Job 22
22
Elifaz Job yöa̧li̧ öpöjödö atadina jawa
1Job jejenö yöa̧liökwe, Elifazma yemidanö öpöjödö atadinobe, baikwö:
2—Bö̧jȩ jojodötjö, bakwo̧bi Diosnö pjabato̧ma ö̧jo̧beji̧? Deobe, inesö waisadötjöbi, bakwo̧bi Diosnö pjabato̧ma deobe. 3Ja̧danö otiwanö Dios wei̧ a̧ja̧kwö ja̧nö, jwaikwöda otiwanö ja̧bö kwö̧ji̧tjö̧ma, Okobe Jwiinö Juluwo̧ Dios ajayitjö bajalekwönönö otiwanö ö̧jobö pjakatenaji̧? Kwöwaisa Job, bö̧jȩ jojodöma ja'yubebi Diosnö pjadatoböma juluwöködösa, ajayitjö bajalekwönönö Dios otiwanö ö̧jakobetjö̧, jö̧tö?
4—Ja̧danö, baikwö atebakwö Job, Dios ökwönö lȩebi̧ma, tajawedö lȩebobeda? Jwaikwöda jo̧banö yebabinö kwösödiökwe, –Sulabenö ja̧köba, –jö̧ba̧lö ökwönö lȩebobeji̧? 5Ja̧maökö Job, chedemi jwiinö sulabenö ja̧köbiökwe, ökwönö lȩebena. Jau Job, isabenö kabatibökönö, jwaikwöda sulabenö ja̧bo̧ja, baikwö yöta̧la: 6Kwömöledö ökwönö tjumusidököjayonö, tjitea 'döbebö emo̧ja, –Kwumusidi kwimidenada tjetatocha, –jö̧ba̧lö,#22:6 Deu 24:6Wanedö yötawa, ju'wikwena bakwo̧ ju'wijaye öbalewitjö̧ma, itea cedulasöja iyobö wetjena, isabenö tjeatakwa̧ wene öwawakobetjö̧. ja̧danö jwibadö tjö̧ka̧misi 'dökebajabe, tja̧do jwibadö batjibanö. 7Ja̧danö me'dawadö kwöba a'o tjichibenama, ojwiyo tjowobö iyinö̧kö̧ja, ja̧danö a̧wi̧chi tjöbadö tjichibenama, tju̧kwa a̧'dȩlinaja.
8Jau Job, sulabenö omukwato̧ja, –Sule juluwadöda niji tjujuna̧lobö jö̧ba̧ladö, sule otiwanö tjomukwatawö̧da otiwanö tjitebo nijinö tjö̧jobö jö̧ba̧ladö, –jö̧ba̧lö, 9ja̧danö jejenö omukwatö, tjilekwamunö wobekwinadönöbi, löyödönöbi sulabenö pjabatö̧kö̧ja. Tjilekwamu wobekwinadö ökwönö abebö tjichenama, iyökönö sulabenö a'dewö lobo̧ja, ja̧danö ju'wibi, okobe jwiinö löyödö tjujuna̧li̧bi, sulabenö 'döbebö emo̧ja. 10Jobekwö sulabenö ja̧bo̧ja Job, jo̧kwajabetjö̧ babema nöinö wene baledo̧ja. Jau Job, jobekwö sulabenö ja̧köbinobetjö̧, babema 'daliwa tjösawökwe jo̧ja, ja̧danö yeabikwawa jawa kwöbaledobe. 11Ja̧danö edökönö, inesö yȩa'wo kwö̧jobedanö ichejekwa, ja̧danö ojwe jwiinö okwatibiökwe kwö̧jobedanö ichejekwa, isabenö sulabenö ja̧bö kwö̧jinobetjö̧.
12—Diosma inesö möemi mölȩjȩnö jo̧, ja̧danö si̧li̧'idö jwiinö mö tjö̧jijayonö, jobadönöbi nijakwö edo̧ Diosma, okobe jwiinö edo̧ Diosma Job. 13Jo̧kwaijayonö, ökwöma sulabenö omukwato̧ja, baikwö kwomukwati̧ yöta̧la: –Wajwibo̧ Diosma sulabenö ja̧di̧ma, jwiinö yȩiökwe, otiwanö edö̧kö̧. 14Ojwiyo'wo yȩa'wo dö'da̧denö ji̧ökwe, bö̧jȩnö ja̧di̧ edö̧kö̧, ojwiyo'woma tjöeba̧la'wo, ökwödönö edapji jö̧ba̧lö, sule ödö, mölȩjȩnöda kwebacho̧ Diosma, ökwödönö edö̧kö̧, –jö̧ba̧lö wajwibö sulabenö omukwato̧ja Job.
