Éxodo 4

Moisés Isabenö Jo̧ jo̧banö ujunina öpöjödiökwe Isabenö Jo̧ Moisésnö ujulu iyina jawa

1Ja̧danö, Isabenö Jo̧ma jejenö yöa̧liökwe atadijetö Moisésma:

— ¡Tjöpöjödena! Chömöledöma ötjö yötawi̧ a̧ja̧kwö, Omöna yöka̧la, jö̧ba̧lö, tja̧ja̧kwökena weköbi̧ yötawi̧ma. Yötja̧lena, Isabenö Jo̧ma öwawachinökena ökwönöma, jö̧ba̧lö. 2Jejenö atadiökwe:

—Moisés ¿taji do̧ka̧lobeda kwömamunöma?— abebö a̧ja̧kwökwe:

—Chotokwa'o— atadökwe:

3—Ja'o nijakwö labinö jabi— weökwe otokwa'o nijakwö jaemi a̧ko'dada baibijetö. Baibiökwe yebaibö jelobekwö pjolachibijetö Moisésma. 4Ja̧danö, webijetö Isabenö Jo̧ma Moisésnöma:

—Öwali'bo bajalenö do̧bati— weökwe a̧ko'da öwali'bonö do̧atemi otokwa'oda baibijetö. 5Ikenama jö̧ba̧lijetö Isabenö Jo̧ma:

—Jejenö kwi̧sebo Israel jojodönö tjomajadenö tjöwaisachibakobetjö̧, Isabenö Jo̧ma, Abraham, Isaac, Jacob tjösödökwe Diosma isabenö öwawachinobe Moisésnöma, jö̧ba̧lö. 6Ja̧danö, yemidanö webijetö Isabenö Jo̧ma Moisésnö:

—Moisés, kamijido̧ okwanö 'dawekwö kwömamu 'bibekwa̧li kwomukonö— weökwe ömamu kamijido̧ okwanö 'dawekwö 'bibekwa̧lajo̧ yemidanö töbekwö edemi ¡ayö! ömamu i̧sedo̧ma suli̧ baibijetö 'doloinö. 7Ikenama webijetö Isabenö Jo̧ma:

—Yemidanö kamijido̧ okwanö 'dawekwö 'bibekwa̧li kwomukwonö, kwömamuma— weökwe yemidanö ömamu kamijido̧ okwanö 'dawekwö 'bibekwa̧lajo̧ yemidanö töbekwö edemi ömamuma otiwanö ji̧jetö, ajayi ja̧jadanö. 8Isabenö Jo̧ma jö̧ba̧lijetö:

—Moisés, jejenö juluwi̧ jawa kwi̧sebo Israel jojodönö, tjöwaisachibobö, bitema jweinö yöbawo̧, jö̧ba̧lö. Ja̧danö, abönö juluwi̧ jawama, kwotokwa'otjö kwi̧sebawö̧ edö, Ömöna kwi̧seba, jö̧ba̧lö ina yökawi̧ tjöpöjöditjö̧ma ikena juluwi̧ jawa kwi̧sebodönö. Kwömamu suli̧ baibajamu yemidanö otiwanö baibanö kwi̧sebawö̧ tjösödena. 9Jo̧kwaijayonö ja̧ dötölataja juluwi̧ jawa kwi̧sebi̧ edö ina yökawi̧ öpöjödö tja̧ja̧kwökötjö̧ma ju'wi juluwi̧ jawa kwi̧sebodönö, biya̧: Nilo ojwetjö ojwiyo wa'yebö nijakwö bajalenö sa̧köbo. Jobu ojwiyoma nijinö sa̧köbajobuma kwu̧kwinö baibakobe— weökwe:

10—Chuluwo̧ jweinö yöta̧lakwö: Ötjöma otiwanö yöba̧lö̧kö̧sa jojodönöma. Ajayinö chöbötjachinemi baikwö yemidawo̧sa. Ja̧danö ina, babebi yöka̧lajemitjö̧ tupakwöbi ja̧danö. Juluwanö yöba̧lökösa, dakwö yöta̧lajö, jö̧ba̧lö. Wajwibo̧sa— jö̧ba̧lijetö Moisésma Isabenö Jo̧nöma. 11Jejenö jö̧a̧lökwe:

