˊ.
Eun seungeuengˊ nyawkˊ ri peue kuˊ meuh sinˊ Eun naˊ ce.
63Ngawl naˊ a haˊ hk'ue nang nhumˊ ce naˊ ce.
Konˊhk'ihˊ ce naˊ ce hkuinˊ laee kueˊ cai romˊleupui.
64Peue jhawpˊ rit naˊ ce pun ri yeum ri leungawng naˊ.
Beunˊ ce naˊ, ce meuh beunˊ seunao. Ce hkuinˊ laee cang aecˊrak yam.
65Hawcˊ awnˊ na, Peucawoˊ Eun kuhˊ seunˊ kuhˊ hk'aiˊ itˊ naˊ,
seunˊ peue suikˊ kuhˊ hk'aiˊ hawcˊ yuicˊ eun ri leuumˊ pliˊ bui naˊ.
66Eun ruip ransu naˊ ce htonˊ ri heulˊ hk'aˊtoˊ ri.
Eun nui ce heulˊ ri hk'aˊ hk'oˊkaic cotˊcu naˊ.
67Eun tecla tupˊ eun Yoˊsaep naˊ.
Eun hkuinˊ laee leuk ri ti ceucat ce Eˊfraim naˊ.
68Daecti Eun leuk ri ti ceucat ce Yuˊdah,
gong Yiˊon kuˊ leumeusˊ Eun naˊ.
69Eun plengˊ vang hk'oˊ munˊ ri naˊ seunˊ kuingˊ pang maoˊ lhungˊ naˊ,
seunˊ bhenˊ keuteˊ kuˊ tangˊ Eun keutawnˊ cotˊcu naˊ.
70Eun leuk ri ti Davitˊ kuˊ meuh mhaiˊ ri naˊ eun.
Eun va eun pucti lih hk'aiˊ kok ka konˊyungˊ naˊ.
71Eun va eun pucti lih hk'aiˊ hk'aˊuiiˊ nomˊnawk konˊyungˊ naˊ,
tuilˊ eun meuh cawoˊ uiiˊ nomˊnawk Yakopˊ peue ceu ri naˊ ce,
meuh cawoˊ uiiˊ nomˊnawk Iˊsarelaˊ kuˊ meuh sinˊ ri naˊ Eun.
72Davitˊ eun uiiˊ nomˊnawk ce ri hpumˊ kati keutawnˊ ri,
maeeˊ teukˊ va ce heulˊ ri tiˊ chanan ri naˊ.
Plang New Testament and Psalms © Wycliffe Bible Translators, Inc. 2026. All rights reserved.