2 Piyɛr 2

Tar dɔ njê-nɛ̂n-tɔjuje tə̂ kə̂ tɔkɔrɔ ang

1Ləw, marə njê-kilaje mbər tar lə Lubba kə̂ tɔkɔrɔ ang toje horo dəwje tə̂ kə̂ Ijarayɛl. Ddəw kâra baa, njê-nɛ̂n-tɔjuje kə̂ tɔkɔrɔ ang a teeje horose tə̂ tɔ. Ddəw gusu tə̂, dâ ddeeje kə nɛ̂n-tɔjuje kə̂ tɔkɔrɔ ang ddəm aw tuju dəwje ddəm. Dâ mbətəje Əbbə-dəwje kə̂ ajide le ngaâ dâ bbarje yo kə dɔde tə̂ kə ngɔru baa. 2Dəwje nya a kunnje gode ddəw lo-to-majang tə̂ kə̂ daw ddaje ngaâ dâ tajije ddəw tar kə̂ tɔkɔrɔ mbade. 3Bbo nɛ̂n-kinga a ddade nya ngaâ dâ kərəjese taa nɛ̂n nɛ̂nje ləse. A sariya kə̂ dɔde tə̂ to ngɔsi ngɔsi ləw baa ngaâ mbɔr ang a, dâ kubbaje tuju. 4Mba anjəje kə̂ ddaje majang le, Lubba inyade ddekeke njaa baann ang. Lubba ungude mə buwa tə̂ kə̂ il biti biti arə n̂-naynje tə̂ daw nginanje ndɔ sariya. 5Dəwje kə̂ duninya tə̂ kə̂ ləw toje to njê-nɛ̂n-ddaje kə̂ maji ang le Lubba inyade arə disije ddekeke ang tɔ. Kar tə̂ kə̂ narə maann uwade le, Nowe kə̂ aw ila mbər nɛ̂n-dda kə̂ gatə gatə le â najɛ̂, ne de kə marə dəwje siri. 6Goe tə̂ a, dəwje kə̂ Sɔdɔm kə Gɔmɔr, Lubba gangə sariya-yo dɔde tə̂ ngaâ narə n̂-ro bbeje le darə ddee to bu. Yeenn to nɛ̂n-kɔju-marɛ̂ mba njê-nɛ̂n-ddaje kə̂ maji ang kə̂ ndɔ tə̂ kə̂ bara. 7A naji Lotə kə̂ to nje-nɛ̂n-dda kə̂ gatə gatə. Dəwje kə̂ dɔ ndɔ tə̂ lə Lotə le, pa-nja ləde kə̂ to kə dɔgɔlɛ̂ ang kə lo-to-majang kə̂ daw dda le oso wur Lotə le nya. 8Mba Lotə kə̂ to dəw kə̂ gatə gatə nəənn kə̂ isi horode tə̂ le aw oo nɛ̂nje kə̂ daw ddaje le kə kəmɛ̂ ddəm kə mbia ddəm. Ndɔ kâra kâra tɔyn, nɛ̂n-ddaje ləde le aw dda arə rɔɛ̂ nəəle ang nyɔm. 9Yeenn tɔju to Əbbə-dəwje gərə gusu kə̂ ta kɔru nɛ̂n dəwje kə̂ unnje rɔde arɛ̂je mə nɛ̂n-nan tə̂ kə ddang. A naw ngəm njê kə̂ toje gatə gatə ang mba gangə sariya dɔde tə̂ ndɔ gangə sariya tə̂. 10Uta tɔyn, nâ gangə sariya dɔ njê kə̂ aw ddaje nɛ̂n ddəw bboje tə̂ kə̂ da-rɔde tə̂, a ooje singa-mɔngu lə Lubba to nɛ̂n ang.

