Josué 19
19
Simeonsaso jojodö tjitebo baibanö 'da̧batö wetjina jawa
1Ja̧danö, yemidanö Dios öba a'otjö inawiya jabö tjedenama, Simeonsaso jojodö tjitebo baibanö 'da̧batö wetjobö badekwachinobe. Ja̧danö, Dios —Chiyocha, —jö̧ba̧lö yöbawö ujunina badekwachinö, Simeon i̧tji̧mu tupadanö jojodö bakwasokwena tjitebo baibanö 'da̧batö wetjinobe, baikwö: Simeon nijima, juda niji okwa ö'wejenö ji̧nobe. Juda nijima jwiinö jalobetjö̧, ja'ö 'da̧batö junö Simeonsaso jojodö tjitebo baibanö wetjinobe. 2Ja̧danö Simeon niji comunidadbiyama, baikwö laebobe, Berseba ju'wi imi Saba comunidadbi, Molada comunidadbi, 3Jazar Sual comunidadbi, Bala comunidadbi, Esen comunidadbi, 4Eltolad comunidadbi, Betul comunidadbi, Jorma comunidadbi, 5Siclag comunidadbi, Bet Marcabot comunidadbi, Jazar Susa comunidadbi, 6Bet Lebaot comunidadbi, Sarujen comunidadbi. Ja̧ a̧li̧nösamutjö wapötakwa comunidadbi, ö'öbö pjei̧ comunidadteniabi, Simeonsaso tjitebo comunidad ji̧nobe. 7Ju'wi Simeon niji comunidadbiyama baikwö laebobe: Ayin comunidadbi, Rimon comunidadbi, Eter comunidadbi, Asas comunidadbi. Ja̧ ö'wejemu jawa comunidadbi, ö'öbö pjei̧ comunidadteniabi, Simeonsaso tjitebo comunidad ji̧nobe. 8Ja̧danö, ju'wibi, jobetjö Balatber, ju'wi imi Neguev niji Ramat comunidad ö'öböbe ichibanö, okobe jwiinö ja̧ niji pjei̧ comunidadteniabi Simeonsaso niji ji̧nobe. Jobekwö laebobe Simeon itji̧mu tupadanö jojodö tjitebo baibanö niji 'da̧batö wetjinama. Damötjö Dios chiyocha jö̧ba̧lö tja'dödönö yöbawö ujunina wene badekwachinö, jejenö Dios wei̧danö 'da̧batö wetjinobe.
9Ja̧ Simeon niji Juda niji ö'wejenö ji̧ labebö loawama, baikwö laebobe. Judasaso jojodönö ajayinö 'da̧batö wetjina nijima, yelösöda jalinemi judasaso jojodöda jobe tjö̧joböma, jo̧kwajabetjö̧ ja̧ niji ja'ö Simeon niji baibanö 'da̧batö wetjinobe. Jo̧kwajabetjö̧ simeonsaso nijima, judasaso niji ö'wejenö ji̧nobe.
Zabulonsaso jojodö tjitebo baibanö 'da̧batö wetjina jawa
10Ja̧danö, wapötakwanö baibanö yemidanö inawiya jabö tjedenama, Zabulon jojodö tjitebo baibanö 'da̧batö wetjobö badekwachinobe. Ja̧danö, Dios chiyocha jö̧ba̧lö yöbawö ujunina badekwachinö, Zabulon i̧tji̧mu tupadanö jojodö bakwasokwena tjitebo baibanö 'da̧batö wetjinobe, baikwö: Zabulon niji a̧likwöchobe bakwachobema, Sarid comunidadtjö jamatobe. 11Ja̧danö Saridtjö, jawo̧ meajobekwö bajalenö dötewobe bakwachobema, Marala comunidadbe ichibanö, ja̧danö jobetjö Dabeset comunidadbe ichibanö, ja̧danö tupakwö bajalenö Jocnean comunidad badeibösödö ojwebe ichibanö. 12Ja̧danö Zabulon niji jawo̧ laebobekwö bakwachobema, baikwö laebobe: Sarid comunidadtjö jawo̧ laebobekwö dötewobe bakwachobema, Quislot Tabor comunidadbe, ja̧danö jobetjö tupakwö bajalenö Daberat comunidadbe, ja̧danö jobetjö Jafia comunidadbe dötewobe Zabulon niji bakwachobema. 13Ja̧danö Jafiatjö, jawo̧ laebobekwö dötewobe bakwachobema, Gat Jefer comunidadbe, ja̧danö jobetjö Itacasin comunidadbe, ja̧danö jemi tupakwö Rimon comunidadbe ichibanö. Ja̧danö, Rimontjö jawo̧ meajobekwö bajalenö dötewobe Zabulon niji bakwachobema, Nega comunidadbe ichibanö, 14ja̧danö Negatjö u'dakwö bajalenö dötewobe, Janaton comunidadbe ichibanö ja̧danö jobetjö Jeftel wabekobe ichibanö. 15Ja̧danö, Catat comunidadbi, Nalal comunidadbi, Simron comunidadbi, Idala comunidadbi, Belen#19:15 Dötölataja comunidadma Belen mikwinobe, Juda niji comunidad Belenbi, Zabulon niji comunidad Belenbi. comunidadbi, Zabulon nijinö ji̧nobe. Ja̧ jelemutjö dötölataja comunidadbi, ö'öbö pjei̧ comunidadteniabi Zabulonsaso niji ji̧nobe.
