Mataayo 26

Ulupulinkhano lwa kimubuda uYeesu

(Maluko 14:1-2; Luuka 22:1-2; Yohana 11:45-53)

1UYeesu wáganile kimala kilogola amaswi ago goona, wávajovela avamanyisiwa vaakwe wáaja, 2“Ngaja shina mumeenye, sisigeele nsiku sivili kiiva shiwungo sha Pasaakha.#26:2 Pasaakha: Yimba iliswi ili mu Maswi aMahensa. One Lusawo lwa Muunu nikhadoolelwa kwa valugu, baheene nikhomeelelwe pa musalaaba.”

3Uluhaavi ulo, avatambule avakhome na vakhome va Vayahuudi vakungaanile mu nanda inkhome ya mutambule umukhome, yuna akhandi itambulwa Kayafa. 4Vapulinkhana kimukhata uYeesu kwa wusugu, baheene vamubude. 5Leelo vapulinkhana vaajova, “Tisikhajelaga kigaha aga, mu lijuva lya shiwungo sha Pasaakha, avaanu vasilaave vayaamule ilibaatu.”

UYeesu idudumisiwa amafuta ku Betaniya

(Maluko 14:3-9; Yohana 12:1-8)

6Baheene uYeesu wáaluta mu lujinji lwa ku Betaniya mu nanda ya Simoni yuna ulwamwandi akhandi ana nyawulova. 7UYeesu pina akhandi akheele iilya, uwashimaayi yumonga wáyinjiile ni nsupa ya mafuta aga lifungu likhome, gina ginunshilila mandu, wáyansa kimududumisisa uYeesu ku mutwe. 8Avamanyisiwa vaakwe vaganile kigaaga ago, vakhalalaga mandu vaajova, “Kwashi iveyanga ndeeni? 9Kiiva amafuta aga, ndi gagusiwa kwa hela nyinshi mandu na kivapeela avapiina!” 10UYeesu wámanyaga gina vakhandi vihiiva, wávajovela wáaja, “Kwashi mukimulafya uwashimaayi uyu? Kiiva wánigahila amanofu mandu. 11Avapiina muli lumo nsiku soona, leelo one nisiiva lumo noomwe nsiku soona. 12Uwashimaayi uyu wánidudumisisa amafuta aga, kiija aniyandaale mu lijuva lya kisiilwa one. 13Shiyooli nikivajovela, popoona pina iMola iNofu yikhakhomwa mu nyi soona, gakhalogolwa amanofu goona gina uwashimaayi uyu wánigahila, baheene avaanu vakhamukumbukha.”

UYuuda uIsikaliyoote iyiitikha kimudoolela uYeesu

(Maluko 14:10-11; Luuka 22:3-6)

14Lino uYuuda uIsikaliyoote, umunyaayumo mu vamanyisiwa vala ishumi na vavili va Yeesu, wálutile kwa vatambule avakhome, 15wávaposa wáaja, “Nda nimudoolele kunyeenyu, musinihombe ihela silinga?” Vamuhombaga ihela mashumi gatatu. 16Baheene uYuuda uIsikaliyoote wáyansa kisakula imwenshe inofu iya kimudoolela uYeesu.

UYeesu iilya ishakiilya sha Pasaakha na vamanyisiwa vaakwe

(Maluko 14:12-26; Luuka 22:7-23; Yohana 13:21-30; 1 Vakolinto 11:23-25)

17Ilijuva lya wutasi ilya shiwungo sha makhaate gina gasiponyisiiwe ishiwumulilo,#26:17 Shiwungo sha makhaate gina gasiponyisiiwe ishiwumulilo: Yimba iliswi ili mu Maswi aMahensa. avamanyisiwa va Yeesu vayinsaga kunyaakwe, vamuposa vaajova, “Wisakula tikunosese kwi ishakiilya sha shiwungo sha Pasaakha?” 18UYeesu wávayankha wáaja, “Lutaji mu lijumbi lya ku Yelusalemu kwa muunu yumonga na kimujova kiija, ‘UMumanyisaaji iijova, “Uluhaavi lwangu lwavejeela, one na vamanyisiwa vangu tisiilye ishakiilya sha Pasaakha mu nanda yaakho.”’” 19Avamanyisiwa vala vaaluta na kisenga goona ngaja shina uYeesu wávalajisaaga, vashinosa ishakiilya sha shiwungo sha Pasaakha.

