Isaías 28

Dios israel niji jojodönö lȩebakwa̧ Isaias yöawina jawa

1Efrainsaso#28:1 Efrain jö̧ba̧lö laebi̧ma, Efrainsaso jojodönöda wanekwachokobe, Efrainsaso jojodönöbi, ju'wedö jelemutjö ö'wejemu jawaso israel ötjabawö̧nöbi badekwachobe. jojodötjö 'dukwachawö̧ tjubutjawakadanö ji̧ma, Samaria comunidad, —Inesö otiwemi, —jö̧ba̧lö. Jau, jobadö nöinö ubasobu o̧wa̧lö, 'dukwachawö̧ babibajadö tjö̧jemi wabeko ö'öbö mösa'o otiwa'o wame öwawinö jo̧be Samaria comunidadma, ja̧danö mösa'o wa̧pekwa'o ja̧nö, butjawakadanö ichejekwobe. Jau, butjawaka otiwakadanö, o̧bubia jwiinö otiwo̧'o̧bu ji̧danö ichejekwobe Samaria comunidadma. Jo̧kwaijayonö, o̧bubiya damö jawa babibö, suli̧ waekwi̧danö baledakobe Samaria comunidadma, Samaria comunidadwe.

2Baikwö yötawaduwakwö Samaria comunidad baledakwa̧ma: Isabenö Jo̧ma bakwo̧ inesö juluwo̧nö weakobe, ja̧danö jwa̧lȩ'epjo labinö doibobedanö, ja̧danö mölejebetjö tiyuwaso inawiyadanö pjei̧ öwiya tjoduwi̧danö, ja̧danö ojwe okwatibö söbebö loobu ichi̧danö ichakobe Dios weökwema, ja̧danö nijakwö baibanö söbebö loakobe Samaria comunidadma. 3Jau, Efrainsaso jojodötjö 'dukwachawö̧ tjubutjawakadanö ji̧ comunidad Samaria ja̧takwö lotjakobe tjöpöjojodöma.

4Jau, Samaria comunidad juluwajadö, otiwi̧ma 'dötjebakwedö, baikwö wanedö yöta̧la: Samaria comunidadma, batjo jawa otiwanö pokwi̧ wabeko bajale mösa'o ji̧ comunidad, wabeko uudanö ichejekwi̧nö, ja̧danö jwiinö otiwi̧'obu o̧bubiyadanö ichejekwobe Samaria comunidadma. Ja̧danö ja̧ o̧bubiya damö jawa babibö suli̧ waekwakwa̧ma, baikwö yöta̧la: Higo towi ajayi wa̧ji̧, deiökwe, bakwo̧ edö 'döebenama, juluwanö ö̧ka̧to̧, jö̧tö? Jobekwö baledakobe Samaria comunidad otiwi̧ma, tjöpöjojodö ichibö, otiwi̧ juluwanö 'dötjebakwedö.

5Jobekwö Efrainsaso jojodö tjösödaka butjawakadanö ji̧ma söbebö lotjakobe. Jemi ikenama, Isabenö Jo̧ Okobe Jwiinö Juluwo̧ Diosda tjösödaka butjawakadanö ö̧jakwo̧ma, iteda ömöledötjö ina ji̧badönöma. Ja̧ möle jo̧ba Diosnöda ösödö tjomukwatakwedö, —Duluwo̧ Diosma dejatinö juluwo̧, inesö mikwawi̧ butjawakadanö ichejekwo̧ma, dösödökwe Isabenö Jo̧ Diosda, —jö̧ba̧lö. 6Ju'wibi ja̧ möle Diosda lȩekwa luwedönö pjaatakwo̧, okwa jawa waisanö tjomukwatakobetjö̧, jadanö jobada israel jojodötjö ölakawabikwawadönö tjujuluwachibanö pjaatakwo̧, comunidad apjude a'ö ölakwabikwawö, tjitebo comunidad tjötjeba̧lakobetjö̧.

