1 Kawˊrinhtuˊ 10

Tuilˊ sati ri kaw unˊ hotˊ ri yeuh seunˊ kuˊ yeuh ce aˊtaˊ aˊya ce peue Iˊsarelaˊ naˊ

1Ecˊawngˊ naˊ peˊ, sumˊ kah uiˊ peˊ yawng lawng ka kuˊ meuh neum ri aˊtaˊ aˊya eˊ naˊ ce. Yam utˊ ce nang vang hk'ohˊhk'oengˊ naˊ, Peucawoˊ tuilˊ Eun putumˊ naˊ kangˊruim ce, maeeˊ ce pun ri hpaˊ mhaˊseumutˊ naˊ heulˊ ku peue ri. 2Ce pun ri ingˊ lec hk'aˊnaee Moˊse eun ri rap ce ri ti hk'aˊ cumˊ naˊ hk'aˊnaee putumˊ naˊ maeeˊ hk'aˊnaee mhaˊseumutˊ naˊ ku peue ri. 3Ce pun ri hk'a kuˊ hk'a civit seunˊ puri naˊ ku peue ri. 4Ce pun ri nyui leuumˊ civit seunˊ puri naˊ ku peue ri. Ce pun ri nyui leuumˊ civit lih neum seumu civit kuˊ a hotˊ ce heulˊ naˊ. Meulˊ seumu awnˊ a meuh Hkrit Eun. 5A saecˊ yeuh saˊnhawˊ, Peucawoˊ Eun nyu ce unˊ htukˊ hpumˊ ri hk'aˊ heunˊ. Aˊtaˊ aˊya awnˊ ce pun ri yeum buba ri nang vang hk'ohˊhk'oengˊ naˊ.

6Ceu nang aenˊ puc a ri meuh naˊ meuh a punta kaw a tuilˊ sati unˊ kah hpumˊ eˊ naˊ renˊ maeeˊ kuˊ rai naˊ seunˊ peue awnˊ ce. 7Pawlaee faeeˊ ruphtu naˊ seunˊ ce ri ngonˊ faeeˊ ce a naˊ seunˊ temˊ a ri nang htawm Seungaˊ naˊ, “Peue naˊ mokˊ ce ri nyui plaiˊ hk'asomˊ. Ce kuhˊ renˊkawn cha ri lomlom.”#10:7 Pucti heulˊ 32:6 8Eˊ naˊ htukˊ ri unˊ yeuh kuˊ kleucˊ hk'aˊ hkuitˊnawngˊtangˊ naˊ seunˊ peue ngonˊ naˊ yeuh ce a. Hawcˊ ka naˊ, ce yeum lalˊmhuinˊ loeˊhengˊ peue hk'aˊnaee ti seunyi naˊ. 9Eˊ naˊ htukˊ ri unˊ cheu ri nawk Peucawoˊ Eun seunˊ peue ngonˊ naˊ yeuh ce a. Hawcˊ ka naˊ, seueuengˊ naˊ a tokˊ ce yeum. 10Eˊ naˊ htukˊ ri unˊ buicbuic seunˊ peue ngonˊ naˊ yeuh ce a. Hawcˊ ka naˊ, inˊhpom ka hk'aˊ yeum naˊ eun toh ce.

11Ceu nang aenˊ puc a ri meuh ri ce naˊ meuh a punta kaw a tuilˊ sati eˊ kuˊ utˊ hk'aˊnaee cu yam tisutˊ naˊ eˊ. A pun ri temˊ ri hk'aˊnaee htawm Seungaˊ naˊ. 12Kop awnˊ na, peˊ lawn kuit meun ri cawng keutawnˊ meulamlam ri hawcˊ koˊ, punta kaw peˊ unˊ cang htangˊmeul naˊ, uinˊ sati ri meulamlam ri reuˊ. 13Hk'aˊ copˊlong pon lheuˊ hk'aiˊ kuˊ tawn hk'eupˊ peue naˊ a hkuinˊ kaw laee kueˊ ri peˊ. Peucawoˊ kati keutawnˊ Eun. Eun hkuinˊ kaw taeˊ peˊ hk'eupˊ kuˊ copˊlong kaw peˊ hkamˊ unˊ pe naˊ. Daecti yam hkamˊ peˊ kuˊ copˊlong naˊ, punta kaw peˊ cang keutawnˊ hk'aˊruim ka hk'aˊ copˊlong naˊ pun, Eun kaw tuilˊ peˊ isˊ hk'aˊ kaw pucti heulˊ naˊ yeut.

