Apocalipsis 10

Juan, ángelso̧ ömamunö ösöja ja'yuwöja, 'bo̧dawöja do̧ba̧lo̧nö edina wene

1Ikenama ju'wi i̧sebi̧ma chedijatö. Ja̧danö, mölejȩbetjö jwibacho̧ ángel, jwiinö juluwo̧nö chedijatö. Jo̧bama ojwiyo'wo lö̧ökwe. Ja̧danö, uu wamema mayo ö̧lökwe. Ja̧danö, jo̧ba ángel öbama ja̧wo̧danö dewinö dejato̧. Isȩ'biju salöbo̧, okwi'iju ubi̧ o'ijudanö. 2Jo̧ba ángelma ömamunö ösöja ja'yuwöja, 'bo̧dawöja do̧ba̧lo̧. Jo̧bama ömasapa öwaisobekwöchobesapanö ojwe nöödönö, ja̧danö, wajwiobekwöchobesapama nijinö öja̧ta̧lobe chedijatö. 3Ja̧danö, jo̧ba jwöi̧ma labinö, didiba jwöi̧ ökwöi̧danö cha̧ja̧kwijatö. Ja̧danö, jwöawö̧ma jelemutjö du̧ju̧tajanö böbadö tjökwödi̧danö tjatadobe cha̧ja̧kwijatö. 4Jobadö tjökwödi̧ma, Chiwȩyudo, jö̧ta̧lemi, mölejȩbetjö iwene ökwöi̧ cha̧ja̧kwijatö:

—Ja̧ tjökwödi̧ wanekwachi̧ma jojodö tjöwaisoböma jwiobe. Wȩyudökönuwi— ökwöi̧ cha̧ja̧kwijatö. 5Ikenama jo̧ba juluwo̧ ángelma, ojwe nöödönö, nijinö ja̧ta̧lö jo̧ma, ömamu öwaisobekwöchobesamunö mölejȩkwö kaebobe chedijatö. 6Jejenö, ömamu kabebö, debö yöawijatö:

—Ötjö yötawi̧ma, Dios iminö isabenö yötawa. Ba̧kwȩlö̧jatebö Jo̧, mölejȩbi, böjȩbi, ojwe nöödöbi otidina iminö isabenö yötawa. Jo̧bama okobe jwiinö otidinobe, mölejȩ jawabi, böjȩ jawabi, ojwe nöödö jawabi. Ja̧danö, okobe deinö mölejȩnö ju̧kwadönöbi, böjȩnö ju̧kwadönöbi, ojwe nöödö okwanö ju̧kwadönöbi otidinobe. Jo̧ba iminöda isabenö yötawa: Tjo̧wi̧ta. Dios ite'ada̧li̧ma 'dö̧ibajabe. 7Isabenö yötawa, jemi ikena trompeta pjubo̧ pjuenama, Dios ajayinö omukwatina badekwachakobe, ajayinö tojö ujuninama, damötjö iteda yöawi̧ yöbawadönö yöawinama— yöawijatö juluwo̧ ángelma.

Mölejȩbetjö iwene ökwöi̧ Juannö weina wene: —'Ya̧wibö emaji ösöja 'bo̧dawöja ángel ömamutjö— jö̧ba̧lö

8Ikenama mölejȩbetjö iwene ökwöi̧ cha̧ja̧kwijatö, yemidanö ötjönö webö:

—Juan, 'ya̧wibö emaji ösöja 'bo̧dawöjama, ojwe nöödönö, nijinö ja̧ta̧lö jo̧ ángel ömamutjö— wei̧ cha̧ja̧kwijatö. 9Jejenö weitjö̧ ángel ö̧jobekwö 'ya̧wibö atebijatö:

—Böja ja'yuwöja iyitjö— atebijatö. Jejenö atebökwe ötjönö jö̧a̧lijatö:

—Böja do̧batö kwidi. Kwukwenama kwukwa'wo okwama yelösöda leakobe. Jo̧kwaijayonö kwaa okwama o̧takobe, wa̧yo̧ jwiinö o̧ti̧danö— jö̧a̧lijatö. 10Jejenö jö̧a̧litjö̧ ösöja ja'yuwöja, ángel ömamutjö emö chukwijatö. Chukwemi wa̧yo̧ o̧ti̧danö o̧tijatö chaanöma. Jo̧kwaijayonö chukwa'wo okwa bamatenama leinö baibijatö. 11Ikenama juluwo̧ ángelma ötjönö yöawijatö:

—Ökwöma Dios yöawi̧ yökawobö jo̧be, iteda ja̧akwa̧ma. Okobe deinö jojodönö, jelobebi, jelobe ju̧kwadönöbi, wainökwena tjiwene yöba̧ladönöbi, la'aka luwedönöbi yökawobö jo̧be, Juan— yöawijatö ötjönöma.

Currently Selected:

Apocalipsis 10: WPC

Highlight

Copy

Compare