16Jobekwö laebobe Zabulon itji̧mu tupadanö jojodö tjitebo baibanö niji 'da̧batö wetjinama. Damötjö Dios chiyocha jö̧ba̧lö tja'dödönö yöbawö ujunina wene badekwachinö, jejenö Dios wei̧danö 'da̧batö wetjinobe. Ja̧ comunidadbiyabi, ö'öbö pjei̧ comunidadteniabi, Zabulonsaso jojodönö wetjinobe, tjitebo baibanö.
Isacar jojodö tjitebo baibanö 'da̧batö wetjina jawa
17Ja̧danö, ö'wejemu jawa baibanö yemidanö inawiya jabö tjedenama, Isacarsaso jojodö tjitebo baibanö 'da̧batö wetjobö badekwachinobe. Ja̧danö, Dios chiyocha jö̧ba̧lö yöbawö ujunina badekwachinö, Isacar i̧tji̧mu tupadanö jojodö bakwasokwena tjitebo baibanö 'da̧batö wetjinobe, baikwö: 18Isacar niji comunidadma, Jezrel comunidadbi, Quesulot comunidadbi, Sunen comunidadbi, 19Jafarayin comunidadbi, Sijon comunidadbi, Anajarat comunidadbi, 20Rabit comunidadbi, Cison comunidadbi, Abez comunidadbi, 21Remet comunidadbi, Enganin comunidadbi, Enada comunidadbi, Bet Pases comunidadbi. 22Ja̧danö Isacar niji bakwachobe ji̧ comunidadma, Tabor comunidadbi, Sajasima comunidadbi, Bet Semes comunidadbi. Ja̧danö jawo̧ laebobekwö Isacar niji bakwachobema, Jordan ojwe. Ja̧ a̧li̧nösamu jelemutjö bakwöta comunidadbi, ö'öbö pjei̧ comunidadteniabi, Isacarsaso niji ji̧nobe.
23Jobekwö laebobe Isacar itji̧mu tupadanö jojodö tjitebo baibanö niji 'da̧batö wetjinama. Damötjö Dios chiyocha jö̧ba̧lö tja'dödönö yöbawö ujunina jawa badekwachinö, jejenö Dios wei̧danö 'da̧batö wetjinobe. Ja̧ comunidadbiyabi, ö'öbö pjei̧ comunidadteniabi, Isacarsaso jojodönö wetjinobe, tjitebo baibanö.