20Shaganile kifikha ishaamihe, uYeesu na vamanyisiwa vaakwe ishumi na vavili vaakhala kiilya ishakiilya. 21Pina viilya, uYeesu wáajova, “Shiyooli nikivajovela, umunyaayumo weenyu asinidoolele.” 22Avamanyisiwa vaakwe vasugumilwa mandu, vayansa kimuposa yumo yumo vaajova, “Wee Mutwa, wuli, yuune?” 23UYeesu wáyankha wáaja, “Yula yuna idabisa umukhaate lumo noone mu bakuli, yumwene yuna asinidoolele. 24One Lusawo lwa Muunu nikhabudwa ngaja shina yiyandiikhwe mu Mayandikhwa aManofu. Leelo aka, umuunu yuna akhanidoolela. Shiba yaali yive umuunu uyo wáali ave asisaviilwe!” 25UYuuda yula yuna wámudolelaga uYeesu kwa valugu, woope wámuposa wáaja, “Wee Mumanyisaaji, wuli, ningava yuune?” UYeesu wámuyankha wáaja, “Owe shiyooli wilogola.”

IShakiilya sha Mutwa

(Maluko 14:22-26; Luuka 22:14-23; 1 Vakolinto 11:23-25)

26Woope pina viliisaga, uYeesu wátoola umukhaate, wámuhonjesa uNguluvi, wágumenyulania, wávapeela avamanyisiwa vaakwe, wávajovela wáaja, “Tooli, mulye, ugu gugwene muvili gwangu.” 27Baheene wátoola ikhoomasi ya divaayi, wámuhonjesa uNguluvi, wávapeela, wávajovela wáaja, “Tooli woona na kiingʼwa idivaayi iyi, 28kwa kiiva iyi shimanyilo sha lufingo ulupya#26:28 Lufingo ulupya: Yimba iliswi Lufingo mu Maswi aMahensa. luna lusenjekha kwa danda yangu. Khanji yikunukha kwa kiiva ya vaanu vinshi, baheene uNguluvi avasaajile avaanu uwunansi waanave. 29Nikivajovela kiija, shiyooli nisikhangʼwa khanji idivaayi mbakha mu lijuva lina nikhangʼwa idivaayi imya, lumo noomwe mu Wutwa wa Daada wangu.”

30Vaganile kiyeyema,#26:30 Vaganile kiyeyema: Pina vaalya ishakiilya sha Pasaakha, aVayahuudi vakhandi ni ngʼoma ya kiyeyema iSabuli 113-118. vawuukha viiluta ku shidunda sha Miseyituni.

UYeesu ikimujova uPetulo kiija akhamukhaana

(Maluko 14:27-31; Luuka 22:31-34; Yohana 13:36-38)

31Baheene uYeesu wávajovelaga avamanyisiwa vaakwe wáaja, “Ishilo sha minsiyaano, omwe woona musinisije na kinilekha. Kwa kiiva uNguluvi ilogola mu Mayandikhwa aManofu kiija, ‘Nikhamutova umudimaaji wa nkholo, ishipuga sha nkholo shikhapalankhana.’#26:31 Yimba mu litaafili lya Sekhaliya 13:7. 32Leelo pina nafyukha, nikhavalongola kiluta ku Galilaya.” 33Baheene uPetulo wámukhaania uYeesu wáaja, “Hata nda woona vakuleshe, one nisikikulekha kaa!” 34UYeesu wámuyankha wáaja, “Shiyooli nikikujovela, uluhaavi luna injogolo yisinaavishe ishilo sha minsiyaano, usiive wanikhaana mala khatatu.” 35UPetulo wámuyankha wáaja, “Hata nda yive kiifwa lumo noowe, nisikulekha kaa!” Woope avamanyisiwa avanji woona vaajova shiisho.

UYeesu ikimufuunya uNguluvi mu Getisemane

(Maluko 14:32-42; Luuka 22:39-46)

36Baheene uYeesu wálutile na vamanyisiwa vaakwe mu shiisi shina shitambulwa Getisemane, wávajovela wáaja, “Khalaji apa, one niiluta pamwandi padoodo kimufuunya uNguluvi.” 37Wávatoola uPetulo na vaana vavili vala ava Sebedayo, wáyansa kisugumilwa na kilava mandu. 38Baheene wávajovela wáaja, “Inumbula yangu yisugumiilwe mandu nkholeela na kiifwa. Mukhale baaha, muveesaje meeho.”

39Wáhejeela pamwandi padoodo, wáagwa pansi wágubama, wámufuunya uNguluvi wáaja, “Wee Daada, nda yikwiliile nikikulomba uniwuusise ikhoomasi iyi iya malava aga! Leelo yisikhaveesaga shina nisakula one, leelo yive shina wisakula owe.” 40Baheene uYeesu wáatina kwa vamanyisiwa vaakwe, wávaaga vagoneleele utulo. Wámuposa uPetulo wáaja, “Wuli, mwagombola kiiva meeho lumo noone, hata kwa luhaavi lufupi? 41Baheene wávajovela wáaja, muveesaje meeho, mufuunyaji uNguluvi kiija, avatanje musikhagahaga uwunansi pina mwijelwa. Mwidobokha kigaha wunofu, leelo umuvili muwoto.”

