Isaías 39

Babilonia jojodö Ezequiasnö edö tjichina jawa

1Jemi ikenama, ja'yubenö lekwajabetjö̧ Babilonia niji la'aka luwo̧ Merodac Baladan#39:1 Baladan itji̧ Merodac Baladan jö̧ba̧lö laebobe. mikwo̧ma Ezequiasnö baledina wene a̧ja̧kwinobe, —Ajayinö nöinö 'dö̧achinajayonö, otiwanö ö̧bibajinobe Ezequiasma, —jö̧ba̧lö. A̧ja̧kwajo̧, ömöayedönö weinobe, Ezequiasnö iyakwa̧ e'ewö tjiyobö, ja̧danö i̧wȩyudaja̧ kwiyalusöja e'ewö tji̧'yobö. 2Tjichibiökwe, ösödinobe Ezequiasma, —Otiwanö kwichaduwajabe chömöledö, —jö̧ba̧lö. Ja̧danö, Ezequiaskwö tjö̧jonö, okobe jwiinö itea jobadönö i̧sȩbinobe, nöinö mikwawi̧ jawa lödawejunö ujuna̧li̧ jawabi, ölakwabikwawa jawa ujuna̧li̧bi, okobe jwiinö ju'wi jaye ko̧ko̧dö lödawejubiyanö ujuna̧li̧bi. Okobe jwiinö iteda ejunö ji̧bi, ju'wi itebonö ji̧bi tojökönö i̧sȩbinobe Ezequiasma.

3Jemi ikenama Dios yöawi̧ yöbawo̧ Isaiasma ichibö, la'aka luwo̧ Ezequiasnö abebö a̧ja̧kwinobe: —Idöma dakwö yötja̧linada? Ja̧danö, didö tjitebotjö tjichinada? —jö̧ba̧lö. Aebökwe, —Ödö tjitebotjö tjichinobe, Babilonia nijitjö, —jö̧ba̧lö atadinobe Ezequiasma. 4Atadökwe, —Kwejunö ji̧ jawatjö, diya jawa tjedinada? —jö̧ba̧lö abebö a̧jakwinobe Isaiasma. Aebökwe, —Okobe jwiinö chejunö ji̧ jawa tjedajabe, ja̧danö okobe jwiinö lödawejubiyanö ji̧ jawabi tjedajabe, ju'wi jayebi tojökönö, okobe jwiinö chi̧sȩbajabe, —jö̧ba̧lö atadinobe Ezequiasma.

5Jobekwö yöawiökwe, Ezequiasnö yöawinobe Isaiasma: —Isabenö Jo̧ Okobe Jwiinö Juluwo̧ Dios yöawi̧ kwa̧ja̧kwo, baikwö yöawi̧ma: 6–Ezequias, yadakwö baledakwa̧ baikwö yötawakwö: Ju'wi möle okobe jwiinö kwejunö ji̧ma, kwa'dödö ko̧ko̧dö tjödina jawabi, ökwö ko̧ko̧dö kwödaja̧ jawabi, Babilonia nijibe tje'ewakwedö. Ja'yubebi ji̧bökönö, okobe jwiinö tje'ewakwedö, –jö̧ba̧lö yöawobe Isabenö Jo̧ma. 7Ja̧danö ju'wibi baikwö yötawakwö, ökwö a̧dekwanö kwitji̧mu tupadanö jojodötjö ju'wedönö tje'ewakwedö, Babilonia nijibe. Ja̧danö jobadönö e'ewajadö, Babilonia niji inesö la'aka luwo̧ ömöayedö#39:7 Ajayinö tjiwene laebi̧ jawa, tjö'lapiyu 'wibebö lotjajawö̧ laebobe, jokwaijayonö ju'wikwenama, ja̧ laebi̧ma, sule la'aka luwo̧ ejunö otidadönö wanekwachinobe. Jo̧kwajabetjö̧ ja̧ laebi̧ma öwawökö, sule tjömöayedö batjibakwa̧da wanekwachinö yöa̧linojobö, tjö'lapiyö 'wibebö lotjakwa̧bi wanekwachinö yöa̧linojobö jö̧ba̧lö., iteda ejunö ja̧nö otidadö batjibanö wetjakwawö̧, —jö̧ba̧lö yöawinobe Isaiasma.

8Jobekwö yöawiökwe, Ezequiasma omukwatinobe, —Jobekwö yadakwö baledobö ji̧jayonö, ina 'yata̧layi, ötjöbi ju'wedö chömöledö Juda jojodöbi otiwanö dö̧jakwedösa, debö chi̧'yaja̧ okobe baledakwa̧da yöawajabe, —jö̧ba̧lö. Ja̧danö jobekwö omukwatö, Isaias yöawi̧ ösödö atadinobe: —Jau Isaias, Isabenö Jo̧ yöawi̧ yökawajama, otiwa, otiwanö yökawajabe, —jö̧ba̧lö.

Currently Selected:

Isaías 39: WPC

Highlight

Copy