1 Kawˊrinhtuˊ 11

1Hotˊ ri yeuh seunˊ kuˊ yeuh uiˊ naˊ seunˊ hotˊ uiˊ ri yeuh kuˊ yeuh Eun Hkrit naˊ reuˊ.

Kuˊ kuingˊ ri yeuh yam hk'oˊ munˊ maeeˊ yam sangsawnˊ leukahˊ munˊ renˊkawn naˊ

2Sukˊseunˊ uiˊ peˊ kopti unˊ pil peˊ leukahˊ sangsawnˊ uiˊ naˊ, peˊ jhawpˊ a ku ceu ka hotˊ seunˊ kuˊ sangsawnˊ uiˊ ri peˊ naˊ.

3Daecti sumˊ kah uiˊ peˊ pawn Hkrit meuh Eun cingˊ ce me naˊ ce ku peue ri, me naˊ eun meuh cingˊ eun beunˊ naˊ, Peucawoˊ Eun meuh cingˊ Eun Hkrit. 4Me ku peue naˊ yam hk'oˊ ce munˊ naˊ, aˊkoˊ yam sangsawnˊ ce leukahˊ munˊ renˊkawn naˊ ce lawn chuipˊ cingˊ ri naˊ ri hpenˊ koˊ, yeuh ce kuˊ hpaˊrai ri cingˊ ri naˊ. 5Beunˊ ku peue naˊ yam hk'oˊ ce munˊ naˊ, aˊkoˊ yam sangsawnˊ ce leukahˊ munˊ renˊkawn naˊ ce lawn unˊ chuipˊ cingˊ ri naˊ ri hpenˊ koˊ, yeuh ce kuˊ hpaˊrai ri cingˊ ri naˊ seunˊ konˊ ce cingˊ ri naˊ koˊ. 6Beunˊ naˊ ce lawn unˊ chuipˊ cingˊ ri naˊ ri hpenˊ koˊ, ce naˊ htukˊ ri cipˊ ri tec huikˊ ri naˊ. Daecti kopti cipˊ huikˊ ri, aˊkoˊ konˊ cingˊ ri naˊ meuh a kuˊ hk'oˊkaic pun ce naˊ, ce naˊ htukˊ ri chuipˊ cingˊ ri naˊ ri hpenˊ. 7Me naˊ kopti meuh ce ruprang munhpungˊ Eun Peucawoˊ naˊ, ce naˊ htukˊ ri unˊ chuipˊ cingˊ ri naˊ ri hpenˊ. Daecti beunˊ naˊ ce meuh munhpungˊ ce me naˊ. 8Kopti me naˊ hpaw eun caˊ hpanplengˊ eun ri neum beunˊ, beunˊ naˊ hpanplengˊ eun ri neum me. 9Me naˊ hpaw eun caˊ hpanplengˊ ri pun beunˊ. Beunˊ naˊ hpanplengˊ eun ri pun me. 10Kop awnˊ na, kopti meuh a inˊhpom naˊ ce, punta beunˊ naˊ kaw ce yeuh utˊ ri hk'aˊruim tiˊca ce me naˊ pucti lih naˊ, ce naˊ htukˊ ri chuipˊ cingˊ ri naˊ ri hpenˊ.

11A saecˊ yeuh saˊnhawˊ, hk'aˊnaee Cawoˊ Yesuˊ Eun, beunˊ naˊ kah ce ri puing me, me naˊ ce ku kah ri puing beunˊ. 12Kopti beunˊ naˊ ingˊ ce neum me naˊ, me naˊ ce ku keutˊ lih neum beunˊ yeut. Daecti ku ceu gawmˊeucˊ naˊ ingˊ a neum Peucawoˊ Eun. 13Yam beunˊ naˊ hk'oˊ ce munˊ ri Peucawoˊ Eun naˊ, htukˊ ce ri chuipˊ cingˊ ri naˊ aw, unˊ htukˊ ce ri chuipˊ a aw, kuit peˊ nawk a meun reuˊ? 14Me naˊ eun lawn leuvangˊ huikˊ ri naˊ koˊ, meuh a kuˊ hk'oˊkaic pun heun naˊ, hpumˊ cang yawng peˊ naˊ unˊ sawnˊ a peˊ ri ka aw? 15Daecti beunˊ kueˊ huikˊ langˊ naˊ meuh a munhpungˊ ce kopti Peucawoˊ tuilˊ Eun ce isˊ huikˊ langˊ naˊ meuh a punta kaw a chuipˊ cingˊ ce naˊ. 16Aˊnhawˊ lawn sumˊ htuˊhtingˊ lawng aenˊ a koˊ, ya ri maeeˊ muk konˊ Hkrit Eun Peucawoˊ naˊ eˊ hkuinˊ kueˊ ritroe seubu.