42UYeesu wávalekha khanji, wáaluta ulwa wuvili kifuunya kwa Nguluvi wáaja, “Wee Daada wangu, nda yive amalava amakhome aga gakwiliile kiwuukha kunyangu, lino ugahaje ngaja shina wisakula.” 43Wáganile kifuunya wágomokha khanji, wávaaga vagoneleele, kiiva vakhandi vana tulo tusito. 44UYeesu wávalekha khanji, wáaluta kifuunya kwa Nguluvi ulwa wutatu, wáwuyiila kilogola amaswi gagala. 45Baheene wáatina khanji kwa vamanyisiwa vaakwe wávajovela wáaja, “Mushaanali mupigonile utulo na kituuya? Loleeli! Uluhaavi lwangu ulwa malava lwafikha. Lino one Lusawo lwa Muunu, nisikhatwe na kitwalwa mu mawokho ga vanansi. 46Yiimaji, tilutaje! Loleeli, yuna ikinidoolela ali nkholeela.”

UYeesu iikhatwa

(Maluko 14:43-50; Luuka 22:47-53; Yohana 18:3-12)

47UYeesu pina akhandi ashaanali ilogola, shitu wátwiwukha uYuuda umunyaayumo mu vamanyisiwa vaakwe ishumi na vavili, wáyinsa ni shipuga shikome sha vaanu shina shikhandi ni panga ni ndulugu. Ishipuga isho shafilikhwagwa na vatambule avakhome na vakhome va Vayahuudi. 48UYuuda umudolelaaji wávajovelaga nkhaani avaanu vala ishimanyilo isha kimumanya uYeesu, kiija, “Yula yuna hambi nikimunoonela, uyo iiva yumwene, mukhataji.” 49Baaho, uYuuda wáaluta kwa Yeesu, wámujovela wáaja, “Wee Mumanyisaaji, aaje senga!” Baheene wámunoonela. 50UYeesu wámuyankha wáaja, “Wee mumanyi, gasengaga gina wayinsila.” Lino avaanu vala vamukhata uYeesu na kimupinya. 51Umuyaanave yumonga mu vina vakhandi vayiimile lumo nu Yeesu wátoola ipanga, wámutova umuvanda wa mutambule umukhome na kimudumula ilikutu. 52Leelo uYeesu wámujova wáaja, “Tinia ipanga yaakho mu haala yaakwe, kwa kiiva avaanu woona vina viikhata ipanga ya wulugu, vakhabudwa kwa panga! 53Wuli, musimeenye kiija, nikwiliile kilomba umutango kwa Daada wangu? Woope akwiliile kinifilishila avamalayikha vaakwe kishila ifipuga ifikhome ishumi na fivili.#26:53 Ifipuga ifikhome ishumi na fivili: Kwa Shiyunaani yiyandiikhwe, Legiyoni ishumi na fivili. Mu wutwa wa Shiluumi Legiyoni shipuga sha vasulukhali magana mashumi mutanda (6,000). 54Wuli, nda nigahe ndeeno, lino gakwiliile kikwilana wuli, gina gayandiikhwe mu Mayandikhwa aManofu kiija, amaswi aga mbakha gasenjeshe?”

55Baheene uYeesu wávaposa avaanu vala wáaja, “Kwashi muniyinsiile ni panga ni ndulugu kinikhata one ngaja muyinsile kimukhata muhiiji? Wuli, mwihiiva kiija one nikiyikhaana iselekhaali? Nsiku soona tikhandi noomwe, nikhandi nimanyisa mu lukeeke lwa nanda imbaagule iya kifuunyila, leelo musikhanikheete! 56Leelo aga goona gasenjekha, kiija gakwilane gina avakuwamalago vagayandiishe mu Mayandikhwa aManofu.” Baheene avamanyisiwa vaakwe woona vamulekha, vaasiga.

UYeesu pa livansa lya Vayahuudi

(Maluko 14:53-65; Luuka 22:54-55, 63-71; Yohana 18:13-14, 19-24)

57Baheene ishipuga ishikhome sha vaanu shila, shamukhata uYeesu na kiluta nawo kwa Kayafa, umutambule umukhome, kuna vakungaanile avamanyisaaji va ndaji sa Musa na vakhome va Vayahuudi. 58UPetulo akhandi ikimufwata uYeesu kwa kutali, mbakha mu lukeeke lwa nanda ya mutambule umukhome. Baheene wáyinjila mukhati, wákhala lumo na vayangalilaaji, kiija aloleele umukhole gwa Yeesu shina gwisilila.

