Job 7
7
Jwiinö usula emawo̧sa jö̧ba̧lö Job yöa̧lina jawa
1Tupakwö yöa̧linobe Jobma:
—Isabenö waiya bö̧je jojodö dö̧ji̧ma, ina bö̧jȩnö dö̧jayi, ölakwabikwawa jojodö ölakwabikwawö tjö̧ji̧danö, 'diinö otidö dö̧jobö jo̧be. Baikwö wanedö yötawa bö̧jenö dö̧ji̧ma, ina 'ya̧dala̧yi, tjömöayedö 'diinö otidö tjö̧ji̧danö 'diinö otidö ju̧kwadösa.
2-3—Ja̧danö ötjö usula emawö chö̧ji̧ma, –Dianö 'dö̧ibakwajö, –jö̧ba̧lö teada̧lö̧ jo̧sa, baikwö wanedö yötawa: Midö tjeminökwe tjömöayo̧ tubobe otidenama, yö̧te juluwanö baibakwa̧ omukwatö teada̧lo̧, –Yö̧te juluwanö baibowe, –jö̧ba̧lö, jö̧tö? Ja̧danö, midö wetjökwe otidenama, tjimidakwa̧ omukwatö teada̧lo̧, –Juluwanö tjimidowe, –jö̧ba̧lö, jö̧tö? Ötjöbi ja̧danö, Diosma usula chemawobö wei̧tjö̧, mikwa jwiinö lekwe jawo̧dö chöbaledobe, –Dianö 'dö̧ibakwajö, –jö̧balö. Jau, Diosma ötjönö weajabe, yö̧te tenia yö̧te baledibanö inia tjöbö usula chemawobö, 4jo̧kwajabetjö̧ yö̧te chabobö chöbamatenama, –Dianö dewachakwajö, –jö̧ba̧lö omukwatö usula emawo̧sa. Jo̧kwaijayonö, yö̧te juluwanö baledobö chösödijayonö, juluwanö baledökö, ja̧danö yö̧te baledibanö bölachö bo̧sa, bajaliyanö dewachenanö kabatö. 5Chiteba'o ba̧kwemeachibanö, sa̧dö ji̧ wale'debiya samökwesa, chi̧sȩdo̧ kököachibi̧ kelawo̧sa, ja̧danö chi̧sȩdotjö dewa'be laebökwesa, isabenö usula emawo̧sa, —jö̧ba̧lö yöa̧linobe Jobma, usula chemawi̧ 'dö̧ibajobö chiteada̧lijayonö, jwaikwöda usula emawö jo̧sa, jö̧ba̧lö.
Job Diosnö budekwö yöa̧lina jawa
6Tupakwö yöa̧linobe Jobma:
—Chuluwo̧ Dios, ötjö chö̧ji̧ma juluwanö 'dö̧ibobe, wanedö yötawa, Isopja peopja 'dö̧tjemi juluwanö 'dö̧ibaji̧danö, chö̧ji̧ peökwesa, ja̧danö chöji̧ juluwanö 'dö̧ibajijayonö, –Tupakwö otiwena, –jö̧ba̧lö omukwatö chiteada̧lobö jwibo̧sa. 7Chuluwo̧ Dios, kwomukwatibobö atebakwö, ötjö chö̧ji̧ma lekwökö ji̧, jwa̧le epjo juluwanö 'dö̧ibi̧danö, juluwanö 'dö̧ibakobe ötjö chö̧ji̧ma. Ja̧danö chuluwo̧, usula emawö ja̧nö, chedemi cho̧'wo ösöwachibökönö, jwaikwöda o̧'wo tjo̧achö chö̧jakwo̧sa, ö'wö batibenanö. 8Jau chuluwo̧, juluwanö debö chi̧'yakwo̧sa, babe möle ötjönö kwedijayonö, itekwayi detakwo̧sa. Itekwayi ötjönö kwedobö kwisakwenama, ida̧ökö debö chö̧ja̧kwo̧sa, juluwanö ö'wö batibakobetjö̧. 9Ökwödö woba jojodöma ojwiyo'wodanö ichejekwadösa. Ojwiyo'wo jwiamachibi̧danö, deinö babibadösa. Jau, ö'wö badibaja̧ ikenama, la'akatjöda tjebachajöködösa, 10ö'wö babibajo̧ma la'akatjöda ȩwa̧jökakwo̧ ejubema, ja̧danö ajayinö ö̧jinemi ju̧kwadöma juluwanö ö'wö babibajo̧nö tjo̧'wo jwitjibakwedö.
