Deuteronomio 12

Israel jojodö kwabö juwö Diosnö tjösödakwa̧ weawa, Moises yöawina jawa

1Tupakwö yöawinobe Moisesma, israel jojodönö: —Chömöledö, kwa'dödö tjösödinökwe Isabenö Jo̧ Diosma kwiteboduwi ökwödönö iyobe, jobe otiwanö kwö̧jaduwobö, jö̧tö? Ja̧danö, jobe kwö̧jaduwena, teada̧lönö kwö̧jaduwo chömöledö, Dios wei̧, ja̧bö kwö̧jaduwobö wei̧ma ba̧kwȩlöjatebö ina 'yaka̧laduwayi a̧ja̧kwö kwö̧jaduwakobetjö̧. Ja̧ ökwödönö wei̧ma, bi̧ya̧ chömöledö: 2Kwiteboduwinö ju̧kwadö, tjitebokwena jojodöma jelobetenia tjösödawö̧nö tjösödobe, mösa'iju möa'o wa̧pekwa'otjöbi, ja'yuwa'o wa̧pekwa'otjöbi, towibiya teebetjöbi. Ja̧danö tjitebo kwiteboduwi baibanö kwemaduwenama, okobe jwiinö tjösödawö̧nö ösödakwawemitenia jwiinö söbebö loköbaduwo. 3Juwö iyawemitenia 'dobö pjolö loköbaduwo, ja̧danö ösödakwawa inawiya 'dobö loköbaduwo, ja̧danö tjösödoko Asera o̧'wo jawabi ökwölanö juwö loköbaduwo, ja̧danö ju'wi tjösödawö̧ o̧'wo jawabi bulatö loköbaduwo. Jwiinö jobadö tjösödawö̧nö ösödakwawa jawa söbebö loköbaduwo, bakobenö jobadö tjösödawö̧nö ösödakwawa jawa kwiteboduwitjö ja'yubebi jwiakobetjö̧.

4—Jobadö jelobetenia kwabö juwö tjösödawö̧nö ösödö tjö̧ji̧danö, kwabö juwö kwösödaduwoko kwuluwo̧duwi Isabenö Jo̧ Diosnö chömöledö. 5-6Ökwödö kwuluwo̧duwi Isabenö Jo̧ Diosma, okobe jwiinö israel jojodö bakwasokwena tjitebotjö bakwöta comunidad 'da̧batö ujunakobe, iteda itebo comunidad, inesö Isabenö Jo̧ kwö̧'da̧deduwinö ö̧ji̧ i̧sȩkwelö baibanö. Jobe 'da̧batö ujunajemibe kwi̧'yaduwo, jobetjöda jwiinö ubinö iyawabi, ju'wi iyawabi, domulataja jawatjö bakwöta jawa kwiyaduwi̧bi, ju'wi kwiyaduwobö kwösödaduwi̧bi kwiyaduwobö. Jobetjöda Diosnö kwiyaduwakwa̧ yöbawö kwujunaduwi̧ma kwiyaduwo, ja̧danö jobetjöda kwajwi̧muduwi pakayadötjöbi, obejadötjöbi ajayinö tjemawö̧nö kwiyaduwo. 7Ja̧danö jobe ökwödöma kwömöledöduwikwö kwuluwo̧duwi Isabenö Jo̧ Dios öba a'o ja̧nö, kwo̧'woduwi ösödachibaduwanö kwukwaduwo. Jau chömöledö, kwuluwo̧duwi Isabenö Jo̧ Diosma otiwanö kwotidaduwi̧tenia pjaatakobe, jobe ja̧nö otiwanö kwö̧jaduwobö, ja̧danö jejenö pjaatiawö̧, jobe öba a'o kwo̧'woduwi ösöwachibaduwanö kwukwaduwobö ja̧kobe.