59Avatambule avakhome na vakhome va livansa lyona ilya Vayahuudi#26:59 Livansa lyona ilya Vayahuudi: Yimba iliswi Livansa lya Vayahuudi mu Maswi aMahensa. vakhandi visakula uwulunjikhaaji wa wudehi, baheene vapate insila iya kimubuda uYeesu. 60Leelo vasikhapatile uwulunjikhaaji wowoona, hata nda vayinsaga avalunjikhaaji ava wudehi vinshi. Kuwudugo avaanu vavili vayinsaga vaajova, 61“Umuunu uyu akhajovile, ‘Nikwiliile kiyibomola inanda iya Nguluvi na kiyisenga khanji kwa nsiku sitatu.’”

62Baheene umutambule umukhome wáyiima, wámuposa uYeesu wáaja, “Wuli, usikivagomosesa hata liswi lyolyona? Usipulikha avaanu ava vikikujova shi?” 63Leelo uYeesu wásisima tototo. Baheene umutambule umukhome yula wámujovela khanji wáaja, “Nikikujovela uyiyiije kwa litaawa lya Nguluvi, yuna muumi, tujovela nda owe yuuwe Mukulusaaji,#26:63 Mukulusaaji: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. Lusawo lwa Nguluvi.” 64UYeesu wámuyankha wáaja, “Owe shiyooli wilogola. Leelo nikivajovela woona kiija, kiyansa lino mukhamwaga uLusawo lwa Muunu akheele ulubali lwa kundiilo#26:64 Ulubali lwa kundiilo: Uluganulo lwakwe, uYeesu akhapeelwa ingufu nu wutawulilwa. Yimba mu litaafili lya Sabuli 110:1. lwa Nguluvi, uMunya Ngufu Soona na mukhamwaga iyinsa mu mafunde.”#26:64 Yimba mu litaafili lya Daniyeli 7:13. 65Apo umutambule umukhome wáganaga kipulikha amaswi ago, wádeemula inkhansu yaakwe kiwonensa inkhalasi wáaja, “Ikimutofola uNguluvi! Tisakula avalunjikhaaji vaashi khanji? Lino mwapulikha yuumwe ulutofolo lwakwe! 66Lino, mwijova wuli ulwa muunu uyu?” Vamuyankha vaajova, “Isakulwa abudwe!”

67Baheene vayansa kimufuunyila amata uYeesu ku weeni, vamutova ni mfunsi. Avanji vamutova na makhoofi, 68na kimujova viija, “Wee Mukulusaaji,#26:68 Mukulusaaji: Kwa Shiyunaani yiyandiikhwe Kilisito. kuva amalago, yu naani yuna wákutova?”

UPetulo ikimukhaana uYeesu

(Maluko 14:66-72; Luuka 22:56-62; Yohana 18:15-18, 25-27)

69Lino mu luhaavi lulula uPetulo akhandi akheele panja pa lukeeke. Baheene umuvanda yumonga umuhinja wávejeela kwa Petulo, wámujovela wáaja, “Na yuuwe ukhandi lumo nu Yeesu uwa ku Galilaya.” 70UPetulo wákhaana pa vala woona wáaja, “Nisigameenye ago gina wilogola!”

71Baheene wáwuukha pala, wáaluta panja ya mulyango gwa lukeeke. Umuvanda uyunji umuhinja wámwaga, wávajovela avaanu vina vakhandi vakwali pala wáaja, “Umuunu uyu akhandi lumo nu Yeesu uwa ku Nasaleti.” 72UPetulo wákhaana khanji kwa kiyiyiiga wáaja, “Nisimumeenye umuunu uyo!”

73Lwaganile kishila uluhaavi ludoodo, avaanu vala vina vayiimile pala, vavejeelile kwa Petulo, vamujovela vaajova, “Shiyooli owe uli muyaanave wa vaanu awo, kwa kiiva hata lulogolo lwakho wiwonensa bahawuvalafu kiija, uhumile ku Galilaya!” 74UPetulo wákhaana kwa kiyiyiiga wáaja, “Nda niijova wudehi, niyiijilwe! Nisimumeenye umuunu uyo!” Baaho injogolo yaavikha.

75Baheene uPetulo wákumbukha ulwa liswi lila lina uYeesu wámujovelaga kiija, “Uluhaavi pina injogolo yisinaavishe, usiive wanikhaana mala khatatu.” Wáahuma panja wáyansa kikhoola kwa kisugumilwa mandu.

Currently Selected:

Mataayo 26: Shisangu

Highlight

Copy

Compare