كارێن هنارتیان 22

بەڕەڤانیا پاولۆسی ل بەرامبەر جوهیان

1«گەلی باب و برایان، نوكە گوهێ خۆ بدەنە وێ بەڕەڤانیێ، یا ل بەرامبەر هەوە ئەز ژ خۆ دكەم.» 2دەمێ وان بهیستی یێ بۆ وان ب زمانێ عیبرانی دئاخڤیت، ئەو پتر بێدەنگ بوون. وی گۆت: 3«ئەز جوهیمە، ل تەرسۆسا كیلیكیایێ ژ دایك بوویمە، لێ ئەز ل ڤی باژێڕی یێ مەزن بوویم و ل بەر دەستێ#22‏:3 ب یونانی دبێژیت: ‹ل بەر پێیێن…›. گەمالائیلی، ل دویڤ دەستوورێ بابكالێن مە، قاییم یێ پەروەردە بوویم و وەكو هەوە هەمیان ل ئەڤرۆ، بۆ خودێ یێ دلگەرم بووم. 4من ئەڤ رێبازە تا مرنێ تەپەسەر دكر و ژنك و زەڵام دگرتن و دهاڤێتنە د زیندانێ دا، 5هەروەكو سەرۆككاهن و هەمی جڤاتا ریهسپیان دشێن شاهدەییێ بۆ من بدەن. من نامە ژی ژ وان وەرگرتن بۆ برایێن ل دیمەشقێ، ئەز دچووم دا ئەوێن ل وێرێ ژی ب گرێدایی بینمە ئورشەلیمێ، دا بهێنە سزادان.

6دەمێ ئەز بڕێڤە و نێزیكی دیمەشقێ بوویم، نێزیكی نیڤرۆ ژ نشكەكێ ڤە رۆناهیەكا گەش ژ ئەسمانی دەوروبەرێن من روهن كرن، 7ئەز كەفتمە ئەردی و من دەنگەك بهیست، گۆتە من: ‹شائوول، شائوول، تۆ بۆچی من تەپەسەر دكەی؟› 8من بەرسڤ دا: ‹تۆ كی ئەزبەنی؟› گۆت: ‹ئەز عیسایێ ناسیرەییمە، ئەوێ تۆ تەپەسەر دكەی.› 9ئەوێن ل گەل من ژی، ئەو رۆناهی دیت، لێ وان ئەو دەنگ نەبهیست، ئەوێ ل گەل من دئاخفت، 10من پرسیار كر: ‹ئەز چ بكەم، خودان؟› خودانی بەرسڤا من دا: ‹رابە هەڕە دیمەشقێ و ل وێرێ هەمی ئەوا بۆ تە هاتیە دانان كو بكەی، دێ بۆ تە هێتە گۆتن.› 11ژ بەر شەوقا وێ رۆناهیێ من چ نەددیت، ئەڤجا ئەوێن ل گەل من، دەستێ من گرت و ئەز گەهاندمە دیمەشقێ.

12ل وێرێ زەڵامەك ب ناڤێ حەنانیا هەبوو، ل دویڤ دەستووری یێ ژ خودێ ترس بوو، وی ناڤودەنگەكێ باش د ناڤ هەمی جوهیێن وێرێ دا هەبوو، 13ئەو هاتە نك من راوەستیا و گۆتە من: ‹برایێ من شائوول، بیناهیێ بكە.› ئێكسەر من بیناهی كر و ئەو دیت. 14وی گۆت: ‹خودایێ بابكالێن مە تۆ یێ هەلبژارتی، دا تۆ حەزا وی بزانی و یێ راستدار#22‏:14 مەبەست ژ ‹یێ راستدار›، مەسیحە. ببینی و ئاخفتنێ ژ دەڤێ وی ببهیسی، 15چنكو تۆ دێ بیە شاهد بۆ وی بەرامبەر هەمی مرۆڤان ب وی تشتێ تە دیتی و بهیستی. 16نوكە تۆ بۆچی خۆ گیرۆ دكەی؟ رابە و ب گازیكرنا ناڤێ وی، وەرە تافیركرن و خۆ ژ گونەهێن خۆ بشوو.›