8-9—Kwöwaisaduwa chömöledö, babe Diosnö ösödö dö̧ji̧ma, ina ditebo baibanö kwuluwo̧duwi Isabenö Jo̧ Dios iyakwemi ichiböködösa, ina ditebonö wene jwiinö jö̧ködösa, jo̧kwajabetjö̧ okobe deinö bakwo̧nökwena, Diosnö dösödobö domukwati̧danö wainökwena ösödadösa, jö̧tö? Jo̧kwaijayonö, kwiteboduwibe kwichibaduwenama, babe dö̧ji̧danöma Diosnö iyö kwö̧jaduwoko chömöledö. 10Jau chömöledö, baikwö labebö lobö yötawa: Ökwödöma Jordan ojwe pebibö, kwiteboduwi baibanö kwuluwo̧duwi Isabenö Jo̧ Dios iyakwemi nijinö kwö̧jaduwakwedöja. Ja̧danö, kwiteboduwi ö'öbötenia, kwöpöjojodöduwi tjösawö̧ tjö̧jijayonö, kwuluwo̧duwi Isabenö Jo̧ Diosma ökwödönö tjöbeba̧lö̧ pjaatakwo̧, ja̧danö jejenö pjaatobetjö̧, wene jwiinö kwiteboduwinö kwö̧jaduwakwedöja. 11Ja̧danö, jobe kwiteboduwitjö kwuluwo̧ Isabenö Jo̧ Diosma ju'wi comunidad 'da̧batö ujunakobe, iteda itebo comunidad, inesö Isabenö Jo̧ ökwödö kwö̧'da̧deduwinö ö̧ji̧ i̧sȩkwelö baibanö.#12:11 Damötjö Diosma israel jojodödö weinobe, iteda eju tjotidobö, jejutjö Diosma iteda jobadökwö ö̧ji̧ i̧sȩkwakobetjö̧. Ja̧danö bakwo̧ Dios öba a'o ichibobö jö̧a̧litjöma, ja̧ Dios weinejube i̧'yobö ji̧nobe. Jobe Dios ejubeda okobe jwiinö kwiyaduwi̧tenia kwiyaduwobö wetaduwakwö chömöledö, jwiinö ubinö iyawabi, ju'wi juwö iyawabi, domulataja jawatjö bakwöta jawa iyawabi, Isabenö Jo̧nö diyakwedösa jö̧ba̧lö yöbawö kwujuninaduwaja̧ jawabi. 12Ja̧danö jobe Dios ejutjöda kwuluwo̧duwi Isabenö Jo̧ Diosnö kwo̧'wo ösöwachibaduwanö ösödö, ba'ali kwukwaduwobö ja̧kobe, ökwödöbi, kwi̧tji̧muduwibi, kwömöayedöduwibi, kwitebo comunidadnö ju̧kwadö Levisaso jojodöbi. Jau chömöledö, jobadö Levisaso jojodöma idöda tjitebo niji juna̧löködö, Diosma idöda tjitebo baibanö niji iyokobetjö̧, jo̧kwajabetjö̧ ökwödö jelesokwena kwiteboduwi niji juna̧ladö Dios öba a'o kwo̧'woduwi ösöwachibanö ba'ali kwukwaduwenama, kwitebo comunidadtjö Levisaso jojodöbi ökwödökwö ba'ali tjukwobö ja̧kobe.

13—Teada̧lönö kwö̧jaduwo chömöledö, jelobetenia ökwödöda kwösödaduwi̧danö kwabö juwö Diosnö kwiyaduwapji jö̧ba̧lö. 14Jelobetenia kwiyaduwobö jwiobe chömöledö, sule bakwasokwena tjitebotjö, Isabenö Jo̧ omudawö ujunakwemi comunidadtjöda kwiyaduwobö ja̧kobe. Ja̧danö jobe Dios ejutjö okobe jwiinö ju'wi ökwödönö yöbawö weti̧ jawa jobetjö Diosnö ösödö ja̧köbaduwobö ja̧kobe.