Lawng hk'a pawe Eun Cawoˊ

17Yam hk'om peˊ puri hk'oˊ munˊ naˊ, hpaw uiˊ caˊ kaw cang sukˊseunˊ peˊ kopti hk'om peˊ puri hk'oˊ munˊ naˊ pun peˊ hk'aˊ unˊ chakˊ naˊ heunˊ hk'aiˊ kuˊ chakˊ naˊ. 18Keuhti ka naˊ, pun uiˊ ri mhawngˊ yam hk'om peˊ puri hk'aˊnaee muk konˊ Hkrit naˊ, peˊ gvah muk gvah cum puri. Uiˊ yumˊ lawng kuˊ pun uiˊ ri mhawngˊ awnˊ ngonˊ meuh a neumneum yeut. 19Punta hk'aˊnaee peˊ naˊ aˊnhawˊ ciˊ meuh peue Peucawoˊ htawhkam Eun naˊ punta kaw a pucti lih glihˊgleuengˊ naˊ, a caˊ lakˊ koe kaw kueˊ hk'aˊ gvah muk gvah cum puri naˊ aw? 20Yam hk'om peˊ puri naˊ, hpaw peˊ caˊ hk'a pawe Eun Cawoˊ naˊ. 21Kopti unˊ laee koˊ peˊ puri peˊ sawngˊ hk'a isˊ aˊnhawˊ isˊ nang awnˊ naˊ. Ngonˊ peˊ sumˊ somˊ, ngonˊ peˊ yuicˊ ri leuumˊ pliˊ bui naˊ. 22Unˊ kueˊ peˊ nyahk'ulˊ vang kaw peˊ mokˊ ri hk'asomˊ aw? Aˊkoˊ, yeuh peˊ kuˊ unˊ nawpsang ri muk konˊ Hkrit Eun Peucawoˊ naˊ ce ri yeuh peˊ peue hk'oˊtukyak naˊ ce kaic aw? Uiˊ ciˊ kaw htukˊ ri lahˊ a yeuh saˊnhawˊ ri peˊ? Kaw peˊ kah uiˊ sukˊseunˊ ri kopti ceu nang aenˊ ce aw? A hkuinˊ kaw duing yeuh keutitˊ.

23Kopti kuˊ sangsawnˊ uiˊ peˊ ri ka naˊ pun uiˊ a neum Cawoˊ Yesuˊ Eun. Aenˊ a, bul yam fuin peue Cawoˊ Yesuˊ Eun naˊ Eun ti hkawomunˊ naˊ. 24Hawcˊ Eun munˊ keuting ri Peucawoˊ Eun naˊ, Eun ves hkawomunˊ naˊ Eun lahˊ, “Aenˊ meuh a tuˊ Uiˊ tuilˊ Uiˊ a ri peˊ. Yeuh aenˊ a meuh kuˊ kaw kuit rot ri Uiˊ reuˊ.” 25Hawcˊ hk'a ce hkawomunˊ naˊ, Eun tang yeuh seunˊ awnˊ na. Eun ti kawkˊ naˊ Eun lahˊ, “Aenˊ meuh a kati satˊcaˊ hk'uˊ ri nhamˊ Uiˊ. Yam nyui peˊ a ku pok ka naˊ, yeuh aenˊ a meuh kuˊ kaw kuit rot ri Uiˊ reuˊ.” 26Kopti yam hk'a peˊ hkawomunˊ aenˊ a maeeˊ yam nyui peˊ kawkˊ aenˊ a ku pok ka naˊ, meuh a paoˊ peˊ lawng hk'aˊ yeum Eun Cawoˊ Yesuˊ naˊ rot ti yam naˊ Eun tang lih naˊ.

27Kop awnˊ na, aˊnhawˊ lawn hk'a hkawomunˊ naˊ maeeˊ nyui kawkˊ Eun Cawoˊ Yesuˊ naˊ maeeˊ unˊ nawpsang ri Heun koˊ, hkawnˊ eun ku yeuh kuˊ kleucˊ ri tuˊ maeeˊ nhamˊ Eun Cawoˊ Yesuˊ naˊ. 28Kop awnˊ na, nanggalˊ ka kaw eˊ hk'a hkawomunˊ naˊ maeeˊ nyui kawkˊ aenˊ a naˊ, htukˊ eˊ ri sawngˊ caet ri nawk tuˊ ri naˊ meun. 29Kopti aˊnhawˊ lawn hk'a a maeeˊ nyui a hk'aˊnaee unˊ kuit eun ri nawk tuˊ Eun Cawoˊ Yesuˊ naˊ koˊ, hkawnˊ eun ku hk'a ku nyui kuˊ kaw yeuh eun pun hk'aˊ tawsˊ aˊmu ciyang naˊ. 30Kopti meuh a ceu nang aenˊ ce naˊ, peˊ ri heunˊ peue peˊ kawlˊreng kloe suiˊ peuyhat, ngonˊ peˊ yeum. 31Daecti eˊ lawn sawngˊ caet ri nawk tuˊ ri naˊ meun koˊ, eˊ hkuinˊ kaw laee pun hk'aˊ tawsˊ aˊmu naˊ. 32Yam Cawoˊ Yesuˊ tawmˊ ram Eun ri eˊ naˊ, taˊfaetˊ sawnˊ Eun eˊ punta kaw eˊ unˊ pun ri hkamˊ hk'aˊ ciyang naˊ maeeˊ peue bhenˊ keuteˊ naˊ ce tiduihˊ naˊ.

33Kop awnˊ na ecˊawngˊ uiˊ naˊ peˊ, yam hk'om peˊ puri kaw hk'a pawe Eun Cawoˊ naˊ, koˊ puri ti peue hawcˊ ti peue reuˊ. 34Punta yam ingˊ hk'om peˊ puri naˊ peˊ ku naˊ unˊ pun ri hkamˊ hk'aˊ tawsˊ aˊmu ciyang naˊ, aˊnhawˊ lawn sumˊ somˊ koˊ, eun naˊ htukˊ ri somˊ ti nya ri.

Yam naˊ uiˊ tang ingˊ rot ri peˊ naˊ, uiˊ naˊ koe tang tuilˊ hk'aˊ sangsawnˊ seubu naˊ ri peˊ baee.

Currently Selected:

1 Kawˊrinhtuˊ 11: blrPL

Highlight

Copy

Compare