15—Jwaikwöda ajayinö ji̧nadö sulabedö ja̧bö tjö̧jinadanö ja̧bö kwö̧jobö kwomukwatobeji̧? 16Jobadönö baledina kwomukwatibo Job, ina pöe waekwöködö tjö̧jayi, sulabenö ja̧tjiökwe, Diosma ojwe okwatibobö weinobe, ja̧danö jwaikwöda jobadönö söbebö loinobe, jö̧tö?#22:16 Gen 6jawa wanedö yöawinobe ichejekwa. 17Jobadöma Diosnö öpöjödö, –Da̧ja̧kwobö döpöjöda, dö̧jelö labebi, –jö̧tja̧linobe. Jobadöma Okobe Jwiinö Juluwo̧ Diosnö tjomukwatinobe, –Da̧ja̧kwököjayonö, ökwödönö lȩeboböma jwibo̧, –jö̧ba̧lö. 18Okobe jwiinö tjujuna̧lina jawa, Diosda jobadönö iyinajayonö, jobekwö sulabenö omukwatinadö Job, ja̧danö baikwö yöta̧la jobadö tjomukwatina jawa: Sulabenö omukwatinadö jobadöma, la'akatjöda jobadö tjomukwatinadanö omukwatö̧kö̧sa ötjöma, sula, jö̧ba̧lö.
19—Isabenö jobadöjayedönö Dios lȩebobö jo̧be Job, ja̧danö Dios wei̧ aja̧kwö ju̧kwadö jobadönö söbebö loaja̧ edö, tjo̧'wo ösöwachibanö edadö, ja̧danö sulabenö ja̧böködöbi edö, tjo̧'wo ösöwanö edö yöba̧ladö: 20–Diosma otiwanö döpöjojodöbinadönö söbebö loajabe, ajayinö tjujuna̧linama, ökwöla juwö loajabe, –jö̧ba̧lö.
21—Jobekwö yöta̧laja̧danö jo̧be Job, jo̧kwajabetjö̧ baikwö pjabatö wetakwö: Dioskwö ölakwabikwawö kwö̧ji̧ma, kabatibi. –Isabenö chuluwo̧ Diosma, –jö̧ba̧lö, jo̧ba wei̧ a̧ja̧kwö kwö̧jo. Jemi ikenama, isabenö Dioskwö wene jwiinö kwö̧jakwo̧ja Job, ja̧danö otiwanö kwö̧jakwo̧ja. 22Dios ökwönö ö̧ba̧ja̧denama, öpöjödökönö ö̧ba̧ja̧di̧ jawa kwöwaisachibo, ja̧danö yöawi̧ jawa kwomajadenö do̧ba̧lö kwö̧jo. 23Jau Job, sulabenö ja̧awa kwejutjö 'da̧batö junö, tjebachajö Okobe Jwiinö Juluwo̧ Diosnö kwösöditjö̧ma, isabenö ökwönö pjaatakwo̧.
24-25—Jwaikwöda Okobe Jwiinö Juluwo̧ Diosnöda kwösödo, –Orotjöbi, platatjöbi bajalekwönönö mikwawo̧ jo̧bada, –jö̧ba̧lö. Jau Job, babe kwösödi̧ oro kwujuna̧li̧ma, nijiso̧pjanö ikwö loköbo, ja̧danö inesö otiwi̧ Ofirtjö emawa oroma, ojwe ö'öbö inawiya jȩna ikwö loköbo, –Diosnöda chösödobö jo̧be, –jö̧ba̧lö. 26Jejenö ja̧köbitjö̧ma, kwo̧'wo ösöwanö Okobe Jwiinö Juluwo̧nö ösödö kwö̧jakwo̧ja, ja̧danö tabakwökönö Dios ö̧jobe mölȩjȩbe edö, 27Diosnö akebakwo̧ja, ja̧danö akebiökwe, ökwönö a̧ja̧kwakwo̧ Diosma. –Isabenö Diosnö chiyakwo̧sa, –jö̧ba̧lajo̧, waekwökönö yöbawö kwujunaja̧danö isabenö Diosnö kwiyakwo̧ja, 28ja̧danö okobe jwiinö otidö kwö̧ji̧ma, otiwanö laebakobe, ja̧danö dewi̧ma otiwanö dejatakobe kwekachakwa̧ mananö, otiwanö edö kwekachakobetjö̧.
29—Jau Job, –Otiwadösa, –jö̧ba̧ladönö, nijakwönönö tjötabakwobö juno̧ Diosma, jo̧kwaijayonö, –Mikwawö̧kö̧sa, –jö̧ba̧lö omukwatadönö, tjö̧ji̧binö pjabato̧ Diosma. 30Isabenö sulabenö ja̧böködönö tjö̧jibinö pjabato̧ Diosma Job, jo̧kwajabetjö̧ Dios wei̧ a̧ja̧kwö, otiwanö ja̧bö kwö̧jitjö̧ma, isabenö kwö̧jibinö pjaatakwo̧, —jö̧ba̧lö yöa̧linobe Elifazma, Jobnö.
Currently Selected:
Job 22: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
