Isaías 21

Babilonia niji Dios lȩebakwa jawa Isaias yöawina jawa

1Baikwö laebobe Dios yöawi̧, jwaibalawa ö'öbö, jojodö deobe niji jawa: —Alikwötjö jwa̧le'epjo labinö dobibö jwa̧le'ewi̧danö, jwiinö yetjabawö̧ tjitebo nijitjö tjichakobe, ja̧danö jojodö deobetjö labebö metjibakwedö, —jö̧ba̧lö laebobe Dios yöawi̧ma.

2Jau, inesö labi̧ jawa chi̧'wi̧didanö i̧sebinobe Diosma, ja̧ baledakwa̧ jawama, baikwö: —Omöna yöba̧lo̧ma jojodö tjösödachibanö omöna yöa̧lakwo̧, jadanö söbebö lobo̧ma, söbebö loakwo̧, sulabenö ja̧tjawö̧ma –Ö̧ö̧, –jö̧ba̧lö tjubudekwenanö baibanö. Jo̧kwajabetjö̧ tjubudekwi̧ a̧ja̧kwö, Elam niji jojodönö weta, –Babilonia comunidad mebibaduwi, –jö̧ba̧lö, ja̧danö Media niji jojodönö weta, –Babilonia comunidad tjösawö ölakwabikwawaduwi, –jö̧ba̧lö, usula emawö tjubudekwi̧ 'dö̧ibajakobetjö̧, —jö̧ba̧lö yöa̧lobekwö chedijatö.

3Jwiinö yetaibanö baledakwa̧ i̧sebinobe, chiteba'o inia tjöbö chö̧jenanö baibanö. Isabenö jwiinö inia tjöbö jo̧sa, jojosuju jitji̧nö jemena inia tjöbö jö̧ji̧danö inia tjöbo̧sa. Dios weakwa̧ jawa cha̧ja̧kwena, ja̧danö chedenama, chöbajale jalaka baibanö edo̧sa, —Ayö, inesö labi̧, —jö̧ba̧lö. 4Jwiinö labi̧ jawa chedajobetjö̧, otiwanö omukwatökönö jo̧sa, yebabinö tjö̧bawö jo̧sa. Ajayinö yöte baibakwa̧ chiteada̧latö, yö̧te juluwanö baibowe, jö̧ba̧lö. Jo̧kwaijayonö babema yöte baibajabe, jadanö Dios i̧sȩbaja̧ edajo̧, jwiinö yebabinö jo̧sa.

5Mesasöte junö otidadö, ja̧danö tjömasapa 'do̧akwawa'ye sedatö lödadö, jadanö kwanöbi owöbi ba'ali junadö, jo̧kwaijayonö ba'ali tjujunobö jwiobe. Ba'ali junökönö, otiwanö tjölakwabikwawakwa̧ jawa tjotidobö jo̧be. Jau, ölakwabikwawadötjö luwedöma o̧tenö tjöekwapi 'do̧bö tjotido, tjöekwapi otiwanö salöakobetjö, juluwanö tjölakwabikwawobö badekwachakobetjö̧.#21:5 Wanekwachi̧ma öwawökö, jo̧kwaijayonö Danielsa'yenö baledina wanekwachena. Capitulo 5 laebobe, Babilonia jojodö ba'ali tjujunina wenema, ja̧danö i̧yada yö̧te ba'ali tjujunena, Persia jojodöbi, Media jojodöbi tebachö tjujuluwinobe.

6Jau, chuluwo̧ Diosma juluwanö badekwachakwa̧ jawa yöbawö, baikwö weinobe: —Bakwo̧ tjöbeba̧lö eda̧lo̧nö kwujuno, comunidad tjöekwemi ja̧nö eda̧lo̧nö, ja̧danö kwujunajökwenö weköbo, edaja̧ jawa yöawakobetjö̧. 7Jo̧banö yökawo, kolukiyanö kwebachadö, du̧ju̧taja kabayudö tötjakanö kwebachadö tjichakwa̧ teada̧lönö eda̧lobö, ja̧danö buludönö kwebachadö tjichakwa̧bi, kamellodönö kwebachadö tjichakwa̧bi eda̧lobö. Jo̧banö weköbo, otiwanö teada̧lönö eda̧lobö, —jö̧ba̧lö weinobe.

8Jobekwö wei̧tjö̧, teada̧lö eda̧lo̧nö chujunijatö, ja̧danö ja'yubenö lekwajabetjö̧, labinö jwöeba̧lajabe eda̧lo̧ma: —Chuluwo̧, isaka eda̧lö teada̧lakwawakanö ja̧nö, möle baledibanö eda̧lö chö̧ja̧jabe, jadanö yötetenia baledibanö eda̧lö chö̧jajabe. 9Ja̧danö, lekwe eda̧lajo̧, babe bakwo̧ icho̧nö chedajabe, duju̧taja kabayudö tjötjaka kolukanö kwebacho̧nö. Jo̧banö edajo̧, jwöbö abebö cha̧ja̧kwatö, jadanö atadö yöawajabe, –Babilonia comunidad söbebö lotjajabe, jwiinö söbebö lotjajabe, ja̧danö okobe deinö Babilonia jojodö tjösödawö̧ o̧'wo jawama, nijakwö ikwö lotjajabe, ja̧danö okobe deinö tjösödawö̧ma, bakobe 'dabebö lotjajawö̧da nijinö tjö̧bobe, –jö̧ba̧lö atadajabe, baikwö icho̧ma, —jö̧ba̧lö yöawajabe eda̧lobö chujunajökwema.

