Job 29
29
Ajayinö Job otiwanö wene jwiinö ö̧jina, Job yöa̧lina jawa
1Jemi ikenama, yemidanö yöa̧linobe Jobma, baikwö:
2—¡Ajayinö chö̧jinadanö yemidanö chö̧jowe! Ajayinöma, lekwe möle Diosma otiwanö iteada̧linobe ötjönö, ötjönö iteada̧lina baikwö wanedö yöta̧la: 3Iteda itea dȩju̧wa'yu ötjönö dejatobö weinobe Diosma, ja̧danö iteda dȩju̧wa'yu dejatonö, otiwanö yȩa'wonö kwetachijatö. 4Ja̧ möle 'dö̧tachökönö, otiwanö juluwo̧ chö̧jijatö, chömöledöso̧ ja̧nö, Dios otiwanö cheju tjöbeba̧lö pjaatenama. 5Jau chömöledö, ja̧ möle Okobe Jwiinö Juluwo̧ma chömöledöso̧ ja̧nö otiwanö ötjökwö ö̧jinobe, ja̧danö chi̧tji̧muma ötjökwö tjösawibö tjö̧jinobe. 6Ja̧ möle otiwanö chujuna̧lijatö, wanedö yöta̧la, cha̧jwi̧mu otiwanö leche tjiyobetjö̧, inesö otiwi̧ lechema ojwedanö chöba a'o isuwinobedanö ichejekwa, ja̧danö inawiya jȩmi chöbatjo otiwanö wa̧jo̧betjö̧, olivo o̧tesödö jobetjö isuwinobedanö ichejekwa, isabenö otiwanö chujuna̧lijatö ja̧ mölema.
7—Ju'wibi, ja̧ möle jojodö otiwanö tjomukwatökwe chö̧jijatö. Comunidad apjudebe 'ya̧nö, luwedö tjö̧bemi chöbamatobö chi̧'yenama, jojodö tjöba a'o luwedö tjö̧'da̧de chöbamatijatö. 8Isabenö otiwanö tjomukwatökwe chö̧jijatö ja̧ mölema, baikwö yöta̧la: Ina möayedödanöbedöma, chichobe edö, otiwanö tjopjolachibinobe, –Duluwo̧, otiwanö kwöbaledo, –jö̧ba̧lö. Ja̧danö damöbi chichobe edö, –Duluwo̧ja, –jö̧ba̧lö tja̧la̧ibinobe, ja̧danö la'aka luwo̧ öba a'o ju̧kwadö bamatökönö tjö̧ji̧danö, chipjeanö bamatökönö ja̧nöda tjö̧jinobe. 9Luwedöbi ja̧danö, tjö̧'dade chichibobetjö̧, tjömamunö tjaa tjumu'dökwinobe, –Bite luwo̧ öba a'o 'wiinö badibo, –jö̧ba̧lö. 10Jau, inesö la'aka luwedöbi chöba a'otjö 'wii̧nö batjibinobe, tjinene möakwö pöaibobedanö yöba̧lökönö tjö̧jinobe, yötawakwa̧ otiwanö tja̧ja̧kwobö tjösödobetjö̧. 11Ja̧danö yötawi̧ tja̧ja̧kwenama, otiwanö a̧ja̧kwö tjösödinobe, –Jobma otiwanö jweinö yöbawo̧, –jö̧ba̧lö, ja̧danö okobe deinö ötjönö edadöma, otiwanö yötja̧linobe ötjönö.
12—Isabenö otiwanö jojodönö pjabatö chö̧jiawö̧, jobekwö ötjönö tjösödinobe, baikwö yöta̧la: Usulasedö ichibö, –Pjabatitjö, –abebö jwötjenama, otiwanö tjö̧jibinö pjabatiachijatö, ja̧danö pjabato̧ debadö löyödönö, wene tjujuna̧li̧tjö tjö̧jibinö otiwanö pjabatiachijatö. 13Jejenö otiwanö pjatatiawö̧, ö'wö batjibo jö̧ba̧ladöma otiwanö yötja̧linobe ötjönö, –Otiwanö pjabato̧ Jobma, –jö̧ba̧lö, ja̧danö otiwanö pjatatiawö̧, tjilekwamu wobekwinadö ya̧döma, tjo̧'wo ösöwachibanö lo̧tjinobe.
