Nsengo sa Vanandeje 18

UPawulo ku Kolinto

1Gaganile kishila ago, uPawulo wáwuukhaga ku lijumbi lya Atene, wáaluta mu lijumbi lya Kolinto. 2Wátangaana nu Muyahuudi yumonga, ilitaawa lyakwe akhandi itambulwa Akila. Umuunu uyo wásawaagwa ku nyi ya Ponto. UAkila akhandi nu mudala waakwe yuna akhandi itambulwa Pulisika. Avaanu ava vakhandi vahumile lilino ndeeni, mu lijumbi lya Luumi mu nyi ya Italiya. Vagahaga ndeeno kwa kiiva umutwa umukhome uKilawudiyo wálajisaaga kiija, aVayahuudi woona vawuushe ku Luumi. Baheene uPawulo wáaluta kivahunjila uAkila nu mudala waakwe. 3Aveene vakhandi visenga insengo ya kihona amaheema, insengo yina woope wáyisengaga, wáyansa kikhala nawo, na kisenga insengo yila lumo. 4Shila lijuva lya Sabaato, uPawulo akhandi iyinjila mu nanda iya kifuunyila, akhandi ijovana na Vayahuudi na vina vasili Vayahuudi kiija, pamonga woope ndi vamuhuviilila uYeesu.

5Uluhaavi luulo, uSiila nu Timoteo vaafikha kihuma ku nyi ya Makedoniya. UPawulo wáyansa kimanyisa iLiswi lya Nguluvi uluhaavi lwakwe loona kwa Vayahuudi. Akhandi iikhoma kiija, uYeesu yu Mukulusaaji yuna uNguluvi wátahisaaga kimufilikha.#18:5 Mukulusaaji yuna uNguluvi wátahisaaga kimufilikha: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. 6Leelo aVayahuudi vamukhaana na kimuliga uPawulo. Baheene wákungʼuuna amankundi mu menda gaakwe,#18:6 Wákungʼuuna amankundi mu menda gaakwe: AVayahuudi vinshi pina vakhandi viiwuya kunyaanave, vakhandi vikungʼuuna amankundi ga nyi yina yisili ya Vayahuudi mu menda gaanave, kwa kiiva vayaagaga inyi iyinji kiiva nyaafu. UPawulo pina akhandi iigaha ndeeno, akhandi iwonensa kiija aVayahuudi ava, uNguluvi ikivaaga ngaja vasili vaanu vaakwe. wávajovela wáaja, “Nda uNguluvi avatove, maanyi yuumwe! Kusiina uwa kinipiikha one kwa liswi ilyo. Kihuma lino, nisiive niiluta kikhoma iMola iNofu kwa vaanu vina vasili Vayahuudi.”

7Baheene uPawulo wáwuukha mu nanda iya kifuunyila, wáhuluta mu nanda ya muunu yumonga ilitaawa lyakwe yu Tito Yusito, akhandi ihuviilila ilihuuvi ilya Shiyahuudi. Inanda iyo yikhandi yivejeleene ni nanda iya kifuunyila. Umo wáyitenekhaga kikhoma iMola iNofu ya Mutwa uYeesu. 8Umuyimililaaji wa nanda iya kifuunyila yila, yuna akhandi itambulwa Kilisipo, wámuhuviilila uMutwa uYeesu, lumo na vaanu woona mu nanda yaakwe. AVakolinto vinshi pina vakhandi vipulikha amaswi ga Pawulo, woope vakhandi vikigahuviilila na kitwinisiwa.

9Ilijuva limonga paashilo, uMutwa uYeesu wámujovela uPawulo mu mahilu wáaja, “Usikhatiilaga, uyitenekhaje kikhoma, usikhasisimaga. 10One nili lumo noowe. Kusiina umuunu yuna angakuyalushila kiija akulemase, kwa kiiva mu lijumbi ili, nivabagwile avaanu vinshi kiiva vahuvililaaji vangu.” 11Baheene uPawulo wáakhala mwakha gumo na meesi mutanda ku Kolinto, akhandi imanyisa avaanu iLiswi lya Nguluvi.

12Leelo uluhaavi luna uGaliyo akhandi mukhome wa nyi ya Akaya, aVayahuudi woona vamuyalushila uPawulo kwa numbula yimo. Vamukhata, vamutwala uluvala luna ihijila amakhole uGaliyo, 13vaajova, “Umuunu uyu ikivamanyisa avaanu kiija, vave vikimufuunya uNguluvi kwa nsila yinji yina yipungana ni ndaji seesu.”

