Isaías 62

Jerusalen jojodönö ba̧kwelöjatebö atebakwo̧sa, jö̧ba̧lö Isaias i̧wȩyudina jawa

1Isabenö cho̧'wo tjo̧ekwobe Sion mösa'o ju̧kwadönö, chitebo comunidad Jerusalen omukwatö, cho̧'wo tjo̧ekwobe, jo̧kwajabetjö̧ wi̧inö chö̧jökakwo̧sa. Jau, jwaikwöda yöbawö chö̧jakwo̧sa, Jerusalen comunidad jojodö Dios wei̧ tja̧ja̧kwenanö baibanö. Jau, baikwö wanedö yöta̧la, ja̧ möle tjö̧jibinö Dios pjaatakwa̧ma, dȩju̧wa'yudanö öwawakobe, ja̧danö Dios wei̧ a̧ja̧kwö tjö̧ji̧ma, möle dewachi̧danö salöinö dewakobe. 2Jau Jerusalen, ja̧ möle tjitebotenia jojodöma, Dios wei̧ a̧ja̧kwö kwö̧ji̧ tjedakwedö, ja̧danö tjitebotenia la'aka luwedöma, salöinö kwidewobe tjedakwedö. Ja̧danö ja̧ möle yayi kwimi ötjabikujuja#62:2 Jerusalen comunidad wanedö yöa̧lenama, jojosujunö yöa̧li̧danö wanedö yöa̧linobe., Isabenö Jo̧ Diosda kwimi imidakwa̧ kwimima. 3Ja̧ möle butjawaka inesö otiwaka, Isabenö Jo̧ Dios do̧alakadanö kwichejekwakwujuja, Dios ökwönö do̧a̧lonö, inesö la'aka luwo̧ ubutjawaka diadema ötjabakadanö kwichejekwakwujuja. 4Ja̧danö ajayinö ökwönö, —Le'dedö loinoko, —jö̧ba̧lö ötjabinajayonö, ja̧danö kwitebo niji —Söbebö loawemi, —jö̧ba̧lö ötjabinajayonö, ja̧ möle 'yayi kwimi ötjabikwujuja, ja̧danö kwitebo nijima 'yayi imi ötjabikobe. Jau, ja̧ möle, —Jwiinö chösödoko, —jö̧ba̧lö ötjabikwujuja, ja̧danö kwitebo niji, —Jilekwenö emaju, —jö̧ba̧lö ötjabikobe. Jau Jerusalen, jobekwö ötjabikwujuja, Isabenö Jo̧ma jwiinö ökwönö ösödobetjö̧, ja̧danö kwitebo nijima Dios ilekwodanö ichejekwakobe, jwiinö otiwanö pjaatobetjö.

5Jau Jerusalen, bakwo̧ möayo̧ ilekwo baibanö möayujunö o̧'wo ösöwanö emidanö, ökwönö otidinama ökwönö emakobe ichejekwa. Ja̧danö ilekwonö emajo̧, bakwo̧ ilekwonö ösödö, —Otiwujunö chemajabe, —jö̧ba̧lö o̧'wo ösöwanö ö̧jidanö, ökwönö o̧'wo ösöwachibanö ösödakobe kwösödökwe Diosma.

6Chitebo comunidad Jerusalen, eda̧lö tjöbeba̧la̧dönö chujunajabe, tjöekwemi ja̧nö, Diosnö atjebakobetjö̧. Jau Jerusalen, mölebi, yö̧tebi baledibanö, wi̧inö jö̧könö, kabatökönö Diosnö abebö tjö̧jakwedö. Isabenö Jo̧ma Jerusalennö ju̧kwadönö pjaatakwa̧ jawa yöbawö ujunajabe, jo̧kwajabetjö̧ ökwödö jo̧banö abebadöma, ö'wachökönö, jwaikwöda yöbawö ujunina jawa omukwatibobö akebaduwo. 7Wanedö yöta̧la, akebaduwi̧ a̧ja̧kwökönö ö'wachobö webökönaduwi, jwaikwöda kabatibökönö abebö kwö̧jaduwo, yemidanö Jerusalen comunidad ujunenanö baibanö, bö̧jȩ ba̧kwemeachibanö jojodö Jerusalen comunidad ösödö, otiwanö tjomukwatenanö baibanö.

8Isabenö Jo̧ma, iteda inesö ujulunö baikwö yöbawö ujunajabe:

Ötjö inesö chujulunö baikwö yöbawö chujunaduwakwö: Bemi tupakwö la'akatjöda ökwödö kwöbatjoduwi wa̧ji̧ma, iyö lotökakwo̧sa kwöpöjojodöduwi tju̧kwa baibanöma. Ja̧danö ökwödö ubasobu o̧'do̧bu kwotidaduwajobuma, ju'wedö tjitebo jojodöma la'akatjöda 'döbebö tjowökakwedö. 9Jau chömöledö, ökwödö kwöbatjoduwitjö kwemaduwaja̧ma, ökwödöda otiwanö ötjö Isabenö Jo̧nö ösödö kwukwaduwakwedöja, ja̧danö ubasobu otidajadöda, cheju a̧petusȩkotjö otiwanö kwowaduwakwedöja,

jö̧ba̧lö yöbawö ujunajabe Isabenö Jo̧ma.

10Comunidad apjudebenö lakebaduwo chömöledö, Jerusalenbe ichibakwama mana otiwanö kwotidaduwo. Jalama otiwama baibanö kwotidaduwo, ja̧danö inawiya manatjö pjolatö loköbaduwo, Jerusalenbe tjichakwedö otiwanö kwetjachakobetjö̧. Ja̧danö mana i̧sȩba̧do̧, banderasa̧do̧ kabebö kwönaduwo, tjiteboteniatjö ichadöma mana otiwanö tjedakobetjö̧.

11Jau chömöledö, bö̧jȩ ba̧kwemeachibanö ju̧kwadönö baikwö weajabe Isabenö Jo̧ma,

Jerusalen jojodönö baikwö yökawaduwo: Edaduwi, kwö̧jibaduwinö pjabato̧ma baikwö kwö̧jaduwobekwö ichobe. Ja̧danö baikwö ichenama, iteda emajawö̧, tjö̧jibinö pjaatajawö̧nö öbibö ichobeta,

jö̧ba̧lö yötjawobö weobe. 12Ja̧danö, jobadö tjö̧jibinö pjaatajawö̧ma, —Isabenö Jo̧ Ömöledö Suli̧ Jwibadö, tjö̧jibinö pjaatinawö̧—jö̧ba̧lö ötjabikwawö̧. Ja̧danö ja̧ möle Jerusalen comunidad ötjabikobe, —Dios ösödemi, kaatibökemi comunidad, —jö̧ba̧lö.

Currently Selected:

Isaías 62: WPC

Highlight

Copy