Nsengo sa Vanandeje 15

Ishiwungu ku Yelusalemu

1UPawulo nu Balinaaba pina vakhandi ku lijumbi lya Antiyokiya ya ku nyi ya Siliya, vayinsile aVayahuudi vamonga vahumile ku nyi ya Yudeya. Vayansa kivamanyisa avahuvililaaji vayaanave vina vasili Vayahuudi kiija, “Nda musiyinjisiiwe ijando#15:1 Musiyinjisiiwe ijando: Kwa Vayahuudi nda umwana uwa shigoosi asawe, ilisiku lya munaana kihuma asawe, vakhandi vidumula ulunsiita ulwa pashaanya ya wugoosi, kiwonensa ulufingo lwa Nguluvi kuveene. Yimba mu litaafili lya Shiyanso 17:9-14. kwa kiyinatila indaji sina uMusa wátuleshelaga, musikwiliile kikulusiwa.” 2Leelo uPawulo nu Balinaaba vasikhapulinkheene na Vayahuudi awo, vayansa kikhaanania mandu nawo. Kuwudugo, avaanu va shipuga sha vahuvililaaji ava ku Antiyokiya vaahumya uwulamulaaji kiija, avahuvililaaji vamonga valute ku Yelusalemu lumo nu Pawulo nu Balinaaba. Vakhandi visakula vapulinkhane amaswi ago na vanandeje na vayimililaaji va shipuga sha vahuvililaaji ava kula. 3Baheene avaanu awo ava shipuga sha vahuvililaaji ava ku Antiyokiya, vavafilikha uPawulo na vayine kiluta ku Yelusalemu. Woope vaashila mu nyi ya Foyinike ni ya Samaliya, vakhandi vikivajovela avahuvililaaji shina avaanu vina vasili Vayahuudi vamuhuvililaga uYeesu. Imola iso savashendefyaga mandu avahuvililaaji woona.

4UPawulo na vayine vaganile kifikha ku Yelusalemu, ishipuga sha vahuvililaaji, avanandeje na vayimililaaji vavaposheela wunofu. UPawulo na vayine vavajovela goona gina uNguluvi wágahaga kishilila kuveene. 5Leelo avahuvililaaji vamonga va shipuga sha Vafalisaayo vayiima, vaajova, “Yisakulwa vayinjisiwe ijando na kivalajisa kiyinatila indaji sa Musa.”

6Baheene avanandeje na vayimililaaji va shipuga sha vahuvililaaji, vaviikha ishiwungu, kiija vaseese wunofu iliswi ilyo. 7Avaanu awo vaganile kijovana kwa luhaavi lutali, uPetulo wáyiima, wávajovela wáaja, “Valukholo lwangu, omwe mumeenye kiija uluhaavi lumonga luna lwashilaga uNguluvi wánibagulaga kihuma munyeenyu, kiija nikhome iMola iNofu kwa vina vasili Vayahuudi kiija, vapulishe kishilila kunyangu na kimuhuviilila uMutwa uYeesu Kilisito. 8UNguluvi yuna iimanya goona gina gali mu numbula sa vaanu, awonensiise kiija avayitiishe vina vasili Vayahuudi kwa nsila ya kivapeela uNumbula uMunofu, ngaja shina atupeelile na yuuse. 9UNguluvi asibaniilila kunyeesu na kunyaanave, leelo woope ayosiise inumbula saanave kwa nsila iya kimuhuviilila uMutwa uYeesu. 10Lino, kwashi mukimujela uNguluvi kwa kivatwikha avahuvililaaji vina vasili Vayahuudi umunjeganjega ugwa kiyinatila indaji sa Musa? Avambuyeesu noose tagombolaga kisiyinatila. 11Ose tikiyihuviilila kiija kwa mota ya Mutwa weesu uYeesu mumwene tikulusiwa, ngaja shina woope vikulusiwa.”

12Baheene avaanu woona vina vakhandi pa shiwungu shila vasisima, vavapuliisa uBalinaaba nu Pawulo pina vikivajovela shina uNguluvi akhandi iigaha amiitu na mabikha minshi kishilila kwa veene kwa vina vasili Vayahuudi. 13Vaganile kimala kilogola, uYaakobo wáaja, “Valukholo lwangu, mupulisaaje! 14USimoni#15:14 USimoni: Ilitaawa ilinji wátambulwagwa, Petulo. wátujovela shina uNguluvi wávalavilaga vina vasili Vayahuudi ukho kunyuma, wávabaagula avanji vave vavanda vaakwe. 15Ago gikundana na gina gayandiikhwe mu mataafili ga vakuwamalago kiija,

16‘UMutwa uNguluvi wájovile ndeeni,

“Pina gakhasa kishila ago, nikhatina,

nikhawunosa khanji uwutwa wa Dawudi wuna wugwile.

Nikhasenga wupya amapagale gaakwe,

na kigayiimya.

17Baheene avaanu avanji woona,

vala vina vasili Vayahuudi,

vina nivashemeelile,

vakhanisakula one Mutwa.”

Shiisho ndeeno ilogola uMutwa uNguluvi,

yuna agahile aga,’#15:16-17 Yimba mu litaafili lya Amosi 9:11-12.

18amaswi gina gamanyikhaga kihuma ulwamwandi.”

