2 Tesalonicenses 2
2
'Dö̧ibaji̧ möle Awetja ömöayo̧ sulabo̧nö Pablo yöawina wene
1Chömöledö, Duluwo̧ Jesucristo ichakwa̧ jawa, ja̧danö jo̧bakwö bakobe dediakwawakwa̧ jawa yötawa, wajwibö kwomukwataduwapji jö̧ba̧lö. Jau chömöledö, baikwö yötawaduwakwö: 2Ju'wedö, Aaa, Duluwo̧ ichi̧ möle ida̧ökö badekwachajabe, jö̧ba̧lö yötjawenama, wajwibö kwomukwataduwa, ja̧danö kwo̧'wo̧ tjo̧kekwaduwa chömöledö. Jejenö yötjawitjö̧böbi, Aaa, Dios O̧'wo̧ Luwo̧ma jejenö i̧sebajabe, jö̧ba̧lö yötjawitjö̧böbi, Aaa, Pabloma jejenö yöbawö iwȩyudajabe, jö̧ba̧lö yötjawitjö̧böbi, yötjawi̧ma kwösödaduwa chömöledö. 3Jejenö omöna yötja̧li̧ma ja'yubebi ösödökönaduwi chömöledö, baikwö yötawa: 'Dö̧ibaji̧ möle okobe deinö böjȩ jojodöma Diosnö tjöpöjödakobe, jo̧ba wei̧ da̧ja̧kwökö jö̧ba̧lö. Jesúsma yemidanö ichökakobe ja̧ möle baibenanö kabatö, ja̧danö inesö sulabo̧ Awetja ömöayo̧, Dios ökwöla nöolanö ikwö loakwo̧ma öwawachenanö kabatö. 4Jo̧ba Awetja ömöayo̧ma okobe deinö diosbedö ötjabiwö̧nö, ja̧danö okobe deinö jojodö tjösödawö̧nö öpöjödakwo̧, Jobadönötjö bajalekwönönö jo̧sa, jö̧ba̧lö. Ja̧danö, ju'wibi Dios weineju okwa tebachibö, öbamatakwo̧, Ötjödasa Diosma, jö̧ba̧lö. 5¿Kwomukwataduwökiji̧ chömöledö? Ina ökwödökwö chö̧jayi, ja̧ wene ökwödönö yötawijatö chömöledö. 6Jau chömöledö, kwöwaisaduwa: Tjöbeba̧lo̧ma babe otiwanö tjöbeba̧lö ö̧jobe, jo̧ba inesö sulabo̧ma öbaledapji jö̧ba̧lö. Jo̧kwaijayonö, Dios badedö ujunina möle badekwachenama, jo̧ba inesö sulabo̧ma ichibakobe. 7Jau chömöledö, Awetjama ida̧ökö tojowanö otidobe, jojodö Dios wei̧ tjöpöjödo jö̧ba̧lö. Jo̧kwaijayonö tupakwö baledakwa̧ma ina baledökakobe, tjöbeba̧lo̧ ina ö̧jayima. Jau chömöledö, Dios badedö ujunina möle badekwachenama, Diosma tjöbeba̧lo̧nö laebakobe. 8Jemi ikenama inesö sulabo̧ Awetja ömöayo̧ma ichibakobe chömöledö, jo̧kwaijayonö Duluwo̧ Jesús ichenama, yöba̧löda jo̧banö kwabö loakwo̧, ja̧danö dejatinö ujulunö jo̧banö söbebö loakwo̧. 9Jau chömöledö, jo̧ba inesö sulabo̧ma Awetja ujulunö ichakwo̧, ja̧danö omöna i̧sebakobe, ujulu i̧sekwa jawabi, jojodö edajitjökö jawabi. 10Ja̧danö, okobe jwiinö sulabenö omöna yöa̧lakwawama omöna yöa̧lakwo̧, Dios lȩebakwawö̧ jo̧banö tjösödakobetjö̧. Jau chömöledö, jobadö Dios lȩebakwawö̧ma isabenö wene tjösödinatjö̧ma tjö̧jibo jö̧tja̧linena, jo̧kwaijayonö tjöpöjödinobetjö̧ Dios lȩebakwawö̧ tjö̧jobe. 11Ja̧danö, isabenö wene tjöpöjödobetjö̧, Diosma weakobe, wajwibö tjomukwatobö, ja̧danö omöna wene tjösödobö. 12Jo̧kwajabetjö̧, okobe deinö isabenö wene öpöjödö sulabenö ja̧awa ösödadönöma lȩebakwo̧ Diosma.
Ökwödöma Dios omudawö ujuninawö̧ja jö̧ba̧lö Pablo yöawina wene
13Chömöledö kabatökönö Diosnö ösödö adebobö jo̧be, ökwödönö pjaatinobetjö̧. Jau chömöledö, ökwödöma Duluwo̧ ile niebawö̧ja, ja̧danö Diosma la'akatjöda ökwödönö omudawö ujuninobe, kwö̧jibaduwobö. Ja̧danö, Dios O̧'wo̧ Luwo̧ ujulunö ökwödönö 'da̧batö ujuninobe, iteda ömöledö bakibaduwanö, isabenö wene kwösödaduwobetjö̧. 14Jau chömöledö, ökwödö otiwa jawa wene yödawinanötjö Diosma ökwödönö jwöinobe kwö̧jibaduwobö, Duluwo̧ Jesucristo dejatinö ujulu ökwödöbi kwujuna̧laduwakobetjö̧. 15Jo̧kwajabetjö̧, pjolachibökönö kwö̧jaduwo chömöledö, yödawina wene isabenö wene do̧ba̧lö, yöbawö yödawina wenebi, wȩyudö yödawina wenebi.
16Chömöledö, Dabe'do Diosma otiwa jawa mikwa jwiinö iyö ökwödönö ile niebinobe, ja̧danö ba̧kwȩlö̧jatebö do̧'wo̧ ösöwachibanö pjaatinobe, ja̧danö jo̧banö otiwanö do̧'wo̧ döwana̧lobö pjaatinobe. Jo̧ba Dabe'do Diosbi, Duluwo̧ Jesucristobi 17ökwödönö kwo̧'wo̧ luwo̧duwi ösöwachibanö pjatjatobö dösöda, ja̧danö kwujuluwachibaduwanö pjatjatobö dösöda, yöka̧laduwi̧bi, kwotidaduwi̧bi ba̧kwȩlö̧jatebö otiwanö ja̧köbaduwakobetjö̧.
Currently Selected:
2 Tesalonicenses 2: WPC
Highlight
Share
Compare
Copy
Want to have your highlights saved across all your devices? Sign up or sign in
©2021, All Rights Reserved