15—Jobekwö yötawi̧ma, kwiteboduwi comunidadtjö kwajwimuduwinö kwabö kwukwaduwoko jö̧ba̧löma yötawökö chömöledö. Kwuluwo̧duwi Isabenö Jo̧ Diosma pjaatakobe ökwödönö, kwajwimuduwi tjö̧ba̧jekwachinö, ja̧danö jejenö pjaatiawö̧ itebia kwukwaduwobö jö̧ka̧laduwenama, okobe deinö wene jwiinö kwiteboduwi comunidadtjö kwukwaduwobö ja̧kobe. Sule Diosnö iyawada kwitebo comunidadtjö kwukwaduwobö jwiobe chömöledö. Jau chömöledö, kwöwaisaduwa, tebonö ju̧kwadö yamanö#12:15 Tjitebonö yamabi, yamadanö ichejekwo̧ Gacela ötjabökwebi tjö̧jinobe, yamadanö ichejekwijayonö jelo̧. Tjiwenenö yamabi, gacelabi laebobe, jo̧kwaijayonö jojodöma okobe deinö jobadönö yama ötjabena. jelobetenia wene jwiinö kwabö kwadöja. Kwöwaisaduwa, ökwödötjö bakwo̧ yȩbekwö#12:15 Yȩekwi̧ jawa laebi̧ma, wame jawadama wanekwachokobe. Ju'wi baledenabi, ju'wi ja̧tjenabi, yȩbekwadö batjibo jö̧tja̧linobe israel jojodöma, Dios öba a'o tjichibökönö. ö̧jitjö̧ma, Dios öba a'o ichibobö jwiena, yȩbekwadöma Dios öba a'o tichibobö jwiobetjö̧, jo̧kwaijayonö yayonö yama itebiya wene jwiinö tjukwobö jo̧be, jö̧tö? Kwajwi̧muduwitjö kwiteboduwitjö kwabö kwukwaduwakwawö̧bi ja̧danö chömöledö, yȩbakwadöbi, yȩbekwöködöbi okobe deinö kwajwi̧muduwi tjitebiya wene jwiinö tjukwobö ja̧kobe, Diosnö iyawa baibanö kwukwaduwokobetjö̧. 16Jo̧kwaijayonö itebia kwukwaduwijayonö, tjökwösöbuma kwukwaduwoko, ojwiyo nijinö tobö lotji̧danö, tjökwösobö nininö ebawobö tobö lobaduwi.

17—Jo̧kwaijayonö Dios 'da̧batö kwujunaduwobö wei̧ jawama, wainö ji̧ chömöledö, ja̧jaye kwiteboduwitjö kwukwaduwoko. Jau chömöledö, Diosma weinobe, batjo̧ jawa 'da̧batö kwujunaduwobö, kwakwawa jawatjöbi, ubasobutjöbi, olivo o̧tesobutjöbi, domulataja jawatjö bakwöta jawa 'da̧batö kwujunaduwobö, jo̧banö iyawa baibanö, ja̧danö kwajwi̧muduwi pakayadötjöbi, obejadötjöbi ajayi tjemawö̧nö 'da̧batö kwujunaduwobö, jo̧banö iyawa baibanö, jö̧tö? Ja̧ 'da̧batö kwujunaduwaja̧ jawabi, ju'wi –Diyakwedösa, –jö̧ba̧lö yöbawö kwujuninaduwaja̧ jawabi, ju'wi kwiyaduwobö kwösödaduwi̧bi, ju'wi iyawateniabi, kwiteboduwitjö kwukwaduwobö jwiakobe chömöledö. 18Ja̧ jaye kwuluwo̧duwi Isabenö Jo̧ Dios omudawö ujunakwa̧ comunidadtjöda kwukwaduwobö ja̧kobe, kwuluwo̧duwi Isabenö Jo̧ Dios öba a'otjö. Jau chömöledö, Diosnö ösödö, jo̧ba öba a'o kwo̧'woduwi ösöwachibanö kwukwaduwobö ja̧kobe chömöledö, –Okobe jwiinö dotidi̧tenia otiwanö pjabato̧ Diosma, –jö̧ba̧lö, ökwödöbi, kwi̧tji̧muduwibi, kwömöayedöduwibi, kwitebo comunidadnö ju̧kwadö Levisaso jojodöbi. 19Isabenö jejenö kwö̧'da̧deduwinö ju̧kwadö Levisaso jojodönö kwiteada̧laduwobö jo̧be chömöledö, jo̧kwajabetjö̧ teada̧lönö kwö̧jaduwo, ba̧kwelöjatebö kwiteboduwi nijinö kwö̧jaduwayi, ba̧kwelöjatebö jobadönö omukwatö kwiteada̧laduwakobetjö̧,#12:19 Diosma Levisaso jojodönö tjitebo niji iyinokobe, jobadöma Dios öba a'o otidö tjö̧jinobe, ja̧danö jojodönö yöbawö tjö̧jinobe. Jo̧kwajabetjö̧, ju'wedö israel jojodö Dios öba a'o ba'ali tjukwenama, Levisaso jojodönöbi tja̧debobö weinobe, bakobe jobadökwö tjukwobö. —jö̧ba̧lö yöawinobe Moisesma, israel jojodönö.

