Nsengo sa Vanandeje 20

UPawulo iiluta khanji ku Makedoniya na ku Wuyunaani

1Ilibaatu lila ilya ku Efeso lyagana kisila, uPawulo wávakunganiaga avahuvililaaji ava pala, wávakhangasa inumbula, wávahwesa. Wáwuukha, wáaluta ku nyi ya Makedoniya. 2Wáava iishila mu nyi iyo, ikivajovela avahuvililaaji imola nyinshi isa kivakhangasa. Baheene wáafikha mu nyi ya Vayunaani,#20:2 Nyi ya Vayunaani: Ilitaawa ilinji yikhandi yitambulwa nyi ya Akaya. 3wáakhala meesi gatatu. Pina akhandi ikiyipinyanga kitina kwa shipugo ishikhome kiluta ku nyi ya Siliya, wáamanya kiija aVayahuudi vakhandi vagulumiile kimugahila fivi pina akhava ishuula. Baheene wálamula kitina lwa magulu, kishilila ku nyi ya Makedoniya. 4Kwa luhaavi ulo, uPawulo akhandi ishuula lumo nu Sopatulo umwana wa Pilo uwa ku lijumbi lya Beloya, uAlisitaliko nu Sekundo ava ku lijumbi lya Tesalonike, uGaayo uwa ku lijumbi lya Delibe, uTimoteo uwa ku lijumbi lya Lisitila, uTikiko nu Tilofimo ava ku nyi ya Asiya. 5Avaanu awo woona valongola, vaaluta kituheepa#20:5 Kituheepa: Apa, uLuuka umuyandikhaaji uwa litaafili ili, akhandi lumo nu Pawulo. ose ku lijumbi lya Tulowa. 6Leelo, shaganaga kishila ishiwungo sha makhaate gina gasiponyisiiwe ishiwumulilo, ose tawuukha pala pa lijumbi lya Filipi, kwa shipugo ishikhome. Tashuula nsiku sisaanu, taafikha ku Tulowa. Taganaga kifikha, tatangaana na vayeesu vina valongwele, tikhakheele kula nsiku fungati.

UPawulo ikimufyusa uEwutikho

7Lyaganile kifikha ilisiku lya Nguluvi, takungaana kiija tilye lumo iShakiilya iShinofu isha Mutwa uYeesu. Baheene uPawulo wáyansa kivakhoma avaanu mbakha paashilo sha paakhati, kwa kiiva akhandi isakula kiwuukha pamulaawu njine. 8Kumwandi iya pa juulu iya nanda yina tikhandi tikungaanile, mukhandi muna lifushe mandu, kiiva ya muli nyinshi sina sikhandi siveekha. 9Umudiimi yumonga, ilitaawa lyakwe akhandi itambulwa Ewutikho, wáali akheele pa ndwi iya kumwandi. UPawulo pina ayiteneeshe kilogola kwa luhaavi lutali mandu, baaho uEwutikho wáyansa kisinsila lushe lushe mbakha wágoneelela utulo. Pina agoneleele, wáagwa kihuma ku ndwi iya mwandi iya juulu ya wutatu. Avaanu pina valutile kimuloleela, vamwaga afwile. 10UPawulo wáyiikha pansi, wámugwila umudiimi yula, wámukumbaatila, wávajovela avaanu wáaja, “Musikhatungumalaji, umuunu uyu muumi hela.” 11Baheene uPawulo wátaana khanji ku shumba shila, vaalya iShakiilya iShinofu isha Mutwa uYeesu. Wáyitenekha kikhoma kwa luhaavi lutali mbakha kwasha, baheene wáwuukha. 12Avaanu vala vashendeeva mandu, kiiva umudiimi yula wáava muumi, vamutoola vamutwala kukhaaya.

Ulushuulo ulwa kiluta ku Mileeto

13UPawulo wálamula kijenda lwa magulu kiluta ku lijumbi lya Asosi. Akhandi isakula kiija timwaje ukho, timuyangase mu shipugo ishikhome. Baheene ose tayangala ishipugo ishikhome, taafikha ukho. 14Wáganile kitufikha ku Asosi, tamuyangasa mu shipugo, taaluta lumo mu lijumbi lya Mitileene. 15Ilijuva lya wuvili shi taava tipishuula kwa shipugo isho, tavejeela mulubali lwa shigunguli sha Kiyo. Ilijuva lya wutatu taafikha pa shigunguli sha Samo. Ilijuva lya wuna, taafikha mu lijumbi lya Mileeto. 16UPawulo wáali agulumiile kishuula kwa shipugo ishikhome bila kishilila ku lijumbi lya Efeso, kiiva asikhandi idobokha kikhala mandu ku nyi ya Asiya. Leelo akhandi idobokha kiija, anyangupe kifikha ku Yelusalemu, pina shishaanali kifikha ishiwungo sha Pentekositi.