19UYaakobo wáyitenekha kilogola kiija, “Ndeeno, one naawona tisikhavalafyaga avaanu vina vasili Vayahuudi, vina vikimusetushila uNguluvi. 20Leelo tisakulwa kivayandishila ibalula iya kivajovela kiija, vasikhaliisaga ifyakiilya fina fihumisiiwe ku mafuunyo ga manguluvi, vasikhagahaga uwushemi, vasikhaliisaga inyama ya nkhanu yina vakhomwele,#15:20 Inyama ya nkhanu yina vakhomwele: AVayahuudi vakhandi ni ndaji sa Musa kiija, vina vishinja inkhanu, vashinje, idanda yikunushe. Yimba mu litaafili lya Njowo sa Valaawi 17:13-14. awu kiilya idanda. 21Tigahe ndeeno, kwa kiiva kihuma pawukuulu, aVayahuudi vakhandi viikhoma indaji sa Musa mu majumbi goona na kisiyimba mu nanda sa kifuunyila insiku soona isa Sabaato.”

Ibalula kwa vahuvililaaji vina vasili Vayahuudi

22Baheene avanandeje, avayimililaaji ni shipuga sha vahuvililaaji woona ava ku Yelusalemu valamula papaamo kiija, vavabaagule avamonga mu veene vina vasiilute lumo nu Pawulo nu Balinaaba ku lijumbi lya Antiyokiya. Vavabaagula avalongosaaji vavili, yumonga akhandi yu Yuuda yuna wátambulwagwa Balisaba, uyunji akhandi yu Siila. 23Vavafilikha ni balula yina yiijova,

“Ose vanandeje lumo na vayimililaaji va shipuga sha vahuvililaaji, ose tili vayeenyu, tikivahunjila omwe mu vayeesu muna musili Vayahuudi muna muli mu lijumbi lya Antiyokiya, mu nyi ya Siliya, na mu nyi ya Kilikiya. 24Tipuliishe kiija avayeesu vamonga kihuma kunyeesu vavajovelaga imola isa kivalafya, inumbula seenyu sisugumiilwe, leelo ndaali tisili yuuse tavafilikhaga. 25Lumo na ago, tayitinkhanaga kiija tivahaagule avaanu vina tisivafilishe kunyeenyu, vayinse lumo na vagani veesu uBalinaaba nu Pawulo. 26Awo vayihumiise mandu kimusenjela uMutwa weesu uYeesu Kilisito, hata vayitiishe kiifwa kwa kiiva ya mwene.

27“Baheene lino, vina tikivafilikha kunyeenyu, uYuuda nu Siila. Vaveene vasivajovele aga gina tiyandiishe. 28UNumbula uMunofu noose, taawona lunofu kiija, tisikhavatwikhaga umusigo ugunji kishila indaji isi isa Vayahuudi sina musakulwa kisiyinatila. 29Musikhaliisaji ifyakiilya fina fihumisiiwe ku mafuunyo ga manguluvi, musikhaliisaji idanda, awu inyama ya nkhanu yina vayikhomwele, khanji musikhagahaji uwushemi. Nda musiigaha ago, baheene musiive mwigaha wunofu. Tikhatangaana.”

30Vaganile kihwesania na vala vina vavafilikha, uPawulo na vayine vaaluta ku lijumbi lya Antiyokiya. Vashikungaania ishipuga sha vahuvililaaji, vavapeela ibalula yila. 31Umuunu yumonga pina wávayimbilaga avahuvililaaji imola iso, avaanu vashendeevaga na kikhangasiwa inumbula.

32UYuuda nu Siila woope vakhandi vakuwamalago. Vavajovela avahuvililaaji vayaanave imola nyinshi isa kivakhangasa inumbula, na kivajinia. 33Vaganile kikhala kula kwa luhaavi, avahuvililaaji va ku Antiyokiya vavatawula valute kwa wulindamafu, kiija vatine kwa vala vina vavafilikhaga. [34Leelo uSiila wáawona kiija, lunofu asigale kukula.]#15:34 Amaswi aga, gakusiina mu mayandikhwa agamonga amakuulu. 35UPawulo nu Balinaaba vasigala ku Antiyokiya, aveene na vaanu avanji vinshi, vakhandi vimanyisa na kikhoma iMola iNofu iya Mutwa uYeesu.

UPawulo nu Balinaaba vibagunkhana

36Uluhaavi lwaganile kishila, uPawulo wámujovela uBalinaaba wáaja, “Titine shila lijumbi lina takhomaga iMola iNofu iya Mutwa uYeesu, baheene tiloleele shina vikiyitenekha avahuvililaaji vayeesu.” 37UBalinaaba akhandi isakula kiija, valute lumo nu Yohana Maluko. 38Leelo uPawulo wáawona lusili lunofu kiija valute lumo nu Yohana Maluko, kwa kiiva umwene wávalekhaga ku nyi ya Pamufiliya, wákhaana kiyitenekha kisenga insengo lumo na woope. 39Baheene kwava kuna makhaananio mandu, vabagunkhana. UBalinaaba wámutoola uYohana Maluko, vayangala ishipugo shikhome vaaluta lumo ku shigunguli sha Kipulo. 40UPawulo wámubaagula uSiila. Pina asinawuushe nawo, avahuvililaaji vayaanave vamulomba uMutwa uYeesu ayiteneshe kivapeela imota yaakwe. 41Wáashila mu nyi ya Siliya ni ya ku Kilikiya, ikivajinia avahuvililaaji va Yeesu.

Currently Selected:

Nsengo sa Vanandeje 15: Shisangu

Highlight

Copy

Compare