Deuteronomio 34
34
Moises ö'wö baibina wene
1Jemi ikenama, Moab niji ba̧ba̧lawobe israel jojodö tjö̧jelö labebö, Moisesma mösa'o Nebo mikwa'o önöchinobe, wa̧pekwa'o Pisga ötjabobe ichibenanö. Ja̧ Pisga ötjabemima, Jerico comunidad badeibö. Ja̧danö, jobe nöchajo̧nö i̧sȩbinobe Isabenö Jo̧ma, israel jojodönö iyakwa̧ nijima. Moisesnö i̧sȩbinama baikwö laebobe: Okobe jwiinö Galaad niji i̧sȩbinobe, Dan comunidadbe ichibanö, 2ja̧danö okobe jwiinö Neftalisaso niji i̧sȩbinobe, ja̧dano okobe jwiinö Efrainsaso nijibi, Manasessaso nijibi i̧sȩbinobe, ja̧danö okobe jwiinö Judasaso nijibi i̧sȩbinobe, jwaibalawabe ichibanö. 3Ja̧danö Neguev ötjabemi nijibi i̧sȩbinobe, ja̧danö ba̧ba̧lawobe Jerico, ju'wi imi Öjiya Towi Jȩmi comunidadtjö Zoar comunidadbe ichibanö wabeko i̧sȩbinobe. 4Jejenö i̧sȩbö, Isabenö Jo̧ma Moisesnö yöawinobe: —Bi̧ya ökwönö chi̧sȩbaja̧ nijima, Abrahamnöbi, Isaacnöbi, Jacobnöbi yöbawö chujunina niji, –Kwitji̧muduwi tupadanö jojodönö chiyakwo̧sa, –jö̧ba̧lö. Ja̧danö, ja̧ chiyakwa̧ niji kwöbajaleduwinö kwedobö wetajabe, jo̧kwaijayonö jobe kwichibanö pekiboböma wetökö, —jö̧ba̧lö yöawinobe Moisesnö.
5Jemi ikenama Isabenö Jo̧ ömöayo̧ Moisesma jelö ö'wö baibinobe, Isabenö Jo̧ baledakwa̧ yöawinadanö. 6Ja̧danö, Diosma ö'wö babibajo̧nö o̧tji̧nobe jobe Moab nijinö, Bet Peor comunidad badeibö wabekonö. Jo̧kwaijayonö, jobe ja̧ wabekonö jo̧banö o̧tji̧nobe jö̧ba̧lö tjöwaisijayonö, dena jö̧ba̧löma wajwitjobe jojodöma, babe mölebi ina wajwitjobe Dios Moisesnö o̧tji̧nemima.
7Moises ö'wö baibenama, ciento veinte o̧biya ujuna̧linobe, jo̧kwaijayonö jwiinö pöe ö̧jijayonö, ina juluwo̧ ö̧jinobe, ja̧danö öbajale tjewawö̧kö̧ ö̧jinobe. 8Ja̧danö, Moises ö'wö baibiawö̧, israel jojodöma jo̧banö tjubudekwabinobe, treinta möle baledibanö. Jobe Moab niji ba̧ba̧lawobe ja̧nö, Moisesnö tjubudekwabinobe israel jojodöma, Moisesnö tjubudekwobö omudawö tjujunina mölebiya 'dö̧jibajenanö kabatö.
9Moises ö'wö baibakwa̧ abönö, ömamiju Josuenö 'bieba̧linobe, —Biteda israel jojodönö öbibö ö̧jakwo̧, —jö̧ba̧lö, ja̧danö Diosma pjaatinobe Josuenö, otiwanö waisanö omukwatobö. Jo̧kwajabetjö̧, Israel jojodöma otiwanö Josue wei̧ a̧ja̧kwö tjö̧jinobe, ja̧danö Isabenö Jo̧ weina Moises yöawina jawa ja̧bö tjö̧jinobe.
10Isabenö Dios yöawi̧ yöbawo̧ otiwo̧ ö̧jinobe Moisesma, ja̧danö jo̧bama Isabenö Jo̧kwö badekwakwawanö yöa̧lakwawinobe. Ja̧danö jo̧ba ö'wö baibaja̧ ikena baikwöma, jo̧bajayo̧ Dios yöawi̧ yöbawo̧ deobe israel jojodötjöma. 11-12Moisesma nöinö Dios ujulu i̧sȩbinobe, nöinö jojodö edajitjö̧kö jawa i̧sȩbinobe. Isabenö Jo̧ weökwe, nöinö jojodö edajitjökö jawa, Dios lȩebi̧ jawa i̧sȩbinobe Egipto nijitjö, Faraonnöbi, ömöayedönöbi, Egipto nijibi, Dios lȩebi̧ma. Israel jojodö tjöba a'otjö, Moisesma isabenö inesö ujulu i̧sȩkwi̧ jawa i̧sebinobe, jojodö yetjaibanö edajitjökö jawa i̧sȩbinobe, ja̧danö Moises ö'wö baibinemi baikwöma, jo̧bajayo̧ Dios ujulu i̧sȩbo̧ma deobe israel jojodötjöma.#34:11-12 jo̧bajayo̧ Dios ujulu i̧sȩbo̧ma deobe israel jojodötjöma. Biya̧ laebi̧ma, Jesus ichakwa̧ abönö laebinobe. Jesusma isabenö Moises i̧sȩbinatjö bajalekwönönö Dios ujulu i̧sȩbinobe, Diosdaobetjö̧.
Currently Selected:
Deuteronomio 34: WPC
Highlight
Share
Compare
Copy
Want to have your highlights saved across all your devices? Sign up or sign in
©2021, All Rights Reserved