14UPawulo pina isakula kilogola, uGaliyo wávajovela aVayahuudi wáaja, “Omwe Vayahuudi nda mwali mumusitaashe umuunu uyu kwa kiiva ya wunansi, awu kwa kiiva ya wuvi, naali nikwiliile kivapuliisa. 15Leelo, kwa kiiva mukhaanania ulwa maswi na mataawa mu ndaji seenyu, mugamale yuumwe. One nisigeene kiiva mulamulaaji wa njowo isi.” 16Baheene uGaliyo wálajisa avasulukhali kiija, vavadaje aVayahuudi awo vawuushe uluvala luna ihijila amakhole. 17Baheene avaanu vina vasikhandi Vayahuudi vina vakhandi pala, vamukhata uSositene,#18:17 USositene: Pamonga uSositene yuna itambulwa apa, yuyula yuna itambulwa mu litaafili lya 1 Vakolinto 1:1. umuyimililaaji wa nanda iya kifuunyila, vayansa kimutova panja bahala pina akhandi ihijila. Leelo uGaliyo asikhandi ihiiva hata padoodo ago gina vagahaga.

UPawulo iitina ku Antiyokiya ya ku nyi ya Siliya

18UPawulo wáyitenekha kikhala ku Kolinto nsiku nyinshi. Kuunyuma, wávahwesa avahuvililaaji vayine, wáaluta lumo nu Akila nu Pulisika mu lijumbi lya Kenikileya. Ukho, avaanu vamonga vamusheeta inyele#18:18 Vamusheeta inyele: AVayahuudi vakhandi viviikha uluyiigo kwa Nguluvi, vapelwagwa indaji kiija, vasikhasheetaga inyele ku mutwe mbakha pina vakwisa uluyiigo. Yimba mu litaafili lya Luvaso 6:1-21. saakwe uPawulo kwa kiwonensa kiija akhandi akwisiise uluyiigo lwakwe, baheene ava Pawulo vayangala ishipugo ishikhome sha kiluta ku Siliya. 19Vaganile kifikha ku lijumbi lya Efeso, uPawulo wávalekha uPulisika nu Akila kiija vakhale ukho. Wáhuluta mu nanda iya kifuunyila, wáakhoma iMola iNofu kwa Vayahuudi. 20Baheene vamulomba uPawulo kiija ayonjelese insiku isa kikhala kunyaanave, leelo wákhaana. 21Wávahwesa, wávajovela wáaja, “UNguluvi nda agane, nikhatina khanji kunyeenyu.” Baheene wáwuukha pala pa Efeso ni shipugo ishikhome.

22UPawulo wáganile kifikha ku lijumbi lya Kayisaliya, wáaluta ku Yelusalemu kivahunjila avahuvililaaji, baheene wáaluta ku Antiyokiya. 23Wáganile kikhala kwa luhaavi lufupi, wáwuukha, wáatina ku nyi ya Galatiya na ku nyi ya Filigiya, akhandi ikivajinia avahuvililaaji woona.

UApolo iikhoma ku Efeso

24Uluhaavi ulo, kukhandi kuna Muyahuudi yumonga, yuna akhandi itambulwa Apolo. Umuunu uyo wásawaagwa mu lijumbi lya Alekisandiliya. Uyo akhandi munya wumanyi wa kilogola, wámanyaga mandu aMayandikhwa aManofu. 25Khanji akhandi amanyisiiwe insila ya Mutwa uYeesu, akhandi imanyisa avaanu ulwa Yeesu kwa wugolofu, kiiva akhandi ana lihaahi mandu ilya kimanyisa, hata ave akhandi awumeenye uwutwiniaji uwa Yohana hela. 26Wáyinsaga ku Efeso, wáhuluta mu nanda iya kifuunyila, wáyansa kimanyisa iMola iNofu kwa wujimfu. UPulisika nu Akila, vaganile kipulikha amamanyiso aga Apolo, vamutoola, vaaluta na woope kunyaanave, vamumanyisa insila iyo iya Nguluvi, baheene ayimanye wunofu mandu.

27Kuunyuma, uApolo akhandi isakula kiluta ku nyi ya Akaya. Avahuvililaaji vayine vamujinia inumbula. Vavayandishila ibalula avahuvililaaji vayaanave ava ku Akaya, kiija vamuposheele wunofu. Wáganile kifikha kula, wávatanjilisa mandu vina vamuhuvililaga uYeesu kwa mota ya Nguluvi. 28Akhandi ikivamena aVayahuudi kwa ngufu mu lilugu lya vaanu, kwa nsila ya kivawonensa mu Mayandikhwa aManofu kiija, uYeesu yu Mukulusaaji yuna uNguluvi wátahisaaga kimufilikha.#18:28 Mukulusaaji yuna uNguluvi wátahisaaga kimufilikha: Kwa Shiyunaani yiyandiikhwe Kilisito.

Currently Selected:

Nsengo sa Vanandeje 18: Shisangu

Highlight

Copy

Compare