Job 39
39
1Tupakwö yöa̧linobe Diosma Jobnö:
—Tupakwö abebö cha̧ja̧kwakwö Job, isabenö chöwaisi̧danö waiso̧ kwö̧jojobö jö̧ba̧lö: Mösa'onö ju̧kwadö chi̧vo̧dönö kwöwaisiji̧, –Tjitjimunö dianö tjemobejö? –jö̧ba̧lö? Tebonö ju̧kwadö yama tji̧tji̧munö tjemenama, jobadönö kwedobeji̧? 2Ajayinö metu'wo batjibinelö, tjitji̧munö tjemenanö baibanö kwöwaisiji̧, –Jawo̧dö dokwa ba̧jȩkwadö baledobejö? –jö̧balö. 3Jau Job, bamatö, tjitji̧munö emadö, ajayinö metu'wo tjö̧jaja̧ma, tji̧tji̧munö emadö, 4ja̧danö tjemajawö̧, meje'yenö ja̧nö da̧peachadö tji̧tji̧muma. Ja̧danö da̧peachajadö, jelobekwö labebadö, ajayinö tjöjinobe ȩwa̧jöködö, ja̧ baledi̧ edö waiso̧köbobeji̧?
5—Ja̧danö tebonö jo̧ buluma, ti ejatö loinadaja, uluwo deinö iteda ösödi̧danö kweachakobetjö̧? 6Jobadönö chiyijatö, meje'ye jwiemi, jojodö deobe tjö̧jobö. 7Jobadö bu̧lu̧döma comunidadnö jaliwobe ökwöi̧ma öpöjödadö, ja̧danö jojodö deobe, bu̧lu̧dönö jwebebadö jwötjokobeda tjö̧jobö ösödadö. 8Jobe ja̧nö, mösa'ijunö kwebachö, tjukwakwa̧ isakwadö, okobe jwiinö ö̧'dö̧wi pokwi̧ jawa tjukwotö jö̧ba̧lö, mösa'ijunö kwebachö isakwadö, ökwöda jejenö tjö̧jobö weköbinaji̧?
9—Ja̧danö tebonö jo̧ pakayaso̧ma, –Otidi, –jö̧balö weköbökwe, weköbi̧ otidobö ösödö, kwajwimu tjukwapjo meje'yesapjo ö'öbö abenaji̧? 10A̧la̧chi'bonö soawaka töobö di̧katobö jȩnaji̧ tebonö jo̧ pakayaso̧nö? Jejenö di̧katajökwe, kwökömanö lubö, batjosayu soenaji̧? 11Isabenö juluwo̧ jo̧ba pakayaso̧ma, jejenö juluwo̧obetjö̧, otiwanö otidakwo̧ jö̧ba̧lö kwo̧'wo kwöwana̧lobö jȩnaji̧? Otidaji, jö̧ba̧lö webajo̧, lakebaja̧ okobe otiwanö otidenaji̧? 12Weköbajökwe, kwöbatjo wa̧ji̧ emö, otiwanö ichejebenaji̧? Trigojaye ko̧ko̧dajo̧, chabö loawejube otiwanö e'ewenaji̧? Jau Job, isabenö ötjödanö kwujuluwitjö̧ma, jobekwö weköbi̧ a̧ja̧kwo jö̧a̧lena.
