Isaías 64

1Chuluwo̧ Dios, mölȩjȩ kȩ'ebö, bö̧jȩkwö kwichitjö̧ma otiwo jö̧a̧lena. Jobekwö kwichitjö̧ma, kwöba a'otjö tjö̧awena mösa'ijuma. 2Jobekwö kwichitjöma, tebo kököemi nötekwajö ubi̧danö ubena mösa'ijuma, ja̧danö ökwöla ojwiyo tubedena wamenö döebi̧danö, mösa'iju tjö̧awena. Jobekwö kwichibitjö̧ma, okobe deinö kwöpöjojodöma, ökwönö tjöwaisachibena, —Isabenö Jo̧ mikwo̧ma, inesö jwiinö juluwo̧, —jö̧ba̧lö, ja̧danö kwöba a'otjö tjitebotenia jojodöma yebabinö tjö̧bawö tjö̧jena.

3Jau chuluwo̧, damötjö edajidökö jawa i̧sȩbö ichinaja, kwi̧sȩbakwa̧ wajwidonö, i̧sȩbö ichibinaja chuluwo̧, ja̧danö jwibachö kwichenama, kwöba a'otjö tjö̧awinobe mösa'ijuma. 4Jau chuluwo̧, ökwödanöbo̧, jo̧banö tjo̧'wo wana̧ladönö pjabato̧ma bakwo̧bi deobe. Damötjö baikwö bajalenö, la'akatjöda a̧ja̧kwajiböködösa, la'akatjöda bakwo̧bi ölakiyunö a̧ja̧kwinokobe, ja̧danö bakwo̧bi öbajalenö edinokobe, ökwöjayo̧ ösödadönö otiwanö pjabato̧nöma. 5Jau chuluwo̧, tjo̧'wo ösöwanö ökwö weköbi̧ a̧ja̧kwö ju̧kwadönö, otiwanö ja̧bö ju̧kwadönö otiwanö pjabatö jo̧ja.

Jobekwö ji̧nöködösa chuluwo̧, ja̧danö sulabenö ja̧bö dö̧jiökwe, ökwödönö dameakwö ji̧naja chuluwo̧. Jo̧kwaijayonö, kwödameakwijayonö, yayonö jwaikwöda sulabenö ja̧bö dö̧jijatö, ida̧ökö lekwe möle sulabenö ja̧bö dö̧jajabe chuluwo̧, ¿dakwö dö̧jibakwajö? 6Okobe deinö kwöba a'otjö yȩbekwadödanö babibadösa chuluwo̧. Ja̧danö otiwanö ja̧badösa jö̧ba̧lö yöda̧li̧jayonö, ja̧di̧ma yȩekwado̧, iwonö lu̧ju pjajawa̧do̧danö ichejekwobe. Ökwödöma towisöja kököachibi̧danö ichejekwadösa, ja̧danö jwa̧le'epjo e'ewibobedanö, sulabenö ja̧bö dö̧ji̧ma jelobekwö badibanö öibawö̧sa.

7Babe ökwönö abebadöma deobe ditebotjö chuluwo̧, bakwo̧bi jwaikwöda ökwönö ösödö jo̧ma deobe. Jau chuluwo̧, dö̧jelö jelobekwö kwöjalachibajabe chuluwo̧, ökwödönö edökönö, —Wainö sulabenö ja̧bö ja̧nö, usula tjemawo, —jö̧ba̧lö iyö loköbajabe chuluwo̧.

8Chuluwo̧ Isabenö Jo̧, dabe'doma ökwödaja. Ja̧danö, ökwöma lete'otjö dadö otido̧danö jo̧ja, ja̧danö ökwödöma kwotidaja'o lete'odanö ja̧dösa, okobe deinö ökwödöma ökwöda kwotidinawö̧sa. 9Chuluwo̧ Isabenö Jo̧, jwiinö dameakwö kwö̧joko, kabatibökönö sulabenö ja̧bö dö̧ji̧ omukwatö kwö̧joko. Atebakwö chuluwo, dö̧jobekwö kwedo, kwo̧'wo jwikiboko, —Okobe deinö Israel jojodöma ötjöda chömöledö, —jö̧ba̧lö.

10Ökwöda kwitebo niji comunidadteniama, bakobe jojodö deobe baibajabe. Sion mösa'obi, jojodö deobe baibajabe, Jerusalen comunidadbi söbebö loawemi baibajabe. 11Ökwö kweju ditebonö dujuna̧leju, inesö otiweju, da'dödö ökwönö tjösödinelöma, juwö lotjineju baibajabe, ja̧danö okobe jwiinö ju'wi dujuna̧li̧ otiwemiteniabi, suli̧ tjöwaedajabe. 12Ja̧ jawa edö, ina pjabatökönö kwö̧jakwa̧ji̧ chuluwo̧ Isabenö Jo̧? Ina wi̧inö ja̧nö, tupakwönönö usula dewawobö weköbakwa̧ji̧?

jö̧ba̧lö Diosnö atebobe.

Currently Selected:

Isaías 64: WPC

Highlight

Copy