7Babe möle, ökwödönö ötjibo jö̧ba̧ladöma, 'dukwachawö̧ kwebachadö. Ubasobu o̧'dobubi, ju'wi nio ojwiyobi o̧wa̧lajadö, jobekwö 'dukwachawö̧ kwetjachobe. Dios yöawi̧ yöbawadöbi, Diostjö jojodötjö ö'weje pjabatadöbi, nöinö o̧wa̧lajadö jobekwö 'dukwachawö̧ kwebachadö. Jobadöma tji̧'wididanö tjedijayonö, okwa jawa tjöwaisachibanö tjedobö jwibadö, ja̧danö lȩekwa yötjawobö jö̧tja̧lenama, jweinö lȩekwa yötjawobö jwibadö, 'dukwachawö̧ tjö̧jobetjö̧. 8Jau, okobe deinö tjitea mesa ötebiya wamema, 'dukwachawö tjetekwajabe, tjetekwajaja̧tjö mesa su̧'be baibanö, mesa ba̧kwemeachibanö tjetekwaja̧tjö sulamachibajabe.#28:8 Öwawökö, tjö̧ji̧ wanedö yöawinojobö, isabenö jobekwö 'dukwachawö̧ tjö̧jinojobö jö̧ba̧lö.

9Dios yöawi̧ tjaja̧kwobö öpöjödadö, —Ite Dios ökwödönö waisakwawa jawa ö̧ba̧jadobö jwibo̧, yöawi̧ okwa jawa ökwödönö labebö lobö yöawobö jwibo̧. Ökwödönö yöawi̧ma, tjemu iya̧nö o̧do'bi̧ 'dötjebajawö̧nö yöawobedanö ichejekwa, tjemu pjebadönö yöawobedanö ichejekwa. 10Ökwödönö yöawi̧ma, tjemunö öba̧ja̧didanö, tjo̧'omanö baikwö ja̧baduwi, baikwö ja̧bökönaduwi jö̧ba̧lö, bakwainö pea'ba tjemu ajayinö yöa̧lakwawa tjöwaisachena yötja̧li̧danö ökwöobe, otiwanö yöbawö̧kö Diosma, #28:10 Ajayi tjiwenenö laebi̧ma, mandamiento tras mandamiento, mandato sobre mandato, renglón tras renglón, línea tras línea, un poquito aquí, un poquito allá laeba, jo̧kwaijayonö tjiwenenö laebi̧ma, tjemu wanekwachökönö ökwöinö yötja̧lobedanö ökwöobe.—jö̧ba̧lö obö yötja̧lobe.

11Ja̧danö, jobekwö tja̧ja̧kwobö tjöpöjödiökwe, wajwitji̧ tjiwenenö jobadönö yöawakwo̧. Jau, tjöpöjojodö jelobetjö ichajadö, wainö ju'wedö tjiwenenö yöba̧ladönötjö̧ yöawakwo̧ Isabenö Jo̧ma, bemi niji israel jojodönö.

12Jau, ajayinö ökwödö iteda ömöledönö yöawinobe, —Bemi niji chiyaduwakwö, nöinö kwotidaduwaja̧tjö kwö'wachaduwobö. Lekwe möle nöinö kwebachö kwö̧jinaduwijayonö, babe bemi nijinö ja̧nö otiwanö kwö'wachaduwobö ja̧kobe, —jö̧ba̧lö yöawinobe, jokwaijayonö yöawi̧ tja̧ja̧kwobö tjöpöjödinobe. 13Ja̧danö, jobekwö tjöpöjödiökwe, tjemu ajayinö yöa̧lakwawa tjöwaisachena wanekwachökönö yötja̧li̧danö ökwöakobe jobadönö, otiwanö tja̧ja̧kwobö tjöpöjödobetjö̧. Jadanö, Dios yöawi̧ tja̧ja̧kwokobetjö̧, tjölakwabikwawenama ökömakwö mebö 'detjawakwedö, ja̧danö 'daliwa tjö̧lakwedö, ja̧danö tjöpöjojodö tjujuluwajawö̧, jelobekwö öbibö tjemakwawö̧.

Dios Juda jojodönö yöawina Isaias yöawina jawa

14Jobekwö Samaria comunidad baledakobe, jo̧kwajabetjö̧ ökwödö sulabenö obadö, Jerusalen comunidad la'aka luwedöma, Isabenö Jo̧ baikwö yöawi̧ kwa̧ja̧kwaduwo, ökwödönöbi baledapji jö̧ba̧lö. Dios yöawi̧ baikwö laebobe:

