Job 32
32
Eliu mikwo̧ Jobnö yöa̧lina jawa
1Job jejenö yöa̧liawö̧, ömöledö Elifazbi, Bildadbi, Zofarbi atadö katjatibinobe. Jwaikwöda sulabenö ja̧binö̧kö̧sa jö̧ba̧lö Job yöa̧liawö̧, jo̧banö yöba̧lö katjatibinobe. 2Jejenö balediökwe, Eliu mikwo̧ma a̧ja̧kwö ödameakwinobe. Jo̧ba Eliuma, Buz jojo Baraquel mikwo̧ itji̧, Ramsaso jojo. Eliuma Job yöa̧laja̧ a̧ja̧kwö ödameakwinobe, —Dios ja̧i̧ma jwea, —jö̧balö yöa̧lo jö̧a̧lijayonö, jwaikwöda iteda jawada yöa̧linobetjö̧, —Sulabenö ja̧binö̧kö̧sa, —jö̧ba̧lö.
3Ja̧danö ju'wibi, Job ömöledö, ajayinö jo̧banö yöba̧lajadönöbi ödameakwinobe. Jobadöma Job sulabenö ja̧aja̧ wajwitjijayonö, yayonö jwaikwöda —Sulabenö ja̧bo̧ja, —jö̧ba̧lö yötja̧linobe, ja̧danö wajwibö jejenö yötja̧liökwe, jobadönöbi ödameakwinobe Eliuma.
4Ajayinö, ju'wedö yötja̧lonö, Eliuma 'wii̧nö ba̧nö a̧ja̧kwinobe, ju'wedötjö baikwönönö möayo̧obetjö̧, 5jo̧kwaijayonö Job ömöledö Elifazbi, Bildadbi, Zofarbi atadakwawa jwitjiökwe, jwiinö ödameakwachibinobe Eliuma.
6Ja̧danö, Eliuma#32:6 tjiwenenö Buz jojo Baraquel itji̧ Eliu yöa̧linobe baikwö:
—Chömöledö, ökwödöma damö kwö̧jaduwonö, ötjöma ina möayo̧danö jo̧sa, jokwajabetjö̧ ajayinö yöta̧lobö yetabijatö, ötjö chöwaisi̧ jawa ökwödönö labebö lotoböma yetabijatö. 7Jau chömöledö, ajayinö yöta̧lijatö ötjödada, –Damöda yötja̧lobö jo̧be, lekwe o̧bia ida̧ökö tjö̧jinobetjö̧, waisanö omukwatakwawa tjöwaisachibajabe, jobadöda otiwanö ba̧ja̧dö yötjawobö jo̧be, –jö̧ba̧lö. 8Jejenö omukwatö 'wii̧nö chö̧bijatö chömöledö. Jo̧kwaijayonö isabenö jojodö waisanö omukwatadö batjibobö pjaati̧ma, lekwe o̧bia tjö̧ji̧maökö, Okobe Jwiinö Juluwo̧ Dios o̧'wo luwo̧ jojodökwö ö̧ji̧da, jojodö okwa jawa waisachibanö tjomukwatobö pjaati̧ma. 9Jau chömöledö, waisanö omukwatadöma, sule damödamaökö, ja̧danö sule damödamaökö, okwa jawa waisachibajadö, otiwanö ja̧awa waisadöma, Dios o̧'wo luwo̧ ö̧ba̧jadawö̧da.
10—Jo̧kwajabetjö̧, baikwö yöta̧laduwakwö chömöledö, Isabenö ötjö yöta̧li̧ kwa̧ja̧kwaduwobö jo̧be. Ina möayo̧danö chö̧jijayonö, yayonö ökwödönö labebö lobö yötawocha ötjö chöwaisi̧ma. 11Jau chömöledö, ökwödöda abönö yöka̧laduwobö chiteada̧lijatö, –Dakwö yöda̧lakwajö, –jö̧ba̧lö yöka̧laduwakwa̧ kwomukwataduwonö, waisanö yöka̧laduwakwa̧ cha̧ja̧kwotö jö̧ba̧lö chiteada̧lijatö.
