Jueces 18
18
Dansaso jojodö tjitebo isakwö tji̧'yina jawa
1Ja̧ möle inesö la'aka luwo̧ma deinobe israel nijitjö̧. Ja̧danö, ju'wibi Dansaso jojodöma ina tjitebo niji tjujuna̧lobö tjisakwinobe. Damötjö tjitebo niji baibobö Dios 'da̧batö ujuninajayonö, ina ja̧ niji tjemobö tjujuluwinokobe Dansaso jojodöma, ju'wedö bakwasokwena jojodö tjitebo baibanö tjujuluwinadanö. 2Ja̧danö, idöda tjitebo niji baibanö Dios 'da̧batö ujuninemi tjujuluwobö waekwobetjö̧, jelobe pjolachö tji̧'yobö tjomukwatinobe Dansaso jojodöma. Jo̧kwajabetjö̧, okobe deinö Dansaso jojodötjö ömadö bakwamubedönö omudawö tjujuninobe, ölakwabikwawa juluwadönö, Zora comunidadtjöbi, Estaol comunidadtjöbi labebö, tupakwö tjö̧jakwemi niji kwebachö tjisakwobö. Jobadö bakwamubedönö webö yötja̧linobe, —Niji̧ ba̧kwemeachibanö kwebachö kwedaduwo, dö̧ja̧kwemi kwöbadekwaduwobö, —jö̧ba̧lö.
Wetjawö̧, latjebinobe, ja̧danö Efrainsaso niji mösa'iju jȩmi nijibenö kwetjachenama, Micaias ejube tjichibinobe, ja̧danö jobe tjabekwinobe. 3Ja̧danö, Micaias ejunö tjö̧jonö, Levisaso jojo iwene tja̧ja̧kwinobe, a̧li̧kwö ö̧jayi tjöwaisinökwe iwenema, jo̧kwajabetjö̧ ö̧jobekwö 'ya̧nö abebö tja̧ja̧kwinobe, —¿Ti ichejebinada ökwönö, bejunö kwö̧jobö? ¿Ja̧danö tajawedö bejunö kwö̧jobö kwichinada? ¿Ja̧danö bejunö kwotidi̧ma di̧yada? —jö̧ba̧lö. 4Abebö tja̧ja̧kwökwe, Micaias jo̧banö tjö̧'da̧de pjabato̧ baibanö 'dabatö ujunina jawa yöawinobe, —Tjö̧'da̧de pjabato̧ chotidobö weinobe Micaiasma, ja̧danö Diostjö Micaiastjö tjö̧'da̧de pjabato̧ batibajabe, —jö̧ba̧lö, baledina jawa yöawinobe.
5Yöawawö̧, atjebinobe: —Tjö̧'da̧de pjabato̧ kwö̧jobetjö̧, adebakwö, Diosnö abebö kwa̧ja̧kwobö, babe kwedachi̧ma, otiwanö laebakwojobö, waekwakwojobö jö̧ba̧lö döwaisobö, —jö̧ba̧lö. 6Atjebökwe, —Jau, wene jwiinö kwi̧'yaduwo, Isabenö Jo̧ma isabenö otiwanö edö pjaatakwo̧ ökwödönö, —jö̧ba̧lö atadinobe.
7Ikenama jobadö bakwamubedöma tupakwö tji̧'yinobe, Lais comunidadbe tjichibenanö kabatö. Jobe ichibajadö, Lais comunidad jojodönö tjedinobe, wene jwiinö, yebabökönö tjö̧jima. Sidon comunidad jojodö wene jwiinö tjö̧ji̧danö, tjöpöjojodö metjibakwa̧ omukwatökönö tjö̧ji̧ tjedinobe. Ja̧danö ju'wibi, Lais comunidad jojodö tjujuna̧li̧ tjedinobe, Tjöbatjiju otiwanö wa̧jobetjö̧ okobe jwiinö bö̧jenö tjö̧ji̧ jawa juna̧ladö, ja̧danö tjitea nöinö juna̧ladö, jö̧ba̧lö tjedinobe. Ju'wibi Lais jojodöma Sidon comunidadtjö ödö tjö̧jinobe, ja̧danö jelobetjö ichadöma Lais comunidadbe ichibiatjinokobe, ja̧danö Lais comunidad jojodöma jelobekwena 'yi̧atjinokobe.
