Éxodo 1
1
Israel jojodö Egiptonö tjuju̧kwina jawa
1Ajayinöma Israel mikwo̧ma, ju'wi imi Jacob#1:1 kwedo Génesis 32:28 Dios Jacob imi balewö loinobe. Israel, jö̧ba̧lö, imidinobe. Israelma Israel jojodötjö ajayinö ji̧na. Egiptobe 'yi̧jetö i̧tji̧mukwö, ja̧danö i̧tji̧mu tji̧lȩkwa̧mukwö tji̧tji̧mukwö. 2Baikwö laeba Jacob i̧tji̧mu, jo̧bakwö Egiptobe 'yi̧nadö tjimibiya: Rubén, Simeón, Leví, Judá, 3Isacar, Zabulón, Benjamín, 4Dan, Neftalí, Gad, Asernö. 5Okobe deinö Jacob i̧tji̧mu, ö̧'dö̧dö setentanö jojodö ju̧kwijadötö. Ja̧danö, i̧tji̧ Joséma ida̧ökö Egiptonö ji̧jetö Jacob ichenama.
6Jobe Egiptonö lekwe o̧biya tjuju̧kwina ikena José, jwiinö pöema ö'wö babibijetö#1:6 Genesis 50:26 baikwö laeba: Joséma cientosdiez ayo̧ bo̧ wobijetö. . Ja̧danö ö̧pö̧ȩdöbi, öjawo̧bi, ja̧danö okobe deinö José ö̧ji̧ ji̧nadöbi ö'wö babibijadötö, o̧biya lekwinemi ikenama. 7Jo̧kwaijayonö jobadö Israeltjö tupadanö jojodöma tji̧tji̧munö yebawö, yebawö nöinö yebawijadötö, jwaikwöda ba̧jekwachadö, ja̧danö juluwadö batjibinö. Jobadöma okobe jwiinö Egipto nijinö ju̧kwijadötö jwiinö tjöba̧jekwachobetjö̧.
Egipto inesö la'aka luwo̧ Israel jojodönö juluwanö tjotidobö weina jawa
8Ja̧danö, o̧biya lekwinemi ikena jelo̧ balekwo̧ inesö la'aka luwo̧ webö bamatijetö Egiptonö ju̧kwadö tjuluwo̧ baibanö. Jo̧bama José ajayinö Egipto jojodönö pjabatajiama wajwibijetö. 9Ja̧danö, Israel jojodö jwiinö tjöba̧jekwachiökwe inesö la'aka luwo̧ faraónma ömöayedönö jö̧ba̧lijetö:
— Chömöledö ¡a̧ja̧kwaduwitjö! Israel jojodöma jwiinö tjöba̧jekwachinobe, ja̧danö ökwödötjö o̧penönö juluwadö batjibinobe. 10Jweinö domukwato jobadönö ja̧dakwa̧ma chömöledö, ba̧kwȩlö̧jatebö tjöba̧jekwachapji jö̧ba̧lö. Ba̧kwȩlö̧jatebö tjö̧ba̧jekwachitjö̧ma ju'wi möle döpöjojodökwö 'dö̧nekwibö tjölakwabikwawena. Ikenama ölakwabikwawö lobibö betjöma dötjibajena. Chömöledö jweinö domukwatobö jo̧be jobadönö ja̧dakwa̧ma— jö̧ba̧lijetö faraónma Egipto jojodönö.
11Jo̧kwaobetjö̧ faraónma, ja̧danö iteda ipjea jojodöma ju'wedö tjömöayedönö wainö junijadötö Israel jojodönö webadö batjibanö, jwiinö juluwanö tjotidobö webadöma. Ja̧danö, Faraón wei̧danö kwakwawa, tea tjujunakwemi comunidades tjotidobö webijadötö Israel jojodönöma. Tjujunakwemi dötölataja comunidades, Pitón mikwemi, Ramesés mikwemi tjotidobö webijadötö. 12Ja̧danö, webadöma Israel jojodönö juluwanö, inia tjöbö tjotidobö jwaikwöda wetjijayonö, Israel jojodöma jwaikwöda ba̧jekwachijadötö, okobe jwiinö Egipto nijinö. Jo̧kwaiawö̧ Egipto jojodöma jwiinö yebabijadötö Israel jojodönöma. 13Ja̧danö, webadöma lsrael jojodönö lȩ jwiinö edö juluwanö tjotidobö webijadötö. 14Israel jojodöma usula emawöda ju̧kwijadötö juluwanö tjotidobö le jwiinö wetjobetjö̧. Bloke junö, letiyakwö pjabatö, okobe jwiinö batjo otikwa, sobö, junö, 'wibö tjotidobö webijadötö.
Tjemunö tjemobe te'ada̧lakwawa ya̧dö faraón weina tjöpöjödina jawa
15Ikenama Egipto inesö la'aka luwo̧ faraónma webijetö du̧ju̧tajanö hebreo#1:15 Egipto jojodöma israel jojodönö hebreo jojodö, jö̧ba̧lö, ötjabinobe. ya̧dönö, tjemunö tjemobe te'ada̧lakwawa jojodönö, Sifra mikwujunö, Fúa mikwujunö:
— 16Hebreo ya̧dö tjemunö tjemobe te'ada̧lö kwedaduwemi iso̧nö jemitjö̧ma kwabö loköbaduwonö. Jo̧kwaijayonö isujunö jemitjö̧ma kwabö loköbaduwoko, wainö jö̧jakwuju— webijetö Egipto inesö la'aka luwo̧ma.
17Jejenö weajayonö jobadö tjemunö tjemobe te'ada̧lakwawa ya̧döma Diosnö yetjabobetjö̧ inesö la'aka luwo̧ weaja̧ma a̧ja̧kwijöködötö. Hebreo ya̧dö tjemawö̧nö ömadönöma kwabö lobijöködötö. 18Jo̧kwaobetjö̧ inesö la'aka luwo̧ma tjemunö tjemobe te'ada̧ladönö ö̧jobekwö yemidanö tjichobö jwöbijetö. Ichajadönö abebö a̧ja̧kwijetö:
—Wetaja̧ma ¿kwa̧ja̧kwinaduwököji̧? Tjȩmawö̧ ömadönö kwabö loköbado wetijayonö wainö tjö̧jobe— 19abebö a̧ja̧kwawö̧ atadijadötö:
— Duluwo̧, hebreo ya̧döma tjemunö emawa juluwadö, Egipto jojodö ya̧dödanömabö̧kö̧dö. Ökwödöma tjemajobekwö 'ya̧nö okobeda dichibijatö— atadijadötö. 20-21Jejenö Diosnö yebabinö omukwatö tjemunö kwabö lotjokobetjö̧ Diosma otiwanö pjabatijetö jobadönöma, idöda tji̧tji̧munö iyö. Ja̧danö jobadöma Diosnö yebabinö omukwatö, inesö la'aka luwo̧ wei̧ tja̧ja̧kwokobetjö̧ Israel jojodöma ba̧jekwachijadötö, jwiinö juluwadö batjibanö.
22Ikenama Israel jojodö ba̧jekwadö tjujulunö tjuju̧kwiökwe faraónma webijetö okobe deinö Egipto jojodönö:
—Okobe deinö hebreo jojodö tjemajawö̧nö ömadönöma ojwe okwa loköbaduwo, o̧tjawinö. Jo̧kwaijayonö okobe deinö ya̧dönö tjemajawö̧nö loköbaduwoko, wainö tjö̧jakwedö— webijetö faraónma okobe deinö Egipto jojodönöma.
Currently Selected:
Éxodo 1: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