14—Isabenö otiwanö ja̧bö chö̧jijatö, baikwö wanedö yötawa: Jwaikwöda Dios wei̧ a̧ja̧kwö chö̧jobetjö̧, kamiji̧do̧ 'dutawi̧danö Dios wei̧ a̧ja̧kwakwawa 'dutawinobedanö ichejekwinobe, ja̧danö jweinö otiwanö ja̧bö chö̧jinama, wamesa̧do̧danö, ja̧danö 'butjawakadanö ichejekwinobe. 15Isabenö otiwanö pjatatijatö jojodönö, tjöbajale tjewawadönö, tjöbajale ichejekwo̧ chö̧jijatö, otiwanö jobadönö pjatatobetjö, ja̧danö kwebachöködö tjömasapiya ichejekwo̧ chö̧jijatö, jobadönöbi pjabatö chö̧jobetjö̧. 16Jwibadö tjabe'dodanö chichejekwijatö, otiwanö jobadönö pjatatobetjö̧, ja̧danö jojodö lȩekwa luwedö tjöba a'o tjichibenabi, otiwanö pjatatijatö. Jau, jelobetjö ichajadö, wajwitawö̧nöbi pjatatotö jö̧ba̧lö, otiwanö chöwaisachibobö chisakwijatö, lȩekwa otiwanö jweinö yötawakobetjö̧. 17Ja̧danö sulabedö ju'wedönö suli̧ tjöwaedobö jö̧tja̧lenama, otiwanö tjöbeba̧lö chö̧jijatö, baikwö wanedö yötawa: Sulabedö tjukwakwawö̧nö yö̧tjenama, tjo'ye paibanö kwatijatö, suli̧ tjöwaedo jö̧tja̧lajawö̧nö ejatö lotjenanö baibanö, isabenö otiwanö jojodönö pjabatö chö̧jijatö ajayinöma.
18—Ja̧ möle otiwanö chö̧jobetjö̧, baikwö chomukwatijatö, –Isabenö jwiinö lekwe möle chö̧jakwo̧sa, jwiinö damö batibenanö kabatö. Ikenama, damö waekwajo̧, ina ötjöda chejunö ja̧nö, bajaliyanö ö'wö batibakwo̧sa, –jö̧ba̧lö chomukwatijatö. 19Ja̧ möle towi 'diowi, bö'dia ojwiyo jȩmi söowidanö chichejekwijatö, jadanö yö̧te baledibanö si̧li̧'idö tji'olitjö 'yoliwowidanö chichejekwijatö, otiwanö chö̧jinobetjö̧. 20Ja̧ möle okobe deinö kabatökönö otiwanö tjomukwatökwe chö̧jijatö, jadanö 'böpö ba̧kwelöjatebö do̧ta̧lidanö, ba̧kwelöjatebö juluwo̧ chö̧jijatö.
21—Ja̧ möle jojodöma isabenö yöta̧li̧ tja̧ja̧kwobö tjösödijatö, yötawi̧ tja̧ja̧kwotö jö̧ba̧lö tjiteada̧linobe, –'Wii̧nö janö diteada̧lo, Job waisanö lȩekwa da̧ja̧kwakobetjö̧, –jö̧ba̧lö. 22Ja̧danö, yötawiawö̧, otiwa jö̧ba̧lö tjösödinobe, bakwo̧bi öpöjödö atadinokobe. Yötawi̧ma otiwanö jobadönö söibinobe ichejekwa, 23ja̧danö yötawakwa̧ otiwanö tjiteada̧linobe, ojwiyo o̧bakwa̧, o̧ba ajayi o̧bakwa̧ ösödinö tjiteada̧li̧danö. 24Tjo̧'wo tjo̧bekwö, –Dakwö ja̧dakwajö, –jö̧ba̧lö tjö̧jenama, tjo̧'wo ujuluwachibanö pjatatijatö#29:24 Ajayinö tjiwenenö, —Jobadönö otijatö, —jö̧ba̧lö laebobe, jo̧kwaijayonö okwa jawa laebi̧ma, tjujuluwachibanö pjatatijatö jö̧ba̧lö wanekwachobe ichejekwa., jadanö tjujuluwachibanö pjatatiawö̧, tjo'wo ösöwachibanö tjösödinobe, –Otiwanö pjakatajabe, –jö̧ba̧lö.
25—Ja̧ möle isabenö la'aka luwo̧ ö̧ji̧danö chö̧jijatö, tjuluwo̧danö otiwanö tji̧'yakwa̧ma mana chi̧sȩbijatö, ja̧danö la'aka luwo̧ iteda ömöayedö ölakwabikwawa jojodönö öbibö ö̧jidanö, jojodönö öbibö chö̧jijatö, ja̧danö tjo̧'wo tjo̧achö budekwadönö tjo̧'wo ösöwachibanö pjabato̧danö chö̧jijatö, isabenö otiwanö jojodönö pjabatö chö̧jinobetjö̧, —jö̧ba̧lö yöa̧linobe Jobma, ajayinö otiwanö ö̧jina jawama.
Currently Selected:
Job 29: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