Hk'a kuˊ hk'a tan ri ruphtu maeeˊ hk'a pawe Eun Cawoˊ

14Kop awnˊ na peue leumeusˊ uiˊ naˊ peˊ, vel hk'aˊ faeeˊ ruphtu naˊ reuˊ. 15Lahˊ uiˊ a ri peue cang kuit ri mhawngˊ naˊ ce. Peˊ naˊ caet ri nawk kuˊ lahˊ uiˊ naˊ meun reuˊ. 16Kawkˊ leuumˊ pliˊ bui kuˊ hk'oˊ eˊ munˊ eˊ munˊ keuting ri Peucawoˊ Eun naˊ yeuh ka eˊ pawngˊ ri hk'aˊnaee nhamˊ Eun Hkrit naˊ, unˊ meuh ka aw? Hkawomunˊ kuˊ ves eˊ naˊ yeuh ka eˊ pawngˊ ri hk'aˊnaee jawngkuiˊ tuˊ Eun Hkrit naˊ, unˊ meuh ka aw? 17Kopti meuh a hkawomunˊ ti meulˊ naˊ eˊ meuh jawngkuiˊ tuˊ keuhti yawo, kopti ruim eˊ ri hk'a hkawomunˊ ti meulˊ awnˊ a naˊ.

18Kuit ri nawk kuˊ yeuh ce peue Iˊsarelaˊ naˊ reuˊ. Peue hk'a kuˊ tan hawcˊ tan ri naˊ pun ce ri pawngˊ ri maeeˊ ten dum ri tan naˊ, unˊ meuh ka aw? 19Vangdohˊ ka kuˊ sumˊ lahˊ uiˊ naˊ meuh a ruphtu naˊ maeeˊ kuˊ tan naˊ kueˊ a aˊyeˊ keuting aw? 20Unˊ meuh, daecti vangdohˊ ka kuˊ sumˊ lahˊ uiˊ naˊ meuh a kuˊ tan ce peue unˊ meuh konˊ Hkrit naˊ tan ce a ri seucaˊ naˊ, hpaw ce caˊ tan a ri Peucawoˊ Eun. Uiˊ hkuinˊ sumˊ kah peˊ pawngˊ ri maeeˊ seucaˊ naˊ. 21Nyui peˊ kawkˊ Eun Cawoˊ Yesuˊ naˊ peˊ ku nyui kawkˊ ka seucaˊ naˊ, a hkuinˊ kaw cang. Hk'a peˊ ri hpuinˊ Eun Cawoˊ Yesuˊ naˊ peˊ ku hk'a ri hpuinˊ ka seucaˊ naˊ, a hkuinˊ kaw cang. 22Kaw eˊ cuˊciˊ yeuh Cawoˊ Yesuˊ Eun hkoeˊmangˊ aw? Kawlˊreng keuting eˊ hk'aiˊ Heun aw?