Aser jojodö tjitebo baibanö 'da̧batö wetjina jawa
24Ja̧danö, bakwamu jawa baibanö yemidanö inawiya jabö tjedenama, Asersaso jojodö tjitebo baibanö 'da̧batö wetjobö badekwachinobe. Ja̧danö, Dios chiyocha jö̧ba̧lö yöbawö ujunina badekwachinö, Aser i̧tji̧mu tupadanö jojodö bakwasokwena tjitebo baibanö 'da̧batö wetjinobe, baikwö: 25Jelcat comunidadbi, Jali comunidadbi, Beten comunidadbi, Acsaf comunidadbi, 26Alamec comunidadbi, Amad comunidadbi, Miseal comunidadbi, Aser niji bakwachobe ji̧ comunidad ji̧nobe. Ja̧danö jawo̧ meajobekwö, Aser niji bakwachobema Carmel mösa'obebi, Sijor Libnatbebi dötewinobe, 27ja̧danö jobetjö jawo̧ laebobekwö bajalenö Bet Dagon comunidadbe dötewinobe, ja̧danö jemi tupakwö Zabulon niji bakwachobe ichibinö. Ja̧danö u'dakwö bajalenö, Jeftel wabekobe ichibanö dötewobe Aser niji bakwachobema, ja̧danö jobetjö Bet Emec comunidadbe ichibanö, ja̧danö Neyel comunidadbe ichibanö. Ja̧danö jobetjö u'dakwö bajalenö Cabul comunidadbe ichibanö, 28ja̧danö jemi tupakwö Abdon comunidadbebi, Rejob comunidadbebi, Hamon comunidadbebi, Cana comunidadbebi dötewinobe Aser niji bakwachobema, bajalianö inesö jalobe comunidad Sidon #19:28 Sidon comunidadma israel jojodö tjitebomaökö, ju'wedö tjitebo comunidad.ö'öböbe ichibanö. 29Ja̧danö jobetjö Rama comunidad jo̧bekwö bajalenö dötewobe bakwachobema, 'diinö tjöekwobe Tiro comunidad ö'öböbe ichibanö. Ja̧danö jobetjö Josa comunidad jo̧bekwö dötewobe Aser niji bakwachobema, bajalianö jwaibalawabe ichibanö. Ja̧danö ju'wi Aser niji comunidadma, Majaleb comunidadbi, Aczib comunidadbi, 30Uma comunidadbi, Afec comunidadbi, Rejob comunidadbi. Ja̧ veinte y dos comunidadbi, ö'öbö pjei̧ comunidadteniabi, Aser niji comunidad ji̧nobe.
31Jobekwö laebobe Aser itji̧mu tupadanö jojodö tjitebo baibanö niji 'da̧batö wetjinama. Damötjö Dios chiyocha jö̧ba̧lö tja'dödönö yöbawö ujunina wene badekwachinö, jejenö Dios wei̧danö 'da̧batö wetjinobe. Ja̧ comunidadbiyabi, ö'öbö pjei̧ comunidadteniabi, Asersaso jojodönö wetjinobe, tjitebo baibanö.
Neftalisaso jojodö tjitebo baibanö 'da̧batö wetjina jawa
32Ja̧danö, jelemutjö bakwöta jawa baibanö yemidanö inawiya jabö tjedenama, Neftalisaso jojodö tjitebo baibanö 'da̧batö wetjobö badekwachinobe. Ja̧danö, Dios chiyocha jö̧ba̧lö yöbawö ujunina badekwachinö, Neftali i̧tji̧mu tupadanö jojodö bakwasokwena tjitebo baibanö 'da̧batö wetjinobe, baikwö: 33Neftali niji bakwachobema, Sananintjö jo̧wi, inesö nöowi Jelef comunidadtjö yöneawowi jamatö, ja̧danö jobetjö jawo̧ laebobekwö dötewobe, Adaminequeb comunidadbe, ja̧danö Jabnel comunidadbe, ja̧danö jemi tupakwö Lacun comunidadbe dötewobe, bajaliyanö Jordan ojwebe ichibanö. 34Ja̧danö jawo̧ meajobekwö dötewobe Neftali niji bakwachobema, Aznot Tabor comunidadbenö, Hucoc comunidadbe ichibanö. A̧likwö bakwachobema, Zabulon niji, ja̧danö jawo̧ meajobekwö bakwachobema, Aser niji, ja̧danö jawo̧ laebobekwö bakwachobema, Jordan ojwe. 35Ja̧danö Neftali niji 'diinö tjöekwobe comunidadbiyama, Sidin comunidadbi, Ser comunidadbi, Jamat comunidadbi, Racat comunidadbi, Quineret comunidadbi, 36Adama comunidadbi, Rama comunidadbi, Jazor comunidadbi, 37Cedes comunidadbi, Edrey comunidadbi, Enjazor comunidadbi, 38Iron comunidadbi, Migdal El comunidadbi, Joren comunidadbi, Bet Anat comunidadbi, Betsemes comunidadbi. Okobe jwiinö ja̧ a̧linösamu jelemutjö ö'wejemu jawa comunidadbi, ö'öbö pjei̧ comunidadteniabi, Neftali niji comunidad ji̧nobe. 39Jobekwö laebobe Neftali itji̧mu tupadanö jojodö tjitebo baibanö niji 'da̧batö wetjinama. Damötjö Dios chiyocha jö̧ba̧lö tja'dödönö yöbawö ujunina jawa badekwachinö, jejenö Dios wei̧danö 'da̧batö wetjinobe. Ja̧ comunidadbiyabi, ö'öbö pjei̧ comunidadteniabi, Neftalisaso jojodönö wetjinobe, tjitebo baibanö.