11—Jobekwö jo̧be ökwödö bö̧jȩ jojodö dö̧ji̧ma chuluwo̧, jo̧kwajabetjö̧ 'wi̧inö chö̧boböma jwibo̧sa, usula emawö yöta̧lobö jo̧be. Jau, jwiinö cho̧'wo tjo̧bekwö chö̧jobetjö̧ yöta̧locha, cho̧'wo suli̧nö yöta̧locha jwiinö usula chemawobetjö̧. 12Tajawedö bejenö usula chemawobö weköbobeda chuluwo̧? Kwedemi jwaibalawanö jo̧ inesö labo̧danö chichejekwobeji? Jo̧bajayo̧ chichejekwobetjö̧, ötjönö pje'data̧lö kwujunobeji̧? 13Isabenö usula chemawinö weköbökwesa chuluwo̧, baikwö yöta̧la: –Yöte camapjonö ba̧nö, cho̧'wo ösöwachibanö chabocha, yö̧te chabitjö̧ma inesö inia tjöti̧ma seachibena, –jö̧ba̧lö chabobö chöbamatijayonö, 14waekwobe. Bö̧ti̧ söinö chabobö jö̧ta̧lijayonö, yetaibanö chi̧'wi̧dikwobö webo̧ja, chi̧'wi̧didanö edö, jwiinö yetaibobö webo̧ja chuluwo̧, bakobenö mölebi, yö̧tebi usula chemawinö.
15—Isabenö babe usula emawö chö̧ji̧danö tupakwö chö̧jobö chöpöjöda, ja̧tjö̧ bajalekwönönö chösödena, cho̧'wo chemökönö tjutumobö. 16Jau, chedemi 'yaba̧lö chö̧ji̧ma mikwawokobe, tupakwö lekwe möle chö̧joböma jwiinö chöpöjöda. Bö̧jenö chö̧ji̧ma juluwanö baledobe chuluwo̧, jwa̧le'epjo juluwanö baledi̧danö, jo̧kwajabetjö̧ atebakwö, usula chemawinö weköbi̧ kakatibobö.
17—Chuluwo̧ Dios, ökwödö bö̧jȩ jojodöma mikwawöködösa, jo̧kwajabetjö̧ tajawedö nöinö kwomukwatobeda ökwödönö? Tajawedö kabatökönö ökwödönö omukwatö kweda̧lobeda? 18Jau chuluwo̧, yȩayikwena ökwödönö badedö edo̧ja, ja̧danö ba̧kwelöjatebö ökwödönö edo̧ja, sulabenö ja̧dakwojobö, otiwanö ja̧dakwojobö jö̧ba̧lö. 19Kabatökönö ötjönö eda̧lo̧ja chuluwo̧, jalachibö jelobekwö kwedobö atebakwö, ja'yubenö lekwe 'wainö chö̧jobö atebakwö, chaasobu chö̧katenanö baibanö.
20—Chuluwo̧ Inesö Jojodönö Teada̧lo̧, tajawedö ötjönö lȩkebobö kwomukwataja̧da? Sulabenö ja̧tinatjö̧ma, abebö cha̧ja̧kwakwö, ökwönö sulabenö ja̧tinama di̧yada? Tajawedö ötjönö öpöjödachibö, mekibobö jö̧kalobeda? 21Isabenö sulabenö ja̧tinatjö̧ma, ötjönö lȩlöjinö kwedobö jwiobeji̧? Sulabenö ja̧tina söbebö loköbobö jwiobeji̧? Jau chuluwo̧, juluwanö ö'wö babibö, wobiakonö chö̧jakwo̧sa, ja̧danö ötjönö kwisakwenama, detocha, ida̧ökö debö chi̧'yajobetjö, jo̧kwajabetjö̧ lȩlöjinö ötjönö kwedobö atebakwö chuluwo̧, —jö̧ba̧lö yöa̧linobe Jobma.
Currently Selected:
Job 7: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