8Jejenö edajadö, tjömöledö tjö̧jobekwö tjȩwa̧jinobe, Zora comunidadbebi, Estaol comunidadbebi, ja̧danö tjȩwa̧jiawö tjedaja̧ abebö tja̧ja̧kwinobe tjömöledöma. 9Abebö tja̧ja̧kwawö̧, yötjawinobe kwebachö ȩwa̧jadöma, —Ichaduwi, jobadönö mebibö di̧'yo, tjitebo niji ökwödöda ditebo niji baibakobetjö̧. Tjitebo niji dedajabetija, ja̧danö isabenö jwiinö otiwi̧ niji. Kwiteada̧laduwa chömöledö, juluwanö jobe di̧'yaduwo. Teada̧lökönö, juluwanö jobe di̧'yobö jo̧be, tjitebo niji tebachö, ditebo baibanö demakobetjö̧. 10Jobe ichibö, kwedaduwakwedöja, jobadö tjöbeba̧lökönö, tjöpöjojodö metjibakwa̧ omukwatökönö tjö̧ji̧ma. Ja̧ nijima isabenö jalobe, okobe jwiinö dö̧ji̧ jawa otiwanö ji̧ nijima, ja̧danö Diosma ja̧ niji demobö otiwanö iyajabe, —jö̧ba̧lö yötjawinobe.
11Yötjawawö̧, Dansaso jojodötjö ömadö seiscientosbedö Zoratjöbi, Estaoltjöbi ko̧ko̧kwö latjebinobe, tjitea ölakwabikwawa jawa kwebatö. 12Ja̧danö, labebajadö, Judasaso niji comunidad Quiriat Yearinbe tjichibinobe, ja̧danö ichibajadö, jobe tjabekwinobe. Ja̧ comunidad ötjabi̧ labebö loawama baikwö laebobe, ja̧ möle jobadö Dansaso jojodö jobetjö tjabekwinobetjö̧, jemi ikena baikwö bajalenö Majane Dan jö̧ba̧lö ötjabobe, Dan jojodö tjabekwinemi jö̧ba̧lö. Ja̧ Majane Dan ötjabobema, Quiriat Yearin comunidadtjö jawo̧ meajobekwö jo̧be. 13Ikenama, jobetjö labebö, Efrainsaso mösa'iju jȩmi nijibenö tji̧'yinobe, Micaias ejube tjichibenanö kabatö.
14Micaias ejube yöneawinö ichibajadö, Lais comunidad niji edö kwebachinadö ömadö bakwamubedöma ju'wedönö yötjawinobe, —Dömöledö, bemi ju̧kwadötjö bakwo̧ ejunö, Diostjö jojodötjö tjö̧'da̧de pjabato̧ 'duawajiado̧bi jo̧be, ja̧danö pjebadö o̧'wo jawabi tjö̧jobe, ja̧danö platatjö otikwa o̧'wo jawabi ö̧jobe. Jo̧kwajabetjö̧ otiwanö kwomukwataduwo ja̧ jawa, dakwö ja̧dakwojobö jö̧ba̧lö, —yötjawinobe. 15Yötjawawö̧, jalachibö Micaias eju jo̧bekwö tji̧'yinobe, Levisaso jojo ö̧jejube, ja̧danö ichibajadö, —Dokwa? —atjebinobe. 16Ja̧danö, Dansaso ömadö seiscientosbedö a̧petu tjöekwemi apjude ö'öbönö ja̧nö, tjitea ölakwabikwawa jawa do̧ba̧lö, 17-18Levisaso jojo tjö̧'da̧de pjabato̧kwö yötja̧lakwawinobe, ja̧danö jo̧bakwö yötja̧lakwawonö, bakwamubedö niji edö kwebachinadöma Micaias eju okwa tetjachinobe, platatjö otikwa o̧'wo jawabi, ö'weje pjabato̧ 'duawajiado̧bi, pjebadö o̧'wo jawabi tjemobö.