Dansaso jojodö tjitebo baibanö 'da̧batö wetjina jawa
40Ja̧danö, bajaleapo Dansaso jojodö tjitebo baibanö 'da̧batö wetjobö badekwachinobe. Ja̧danö, Dios chiyocha jö̧ba̧lö yöbawö ujunina badekwachinö, Dan i̧tji̧mu tupadanö jojodö bakwasokwena tjitebo baibanö 'da̧batö wetjinobe, baikwö: 41Dan niji comunidadbiyama bi̧ya, Zora comunidadbi, Estaol comunidadbi, Ir Semes comunidadbi, 42Sagalbin comunidadbi, Ayalon comunidadbi, Jetla comunidadbi, 43Elon comunidadbi, Timnat comunidadbi, Ecron comunidadbi, 44Elteque comunidadbi, Guibeton comunidadbi, Balat comunidadbi, 45Jehud comunidadbi, Bene Berac comunidadbi, Gat Rimon comunidadbi, 46Mejarcon comunidadbi, Racon comunidadbi, ja̧danö Jope comunidad badeibö nijibi.
47-48Jobekwö laebobe Dan itji̧mu tupadanö jojodö tjitebo baibanö niji 'da̧batö wetjinama. Damötjö Dios chiyocha jö̧ba̧lö tja'dödönö yöbawö ujunina jawa badekwachinö, jejenö Dios wei̧danö 'da̧batö wetjinobe. Ja̧ comunidadbiyabi, ö'öbö pjei̧ comunidadteniabi, Dansaso jojodönö wetjinobe, tjitebo baibanö.
Jejenö Dansaso tjitebo baibanö wetjinobe, jo̧kwaijayonö jemi ikena, lekwe möle baledibajenama, Dansaso jojodö jobe tjö̧jobö jö̧tja̧lima waekwinobe, jo̧kwajabetjö̧ u'dakwö bajalenö tji̧'yinobe, ju'wedö tjitebo comunidad Lesenbe, jobadö tjitebo do̧tja̧tobö. Ja̧danö, Lesen jojodönö juluwajadö, okobe deinö Lesennö ju̧kwadönö kwabawö lotjinobe, ja̧danö idöda tjitebo baibanö tjeminobe. Jejenö emajadö, ajayi imi balewö lobö, tja'dömine iminö midö ötjabinobe, Dan comunidad jö̧ba̧lö, ja̧danö jemi tupakwö Dansaso jojodöma jobe tjö̧jinobe.
Josue itebo baibanö niji 'da̧batö wetjina jawa
49Jejenö bakwasokwena jojodö tjitebo baibanö 'da̧batö wetjinobe, damötjö Dios chiyocha jö̧a̧lidanö badekwachinö. Ikenama, jejenö katjataja̧ ikenama, Israel jojodöma Josuenö niji tjiyinobe. 50Isabenö Jo̧ma ajayinö weinobe, Josue ösödi̧ niji jo̧banö tjiyobö, jo̧kwajabetjö Timnat Sera comunidad aebiawö̧, aeba̧jadanö tjiyinobe. Timnat Sera comunidadma, Efrain niji mösa'iju jemi comunidad ji̧nobe. Ja̧danö, Josuema yemidanö ja̧ comunidad otidinobe, ja̧danö jobe ö̧jinobe.
51Jobekwö laebobe Dios chiyocha jö̧a̧lina badekwachinö niji 'da̧batö wetjina jawa, bakwasokwena jojodö tjitebo otiwanö tjujuna̧lobö. Diostjö jojodötjö tjö̧'da̧de pjabato̧ Eleazarbi, Josuebi, israel bakwasokwena jojodö tjuluwedöbi Silo comunidadtjö Isabenö Jo̧ öba a'otjö inawiya jabö tjedinobe, Isabenö Jo̧ wei̧ tjöwaisobö, ja̧danö wei̧danö 'da̧batö wetjinobe, okobe deinö tjitebo tjujuna̧lenanö kabatö.
Currently Selected:
Josué 19: WPC
Highlight
Share
Compare
Copy
Want to have your highlights saved across all your devices? Sign up or sign in
©2021, All Rights Reserved