Njê-nɛ̂n-tɔjuje kə̂ tɔkɔrɔ ang nəənn le əjəje to dasəje ta dda nɛ̂n tɔyn ngaâ daw dundaje gude nya nya. Ndilje kə̂ darâ kə̂ aw ingaje piti njaa kara n̂-bbəəlje ta tajide ang. 11A anjəje kə̂ singade ddəm singa-mɔngu ləde ddəm uta lə njê-nɛ̂n-tɔjuje kə̂ tɔkɔrɔ ang le kara dilaje ta-bbar dɔ ndilje tə̂ənn le kəm Əbbə-dəwje tə̂ ang. 12A dede le, daw ddaje nɛ̂n tokə lə daje kə̂ kəjə ləde goto. Lubba ddade karə duwade n̂-tɔlde. Daw tajije nɛ̂n kə̂ n̂-gərəje ang. Lubba a tɔlde tokə daw tɔl daje. 13Baann njaa â dâ kingaje nɛ̂n kuka nɛ̂n-ddaje ləde kə̂ gatə gatə ang le. Rɔde nəəlde nya ta dda nɛ̂n-yərəw dann karâ. N̂-toje tokə yərəw kə̂ ratə kubbu arə to nɛ̂n-rɔ-kul. Bbo daw dusaje nɛ̂n kə se a, rɔde aw nəəlde ta kərəse. 14Kəmde to kə dɔ lo-to-majang tə̂ dɔrɔ ngaâ maal majang oy rɔde tə̂ ndɔ kâra ang, daw dərəje kəm dəwje kə̂ sangəje kə majɛ̂ ang, məde ərə ddəw dda bbo nɛ̂n tə̂ lə dəwje, n̂-toje to dəwje kə̂ ndu-ndɔɔl to dɔde tə̂. 15Dinyaje ddəw kə̂ ndɔju, a n̂-ndəəmje ddəw. Ddəw kə̂ Balaam kə̂ to ngonn lə Bosɔr unn â dunnje. Ne kə̂ n̂-ndiki tə̂ ta kinga kuka nɛ̂n-dda kə̂ gatə gatə ang le. 16A Lubba in saa mba kaal-ta laa le. Kororo kə̂ to da kə̂ aw pa tar ang, pa tar kə ndu-gɔsu dəw ngaâ ɔku ddəw Balaam kə̂ to nje-kila mbər tar lə Lubba le arə dda nɛ̂n-mbə le ang.#2:16 Nɔmbərə 22:4-35

17Njê-nɛ̂n-tɔjuje kə̂ tɔkɔrɔ ang le toje tokə lə buwa-maann kə̂ maann goto tə̂ ddəm ndi kə̂ il kə̂ bamburanbo ɔsu ɔtu nɛ̂n ddəm. Lubba ngəm lo kə̂ il biti biti aw nginan nɛ̂n de. 18Mba daw paje tarje kə̂ ngəng ngəng, a to tarje kə̂ baa daw dərəje nɛ̂n dəwje kə̂ bbasinɛn bbay njaa aynje ji dəwje tə̂ kə̂ ndəəmje ddəw. Dərəde ddəw bbo dda lo-to-majang tə̂, 19ngaâ dunnje ndude darə dəwje le nan, dâ kɔrujede kɔ bbərə tə̂. A dede njaa kara n̂-toje to bbərəje lə bboje kə̂ da-rɔ tə̂ kə̂ aw tuju dəwje. Mba dəw kâra kâra to bbərə lə nɛ̂n kə̂ bboe uta dɔɛ̂. 20Dəwje kə̂ gərəje Jeju-Kristə kə̂ to Əbbəjeje ddəm Nje-kajije ddəm teeje mə nɛ̂n-yərəwje tə̂ kə̂ duninya tə̂ nəənn kə ddang ngaa. A bbo n̂-təlje dulaje rɔde mə nɛ̂n-yərəw tə̂ le bbay darə taa singade a, kisi ləde kə̂ guku a maji ang kuta ye kə̂ kete bbay. 21Mba, gərə ddəw nɛ̂n-dda kə̂ gatə gatə ang maji uta ye kə̂ ta gərə ngaâ bba ta tusu Ndu lə Lubba kə̂ n̂-tɔjude le kinya. 22Nɛ̂n kə̂ tɔkɔrɔ kə̂ kɔn-tar pa nəənn â ingade. Kɔn-tar le nan: «Bisi kə̂ tɔmɔn a, təl ay tɔmɔn laa le» ngaâ «Bərə kə̂ n̂-toke bbasinɛn nəənn njaa a, təl ula rɔɛ̂ bərə tə̂.»

Currently Selected:

2 Piyɛr 2: KabbaDkS

Highlight

Copy