Ja̧danö, Micaias eju tebachajadö, ja̧ jawa e'ewö latjebiökwe, tjö̧'da̧de pjabato̧ma abebö a̧ja̧kwinobe, —¿Taji kwöwaedaduwa? —jö̧ba̧lö. 19Abebö a̧ja̧kwawö̧, —¡Yöba̧lökönui! 'Wiinö ja̧nö, ökwödökwö kwicho, okobe deinö ökwödö dabe'dodanö ja̧nö, Diostjö ökwödötjö dö̧'da̧de pjabato̧ bakibanö. Jau, babema sule bakwo̧nöda pjabatö, Diostjö Micaiastjö tjö̧'da̧de pjabato̧ kwö̧jobe, jö̧tö? Jo̧kwaijayonö isabenö ja̧tjö bajalekwönönö otiwena, okobe deinö bakwaso jojodönö, israel jojodötjö jeleso jojodönö okobe deinö pjabatö, Diostjö jobadötjö tjö̧'da̧de pjabato̧ kwö̧joböma, jö̧tö?#18:19 Ajayi tjiwenenö, Jau, di̧yada otiwi̧ma, sule bakwo̧nöda pjabatö, tjö̧'da̧de pjabato̧ kwö̧joböö̧kö̧, okobe deinö bakwaso jojodönö, israel jojodötjö jeleso jojodönö okobe deinö pjabatö, tjö̧'da̧de pjabato̧ kwö̧joböö̧kö̧? Jo̧kwajabetjö isabenö ökwödökwö kwichobö jo̧be, Diostjö ökwödö Dan jojodötjö dö̧'da̧de pjabato̧ bakibanö kwö̧jobö, —jö̧ba̧lö yötja̧linobe. 20Yötja̧lökwe, ösödinobe, ja̧danö tjö̧'da̧de pjabato̧ 'duawajiado̧bi, pjebadö o̧'wo jawabi, platatjö otikwa o̧'wo jawabi emö i̧'yinobe Dansaso jojodökwö. 21Ja̧danö, jobetjö labebö tupakwö tji̧'yinobe, ja̧danö 'ya̧nö, tji̧tji̧mubi, tja̧jwi̧mubi, ju'wi tjiteabi abönö 'yo̧bö wetjinobe, ja̧danö ölakwabikwawadöma ju'wedö tjö̧kömanö kwetjachinobe.
22Ja̧danö, Micaias ejutjö ja'yubenö ödö tji̧'yaja̧ ikenama, tje'ewaja̧ waisachibö Micaiasma ipjeanö ju̧kwadönö jwöinobe, ja̧danö jo̧bakwö ko̧ko̧kwö Dansaso jojodönö lutjinobe, yö̧ne tjichibenanö. 23Ja̧danö yö̧ne ichibö, jwötjeba̧linobe Dansaso jojodönö, ja̧danö jwötjeba̧liawö̧, Dansaso jojodöma jalachibö abebö tja̧ja̧kwinobe Micaiasnö, —Taji waekwa? Tajawedö ba̧jȩkwadökwö dökömanö lukibaduwaja̧da? —jö̧ba̧lö. 24Atjebökwe, Micaiasma atadinobe, —Kwöwaisaduwa waekwaja̧ma. Ökwödöma chotidinawö̧ chösödawö̧ diosbedönöbi kwemaduwajabe, ja̧danö chömöledöso̧ tjö̧'da̧de pjabato̧nöbi kwemaduwajabe. Jejenö kwemaduwi̧tjö̧ jwibo̧ chö̧jibajabe, dakwö –Taji waekwa, –jö̧ba̧lö yöka̧laduwobö? Kwöwaisaduwa sulabenö kwemaduwaja̧ma, —jö̧ba̧lö.
