2 Piyɛr 1
1
Tar lapiya lə Piyɛr
1Əman Simɔn Piyɛr kə̂ m-to bbərə-kula lə Jeju-Kristə ddəm nje-kaw-kula lə Jeju-Kristə ddəm m-dda makəturu nəənn marə dəwje kə̂ ingaje mə-kunn kə̂ ngəng kə̂ kâra baa kə̂ jinga le. Dingaje mə-kunn le ddəw nɛ̂n-dda tə̂ kə̂ gatə gatə lə Jeju-Kristə kə̂ to Lubba ləje ddəm Nje-kajije ddəm. 2Maji karə Lubba dda kə se mə-maji nya ddəm narə məse wul lɔm nya ddəm ddəw gərə tə̂ kə̂ aw gərəje Lubba ddəm Jeju kə̂ to Əbbəjeje ddəm kə kete kete.
Nɛ̂nje kə̂ maji karə njê-mə-kunnje ddaje
3Ddəw singa-mɔngu tə̂ lə Lubba, Lubba le arəje nɛ̂n tɔyn karə n-naynje nɛ̂n kəm baa bba karə junn rɔje jarɛ̂. Narə n-gəre ne kə̂ n̂-bbarje karə jinga piti laa ddəm n-dda nɛ̂n-ddaje laa kə̂ maji ddəm.#1:3Marə makəturuje ndaji tar nəənn le nan: Lubba bbarje ddəw mə-maji tə̂ laa kə ddəw piti tə̂ laa. 4Ddəw nɛ̂nje tə̂ənn le bba jingaje nɛ̂n nɛ̂nje kə̂ ngəng nya kə̂ Lubba unn ndue ta karəje le. Yeenn bba karə ddəw nɛ̂nje tə̂ənn le, ə-ddeeje tokə lə Lubba, mba aynje bbo nɛ̂nje kə̂ maji ang kə̂ dɔ nangə tə̂ nəənn kə̂ aw tuju dəwje. 5Mba yeenn bba, maji karə ə-ddaje singa mba kila nɛ̂n-dda kə̂ maji dɔ mə-kunn tə̂ ləse. Nɛ̂n-dda kə̂ maji le, ilaje nɛ̂n-gərə dɔɛ tə̂. 6Nɛ̂n-gərə le, ilaje tɔ-bbo kə̂ da-rɔ tə̂ dɔɛ̂ tə̂, tɔ-bbo kə̂ da-rɔ tə̂ le, ilaje kuwa karə ngəng dɔɛ̂ tə̂, kuwa karə ngəng le, ilaje ngəm-rɔ mba Lubba dɔɛ̂ tə̂, 7ngəm-rɔ mba Lubba le, ilaje ndiki naan tokə ngakɔn-naan njaa dɔɛ̂ tə̂. Ndiki naan tokə ngakɔn-naan le, ilaje ndiki dəwje tɔyn dɔɛ̂ tə̂. 8Mba bbo nɛ̂njeenn toje məse tə̂ ngaâ nɛ̂nje le ujuje nya nya a, a dda karə ə-ddaje kula bbo karə isije baa ang ngaâ â gərəje Əbbəjeje Jeju-Kristə kə kete kete. 9A dəw kə̂ nɛ̂njeenn le goto məɛ̂ tə̂ to tokə lə nje-kəm-tɔ kə̂ aw mam lo to mam. Məɛ̂ oy dɔ toko kə̂ Lubba toko majangje laa kə̂ ləw le. 10Mba yeenn bba, ngakɔnʼmje, maji karə ə-ddaje singa nya mba nayn ddəw bbar tə̂ kə̂ Lubba bbarse kə mbərə kə̂ n̂-mbərəse le kə majɛ̂. Bbo ə-ddaje tokə baann a, â kosoje mə majang tə̂ ndɔ kâra ang. 11Baann bba Lubba a kɔru ddəw karə tatə karə andəje nɛ̂n mə Bbe-kɔn tə̂ kə̂ a to kə bbal kə bbal, kə̂ to Bbe-kɔn lə Jeju-Kristə kə̂ to Əbbəjeje ddəm Nje-kajije ddəm.
12Mba yeenn bba, m-gərə to ə-gərəje nɛ̂njeenn le ngaâ aw ngəmje tar kə̂ tɔkɔrɔ kə̂ ingaje le kə majɛ̂ njaa, a mâ kole məse dɔɛ̂ tə̂ kə ndɔ tɔyn. 13Moo a, to kə dɔgɔlɛ̂ njaa karə bbo m-nayn kəm baa bbay a, mole məse mba ndol nɛ̂n dɔse. 14Mba m-gərə to m-to ngɔsi ta kinya dɔ nangə nəənn ngaa. Əbbə-dəwje Jeju-Kristə tɔjum arə m-gərə. 15A mâ dda karə gom tə̂ kara, ingaje ddəw ta kole məse dɔ nɛ̂n-tɔjuje tə̂ nəənn kə kar tɔyn.
Tarje kə̂ dila mbəre darəse to tarje kə̂ tɔkɔrɔ
16Kar tə̂ kə̂ n-tɔjuse tar ddee kə̂ Əbbəjeje Jeju-Kristə a ddee kə singa-mɔngu le, jar dɔ tarje tə̂ kə̂ kura kura kə̂ dəwje əjəje kə dɔde baa bba n-tɔju nɛ̂n se ang. Joo tɔkə-mbangə laa kə kəmje njaa. 17-18Mba kar tə̂ kə̂ jee nɛ̂n saa dɔ ddingiri tə̂ kə̂ maji tɔyn le, Lubba kə̂ Bɔ pite ngaâ walɛ̂ kar tə̂ kə̂ ne Lubba kə̂ nje-tɔkə-mbangə n̂-pa mə piti tə̂ laa nan: Dəw nəənn to ngonnəm kə̂ m-ndike nya, minga rɔ-nəəl nya ddəw tə̂ laa. Ngaa ndu kə̂ in darâ le, jeje njaa joo kə mbije.
19Dɔɛ̂ tə̂ bbay, n-gərə to tarje lə njê-kilaje mbər tar to tarje kə̂ tɔkɔrɔ njaa. Yeenn a, ngəm kə̂ aw ngəmje tarje ləde le to nɛ̂n kə̂ maji. Mba tarje le toje tokə lə puru lambe kə̂ aw ndoko lo ndul tə̂ ndərəng karə lo arɛ ngaâ karə əndɛtɛrɛndɛn kə̂ ta lo-karɛ tə̂ ndoko məse tə̂. 20Maji karə ə-gərəje nɛ̂n nəənn bba: Tarje kə̂ inje ta Lubba tə̂ bba n̂-dda makəturu tə̂ le, dəw kâra a kasə kɔru gəle kə dɔɛ̂ baa ang. 21Mba dəw ila mbər tar lə Lubba kə mə-ndiki laa njaa ang. Ndil-mə-nda â aw kə dəwje arə ilaje mbər tar kə̂ in ta Lubba tə̂.
Currently Selected:
2 Piyɛr 1: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