17گاڤا ئەز ڤەگەڕیایمە ئورشەلیمێ و ل پەرستگەهێ من نڤێژ دكر، ئەز دلگرتی بووم 18و من عیسا دیت و دگۆتە من: ‹لەزێ بكە و زوی ژ ئورشەلیمێ دەركەڤە، چنكو ئەو ب شاهدەییا تە سەبارەت من رازی نابن.› 19من گۆت: ‹خودان، ئەو دزانن كو د هەمی كنیشتەیان ڤە، من ئەوێن باوەری ب تە هەی، زیندان دكرن و دقوتان. 20دەمێ خوینا ستیڤانۆسێ شاهدێ تە هاتیە رشتن، ئەز ل وێرێ یێ راوەستیایی بووم و رازی بووم و من جلكێن بكوژێن وی دپاراستن،› 21لێ وی گۆتە من: ‹هەڕە، ئەز دێ تە دویر هنێرم بۆ مللەتێن نەجوهی.›»

22تا ڤێ گۆتنێ، ئەو جەماوەر ل سەر گوهدانێ یێ بەردەوام بوو، پاشی ب دەنگەكێ بلند گۆتن «بلا زەڵامەكێ هۆسا ل سەر ئەردی نەمینیت، چنكو ئەو نە هەژی ژیانێیە!» 23دەمێ وان دكرە هەوار و جلكێن خۆ ژ بەر خۆ دهاڤێتن#22‏:23 وەكو خۆ ئامادەكرن بۆ بەربارانكرنێ. بنێڕە كارێن هنارتیان 7‏:58 و تۆز دهەڵاڤێتە ئەسمانی، 24فەرماندەی فەرمان دا، كو پاولۆسی ببەنە د سەربازگەهێ ڤە و ب قامچیدانێ ڤەكۆلینێ ل گەل بكەن، دا بزانیت كا بۆچی جوهیان ل دژی پاولۆسی دكرە هەوار.

پاولۆس هەڤوەڵاتیەكێ رۆماییە

25لێ دەمێ سەربازان ئەو بۆ قامچیدانێ گرێ دای، پاولۆسی گۆتە سەرلەشكەرێ ل نك وی راوەستیایی: «ئەرێ رەوایە، هوین هەڤوەڵاتیەكێ رۆمایی قامچی بدەن، بەری بهێتە دادگەهكرن؟» 26دەمێ سەرلەشكەری گو‍‌ھ ل ڤێ چەندێ بووی، چوو نك فەرماندەی و گۆتێ: «ئەڤە تۆ دێ چ كەی؟ ئەڤ مرۆڤە هەڤوەڵاتیەكێ رۆماییە.» 27فەرماندە هاتە نك پاولۆسی و گۆتێ: «بێژە من، ئەرێ تۆ هەڤوەڵاتیەكێ رۆمایی؟» ئەوی بەرسڤ دا: «بەلێ.» 28ئینا فەرماندەی گۆت «من ب پارەیەكێ زۆر ئەڤ هەڤوەڵاتیبوونە ب دەست خۆ ڤە ئینایە.» ئینا پاولۆسی گۆت: «لێ ئەز هەر ژ دایكبوونا خۆ هەڤوەڵاتیمە.» 29ئێكسەر ئەوێن ل بەر بوو ڤەكۆلینێ ل گەل بكەن، خۆ ژێ دویر ئێخستن و فەرماندە ژی ترسیا، دەمێ زانی كو پاولۆس هەڤوەڵاتیەكێ رۆماییە، چنكو وی ئەو گرێ دابوو.

پاولۆس ل بەرامبەر جڤاتا بلند یا جوهیان

30ل رۆژا پاشتر، فەرماندەی حەز دكر راستیێ بزانیت، كا بۆچی پاولۆس ژ لایێ جوهیان ڤە دهێتە تاوانباركرن. ئینا قەیدێن وی ڤەكرن و فەرمان دا كو سەرۆكێن كاهنان و هەمی ئەندامێن جڤاتا بلند كۆم ببن. وی پاولۆس ئینا و ل بەرامبەری وان راوەستاند.

Currently Selected:

كارێن هنارتیان 22: BHD

Highlight

Copy