Jueces 12
12
Efrainsaso jojodö Jeftekwö tjölakwabikwawina jawa
1Ja̧danö, Jefte amonitas jojodönö ujuluwaja̧ ikenama, Efrainsaso luwedöma Efrainsaso jojodötjö ölakwabikwawa jojodönö tjo̧ko̧kodinobe, ja̧danö ko̧ko̧dajadö, Jordan ojwe petjibinobe, Zafon comunidadbe, Jefte ö̧jobekwö. Ja̧danö, ichibajadö, dameakwö yötja̧linobe Jeftenö, —Belö amonitas jojodönö ölakwabikwawö kwi̧'yenama, tajawedö ökwödöbi ichö dölakwabikwawobö akebinököda? Isabenö ökwödöbi dichobö jwököbinatjö̧bö. Ja̧danö, ökwödönö jwököbinokobetjö̧, babe kweju juwö lodakobe, okwa kwö̧jonö, kweju juwö lodakobe, —jö̧ba̧lö.
2Yötja̧lökwe, Jeftema atadinobe, —Ja̧maökö. Amonitas jojodöma jwiinö usula demawinö ja̧tjinobe, ökwödö Galaad niji ju̧kwadönö, ja̧danö ötjöbi chömöledöbi jobadökwö ölakwabikwawö dö̧jijatö. Ja̧danö, ölakwabikwawö ja̧nö, ökwödönö jwötijatö, jobadötjö dö̧jibinö pjakataduwobö, jo̧kwaijayonö pjakatinaduwokobe. 3Ja̧danö, –Efrainsaso jojodöma pjatjatökakwedö, –jö̧ba̧lö chöwaisachibenama, ökwödöda amonitas jojodönö dölakwabikwawobö chomukwatijatö. Jau, jobadönö ölakwabikwawö debö chi̧'yo jö̧ta̧linajayonö, yayonö amonitas jojodönö ölakwabikwawö chi̧'yijatö, ja̧danö Isabenö Jo̧ma otiwanö pjaatinobe, jobadönö chujuluwobö. Isabenö ötjönö kwödameakwawobö jwiobe, tajawedö ötjökwö kwölakwabikwawotö jö̧ba̧lö kwichaduwaja̧da? Sula, —jö̧ba̧lö atadinobe Jeftema.
4Efrainsaso jojodöma Galaad niji jojodönö öpöjödö yötja̧linobe, —Ökwödö Galaad niji ju̧kwadöma, ökwödö otiwadö dö̧ji̧danöma jö̧ködöja, ökwödöma sulabedö Efrain nijitjö döbibajadöja, ja̧danö döbibajadö, Efrain nijibi Manases nijibi ö'wejenö ju̧kwadöja, sulabedöja ökwödö Galaad jojodöma, —jö̧ba̧lö. Jejenö yötja̧lökwe Jeftema okobe deinö Galaad niji ölakwabikwawadönö ko̧ko̧dö, Efrainsaso jojodökwö ölakwabikwawinobe, ja̧danö Galaad jojodöma Efrain jojodönö tjujuluwinobe. 5Ja̧danö Galaad jojodöma Jordan ojwe peikwelö tjujuluwinobe, ja̧danö tötjeba̧linobe, Efrainsaso ölakwabikwawa jojodö petjibapji jö̧ba̧lö. Ja̧danö, Efrainsaso ölakwabikwawadötjö bakwo̧ ichibö, —Petibobö jö̧ta̧la, —jö̧ba̧lö aebenama, abebö tja̧ja̧kwinobe, —Ökwöma Efrainsaso jojoköbiji̧? —jö̧ba̧lö. Ja̧danö, —Efrainsaso jojobö̧kö̧sa, —jö̧ba̧lö ataditjö̧ma, 6jo̧banö wetjinobe, —Kwatjö̧ma Shibolet jö̧ba̧lö yöba̧li̧, kwiwene da̧ja̧kwobö, —jö̧ba̧lö. Jejenö wetjökwe, —Sibolet, —jö̧ba̧lö yöa̧litjö̧ma, jo̧banö tjöwaisachibinobe, isabenö bitema Efrainsaso jojo jö̧ba̧lö, yötja̧li̧tjö wainö yöa̧lobetjö̧#12:6 Wanedö yöta̧la, owotjo̧jo̧ jojodöma —Iso̧ —jö̧ba̧lö yötja̧lenama, jojodö yötja̧li̧tjö wainö yötja̧lobe, ja̧danö Efrainsaso jojodö Shibolet jö̧ba̧lö yötja̧lenama, Galaad jojodö yötja̧li̧tjö wainö yötja̧linobe, Sibolet jö̧ba̧lö., ja̧danö jo̧banö do̧batö, ojwe peikwelö kwabö lotjinobe.
