Sukˊseunˊ 2
2
Cawoˊ kuˊ Peucawoˊ leuk Eun ri ti
1A ciˊ meuh kop keunhawˊ peue ceu naˊ ce vaeeˊ saˊlit puri fuin Peucawoˊ Eun?
A ciˊ meuh kop keunhawˊ peue vaeeˊ rangraen ri uinˊ hk'aˊ kanˊ unˊ kueˊ peuehotˊ naˊ?
2Hkunˊhawˊhkamˊ ka bhenˊ keuteˊ naˊ tangˊ ce ri uinˊ meun ri meuh cawoˊ.
Cawoˊ uˊpeung naˊ ce pawngˊ puri saˊlit ri
kaw toˊtamˊ Peucawoˊ Eun maeeˊ peue kuˊ Peucawoˊ tangˊ Eun ri uinˊ naˊ eun.
3Ce lahˊ, “Pawh, eˊ lakˊ peutˊ muˊ lhecˊ mawt ka eˊ ri ka naˊ.
Eˊ naˊ ti ri tec muˊ mawt ka eˊ ri ka naˊ.”
4Peucawoˊ utˊ nang kuingˊ pang maoˊ naˊ keunyas Eun.
Eun ceˊ awngˊpu ri ce.
5Hawcˊ koˊ, Peucawoˊ Eun isˊ ce ri maeeˊ hk'aˊ seungeuengˊ ri naˊ.
Eun yeuh ce lhatˊ ri hk'aˊ seungeuengˊ ri naˊ. Eun lahˊ,
6“Tangˊ Uiˊ hkunˊhawˊhkamˊ ri naˊ eun
pang gong Yiˊon seungaˊ chakˊ Uiˊ naˊ hawcˊ.”
7Hkunˊhawˊhkamˊ awnˊ eun lahˊ leukahˊ tuilˊ Eun Peucawoˊ naˊ.
Eun lahˊ, “Peucawoˊ lahˊ Eun a ri uiˊ, ‘Meuh mi konˊ Uiˊ.
Seunyaenˊ, pun Uiˊ ri meuh kuiingˊ mi.
8Hk'oˊ reuˊ,
kaw Uiˊ tuilˊ peue ceu gawmˊeucˊ naˊ peue meuh isˊ mi,
kah mi uˊpeung bhenˊ keuteˊ naˊ rot ti vang sutˊ ka.
9Mi kaw peumˊ ce puinˊpanˊ ri ri hkuˊji lhecˊ naˊ.
Mi kaw peumˊ ce nyaiˊ lheoˊ seunˊ keutongˊ keuteˊ naˊ.’ ”
10Kop awnˊ na, hkunˊhawˊhkamˊ naˊ peˊ, yeuh ri kueˊ peuyhaˊ cuˊyi.
Peue uˊpeung bhenˊ keuteˊ naˊ peˊ, leuceng ri ti leukahˊ deunˊ Uiˊ naˊ.
11Yeuh mhaiˊ Eun Peucawoˊ naˊ maeeˊ hk'aˊ lhatˊtil ri naˊ.
Renˊkawn maeeˊ rawsˊruing ri naˊ.
12Nghupˊ ri faeeˊ Konˊ aiˊ Eun. A lawn unˊ yeuh keutitˊ koˊ, Eun kaw seungeuengˊ.
Mi ri maeeˊ hk'aˊ mi naˊ a kaw lulaic heulˊ.
Kopti hk'aˊ seungeuengˊ Eun Peucawoˊ naˊ kaw a pucti lih hk'aˊnaee ti jep ngaiˊ naˊ.
Kah hk'aˊ renˊkawn naˊ kueˊ ri peue ingˊ papuing hk'aˊnaee Peucawoˊ Eun naˊ ce.
Plang New Testament and Psalms © Wycliffe Bible Translators, Inc. 2026. All rights reserved.