UPawulo ikivahwesa avayimililaaji va shipuga sha vahuvililaaji

17UPawulo pina akhandi ku Mileeto, wávafilikha avaanu kivashemeela avayimililaaji va shipuga sha vahuvililaaji va ku Efeso. 18Vaganile kifikha kunyaakwe, wávajovela wáaja, “Omwe mumeenye shina nikhandi nikheele noomwe nsiku soona, kihuma ilijuva lina nafikhaga pa nyi ya Asiya panu. 19Mumeenye shina nikhandi nikimusenjela uMutwa uYeesu kwa kiyiyiisa koona, kwa maanyosi na malava gina ganipataga kwa kiiva ya lugulumilo uluvi lwa Vayahuudi. 20Mumeenye kiija pina nikhandi nikivamanyisa mu fipuga fya vaanu na mu nanda seenyu, nikhayihumiise kivakhoma lyolyona lina lisivatanje. 21Nikhandi nikivabedela aVayahuudi na vina vasili Vayahuudi kiija valambiisile uwunansi waanave, vagomoshe kwa Nguluvi, na kimuhuviilila uMutwa weesu uYeesu.

22“Lino puliisi! UNumbula uMunofu ikinikhamiilisa one, kiija nilute ku Yelusalemu, leelo nisigameenye gina gasinipate ukho. 23Nimeenye hela kiija, mu lijumbi lyolyona lina nishilila, uNumbula uMunofu ikiniwonensa kiija, ku Yelusalemu vasinilemase na kinidindila mu shifungo. 24Leelo hata nda nifwe, nisisaajila uwuumi wangu. Ishiinu ishikhome mandu kunyangu, niyimaliise insengo yina uMutwa uYeesu anipeelile, kiija nivakhome avaanu iMola iNofu iya mota ya Nguluvi.

25“Nikhandi niishila kunyeenyu kivakhoma isa Wutwa wa Nguluvi. Lino leelo, nimeenye kiija omwe woona musikhanyaaga khanji kaa. 26Ndeeno, nikivajovela woona iminsiyaano kiija, nda kuna muunu yoyoona yuna asiiyaje, kusiina umuunu uwa kinipiikha. 27Nikhayihumiise kikhoma goona gina uNguluvi akhandi agulumiile kwa lugano lwakwe. 28UNumbula uMunofu wávaviikhaga omwe muve vayimililaaji va shipuga sha vahuvililaaji va Nguluvi. Muyiyangalilaje yuumwe na kishidiima ishipuga shaakwe, shina uNguluvi wáshikulusaaga kwa danda ya Mwanaakwe. 29Nimeenye kiija, one pina nawuukha na kivalekha omwe, avamanyisaaji va wudehi vakhayinsa kunyeenyu. Avamanyisaaji ava vakhava vakhali ngaja mbwawa sa mu lihakha, vasikhashisungupila ishipuga. 30Hata munyeenyu omwe, vakhawonekha avaanu vina vakhava viijova imola isa wudehi isa kivayasa avahuvililaaji, kiija omwe muvafwate hela. 31Kwa kiiva ya ilyo, muveesaje meeho! Muveesaje nu luuju kiija, kwa maakha gatatu ishilo ni shiminsi nisikhakhateele kivapavila omwe shila muunu kwa maanyosi.

32“Nikimufuunya uNguluvi avadiime na kiija iliswi lya mota yaakwe, livalongose. Iliswi ilyo lina ngufu iya kivajinia na kivayimiilila mu goona gina uNguluvi avavishiile omwe na vabaagule avanji woona. 33One nisikhasidobweshe ihela sa muunu yoyoona, awu umwenda gwakwe. 34Omwe mumeenye shina nikhandi nisenga insengo kwa mawokho gangu, kwa kiiva ya fiinu fyangu fina nikhandi nikifisakula, ni fya vayangu vina tikhandi lumo noone. 35Mu goona gina nagasengaga, nikhandi nisakula kivawonensa kiija, tiveesaje tijimba kisenga insengo. Baheene tive tiipata ifiinu ifya kivatanga avaanu vina vashepushiilwe. Muveesaje nu luuju kwa maswi gina uMutwa uYeesu wájovile kiija, ‘Vayimiliilwe mandu vina viihumya, kishila vina viposheela.’”

36UPawulo wáganile kimala kilogola amaswi ago, wáfugama lumo nawo woona, vamufuunya uNguluvi. 37Baheene woona vakhoola, vamukumbaatila na kimunoonela pina vikimuhwesa uPawulo. 38Iliswi lina lyavagahaga vasugumilwe mandu, lila lina wávajovile kiija, vasikhamwaga khanji kaa. Baheene vamusindishila, vamufisa pa shipugo ishikhome.

Currently Selected:

Nsengo sa Vanandeje 20: Shisangu

Highlight

Copy

Compare