Proverbios 9
9
Jweinö omukwatö ja̧kwawa wanekwachuju wajwibadönö jejube kwanö tjichobö ja̧debina jawa
1Baikwö laebobe Salomón wanedö yöawina jawa, jweinö omukwatö ja̧kwawa wanekwachujunö wanedö:
Jweinö omukwatö ja̧kwawa wanekwachujuma o̧do otiduju, isuda jejuma. Ja̧danö, okwi'iju, jelemutjö̧ do'olataja o'iju jujunobö löbuju, mö yöeba̧li̧ okwi'iju. 2Ikenama ja̧jwi̧mu̧tjö̧ ju'wedönö kwajajawö̧ tjitebiya söbuju tjukwakwa̧ma. Ja̧danö, ubasobu o̧'do̧bukwö söinö 'dö̧ekwi̧ so̧pja̧kwö bakobe wiwodö otiduju. Jotidaja̧ ikena kwakwawa mesasötenö junuju.
3Jemi ikenama jweinö omukwatö ja̧kwawa wanekwachujuma jömöayedö ya̧dönö webuju jejutjö labebö comunidad tjöekwemi mö nöchachibö ja̧nö jojodönö jwötjobö, baikwö:
4— Ökwödö, wajwibadöma ichaduwi tekachaduwo jweinö omukwatö ja̧kwawa jojosuju jejube. Jobujuma ökwödö omukwatöködönö ja̧debobe, Ichaduwi tekachaduwo, jö̧ba̧lö. 5Duluwuju jweinö omukwatö ja̧kwawa jujuma ökwödönö ja̧debobe, Ötjö sötaja̧ kwakwawa kukwaduwo tebachaduwi, ja̧danö ubasobu o̧'do̧bu, söi̧ so̧pja̧ pjabatö chotidajobuma kwowaduwo tebachaduwi, jö̧ba̧lö.
6Ja̧danö, duluwuju jweinö omukwatö ja̧kwawa jojosujuma ökwödönö baikwö jwebebö yöbawuju:
—Ökwödö ajayinö wajwibö kwö̧jinaduwa kabatibö kwöbalewachaduwo otiwanö kwö̧jaduwakobetjö̧. Jobekwö kwö̧jaduwo kwöwaisaduwakobetjö̧ di̧ya sulojobö jö̧ba̧lö, di̧ya otiwojobö jö̧ba̧lö — jobekwö jwebebö yöbawuju jweinö omukwatö ja̧kwawa jojosujuma ökwödönöma, ichaduwi tekachaduwo jö̧ba̧lö—
jobekwö yötjawinobe jweinö omukwatö ja̧kwawa wanekwachuju jömöayedö ya̧döma.
Salomón ju'wi wanedö yöawina jawa
7Baikwö laebobe Salomón wanedö yöawina jawa:
—Chömöledö, bakwo̧ma ju'wedönö sulabenö obo̧ma jo̧banö jwebebö yötjawi̧ma öpöjödo̧. Isabenö, jo̧banö jwebebö yöbawo̧nö labinö, sulabenö atado̧.
Ja̧danö, sulabenö omukwatö ja̧bo̧nö jwebebö yötjawena nöinö ölabobe. Isabenö, jo̧banö jwebebö yöbawo̧nö kwakwaena, 'do'doena, nöinö ölabobetjö̧.
8Jo̧kwaobetjö̧, jwebebö yötawaduwakwö: Jelo̧nö edö obo̧nöma jwebebö yökawaduwoko, o̧'wo̧ sulinö edöda ökwödönö jwiinö öpöjödakwo̧. Jo̧banö jwebebö yökawaduwoböma jwiyobe.
