Nsengo sa Vanandeje 14

Avaanu ava ku Ikoniyo vibagunkhana fipuga fivili

1UPawulo nu Balinaaba pina vakhandi ku lijumbi lya Ikoniyo, vayinjila mu nanda iya kifuunyila iya Vayahuudi ngaja shina yikhandi ngʼoma yaanave. Ku Ikoniyo ukho, gasenjekhaga gagala gina gasenjekhaga ku Antiyokiya ya ku Pisidiya. Vavamanyisa avaanu umo imola sa Yeesu kwa ngufu. AVayahuudi vinshi mandu, lumo na vaanu vinshi vina vasili Vayahuudi, vamuhuviilila uYeesu. 2Leelo aVayahuudi vamonga vina vakhaanaga kimuyiitikha uYeesu, vayansa kivahonsa vina vasili Vayahuudi na kivaseetula inumbula saanave kiija, vavakhalalile avahuvililaaji. 3Hata ndeeno, uPawulo nu Balinaaba vaakhala nsiku nyinshi ku Ikoniyo, vaava vikivajovela avaanu imola isa mota ya Yeesu kwa wujimfu. UMutwa uYeesu akhandi iwonensa kiija amaswi gaanave ga shiyooli, kwa nsila ya kivapeela ingufu isa kigaha amiitu na mabikha minshi. 4Avaanu va mu lijumbi lila vabagunkhana, avanji vaava ulubali lwa Vayahuudi, avanji vaava ulubali lwa vanandeje.

5Kuwudugo, aVayahuudi na vayimililaaji vaanave, lumo na vaanu vina vasili Vayahuudi, vapulinkhana kivagahila fivi na kivahuda na mangʼanga uPawulo nu Balinaaba. 6Avanandeje vaganile kimanya shina vapulinkheene, vasijila mu nyi iya Likayoniya, umo vaaluta mu lijumbi lya Lisitila ni Delibe, na mu majumbi gina gali nkholeela. 7Shila luvala vakhandi vikivakhoma avaanu iMola iNofu.

UPawulo nu Balinaaba ku Lisitila

8Mu lijumbi lya Lisitila, mukhandi nu muunu yumonga yuna akhandi mulema amagulu kihuma asawe, asikhajendile hata lisiku limo. 9UPawulo pina akhandi apilogola, umuunu yula woope wákhalaga bahala ikimupuliisa. UPawulo wámuhonekha umuunu yula, wámwaga kiija ana lihuuvi ilya kiponisiwa. 10UPawulo wákhoosa ishawuti wáaja, “Uyiime kwa magulu gaakho!” Baheene umuunu yula wáyiima nyangu, wáyansa kijenda yumwene.

11Avaanu vina vakhandi vakungaanile pa lilugu lila, vaganile kimwaga uPawulo shina wámuponia umuunu yula, vayansa kilyova ilyowo kwa shilogolo shaanave isha Shilikayoniya vaaja, “Amanguluvi gatuyiishila kwa shihwano sha vaanu!” 12Vamupeela uBalinaaba ilitaawa ilya munyaayumo wa manguluvi gaanave vaajova yu Sewusi. UPawulo, vamupeela ilitaawa ilya Helime,#14:12 Sewusi: Mu manguluvi ga Vayunaani, uSewusi yumwene akhandi mukhome kishila avayine woona nu Helime akhandi mukuwamalago na mulogolaaji waakwe. kwa kiiva uPawulo yumwene akhandi mulogolaaji mandu. 13Uluvala lwa lilonjelo lya Sewusi lukhandi kunja ya lijumbi. Baheene umutambule wa Sewusi wáleeta ingʼombe sivili, ni njoola sina vatavile na makogo pa shikwilo sha lijumbi. Umutambule lumo na vaanu vakhandi visakula kimushinjila uPawulo nu Balinaaba ingʼombe igida iso, sive shadanda.