10Jobekwö yötawaduwakwö chömöledö juda jojodö, ökwödö jwiinö usula emawadönö. Jau chömöledö, wanedö yöta̧la usula emawö kwö̧jaduwi̧ma, trigo waji̧ chabö loawejutjö, isa'ye ja̧tö loawa'ye ji̧danö usula emawadöja, ja̧danö ökwödö usula emawadönö jweinö yötawajabe Dios yöawaja̧ma, Isabenö Jo̧ Okobe Jwiinö Juluwo̧ Dios, ökwödö israel jojodö dösödökwe Dios ökwödönö yötawobö weaja̧ma.

Edom niji jawa Isaias yöawina jawa

11Baikwö laebobe Dios yöawi̧, Edom niji jojodönö: —Edom niji mösa'o Seirtjö bakwo̧ abebö a̧ja̧kwö jwöobe, –Teada̧lö eda̧lo̧, dokwa lekwe yöte ina yȩakwa̧da? Dokwa lekwe dewachakwa̧da? –jö̧ba̧lö. 12Abebö a̧ja̧kwökwe, teada̧lö eda̧lo̧ma, –Tjo̧wi yȩayi dewachakwa̧ yöneawachibobe, jo̧kwaijayonö jemi ikenama juluwanö yemidanö yi̧ibakobe. Kwitebonö baledakwa̧ abebö kwa̧ja̧kwobö jö̧ka̧litjö̧ma, yemidanö abebö a̧ja̧kwö kwicho, –jö̧ba̧lö atado̧, —jö̧ba̧lö Dios iteda yöawi̧ yöawinobe, Edom niji jawama.#21:12 Wanedö yöawinama, öwawökö, taji jö̧ba̧lö yöawinajö, jö̧ba̧lö. Chedemi laebi̧ma baikwö laebena: Dokwa lekwe ina usula demakwa̧da, jö̧ba̧lö abebö a̧ja̧kwobe ichejekwa, ja̧danö atadakwawama, baikwö laebena ichejekwa: Babe usula kwemawaduwi juluwanö 'dö̧ibakobe, jo̧kwaijayonö jemi ikenama juluwanö yemidanö usula kwemawaduwakwedöja, jö̧ba̧lö.

Dios Arabia niji jojodönö lȩebakwa̧ Isaias yöawina jawa

13Baikwö laebobe Dios yöawi̧, Arabia niji jojodönö: —Ökwödö Arabia niji comunidad Dedantjö döbibajadöma, Arabia niji tebo okwa kwabekwaduwakwedöja, —jö̧ba̧lö. 14Jo̧kwajabetjö̧, ökwödö jobe ju̧kwadöma, ojwiyo kwe'ewaduwo, jobadötjö o̧ti̧ tjöbadöma tjowakobetjö̧, ja̧danö Arabia niji comunidad Temanö jukwadöma, kwakwawa kwe'ewaduwo, jobadö Dedan comunidadtjö döbibajadö tjukwobö. 15Jau, jobadöma kwölöte'onö dȩdȩbö lobadötjö döbibajadö, tjöpöjojodöma ida̧ökö dȩdȩbö lotjotö jö̧ba̧lö kwölöte'o yutekwö anawemitjö tjemajabe, ja̧danö ida̧ökö 'böawa i̧sȩba̧lö tjö̧jobe. Jau, ida̧ökö labinö ölakwabikwawö tju̧ju̧kwobe Dedan comunidadtjö, ja̧danö ja̧tjö tjö̧jibotö jö̧ba̧lö baikwö dötjibajabe, jo̧kwajabetjö̧ jobadönö pjakataduwo, —jö̧ba̧lö laebobe Dios Arabia niji jojodönö yöawi̧ma.

16Jobekwö juluwanö baledakobe Arabia nijitjö chömöledö, Chuluwo̧ Diosma baikwö yöawajabe ja̧ jawa baledakwa̧ mölema: —O̧ba bakwabada 'dö̧ibakwa̧ abönö, inesö juluwemi Arabia niji comunidad Cedarma, söbebö loawemida ji̧bakobe. Jau, tjimidökwe otido̧ma, otiwanö otidakwa̧ ba̧ja̧dö waiso̧, tupakwö otidakwa̧ma, dokwa lekwe otidakwojobö jö̧ba̧lö, ja̧danö otido̧ ba̧ja̧dö öwaisi̧danö kwöwaisaduwobö jo̧be, 17babe möle Cedar comunidad ölakwabikwawadö inesö juluwadö 'böbadö tjö̧ba̧jekwijayonö, o̧ba bakwabada 'dö̧ibajenama, jobadötjö sule o̧bukwedöda tjö̧jibakwedö, —jö̧ba̧lö. Jobekwö yöawajabe Isabenö Jo̧ Israel jojodö tjösödökwe Diosma chömöledö, ja̧danö isabenö yöawaja̧danö baledakobe.

Currently Selected:

Isaías 21: WPC

Highlight

Copy