Ja̧danö, Efrainsaso jojodö Galaad jojodökwö tjölakwabikwawenama, Efrainsaso jojodötjö cuarenta y dos milbedö ö'wö batjibinobe.
7Galaad jojo Jeftema, jelemutjö bakwöta o̧biya baledibanö israel jojodötjö la'aka luwo̧ ö̧jinobe. Ikenama, Jeftema ö'wö baibinobe, ja̧danö ö'wö babibajo̧nö iteda itebo comunidadtjö jo̧banö tjo̧tji̧nobe, Galaad nijinö.
Ju'wedö israel jojodötjö la'aka luwedö tjö̧jina jawa
8Jefte ö'wö baibaja̧ ikenama, Belen comunidad jojo Ibsan mikwo̧ israel jojodötjö la'aka luwo̧ ö̧jinobe. 9Ibsanma itji̧mu ömadönö treintabedönö ujuna̧linobe, ja̧danö itji̧mu ya̧dönö treintabedönö ujuna̧linobe. Jo̧bama itji̧mu ya̧dönö weinobe, israel jojodötjö jelesokwena jojodönö tjemobö, iteda ömöledösaso jojodöböködönö, ja̧danö ju'wibi jelesokwena jojodötjö ya̧dönö ichejebinobe, itji̧mu ömadö tjilekwamu batjibanö#12:9 Damötjö luwedö jejenö ja̧tji̧nobe, ju'wedö luwedökwö wene jwiinö tjö̧jobö. Bakwo̧ la'aka luwo̧ma, itjijunö weena, jelo̧ la'aka luwo̧ itji̧nö jemobö, yöne tjö̧möledö babibö, wene jwiinö tjö̧jakobetjö̧.. Jo̧ba Ibsanma jelemutjö dötölataja o̧biya baledibanö israel jojodötjö la'aka luwo̧ ö̧jinobe. 10Ikenama, Ibsanma ö'wö baibinobe, ja̧danö ö'wö babibajo̧nö Belen comunidadtjö tjo̧tji̧nobe.
11Ja̧danö Ibsan ikena, Zabulonsaso jojo Elon mikwo̧ma israel jojodötjö la'aka luwo̧ ö̧jinobe. Elonma domulataja jawa o̧biya baledibanö israel jojodötjö la'aka luwo̧ ö̧jinobe, 12ikenama Elonma ö'wö baibinobe, ja̧danö jo̧banö Zabulonsaso niji comunidad Ayalontjö tjo̧tjinobe.
13Ja̧danö, Elon ikena, Piraton comunidad jojo Abdon#12:13 Tjiwenenö Hilel itji̧ Abdon jö̧ba̧lö laebobe. mikwo̧ israel jojodötjö la'aka luwo̧ ö̧jinobe. 14Jo̧ba Abdonma itji̧mu ömadönö cuarentabedönö ujuna̧linobe, ja̧danö ö̧'dö̧dö ömadönö treintabedönö ujuna̧linobe. Okobe deinö Abdon itji̧mubi, ö̧'dö̧döbi bakwo̧nökwena tjajwi bulokwena tjujuna̧linobe, ja̧danö tjajwikwena oma'anö wanö kwebachiatjinobe. Jo̧ba Abdonma jelemutjö wapötakwa o̧biya baledibanö israel la'aka luwo̧ ö̧jinobe, 15ikenama Piraton comunidad jojo Abdonma ö'wö baibinobe. Ja̧danö, ö'wö babibajo̧nö Piraton comunidadtjö tjo̧tjinobe. Ja̧ Piraton comunidadma, Efrain niji mösa'iju jȩmi comunidad, ajayinö amalecita jojodö tjö̧jinemi.
Currently Selected:
Jueces 12: WPC
Highlight
Share
Compare
Copy
Want to have your highlights saved across all your devices? Sign up or sign in
©2021, All Rights Reserved