25Atadawö̧, —Teada̧lönö ja̧wi, labinö ökwödönö jwökeba̧lapji jö̧ba̧lö. Ökwödötjö ju'wedöma labidö tjö̧jobe, ja̧danö labinö jwökeba̧litjö̧ma, dameakwö ökwödönö metjibena, ja̧danö ökwöbi, kwömöledö kwejunö ju̧kwadöbi debö kwi̧'yaduwena. Jejenö baledapji jö̧ba̧lö, labinö jwökeba̧la, —jö̧ba̧lö tjatadinobe. 26Ikenama atadajadö, tupakwö tji̧'yinobe. Ja̧danö, Micaiasma jobadönö edö öwaisinobe, Bidönö chujuluwobö jwibo̧sa jö̧ba̧lö, jo̧kwajabetjö̧ Micaiasbi jalachibö ejube ȩwa̧jinobe.
Dansaso jojodö Lais comunidad tjemina jawa
27Dansaso jojodöma, Micaias otidina jawabi, jo̧ba ömöledöso̧ tjö̧'da̧de pjabato̧nöbi tjeminobe, ja̧danö emajadö, öbibö tji̧'yinobe, Lais comunidadbe tjichibenanö kabatö. Jobadö Lais comunidad jojodöma wene jwiinö, ölakwabikwawökönö tjö̧jinobe, tjöpöjojodö juluwanö tjichibakwa̧ omukwatökönö, ja̧danö jejenö tjö̧jemi ja'ötjö, Dansaso jojodöma ichibö, okobe deinö jobadönö kwabawö lotjinobe, ja̧danö kwabö lobajadö, okobe jwiinö comunidad juwö lotjinobe. 28Ja̧danö, Lais comunidad jojodönö pjabato̧ bakwo̧bi deinobe, Sidon comunidadtjö ödö tjö̧jinobetjö̧, ja̧danö ju'wibi pjeanö ju̧kwadötjö tjömöledö deinobetjö̧. Ja̧ Lais comunidadma, wabekonö ji̧nobe Bet Rejob comunidad yöne.
Ja̧danö, Lais comunidad jojodönö juluwajadö, yemidanö comunidad tjotidinobe, ja̧danö jobe tjö̧jinobe, idöda tjitebo comunidad baibanö. 29Ja̧danö comunidad imi balewö lotjinobe Dan jojodöma. Ajayinö Lais jö̧ba̧lö mikwinobe ja̧ comunidadma, jo̧kwaijayonö tja'dömine iminö tjimidinobe, Dan comunidad jö̧ba̧lö. Jo̧ba tja'dömine Danma, Jacob ju'wi imi Israel itji̧.
30Ja̧danö, Dansaso jojodöma Micaias otidinökwe o̧'wo jawa jobe tjitebo comunidadnö tjujuninobe, idöda tjösödökwe baibanö. Ja̧danö Levisaso jojoma tjö̧'da̧de pjabato̧ ö̧jinobe. Jo̧ba Levisaso jojoma Jonatan mikwo̧, ja̧danö jo̧bama Moises itji̧ Gerson mikwo̧ itji̧ tupadanö jojo. Ja̧danö, Jonatanbi, itji̧mu tupadanö jojodöbi jobe tjö̧'da̧de pjabatadö tjö̧jinobe, bajalianö israel jojodö tjöpöjojodöma israel jojodönö juluwö, tjitebotjö labebö tjemenanö baibanö. 31Dios eju, jo̧banö tjösödobö weinejuma Silo comundidadnö ji̧nobe, otiwanö jobetjö jojodö tjösödobö. Jo̧kwaijayonö Dios eju Silo comunidadnö jȩmi baledibanö, Dansaso jojodöma Micaias otidinökwe o̧'wo jawa ösödö tjö̧jinobe, bitema dösödökwe dios jö̧ba̧lö.
Currently Selected:
Jueces 18: WPC
Highlight
Share
Compare
Copy
Want to have your highlights saved across all your devices? Sign up or sign in
©2021, All Rights Reserved
