Nsengo sa Vanandeje 25

UPawulo pa Fesito umukhome wa nyi

1Lino uFesito wáfikhaga ku Kayisaliya, wáyansa kitema ku nyi ya Yudeya. Saganaga kishila nsiku sitatu, wáwuukha apo kiluta ku Yelusalemu. 2Pina ali apo, avatambule avakhome lumo na vakhome avanji va Vayahuudi vayinsa, vamutaviilila goona gina vamusitaashile uPawulo. 3Vakhandi vikimulomba mandu kiija avatanjilise, amutinie uPawulo ku Yelusalemu, kwa kiiva vapulinkhana kiija, vamuyalushile na kimubuda uPawulo mu nsila. 4Leelo uFesito wávayankha wáaja, “UPawulo asigeele iyangalilwa ku Kayisaliya, one yuune nisiilute ukho lilino. 5Lino muvahaagule avakhome veenyu vamonga, tilute lumo noone. Vahumye amasitaakho gaanave ukho, baheene nimanye nda kuna wunansi wowoona wuna ananjile.”

6UFesito wáakhala na vaanu vala nsiku munaana awu ishumi, wáawuya khanji ku Kayisaliya. Kwaganile kiisha, wáakhala pa shitengo shaakwe pina ihijila amakhole, wálajisa kiija vamutwale uPawulo pamwene. 7Wáganile kifikha uPawulo pala, wávaaga aVayahuudi vina vayinsaga kihuma ku Yelusalemu. Vamugomba, vakhandi vikimusitaakha wunansi winshi wuna vagombolaga kijinia.

8Baheene uPawulo wáyansa kiyitanga wáaja, “Nisinanjile lyolyona ilya ndaji ya Vayahuudi, awu ulwa nanda imbaagule iya kifuunyila, awu kwa Kayisaali, umutwa wa Valuumi.”

9Leelo kwa kiiva uFesito akhandi isakula kivashendeefya aVayahuudi, wámuposa uPawulo wáaja, “Wuli, wiyiitikha kiluta ku Yelusalemu kiija uhigwe kwa masitaakho aga?”

10UPawulo wámugomosesa wáaja, “Niyiimile pa muhigaaji yuna avishiilwe nu Kayisaali, baaha baheene nisakulwa kihigwa. Kusiina lyolyona lina ninanjile kwa Vayahuudi, ngaja owe shina umeenye wunofu. 11Nda ninanjile lyolyona lina lisakula one nibudwe, nisikhaana kiifwa. Leelo nda ava vikinisitaakha wudehi hela, kusiina umuunu yuna ana wutawulilwa uwa kinitwala kunyaanave. One nilomba kiija, umukhole gwangu gulute guhigwe kwa Kayisaali!”#25:11 Umukhole gwangu gulute guhigwe kwa Kayisaali: Umuunu yoyoona yuna akhandi Muluumi, wátawulwagwa kitwala umukhole gwakwe ku Luumi, baheene kuunyuma vitwala kwa mutwa umukhome yuna akhandi itambulwa Kayisaali.

12Baheene uFesito na vatanjilisaaji vaakwe vatavililana, wámugomosesa uPawulo wáaja, “Walomba kiija umukhole gwakho guhigwe kwa Kayisaali, shiisho ndeeno usiilute uhigwe kwa Kayisaali!”

UFesito ilomba vatavililane nu mutwa uAgilipa

13Saganile kishila nsiku ndoodo, umutwa uAgilipa#25:13 Umutwa uAgilipa: Yimba iliswi Helode mu Maswi aMahensa. lumo nu wulumbu waakwe uBelenike vayinsa ku Kayisaliya kiija vamuhunjile uFesito. 14Vaganile kikhala apo nsiku nyinshi, uFesito wámujovela uAgilipa umukhole gwa Pawulo wáaja, “Apa akwali umuunu yumo yuna uFeliki wámulekhaga adindiilwe mu shifungo. 15Uluhaavi luna nalutaga ku Yelusalemu, avatambule avakhome na vakhome va Vayahuudi vakhanijoveele goona gina vamusitaashile uPawulo, vanilomba nimuhije kiija ananjile.

16“Leelo navagomosesa kiija, yisili ngʼoma yeesu ose ti Valuumi kimuhiga umuunu, nda asinatangaane na vina vikimusitaakha na kiyitanga. 17Naatina apa lumo na awo vina vikimusitaakha uPawulo. Taganile kifikha, nisikhasheleveese umukhole gwakwe. Kwaganile kiisha, naakhala pa shitengo shangu isha kihijila amakhole, nalajisa avasulukhali kiija vamuleete uPawulo. 18Vaganile kimuleeta, vala vina vikimusitaakha vayiima vayansa kilogola gina ananjile. Leelo amaswi gina vamusitaashile gasikhandi mavi mandu, ngaja shina nikhandi nihuviliile. 19Leelo vikhaanania na woope amaposo ga lihuuvi lyanave, ni sa muunu yumonga yuna wáfwisaga, ilitaawa lyakwe akhandi yu Yeesu, yuna uPawulo akhandi ilogola kiija muumi. 20Amaswi ngaja ago, nisikhaloleelile shina hambi nikigaseesa wunofu. Baheene namuposa uPawulo nda asiyiitishe kiluta ku Yelusalemu, kiija ahigwe umukhole gwakwe ukho. 21Leelo uPawulo wálomba kiija umukhole gwakwe guhijwe nu Kayisaali, umutwa wa Valuumi, naajova vamuyangalile mbakha nipate insila ya kimutwala kwa Kayisaali.”

22Baheene uAgilipa wámujovela uFesito wáaja, “Nadobokha kiija, nimupuliise yuune umuunu uyo.” UFesito wámugomosesa wáaja, “Ukhamupuliisa pamulaawu.”

UPawulo pa mutwa uAgilipa

23Kwaganile kiisha, uAgilipa lumo nu Belenike vayinsa kwa kinunumukha. Vayinjila pa wudaama wuna vakhandi vikungaana avaanu, valongoseenie na vakhome va vayimililaaji va vasulukhali, na vakhome va lijumbi. UFesito wálajisa kiija, uPawulo aleetwe mukhati. 24Baheene uFesito wáyansa kilogola wáaja, “Mutwa Agilipa, noomwe woona muna mukungaanile lumo noose, umuunu uyu yuna mukimwaga apa, aVayahuudi woona ava ku Yelusalemu na va panu pa Kayisaliya, vamusitaakhaga kunyangu. Vakhandi vilyova vilalamikha kiija, asifwaya kiiva muumi. 25One nisilyajile ilivi lyolyona lina likwiliile kiija vamubude. Leelo kiiva umwene wánilomba kiija umukhole gwakwe gulute kihigwa ku Luumi nu mutwa umukhome uKayisaali, baheene nalajisa kiija, vamutwale kunyaakwe. 26Hata ndeeno, one nisiina iliswi kwa mwene lina ningayandikha kwa mutwa weesu umukhome. Lulwene namuleeta panyeenyu, mandu panyaakho mutwa Agilipa, nda timale kimuposa, baheene nisiive ni liswi ilya kiyandikha. 27One niiwona kiija, lusili lunofu kimutwala umudindilwa bila kimujovela uKayisaali, umukhole guna asitashiilwe.”

Currently Selected:

Nsengo sa Vanandeje 25: Shisangu

Highlight

Copy

Compare