14Vaganile kipulikha ago avanandeje uBalinaaba nu Pawulo, vadeemula amenda gaanave kiwonensa shina vingʼuula. Vaasiga, vayinjila mu lilugu lya vaanu, vakhoosa ishawuti vaajova, 15“Omwe vagoosi! Kwashi mwisenga aga? Ose tili vaanu ngaja omwe! Tili apa kikhoma iMola iNofu, kiija muleshe kigafuunya amanguluvi gina gasitanga shiinu, muveesaje vaanu va Nguluvi yuna muumi, yuna wáwumbaga uwulanga, inyi, ibahali na fyona fina fikwali umo. 16Insiku sa paanyuma uNguluvi wávalekhaga avaanu woona vina vasili Vayahuudi vayitenekhaje kiyinatila gala gina visakula aveene. 17Hata ndeeno, asikhaleshile kiwonensa kiija ali lumo nawo kwa kivagahila amanofu. UNguluvi yumwene ikivaleetela inoonya kihuma kushaanya kiija, muve ni shakiilya kwa luhaavi luna lufwaya. Umwene ikivapeela uwinshi wa fyakiilya na kishendeefya mandu mu numbula seenyu.” 18Hata nda uPawulo nu Balinaaba vajovaga amaswi ago, yikhandi lukhamu kilisivila ililugu lya vaanu kiija, vasikhahumyaga ishadanda kunyaanave.

19Kuunyuma vayinsaga aVayahuudi vamonga vina vahumile ku Antiyokiya na ku Ikoniyo. Vavahonsa avaanu vave lubali lwanave, woona vamuhuda uPawulo na mangʼanga. Vamuduluuna, vamutwala kunja ya lijumbi, kwa kiiva vahiivile kiija afwile. 20Leelo avamanyisiwa pina vamupiliime uPawulo, wálamukha, wáawuya mu lijumbi. Kwaganile kiisha, wáwuukha apo, wáaluta lumo nu Balinaaba mu lijumbi lya Delibe.

UPawulo nu Balinaaba viiwuya ku Antiyokiya ya ku nyi ya Siliya

21UPawulo nu Balinaaba, pina vakhandi vali ku lijumbi lya Delibe, vakhandi vikivakhoma avaanu iMola iNofu, vinshi vaseetukha vaava vahuvililaaji va Yeesu. Kuunyuma vaawuya ku Lisitila, Ikoniyo na ku Antiyokiya ya ku nyi ya Pisidiya. 22Kokoona kuna vakhandi viiluta, vakhandi vikivajinia inumbula avahuvililaaji na kivakhangasa vakhalaje mu lihuuvi. Vakhandi vikivajovela kiija, “Kiyinjila mu Wutwa wa Nguluvi, yisakulwa kishilila mu malava minshi.” 23UPawulo nu Balinaaba vakhandi vikivabaagula avayimililaaji va kiyimiilila ifipuga fya vahuvililaaji woona. Vavaviikhaga kwa Mutwa uYeesu kwa nsila ya kilekha kiilya kwa kiiva ya kivafuunyila.

24Kuunyuma uPawulo nu Balinaaba vaashila mu nyi ya Pisidiya, vayinjila ku nyi ya Pamufiliya, 25vaafikha ku lijumbi lya Pelige. Vaganile kivamanyisa imola sa Nguluvi ukho, vaaluta mu lijumbi lya Ataliya. 26Vawuukha pala kwa shipugo ishikhome, vaaluta khanji ku Antiyokiya ya ku nyi ya Siliya. Apo baheene ishipuga sha vahuvililaaji, shikhandi shikivafuunyila imota ya Nguluvi kwa nsengo yina vaava vayimalile. 27Vaganile kifikha ku Antiyokiya, vashikungaania ishipuga sha vahuvililaaji. Vavajovela goona gina uNguluvi wágahaga kishilila kunyaanave, na shina wávadindulila vina vasili Vayahuudi umulyango gwa kimuhuviilila uYeesu. 28Vakhalaga nsiku nyinshi ku Antiyokiya lumo na vahuvililaaji va Yeesu.

Currently Selected:

Nsengo sa Vanandeje 14: Shisangu

Highlight

Copy

Compare