Job 19
19
Bildad sulabenö yöa̧liökwe Job atadina jawa
1Bildad jejenö yöa̧liökwe, Jobma atadinobe baikwö:
2—Ökwödö chömöledöma, dokwa lekwe usula chemawinö ja̧köbaduwakwa̧da? Dokwa lekwe ötjönö sulabenö yöba̧lö, 'diinö tjinebi̧danö, 'diinö inebö usula chemawinö yöka̧laduwakwa̧da? 3Yemidanö, yemidanö kabatökönö#19:3 Ajayi tjiwenenö, domulatajanö laebobe, nöinö jö̧ba̧lö., –Sulabo̧ja, –jö̧ba̧lö sulabenö yöba̧ladöja ökwödöma, taba jwiinö sulabenö mebibadöja ötjönö, sula chömöledö.
4—Ökwödönö sulabenö ja̧binö̧kö̧sa chömöledö, ötjönö mekibaduwo jö̧ba̧lö. Chedemi Dios öba a'otjö sulabenö ja̧bö̧kö̧sa chömöledö, jo̧kwaijayonö isabenö sulabenö ja̧tatjö̧ma, ja̧ma ökwödö jawamaökö, ötjöda jawa, ötjönö mekibaduwobö jwibadöja chömöledö.
5—Ökwödöma sulabenö omukwatadöja, –Aaa, ökwödöma Jobtjö bajalekwönönö otiwadösa, –jö̧ba̧lö, ja̧danö tabakwö chö̧ji̧ edö yöba̧ladöja, –Job tabakwö ö̧ji̧ma öwaetjöda i̧sebobe, sulabo̧ ö̧ji̧ma, –jö̧ba̧lö. 6Jejenö yöka̧laduwi̧tjö̧, baikwö yötawaduwakwö chömöledö: Ötjönö baledi̧ma, sulabenö ja̧tököjayonö, Diosma suli̧ öwaedajabe ötjönö, wanedö yötawa, 'daliwanö chö̧li̧binö di̧atajabe, —jö̧ba̧lö yöa̧linobe Jobma, iteda ömöledönö.
Ötjönö pjabato̧ bakwo̧bi deobe, jö̧ba̧lö Job yöa̧lina jawa
7Tupakwö yöa̧linobe Jobma:
—Usula chemawinö baledobetjö̧, –Suli̧ kwöwaeda, kabatibi, –jö̧ba̧lö jwöteba̧lobe, jo̧kwaijayonö atado̧ma deobe. –Pjabatitjö, –jö̧ba̧lö jwöteba̧lobe, ja̧danö bakwo̧ pjaatobö ji̧jayonö, pjabato̧ bakwo̧bi deobe. 8Diosma chi̧'yakwa̧ mana tjöeba̧lajabe, chöbaledapji jö̧ba̧lö, ja̧danö okobe jwiinö kwetachi̧tenia yȩa'wonö kwetachobö weajabe. 9Ajayinö jojodö otiwanö ötjönö tjomukwatinajayonö, wanedö yöta̧la, ja̧ otiwanö tjomukwati̧ 'dutawinado̧ 'yobebö loajabe, ja̧danö otiwanö tjomukwatökwe tjubutawaka, chuutjö kabebö ödajabe.
10—Isabenö usula chemawinö weajabe Diosma, wanedö yöta̧la, söpödibö ö'öböteniatjö metji̧bi̧danö, ötjönö meibobedanö ichejekwa, ö'wö batibenanö baibanö. Ajayinö otiwanö pjaatakwa̧ ösödö cho̧'wo chöwana̧linajayonö, towi bö'diya 'yebö lotji̧danö ja̧ cho̧'wo chöwana̧li̧ 'yebö loajabe ichejekwa, –La'akatjöda pjaatökena, –jö̧ba̧lö chö̧jibi̧nö. 11Jobekwö jwiinö ödameakwajabe ötjönö, ja̧danö iteda öpöjojodötjö bakwo̧ chö̧ji̧danö, ötjönö ölakwabikwawobedanö ichejekwa. 12Jau, iteda ömöayedö ölakwabikwawa jojodö bakobe ötjönö metji̧botö jö̧ba̧lö tjichobedanö ichejekwa, ja̧danö cheju tjösawö ja̧nö, 'dieju pjolö loawaka tjujunobedanö ichejekwa, ötjönö tjujuluwobö, isabenö Dios suli̧ öwaedökwesa, —jö̧ba̧lö yöa̧linobe Jobma.