20-21Tupakwö yöawinobe Moisesma: —Chömöledö kwuluwo̧duwi Isabenö Jo̧ Diosma ökwödönö yöbawö ujuninobe, Ajayitjö bajalekwönönö kwiteboduwi jalobe baibanö pjaatakwo̧, jö̧ba̧lö. Ja̧danö jejenö kwiteboduwi jalobe baibanö pjaatenama, ökwödötjö ju'wedöma Isabenö Jo̧ Dios 'da̧batö ujunina comunidad, iteda ö̧jemi i̧sȩkwelö comunidadtjö ödö kwö̧jaduwena. Jejenö ödö ja̧nö, –Dios ejuma yelösöda ödöobe, jobe 'yö̧könö, babeda itebia chukwowe, –jö̧ka̧laduwitjö̧ma, wene jwiobe chömöledö, kwösödaduwena kwajwimu pakayadötjöbi, obejadötjöbi wene jwiinö kwabö kwukwaduwena. Jau chömöledö, kwuluwo̧duwi Isabenö Jo̧ma kwajwimuduwinö otiwanö iyakobe, ja̧danö iyinawö̧nö wene jwiinö kwitebo comunidadtjö kwukwaduwena chömöledö, kwomeawaduwinö, tjo̧wita jö̧ba̧lö yöka̧laduwenanö kabatö. 22Jau chömöledö, tebonö ju̧kwadö yamanö kwabö kwukwaduwi̧danö, wene jwiinö kwiteboduwitjö kwukwaduwena kwajwimuduwinöbi. Dios öba a'o tjichibökönö yȩbekwadöbi, yȩekwi̧ jwibadöbi wene jwiinö tjukwobö ja̧kobe. 23Jo̧kwaijayonö itebia wene jwiinö kwukwaduwijayonö, tjökwösobuma kwukwaduwoko, baikwö yötawa: Tjökwösobuma, ja̧kwawasobu ji̧, ja̧danö ja̧kwawama tjukwökö ji̧, jo̧kwajabetjö̧ tjökwösobuma itebiyakwö kwukwaduwobö jwiobe. 24Tjökwösobu kwökönö, nijinö ebawinö tobö loköbaduwobö jo̧be, ojwiyo nijinö tobö lotji̧danö. 25Jobekwö laebobe Isabenö Jo̧ ökwödönö wei̧ma chömöledö, jo̧kwajabetjö̧ wei̧ a̧ja̧kwö, ökwödöbi kwi̧tji̧muduwibi tjökwösobu kwukwaduwoko chömöledö. Ja̧danö jejenö Dios wei̧ a̧ja̧kwö kwö̧jaduwiökwe, ötiwanö kwö̧jaduwobö pjaatakwo̧, –Weti̧ a̧ja̧kwö, otiwanö ja̧bö ju̧kwadö, –jö̧ba̧lö.

26—Jobekwö wene jwiinö itebia kwukwaduwena kwiteboduwi comunidadtjö chömöledö, jo̧kwaijayonö Dios itea jawa baibanö 'da̧batö kwujunaduwaja̧ jawabi, –Isabenö bi̧ya Diosnö diyakwedösa, –jö̧ba̧lö 'da̧batö kwujunaduwaja̧ jawabi, kwiteboduwi comunidadtjö kwukwaduwoko chömöledö, ja̧ jawa Isabenö Jo̧ omudawö ujunakwemibe e'ewö kwi̧'yaduwobö ja̧kobe. 27Ja̧danö jobe ichibajadö, jwiinö ubinö iyawa kwuluwo̧duwi Isabenö Jo̧ Diosnö iyawötetjö kwiyaduwo, itebiabi, tjökwösobubi. Ja̧danö ju'wi iyawa jobetjö kwiyaduwi̧ma, tjökwösobu ebawinö loköbaduwo, kwuluwo̧duwi Isabenö Jo̧ Diosnö iyawöte ö'öbönö, jo̧kwaijayonö itebiama jobetjö kwukwaduwena.