Kuˊ peue yumˊ naˊ cang yeuh ce

23Temˊ peˊ lai ri uiˊ peˊ lahˊ, “Cang yeuh eˊ ku ceu naˊ gawmˊeucˊ.” Daecti uiˊ lahˊ a ri peˊ, kuˊ yeuh eˊ ku ceu naˊ a hkuinˊ kueˊ peuehotˊ gawmˊeucˊ. Cang yeuh eˊ ku ceu naˊ gawmˊeucˊ. Daecti kuˊ yeuh eˊ ku ceu naˊ a hkuinˊ yeuh ri tuilˊ hk'aˊ hukˊhawnˊ naˊ gawmˊeucˊ. 24Unˊ htukˊ eˊ ri keueˊ ri kuˊ kaw sawngˊ kueˊ peuehotˊ pun tuˊ ri naˊ, daecti keueˊ ri kuˊ kaw kueˊ peuehotˊ pun peue seubu naˊ ce reuˊ.

25Kuˊ paingˊ ri nang keulas paingˊ keune naˊ cang hk'a peˊ a gawmˊeucˊ ka. Pawlaee hkiˊkeung ri kaw a cawpˊ unˊ cawpˊ naˊ. 26Kopti bhenˊ keuteˊ naˊ maeeˊ kuˊ kueˊ hk'aˊpang ka bhenˊ keuteˊ naˊ ce gawmˊeucˊ meuh a isˊ Eun Peucawoˊ.#10:26 Sukˊseunˊ 24:1

27Peue unˊ yumˊ ti ri peue naˊ eun lawn klawng peˊ heulˊ hk'asomˊ maeeˊ ti peˊ ku sumˊ heulˊ koˊ, hk'a kuˊ hk'a bangˊ ri nanggalˊ peˊ naˊ reuˊ. Pawlaee hkiˊkeung ri kaw a cawpˊ unˊ cawpˊ naˊ. 28Daecti peue ti ri peue eun lawn lahˊ, “Aenˊ meuh a kuˊ hk'a tan ri ruphtu hawcˊ naˊ” koˊ, kopti meuh a kuˊ lahˊ a ri mi naˊ eun maeeˊ kopti meuh a hpumˊ cang yawng naˊ, pawlaee hk'a a. 29Hpumˊ cang yawng lahˊ uiˊ naˊ a hkuinˊ meuh isˊ peˊ naˊ, daecti meuh a hpumˊ cang yawng eun kuˊ lahˊ a ri peˊ naˊ eun. A ciˊ meuh kop keunhawˊ hpumˊ cang yawng ce peue seubu naˊ a vaeeˊ ingˊ hamˊtap kuˊ cang yeuh pun uiˊ naˊ? 30Uiˊ lawn hk'a a hk'aˊnaee munˊ keuting uiˊ ri Peucawoˊ Eun koˊ, a ciˊ yeuh keunhawˊ eun vaeeˊ tawk uiˊ kopti kuˊ munˊ keuting uiˊ ri Peucawoˊ Eun hawcˊ naˊ?

31Kop awnˊ na, yam hk'a peˊ, yam nyui peˊ, aˊkoˊ yam yeuh peˊ kuˊ ti ri ceu naˊ, yeuh a punta kaw a tuilˊ munhpungˊ Eun Peucawoˊ naˊ reuˊ. 32Pawlaee yeuh ri meuh kleumˊ ka vang seuduih leuveulˊ ce peue Yuˊda naˊ, aˊkoˊ peue Helasaˊ naˊ, aˊkoˊ peue konˊ Hkrit Eun Peucawoˊ naˊ ce. 33Daecti yeuh seunˊ kuˊ yeuh uiˊ naˊ reuˊ. Coˊcaˊ uiˊ ri yeuh kuˊ yeuh uiˊ ku ceu naˊ kaw a htukˊ hpumˊ peue gawmˊeucˊ naˊ. Kopti hpaw uiˊ caˊ sok ri yeuh kuˊ kaw kueˊ peuehotˊ pun tuˊ ri naˊ meun, daecti punta peue gawmˊeucˊ naˊ kaw ce pun ri rap ri ti hk'aˊ htut lawtpon naˊ, uiˊ sok ri yeuh kuˊ kaw kueˊ peuehotˊ pun ce naˊ.

Currently Selected:

1 Kawˊrinhtuˊ 10: blrPL

Highlight

Copy

Compare