Isabenö chömöledö tjo̧'wo jwitjibökwesa, jö̧ba̧lö Job yöa̧lina jawa
13Tupakwö yöa̧linobe Jobma:
—Diosma chö̧jawo̧dö chö̧jelö 'da̧batö ujunajabe, ödö tjö̧jobö, ja̧danö okobe deinö chöwaisawö̧ jojodöma, jalachibö ötjönö öpöjödadö, –Jobnö wajwidökwe, –jö̧ba̧lö. 14Okobe deinö chömöledöma#19:14 Tjo̧jo tjiwenenö Parientes y amigos le'dedö lotjajabe ötjönö, 15ja̧danö chejunö ju̧kwadöbi, chömöayedö ya̧döbi ötjönö öpöjödadö, –Bitema wajwidökwe, jelobetjö ichajo̧ ju'wedö tjitebo jojoena, –jö̧ba̧lö. 16Chömöayo̧bi ja̧danö, jo̧banö wetijayonö, aja̧kwö̧kö̧, labinö jo̧banö yöta̧litjö̧bi, weti̧ a̧ja̧kwö̧kö̧, –Chuluwo̧bö̧kö̧ja, –jö̧ba̧lö. 17Chilekwobi ja̧danö, sulabenö 'dö̧tekwioko, ötjönö jöpöjödachibajabe, –Chilekwe Jobma sulabenö 'dö̧bekwo̧, –jö̧ba̧lö, ja̧danö yö̧ne chöja̧wo̧döbi chö̧jobekwö ichiböködö, –Sulabenö 'dö̧bekwo̧, –jö̧ba̧lö. 18Tjemubi ötjönö obö öpöjödadö, cha̧la̧ibenama, sulabenö ötjönö obö yöba̧ladö. 19Okobe deinö yöne chömöledöma ötjönö öpöjödadö, okobe deinö ile 'di̧tebawö̧ma, ötjönö öpöjödö, chöpöjojodökwö batjibajabe. 20Isabenö nöinö usula emawo̧sa, jwiinö 'dalöko̧ batibajabe. Chitebia jwiinö, chi̧sȩdo̧ chiwe'ijunö pöawajökwesa, ja̧danö ina 'ya̧ta̧lijayonö, ö'wö batibo jö̧ba̧lo̧sa.
21—Isabenö lȩlöjinö kwedaduwobö jo̧be chömöledö, Diosma isabenö 'diinö kwakwaajabe ötjönö chömöledö, lȩlö̧jinö kwedaduwobö atebaduwakwö. 22Dios usula chemawinö ja̧i̧danö, tajawedö ökwödöbi lȩlöjinö edökönö, usula chewawinö ja̧köbaduwobeda chömöledö? Ida̧ökö nöinö chiteba'o 'yö̧'yököbaduwajabe ichejekwa, la'akatjöda tjo̧wita jö̧ba̧lö, yö̧bö kakataduwökenaji̧? —jö̧ba̧lö yöa̧linobe Jobma.
Isabenö chö̧jibinö pjaatakwo̧ ö̧jobe, jö̧ba̧lö Job yöa̧lina jawa
23Tupakwö yöa̧linobe Jobma:
—Yöta̧li̧ tji̧wȩyudobö chösöda, wȩyukwöjanö tji̧wȩyudobö chösöda. 24Inawanöbi tji̧wȩyudobö chösöda, martiyunö kwabö sobajadö, kwö'öbadenö tji̧wȩyudobö chösöda, yötali̧ 'dö̧ibajökönö, ba̧kwelöjatebö tjomukwatakobetjö̧.
25—Chöwaisa ötjöma, isabenö chö̧ji̧binö pjaatakwo̧ ö̧jobe, jö̧ba̧lö. Chöwaisa, 'dö̧ibaji möle, juluwajo̧ chö̧jibinö pjaatakwo̧ma bö̧jenö öjamatakwo̧. 26Ja̧danö chöwaisa, nöinö chö'wöchi̧tjö chi̧sȩdo̧ suli̧ waekwijayonö, ina chiteba'onö chö̧jayi, isabenö Diosnö chedakwo̧sa, jö̧ba̧lö. 27Jau, chöwaisa, ötjöda jo̧banö chedakwo̧sa, ötjöda chöbajalebiyanö ötjönö pjaatakwo̧nö Diosnö chedakwo̧sa, jö̧ba̧lö chöwaisa. Isabenö chösödökwe, chöwaisökwe Diosnöda chedakwo̧sa chömöledö, ja̧danö jo̧banö chedakwa̧ omukwatö, leetjö chime'dawachibobedanö ichejekwa, –Ayö, Diosnö chedenama, isabenö jwiinö otiwakobe, —jö̧ba̧lö.
Jweinö kwomukwataduwo, jö̧ba̧lö Job ömöledönö yöa̧lina jawa
28Tupakwö yöa̧linobe Jobma, ömöledönö:
—Ja̧danö, ökwödö chömöledönö baikwö yötawaduwakwö: Jweinö kwomukwataduwo chömöledö. Kwomukwataduwoko, –Jobma iteda wene ujuna̧lobetjö̧, tupakwö usula emawinö ja̧do, –jö̧ba̧lö, baikwö yötawa: 29Jejenö omukwatö ja̧köbaduwitjö̧ma, isabenö Dios lȩebakwa̧ yekabiduwobö jobe chömöledö. Jejenö sulabenö omukwatö kwö̧jaduwiökwe, Diosma isabenö dameakwö lȩebakwo̧ chömöledö. Jau chömöledö, –Isabenö inesö lȩekwa luwo̧ Diosma lȩbȩbo̧, –jö̧ba̧lö kwöwaisachibaduwakobetjö̧, isabenö ökwödönö lȩebakwo̧ Diosma, jo̧kwajabetjö̧ jweinö kwomukwataduwo, —jö̧ba̧lö yöa̧linobe Jobma.
Currently Selected:
Job 19: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