— Moisés ¿kwomukwatököji̧? ¿Tida jojo yöa̧lobö otidinama? Ja̧danö ¿tida jojonö yöba̧lö̧kö̧nö, a̧ja̧kwö̧kö̧nö, edo̧nö, edö̧kö̧nö otidinama? Ötjödasa, Isabenö Jo̧da jejenö otidinama. 12Jo̧kwaobetjö̧ Egiptobe kwi̧'yo. Ökwönö pjabatö chi̧'yakwo̧sa Moisés. Yöka̧lonö yöta̧lakwo̧sa, ökwönö pjabatö— jö̧ba̧lijetö Isabenö Jo̧ma Moisésnö. 13Jejenö jö̧a̧lijayonö Moisésma jö̧ba̧lijetö:

—Chuluwo̧ atebakwö: Jelo̧nö weköbo ötjö jawanö— abebijetö Moisésma. 14Jejenö aebökwe jwiinö labijetö Isabenö Jo̧ma Moisésnö. Atadijetö:

—Jao kwatjö̧ma, kwöpöe Aarónnö wetena, jo̧babi Levítjö tupadanö jojo. Jo̧bama isabenö waiso̧ jojodönö yöa̧lakwawama. ¡A̧ja̧kwitjö! Babema ökwönö edö ichakobe, ja̧danö o̧'wo ösöwanö ösödakobe ökwönö edö. 15Jo̧banö yöka̧lo iteda yöa̧lakwa̧ Egiptonö ja̧nö. Ja̧danö, ökwöbi kwöpöebi yöka̧laduwi̧ kwöwaisaduwinö pjatatakwo̧sa. Ja̧danö, ja̧köbaduwi̧ kwöwaisaduwinö chö̧ba̧jadakwo̧sa. 16Kwöpöe Aarónnö yökawo Israel jojodönö yöawakwa̧, ökwönö yökawobö weti̧ma. Jejenö jo̧bama ökwö yökawi̧ yöawakobe Israel jojodönö. Isabenö, Dios yöawi̧ yöbawo̧danö Aarónma ökwö yökawi̧ yöawakwo̧. 17Ja̧danö Moisés, kwotokwa'o do̧ba̧lö kwi̧'yo, kwo̧'wo jwibibökönuwi, juluwi̧ jawa kwi̧sebakwa̧ma— webijetö Isabenö Jo̧ma Moisésnöma.

Dios Moisésnö weina jawa Egiptobe ȩwa̧ja̧ ikena

18Ikenama Moisésma öjaba Jetro ö̧jobekwö ȩwa̧jö jö̧ba̧lijetö:

—Chöjaba, ökwönö ateba: Egiptobe chȩwa̧jo webitjö, chömöledö Israel jojodönö chedobö. Ina 'yatja̧lo̧jo̧bö chöwaisobö jö̧ta̧la— jö̧a̧lökwe:

—Jao kwȩwa̧jo, Diosma kwo̧'wo luwo̧nö ösöwachibanö pjaatobö chösöda— jö̧ba̧lijetö Jetroma Moisésnöma.

19Ja̧danö, Isabenö Jo̧ma jö̧ba̧lijetö Moisésnöma, Madiántjö Egiptobe ȩwa̧jakwa̧ abönö:

—Moisés ida̧ökö kwȩwa̧jobö jo̧be Egiptobe. Ökwönö kwabö lotjobö omukwatö juninadöma ida̧ökö wotjinobetjö̧ labokobe babema— jö̧ba̧lijetö. 20Jo̧kwaobetjö̧ Moisésma ilekwonö, i̧tji̧munö bu̧lu̧dö tjoma'a wamenö wanibö öbibö ȩwa̧jijetö Egiptobe. Ja̧danö, otokwa'o, Dios, do̧balö kwi̧'yo, jö̧ba̧lö weina'o ömamunö do̧ba̧lö ȩwa̧jijetö Moisésma.