28—Jobekwö Dios ökwödönö wei̧ yöbawö wetaduwakwö, ja̧bö kwö̧jaduwobö chömöledö, ja̧danö teada̧lönö kwö̧jaduwo, ökwödöbi, kwitji̧muduwibi ba̧kwelöjatebö yötawi̧danö ja̧bö kwö̧jaduwakobetjö̧. Jau chömöledö, jejenö kwuluwo̧duwi Isabenö Jo̧ Dios wei̧ a̧ja̧kwö kwö̧jaduwitjö̧ma, ökwödönö ösödakobe, –Jweinö chösödi̧danö otiwanö a̧ja̧kwö ju̧kwadö, –jö̧ba̧lö, ja̧danö ba̧kwelöjatebö ökwödönö pjaatakwo̧, otiwanö kwö̧jaduwakobetjö̧.

29—Ja̧danö, ju'wibi yötawaduwakwö chömöledö: Juluwanö kwiteboduwi baibakwa̧ niji ölakwabikwawö tekachaduwakwedöja, jobe ju̧kwadö tjitebo 'döbebö, kwiteboduwi baibanö kwemaduwakobetjö̧, ja̧danö jejenö tekachaduwenama, jobe ju̧kwadö tjitebokwena jojodönö kwöba a'oduwitjö̧ söbebö loakobe, tjiteboinemima otiwanö kwemaduwobö. Ja̧danö jobadönö a'dewö lobajadö, tjiteboinemi niji emö, kwiteboduwi baibanö jobe kwö̧jaduwakwedöja. 30Jejenö kwöba a'oduwitjö̧ Dios söbebö loaja̧ ikenama, teada̧lönö kwö̧jaduwo chömöledö, jobadö tjösödawö̧nö tjösödina jawa kwomuwataduwapji jö̧ba̧lö. Jau chömöledö, tjiteboineminö ja̧nö, abebö kwa̧ja̧kwaduwoko, –Bemi nijinö tjitebokwena jojodö tjösödinadanö dösödobö jö̧da̧la, tjösödadawö̧nö tjösödinama, dakwö ja̧bö tjösödinada? –jö̧ba̧lö abebö kwa̧ja̧kwaduwoko, jobadö sulabenö tjösödinama ökwödönö 'daliwa baibapji jö̧ba̧lö. 31Jau chömöledö, jobadö tjösödinadanöma kwösödaduwoko kwuluwo̧duwi Isabenö Jo̧ Diosnö chömöledö, baikwö yötawa: Jobadö tjösödawö̧nö ösödö ja̧tji̧ma, jwiinö suli̧ jawa ösödö ja̧badö, inesö suli̧ Isabenö Jo̧ öpöjödi̧ jawa. Jau chömöledö, isabenö jwiinö sulabenö ja̧bö tjösodobe o̧'wo jawa tjösödawö̧nö, idöda tji̧tji̧munöbi juwö tjiyobe, tjösödawö̧nö̧ iyawa baibanö chömöledö, jobadö tjösödi̧danö kwösödaduwoböma kwisakwaduwoko, la'akatjöda.

32—Jobekwö laebobe Dios ökwödönö wei̧ma chömöledö, ja̧danö teada̧lönö kwö̧jaduwo, okobe jwiinö bakwainö webö yötawaja̧danö ja̧bö kwö̧jaduwakobetjö̧ chömöledö. Jau chömöledö, bakwainö yötawaja̧danö ja̧bö kwö̧jaduwo, baikwö yötawa: Yötawaja̧ jawatjö ja'yebi söbebö loköbaduwoko chömöledö, ja̧danö ju'wibi yötawaja̧ jawakwö ju'wi jayekwö pjabata̧lö ja̧köbaduwoko, —jö̧ba̧lö yöawinobe Moisesma, israel jojodönö.

Currently Selected:

Deuteronomio 12: WPC

Highlight

Copy