Isaías 35
35
Dios yemidanö Jerusalennö ju̧kwadönö pjaatakwa̧ Isaias yöawina jawa
1Yadakwö jojodö deobebi, jwiinö kököemi nijibi o̧'wo ösöwachibakobe ichejekwa, ja̧danö kököemi jojodö deajemibi, o̧'wo ösöwachibobedanö o̧bubiya bo̧akobe. 2Otiwanö nöinö o̧bubiya bo̧akobe, ba'ali junö lo̧obedanö ichejekwinö. Jojodö deajemi kököajemima, Libanö niji otiwi̧danö otiwakobe, Carmelo ötjabobebi, Saron ötjabobebi otiwanö pokwö wa̧ji̧danö otiwanö pokwakobe, ajayinö jojodö deobe kököinemima. Jobetjö Isabenö Jo̧ inesö ujuluwi̧ öwawakobe, jobetjöda öwawinö tjedakwedö, —Dösödökwe Diosma inesö dejatinö otiwo̧, —jö̧ba̧lö.
3Jobekwö isabenö baledakobe chömöledö, jo̧kwajabetjö̧ ja̧ baledakwa̧ yöbawö, me'dawachibadö, tjujulu jwibadönö tjujuluwachibanö pjakataduwo. 4Tjomajadenö yebabinö ju̧kwadönö yökawaduwo, —Kwujuluwaduwachibanö, yebabökönö kwö̧jaduwo, chömöledö. Jau chömöledö, kwösödaduwökwe Diosma isabenö pjabatö ichakwo̧, öpöjojodö sulabenö ja̧tjiökwe, balekwa mikwa dameakwö ichakwo̧, lȩebobö. Jau chömöledö, kwöpöjojodöduwitjö kwö̧jibaduwanö, otiwanö ichakwo̧ Diosma, kwujuluwachibaduwo, —jö̧ba̧lö ökwödötjö tjomajadenö yebabinö ju̧kwadönö tjujuluwachibanö yökawaduwo.
5Jobekwö pjabatö ichenama, tjöbajale tjewawadöma tjedakwedö, ja̧danö tjölakiyu a̧ja̧kwöködöma tja̧ja̧kwakwedö. 6Kwebachöködöma, yama döbö kweachi̧danö, dötjakwedö, ja̧danö tjinene yöba̧löködöma, tjo̧'wo ösöwachibanö jwötjeba̧lakwedö. Jojodö deobe kököelö, ojwese'do doakobe, ojwebiyabi jobe isuwakobe. 7Kököinemima, o̧pesobu baibakobe, niji kököachibinelö, ojwese'do baibakobe. Kököinemi jojodö deobe, ajayinö tebo awi̧li̧döda tjö̧jinelö, isa'ye otiwanö pokwakobe, ojwenö pokwi̧ isa'yebi, papiro ötjabi̧ jawabi.
8Ja̧danö niji ö'wejenö, jalama mana ja̧kobe, ja̧danö ja̧ma Sulabe jwibadö kwetjachama, jö̧ba̧lö ötjabakwama. Ja̧manö Dios öba a'otjö 'yȩekwi̧ juna̧ladöma kwetjachökakwedö, sule Dios wei̧ a̧ja̧kwö ju̧kwadöda jamanö tjö̧jakwedö. Ja̧manö la'akatjöda kwetjachökakwedö, sulabedö jweinö omukwatöködöma.
9Tebonö ju̧kwadö labidöma deakobe ja̧matjö, didibadöbi, ju'wedö tebonö ju̧kwadö labidöbi deakobe. Ja̧manö kwetjachakwedöma, Dios tjö̧jibinö pjaatinawö̧da. 10Tjöpöjojodö tjujulutjwö Isabenö Jo̧ tjö̧jibinö pjaatinawö̧ jamabenö Sion mösa'obe tjȩwa̧jakwedö. Tjo̧'wo ösöwachibanö lo̧awa lo̧bö, Sion mösa'obe tjichibakwedö, ja̧danö 'dö̧bibajökönö, ba̧kwelöjatebö tjo̧'wo ösöwanö tjö̧jakwedö. Ja̧ möle la'akatjöda o̧'wo tjo̧achö tjö̧jökakwedö, ja̧danö la'akatjöda usula tjemawökakwedö, Isabenö Jo̧ pjaatiawö̧, jwaikwöda ba̧kwelöjatebö tjo̧'wo ösöwanöda tjö̧jakwedö.
Currently Selected:
Isaías 35: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