21Ja̧danö, Isabenö Jo̧ma webijetö Moisésnö:

—Egiptonö ja̧nö faraón öbajale a'otjö kwö̧jena jo̧bama eda̧lonö okobe jwiinö juluwi̧ jawa kwi̧sebobö pjatati̧ma kwi̧sebo. Jo̧bama kwi̧sebobe edijayonö omajade 'diinö wetobetjö̧ Israel jojodönö kaatakwawökakobe. 22Ikenama baikwö yökawo faraónnö:

Isabenö Jo̧ma ökwönöma yöa̧la, Israel jojodöma ötjöda ile nitebawö̧, bakwuju ajayinö jitji̧nö ile nijebi̧danö, jö̧ba̧lö. 23Jobadönö kakatakwawobö wetakwö, ötjönö ösödö tji̧'yobö. Jobadönö kakatakwawökötjö̧ma ¡a̧ja̧kwitjö! kwitji̧ abönö pöenö kwabö lotakwo̧sa, jö̧ba̧lö. Jejenö yöa̧lobe Isabenö Jo̧ma ökwönöma, faraón.

Moisés, jejenö yökawo faraónnö—

jejenö webijetö Isabenö Jo̧ma Moisesnö.

Séfora jitji̧nö ötade bajalesado̧ 'wibebö lojina jawa

24Ja̧danö, Moisés, ilekwo, i̧tji̧mu Egiptobe ȩwa̧jö ja'ö yi̧bekwijadötö. Yi̧bekwobetjö̧ tjabakweju otidajadö tebachijadötö tjeju okwa tjabobö. Jejutjö Isabenö Jo̧ma öwawachijetö Moisénö, kwabö lotakwö, jö̧ba̧lö. Moisésma Isabenö Jo̧ damötjö weina, kwi̧tji̧mu ömadönö tjötade bajalesa̧do̧ 'wibebö loköbo, jö̧ba̧lö weinama a̧ja̧kwokobetjö̧ kwabö loobö omukwatijetö Isabenö Jo̧ma, Moisésnöma. 25-26Ikenama ilekwo Séforama inawa jwiinö sȩawa emibö jitji̧ ötade bajalesado̧ 'wibebijotö. 'Wijebajado̧ma 'bibeba̧lijotö Moisés ömasapanö. Jejenö 'bibeba̧lö jö̧ba̧lijotö, Chilekwe, chitji̧nö kwu̧kwinö ebawinö 'witebajabetjö̧ ökwönö kwabö loökakobe Diosma, jö̧ba̧lö.

Israel jojodö Moisés Aarón yötjali̧ a̧ja̧kwö tjösödina jawa

27Ja̧danö, Isabenö Jo̧ma Aarónnö webijetö:

—Jojodö deobekwö 'yawi, kwöjawo̧ Moisésnö kwöbajekwajo— weökwe 'yajo̧ma mö'ösa'o, Dios ö̧ja'o, jö̧ba̧lö, mikwa'onö öwawachakwa̧'onö ichibö badekwajijetö Moisésnö. Badekwajö ibekwasa'wonö du̧batijetö Aarónma Moisésnöma, dokwa jö̧ba̧lö. 28Ikenama Moisésma Aarónnö yöbawijetö okobe jwiinö Isabenö Jo̧ yöa̧lina, Egiptobe kwȩwa̧jo̧, jö̧ba̧lö weenama. Ja̧danö, yöbawijetö okobe jwiinö juluwi̧ jawa Egiptonö ja̧nö i̧sebobö weinama.

29Ikenama Moisés, Aarón ȩwa̧jijadötö Egiptobe. Jobe ichibajadöma jwöbijadötö Israel jojodötjö damönö ichö jobadökwö tjo̧ko̧kokwobö. 30Aarónma ko̧ko̧kwajadönö yöba̧lijetö okobe jwiinö Isabenö Jo̧ Moisésnö yöawina. Ja̧danö, jobadönö i̧sebijetö okobe jwiinö juluwi̧ jawa Israel jojodötjö damö tjeda̧lonö, tjöwaisachibobö, Jweinö yöbawo̧, jö̧ba̧lö. 31Jejenö yöa̧liawö̧, ja̧danö juluwi jawa i̧sebiawö̧, Jweinö yöba̧ladö, jö̧ba̧lö ösödijadötö Israel jojodötjö damöma. Ja̧danö, tja̧ja̧kwena, Isabenö Jo̧ inia tjököbaduwino wetjobe edo̧, ja̧danö, ökwödönö pjaatakobe jö̧ba̧lö, tju̧yu̧kijunö bamatö tjöba bȩbachibijadötö nijakwö tjuunö, Isabenö Jo̧nö ösödö.

Currently Selected:

Éxodo 4: WPC

Highlight

Copy