Sukˊseunˊ 76
76
Peucawoˊ tawsˊ Eun aˊmu hk'awpˊ bhenˊ keuteˊ naˊ
Leukahˊ sukˊseunˊ eun Asapˊ, temˊ ri tuilˊ a ri roˊ cai naˊ eun.
1Hk'aˊnaee kuingˊ Yuˊda naˊ koˊ, Peucawoˊ naˊ yawng peue a.
Hk'aˊnaee kuingˊ Iˊsarelaˊ naˊ koˊ, muis Eun naˊ keuting ka.
2Tupˊ Eun naˊ a kueˊ nang veng Salem,
vang utˊ Eun naˊ a kueˊ pang gong Yiˊon naˊ.
3Tehˊ naˊ, Eun yeuh taee akˊ ngawl, hpaˊla,
leungawng maeeˊ hk'eung anˊnya naˊ lulaic.
4Peucawoˊ, Mi munhpungˊ cengˊ kueng ri kuˊ cengˊ naˊ.
Kueˊ Mi munhpungˊ heunˊ hk'aiˊ gong htonnuk ri satˊ hk'i naˊ.
5Aˊtaˊ me klaeeˊ ri hkuru hk'oˊhanˊ naˊ ce,
hk'eung ce naˊ pun a ri rutrimˊ ri ti ri heulˊ.
Ce itˊ unˊ laee cheunˊ ri, ce itˊ heulˊ keulawnˊ.
A hkuinˊ laee kueˊ nang peuengˊ suikˊ cang yuk tiˊ ri naˊ hukˊ saecˊ ti peue.
6Peucawoˊ Eun Yakopˊ naˊ Mi, yam yeuh Mi ce lulaic naˊ,
gawmˊ rawng naˊ maeeˊ peue pawk rawng naˊ ce itˊ heulˊ keulawnˊ.
7Mi ri koe hk'oˊ lhatˊtil Mi.
Yam seungeuengˊ Mi naˊ,
aˊnhawˊ ciˊ kaw cang cawng pun nanggalˊ Mi naˊ?
8Mi paoˊ leukahˊ tawsˊ aˊmu naˊ neum kuingˊ pang maoˊ.
Bhenˊ keuteˊ naˊ a seutuin seutan,
9a yenˊyong yam kuhˊ tawsˊ Mi aˊmu naˊ,
punta kaw teumˊkawm peue pun ri hkamˊ hk'aˊ keunhapˊ nokneh ka bhenˊ keuteˊ naˊ.
10Meuh ka neum, hk'aˊ seungeuengˊ Mi ri peue naˊ ti a hk'aˊ sukˊseunˊ naˊ ri Mi.
Peue pun ri pon hk'aiˊ hk'aˊ seungeuengˊ Mi naˊ, ce kaw roksaˊ pawe hk'asomˊ Mi naˊ.
11Yeuh kati ri Yahoˊwah Peucawoˊ mi naˊ Eun,
hawcˊ koˊ hotˊ ri yeuh a htonnuk.
Kuingˊ utˊ keunam caonaoˊ naˊ kah ce ti lapsawngˊ ingˊ tan a ri Heun kuˊ meuh Cawoˊ hk'oˊ lhatˊtil naˊ Eun.
12Eun yeuh hpumˊ ce cawoˊ naˊ nyomˊjom tem.
Eun meuh Cawoˊ hk'oˊ lhatˊtil ce hkunˊhawˊhkamˊ ka bhenˊ keuteˊ naˊ.
Plang New Testament and Psalms © Wycliffe Bible Translators, Inc. 2026. All rights reserved.