15—Ökwödöma Egipto jojodökwö bakobe pjabatakwawö kwö̧jaduwakwa̧ wene yöbawö kwujuninaduwobetjö̧, omukwatadöja: –Ökwödöma Egipto luwedökwö bakobe pjabatakwawö dö̧jakwa̧ wene yöbawö dujuninobetjö̧, ö'wö badibökakwedösa, ja̧danö ö'wö babibajadö tjö̧jemi dichibökakwedösa, otiwanö wene jwiinö dö̧jakwedösa. Jau, inesö labinö kwakwaakwawopja ji̧danö̧ ichejekwadö Asiria ölakwabikwawadöma, yö̧ne israel niji ö'wejenö tjöbaledijayonö, ökwödönö mebibö tjujuluwökakwedö, –jö̧ba̧lö omukwatadöja. Jo̧kwaijayonö ja̧ yöbawö kwujuninaduwama, omöna yöba̧lakwawö yöbawö kwujuninaduwobe, ja̧danö kwo̧'wo kwöwana̧laduwi̧ma, ömöna yöa̧lakwawa jawada ösödö, tjökeba̧la̧duwobö kwisakwaduwobe. Jo̧kwajabetjö̧, baikwö yötawaduwakwö ökwödö Juda jojodönö: 16Ötjö Isabenö Jo̧ma baikwö yötawaduwakwö: Jerusalen mösa'o Sion mikwa'onö inawa chödocha, –Isabenö otiwawa, –jö̧ba̧lö badedö chedinawama. Jawa, o̧do la'aka baibanö, ajayinö lödawawa nöinö mikwawawa baibanö chödocha, o̧do la'aka 'diinö jakobetjö̧. Ja̧danö jawa ösödadöma, –Dakwö jatakwajö, –jö̧ba̧löma omukwatö tjö̧jökakwedö.

17Ja̧danö wanedö yötawa: O̧do otido̧ma, ba̧ja̧dakwawopja junalo̧, otidaja̧ otiwanö ö̧ba̧jadakobetjö̧, ja̧danö jweinö otidinojobö edakobetjö̧, jö̧tö? Jobekwö ökwödönö ba̧ja̧dö chedocha chömöledö, jweinö lȩekwada yökawaduwojobö jö̧ba̧lö, ja̧danö jweinö ötjö weti̧ a̧ja̧kwö kwö̧jaduwojobö jö̧ba̧lö. Ja̧danö, jweinö lȩekwa yö̧kawaduwokobetjö̧, ja̧danö weti̧ a̧ja̧kwö kwö̧jaduwokobetjö̧, isabenö kwöwaekwaduwakwedöja. Baikwö wanedö yötawa: Tiyuwaso pjei̧ öwiyama ökwödönö tjoduwakobe, ja̧danö ojwe okwatibö söbebö loakobe 'diinö tjöbebö kwotidinaduwemima.

18—Jobekwö baledenama, ökwödökwö Egipto luwedökwö yöbawö kwujunaduwinama söbebö loakobe, ja̧danö ö'wö badibökakwedösa, ö'wö babibinadö tjö̧jemi dichibökakwedösa, jö̧ba̧lö kwomukwataduwi̧ma waekwakobe. Ja̧danö kwakwaakwawopjadanö ichejekwadö ölakwabikwawadö kwiteboduwi ö'wejenö tjöbaledenama, ökwödönö tjö̧jatakwedö, nijakwö bakibaduwanö. 19Ja̧danö jobadö ölakwabikwawadö yemidanöbi, yemidanöbi kwitebobenö baledö, ökwödönö tjemakwedö, yȩayibi, möle ja'öbi, yö̧tebi ökwödönö emibö tjöbaledakwedö. Ja̧danö sule jwiinö bakwainö yekabiduwenada, bajalianö yötawi̧ okwa jawa kwöwaisachibaduwakwedöja.

20—Waisanö yöa̧lakwawa yötja̧li̧danö baledakwawö̧ ökwödönö, baikwö laebobe yöa̧lakwawama: –Camapjoma yelösöda peapjoobetjö̧, dekatobö jwiiobe, ja̧danö sabana'woma, pea'woobetjö̧, jwakekwobö jwiobe, –jö̧ba̧lö laebobe. Ja̧danö yöa̧lakwawa laebi̧danö baledakobe ökwödönö, Egipto jojodönö kwo̧'wo kwöwana̧laduwi̧ waekwakobetjö̧.