12—Jo̧kwaijayonö, cha̧ja̧kwa̧lonö, yöka̧laduwi̧ waekwatö chömöledö. Jobnö yöba̧lö, sulabenö omukwati̧ kwi̧sȩbaduwotö jö̧ba̧lö yöka̧laduwi̧jayonö, waekwatö. Jau chömöledö, otiwanö teada̧lönö cha̧ja̧kwa̧latö, ja̧danö ökwödötjö bakwo̧bi kwi̧sebaduwökötö, –Isabenö sulabenö omukwato̧ Jobma, –jö̧ba̧lö. Ja̧danö ju'wibi, Job ökwödönö yöa̧laja̧ kwatadaduwo jö̧ka̧laduwijayonö, bakwo̧bi otiwanö kwatadaduwökötö, labebö lobö yöa̧laja̧ma. 13Jo̧kwajabetjö̧ baikwö yöta̧laduwakwö chömöledö, yöka̧laduwoko, –Okobe jwiinö waisanö omukwatakwawa waisadösa, ökwödödasa Jobnö jwedebakwedösa, –jö̧ba̧löma. Diosda Job yöa̧laja̧ atadakwo̧ma chömöledö, jojodödamaökö. 14Ja̧danö, Job yöa̧laja̧ma, ötjönö yöa̧lökötö, jadanö ötjö jo̧banö chatadakwa̧ma, ökwödö yöka̧laduwaja̧danö chatadökakwo̧sa, —jö̧balö yöa̧linobe Eliuma, ju'wedö Job ömöledö wamedukwabedönö.
15Jejenö yöba̧lajo̧, Eliuma Jobnö yöa̧linobe, baikwö:
—Idö kwömöledöma 'wii̧nö batjibajabe, –Tupakwö dakwö datadakwajö, –jö̧ba̧lö, jobadö yötja̧li̧ma 'dö̧ibajabe ida̧ökö. 16Ja̧danö, ajayinö jobadö yötja̧lonö, ötjöma chiteada̧latö, jokwaijayonö babema, jobadö yötja̧lokobetjö̧, sule 'wii̧nö ja̧nö tjatadokobetjö̧, 17ötjöbi yöta̧locha, ötjöbi chöwaisi̧ jawa labebö lobö yötawocha. 18Jau Job, ötjöbi nöinö yöta̧lakwa̧ chujuna̧la, ja̧danö cho̧'wo luwo̧ma ötjönö weobe, ökwönö yöta̧lobö.
19—Wanedö yöta̧la yöta̧lobö jö̧ta̧li̧ma, baikwö: Ubasobu o̧'dobu, ina po̧ȩkwökö'wo a̧jobu 'dabö welachibobö jö̧a̧li̧danö ichejekwo̧sa, isabenö lekwe teada̧lajo̧, ökwönö yöta̧lobö jö̧ta̧lobetjö̧, –Tjo̧wita, babeda yöta̧lobö jo̧be, –jö̧ba̧lö. 20Jau, isabenö yöta̧lobö jö̧ta̧li̧ seachibakobetjö, babeda yöta̧lobö jo̧be, tupakwö chiteada̧lobö jwiobe, isabenö ökwönö yötalobö jo̧be.
21—Ja̧danö, yöta̧lakwa̧ma, jojodönö bakweminö omukwatö yöta̧locha, –Aaa, bitenöda pjabatö yöta̧lo, –jö̧ba̧lö omukwatökönö. Ju'wibi, bakwo̧ ötjönö ösödotö jö̧ba̧lö, ösödi̧ jawa omöna yöta̧lökakwo̧sa, jweinö isabenö weneda yöta̧lakwo̧sa. 22Jau, ötjöma döyötö jojodö tjösödo jö̧ba̧lö omöna yöta̧loböma wajwibo̧sa, ja̧danö jweinö yöba̧lökönö, sule jojodö tjösödi̧ jawada yöta̧litjö̧ma, chuluwo̧ ötjönö otidina Diosma öpöjödö, juluwanö ötjönö lȩebena, —jö̧ba̧lö yöa̧linobe Eliuma.
Currently Selected:
Job 32: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