Jobekwö omukwatokobe jweinö omukwato̧ma. Jweinö omukwato̧nö jwebebö yökawaduwitjö̧ma ökwödönöma otiwanö edö ösödakwo̧, otiwanö pjakataduwobe, jö̧ba̧lö. 9Isabenö, jweinö omukwatö jo̧nö jwebebö yökawaduwitjö̧ma jweinö omukwatemitjö̧ bajalekwönönö jweinö omukwatakwo̧. Ja̧danö, Dios wei̧ a̧ja̧kwö jo̧nöbi pjabatö yökawaduwitjö̧ma öwaisemitjö̧ bajalekwönönö öwaisachibakwo̧.
10Ja̧danö, ju'wibi yötawaduwakwö:
Jweinö omukwatö kwö̧jaduwobö kwösödaduwitjö̧ma abönö baikwö kwomukwataduwobö jo̧be: Isabenö Jo̧nö yebabinö kwomukwataduwobö jo̧be, ökwödaja, jö̧ba̧lö. Ju'wibi yötawaduwakwö: Diosnö, Suli̧ Jwibo̧nö kwöwaisaduwitjö̧ma di̧ya sulojobö jö̧ba̧lö, di̧ya otiwojobö jö̧ba̧lö kwöwaisaduwakwedöja.
11Isabenö yötawa: Jweinö omukwatö kwö̧jaduwitjö̧ma lekwe kwö̧jaduwena. 12Jao chömöledö, jweinö omukwatö kwö̧jaduwitjö̧ma otiwanö kwö̧jaduwakwedöja. Jobekwö kwö̧jaduwokobe jweinö omukwatö ja̧kwawa yötjawi̧ kwöpöjödaduwitjö̧ma. Isabenö, jweinö omukwatö ja̧kwawa yötjawi̧ oböda kwöpöjödaduwitjö̧ma usula kwemawaduwakwedöja— jobekwö yöawinobe Salomónma.
Salomón wanedö yöawina jawa, sulabenö obuju ömadönö jejube tjichobö a̧debuju jobujukwö tjö̧jobö, jö̧ba̧lö
13Salomón wanedö yöawinama baikwö laebobe:
Jweinö omukwatökujuma ¿dakwö jujuda? Yötawaduwakwö: Jobuju jweinö omukwatökujuma labinö yöba̧luju, ja̧danö wajwibuju jweinö omukwatö jö̧joböma. Yelösöda ja'yubebi do̧batökuju jweinö omukwatö ja̧kwawa yötjawi̧ma.
14Ja̧danö, jeju apjude la'aka ba̧nö, ja̧danö comunidad tjöekwena wame ja̧nöbi 15jwöbeabuju jobe baledadönö, idöda jawa omukwatö baledadönöma. Jobujukwö bakobe tjö̧jobö jwöbeabuju ömadönöma.
16Baikwö jwöbeabuju wajwibadönöma:
— Ökwödöma baikwö ichaduwi chejube tekachaduwo— jö̧ba̧lö—. 17Jwiinö kwösödaduwena kwilekwobö̧kujukwö kwö̧jaduwoböma. Ojwiyo kwönaukwaja̧duwobu o̧tobudanö o̧tena kwilekwobö̧kujukwö kwö̧jaduwi̧ma. Ja̧danö, ju'wedöma tjedokonö emiba pan jo̧dawa'ye kukwi̧ pan söi̧danö söena kwilekwobö̧kujukwö kwö̧jaduwi̧ma, ichaduwi— jwöbeabuju sulabenö obujuma.
18Ja̧danö, ömadötjö ju'wedöma tjösödobe jobuju ja̧debi̧ a̧ja̧kwö. Tjösödijayonö wajwitjobe jobujukwö tjö̧ji̧ma yelösöda labobe. Wajwitjobe jejube tebachadöma debö tji̧'yakwedö. Jao, jejube tebachadöma wobinadö tjuju̧kwobekwö debö tji̧'yakwedöda, böjȩ teebe jwiinö da̧kwobekwö. Yelösöda labobe jobuju sulabenö obujukwö tjö̧ji̧ma.
Currently Selected:
Proverbios 9: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