13—Ja̧danö nöbo̧patunö yöta̧la, jöwaja̧pi̧ya labinö welewuju, jö̧tö? Jejenö welewö, 'duwi köa̧li̧danö köja̧lenaji̧? 14Ja̧danö baikwö yöta̧la nöbo̧patusujunö, iyabiya lödaju, wainö nijinöda bo̧bö labebuju. Ju'wedö pji̧yu̧ iyabiya yötjachi̧danöma teada̧lökuju, nijida tubedena jö̧ba̧lö, labebuju. 15Jau, omukwatöködö jobadöma, bakwo̧ ja̧tö loena, ja̧danö tebonö ju̧kwadö söbebö lotjena, jö̧ba̧lö omukwatöködö. 16Jitji̧munö sulabenö ja̧buju nöbo̧patuma, jitji̧munö, jitji̧muböködö tjö̧ji̧danö teada̧lökuju. Iyabiya lödaju, omukwatökuju, jelo̧ söbebö loitjö̧ma, chödaja̧ mikwawökena, jö̧ba̧lö. 17Jau Job, ötjö Diosma jobujunö waisanö jomukwatobö chiyijökötö, ja̧danö okwa jawa waisanö jomukwatobö chiyijökötö, jokwajabetjö̧ jejenö omukwatökönö ju̧ju̧. 18Jo̧kwaijayonö waisanö omukwatöködö tjö̧jijayonö, isabenö juluwanö ö'öbakwawadö jobadöma, baikwö yöta̧la: Kabayudönö wa̧nö ö'öbakwawadöma, juluwanö ö'ötjakwawijayonö, jobadö ö'ötjakwawi̧tjö bajalekwönönö juluwanö ö'öbakwawadö. Ökwöda jejenö tjö̧jobö kwiyinaji̧?
19—Ja̧danö kabayuja? Kabayuma juluwo̧, jö̧tö? Ökwöda ujulu kwiyinaji̧? Kamijido̧ 'dutjati̧danö, kabayu u̧lu̧me'anö öwö'ye ödöa'ye 'duawobö kwiyinaji̧? 20-21Ökwöda kabayunö kwiyinaji̧, juluwanö malakayu döidanö, döbö ö'öakwawoböma? Isabenö ölakwabikwawa jawa juluwo̧ ka̧ba̧yuma, juluwo̧sa jö̧ba̧lö, bakwena ja̧nö ja̧takwö jwöbeba̧lo̧, jojodö a̧ja̧kwö yetjaibanö. Ja̧danö juluwanö ö'öbakwawo̧, tjölakwabikwawobekwö ö'öbakwawo̧. 22Yebabökönö, –Yeabikwawama di̧yada, –jö̧ba̧lö obö yöa̧lobedanö ichejekwa, ja̧danö kwölöte'okwö jo̧banö metjibijayonö, jalachiböma döbibajö̧kö̧. 23Nayu̧nö a̧japjo ökwöijayonö, ja̧danö tjotjokwöte salöijayonö, 24juluwanö chichibowe, jö̧ba̧lö ölakwabikwawotö jö̧ba̧lö ö'öbakwawo̧, jadanö metjibakwa yöbawö trompeta pjutjenama, teada̧lökönö juluwanö 'yo̧. 25Jau, trompeta ökwöenama, –Tjo̧wita, –jö̧ba̧lö jwöobedanö ichejekwa, jadanö ödötjö tjölakwabikwawi̧ 'dö̧batö, ölakwabikwawa luwedö jwöbö wetji̧bi, ölakwabikwawadö jwötjeba̧li̧bi a̧ja̧kwö ösödo̧. Ökwöda jejenö kabayu ö̧jobö weköbinaji̧?
26—Ja̧danö pjibole mö köa̧li̧ma, ökwöda okwa jawa waisanö kwomukwatinobetjö̧, öwa̧ja̧piyanö mö köba̧lö, a̧li̧kwöchobe bajalenö köobeji̧? 27Ökwöda weköbajawö̧, wiyulima mö köba̧lajadö, möemi tja̧'do̧ tjotidobeji̧? 28Jau, mö inawanö janö, mösa'otjö yalikwaobe, ilȩdo̧nö 'diinö tjuju̧kwobe wiyulima, 29jobe ja̧nö, ödötjö otiwanö eda̧lö, tjukwakwawö̧nö edadö. 30Ja̧danö ukwakwo̧nö juluwajo̧, wiyuli itji̧muma ujuluwajökwe ökwösobu owadö. Jau, wobiya bȩmima, wiyulibi jobe jo̧, jö̧tö? Ökwöda jejenö weköbajawö̧, wiyulima jejenö tju̧ju̧kwobeji̧? —jö̧ba̧lö abebö a̧ja̧kwinobe Diosma, Jobnö.
Currently Selected:
Job 39: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