21Diosma isabenö a̧la̧ibö ölakwabikwawakwo̧, damötjö Perazim mösa'otjö ölakwabikwawinadanö, ja̧danö Gabaon wabekotjö ölakwabikwawinadanö ölakwabikwawakwo̧. Iteda otidobö jö̧a̧li̧ jawa otidakwo̧, jojodö tajijö jö̧ba̧lö wajwitji̧ jawa otidakwo̧. Jau, iteda omukwatö ujunina, jojodö wajwitji̧ jawa otidakobetjö̧, jobekwö a̧la̧ibö ölakwabikwawakwo̧ Isabenö Jo̧ma,

—jö̧ba̧lö laebobe Dios yöawi̧ma.

22Jau chömöledö, Isabenö Jo̧ Okobe Jwiinö Juluwo Diosma ötjönö yöawajabe, ditebo niji suli̧ tjöwaedobö weakwa̧ma, ja̧ yöawina cha̧ja̧kwajabe. Jo̧kwajabetjö̧ baikwö atebaduwakwö, Dios yöawi̧ a̧ja̧kwö, oköbaduwoko, oköbaduwiökwe ajayitjö bajalekwönönö ökwödönö tjunu'yakwa̧ tjunu'yobö weapji jö̧ba̧lö.

23Yötawi̧ otiwanö kwa̧ja̧kwaduwo chömöledö, chiwene ökwöi̧ a̧ja̧kwö, otiwanö a̧ja̧kwö kwomukwataduwo. 24Batjo otikwa kwöwaisaduwa chömöledö, bakwo batjo sobö otido̧ma, ba̧kwelöjatebö kabatibökönö niji soenaji̧? Batjo otidi̧ma, ödebia lödökönö, sule yemidanö yemidanö sobö otidenaji̧? 25Kwöwaisaduwa, sobajo̧, ba̧ba̧la̧wobe baibanö otido̧, ja̧danö jemi ikenama ödebiya lödo̧, jö̧tö? Jau, sobö kabatajo̧, eneldo ötjabi̧ ödebiyabi, comino#28:25 Eneldo ötjabi̧bi, cominobi (especies) ji̧, kwakwawa söinö pjaati̧ ötjabi̧ ödebiyabi ikwo̧, jö̧tö? Ja̧danö, Trigo ödebiya isa'banö lödo̧, ja̧danö cebada ödebiya, ödo jö̧a̧lemi lödo̧, ja̧danö öbatjo bakwachobe baibanö centeno lödo̧, jö̧tö? Kwöwaisaduwa chömöledö, jobekwö otidadö batjo otidadöma, jö̧tö? 26Ja̧danö, baikwö yötawaduwakwö chömöledö, jobekwö otidi̧ma, Diosda jobekwö waisanö otidobö ö̧ba̧ja̧diökwe, jobekwö otido̧.

27Ja̧danö wa̧ji̧ emadö tjotidi̧bi kwomukwataduwo chömöledö. Bakwo̧ eneldo jawa waji̧ emenama, trigo chabö loawakanö chabö loawö̧kö̧, jö̧tö? Ja̧danö comino jawa emajo̧, kolukasa'onö baledakwawokobe, jö̧tö? Kwöwaisaduwa, eneldo emajadö, ö̧sö̧'a ja'yuwö̧'anö kwabadö, waji̧ nijakwö tjoduwobö, ja̧danö comino emajadö, ö̧sö̧'anö kwabadö, jö̧tö? 28Ja̧danö pan otikwa jawa trigo wa̧ji̧ma, i̧sopja baibanö 'dobö otidadö, jo̧kwaijayonö kabatibökönö 'dobö otidöködö, jö̧tö? Ja̧danö, trigo jawa ochobiya wamenö, ajwimu kabayudö koluka tötjobö weijayonö#28:28 Jobekwö trigo waji̧ ochobiyatjö chabö lobö tjotidinobe, ödebiya tjoduwakobetjö̧., kabatibökönö wamenö tjöbaledobö webö̧kö̧, trigo jawa 'dainö suli̧ waekwapji jö̧ba̧lö, jö̧tö?

29Ja̧ otikwa tjöwaisi̧bi, Diostjö ichi̧ chömöledö, batjo ajayi otikwa jawa tjöwaisi̧bi, waji̧ emö otikwa jawa tjöwaisi̧bi Isabenö Jo̧ Okobe Jwiinö Juluwo̧ Diostjö ichi̧ chömöledö. Isabenö jwiinö waiso̧ Diosma, ja̧danö ju'wibi waisakwawa jawa otiwanö ba̧ja̧do̧, ökwödöbi waisanö domukwatakobetjö̧.

Currently Selected:

Isaías 28: WPC

Highlight

Copy