2 Samuel 22
22
David lo̧awa Isabenö Jo̧ Diosnö ösödö lo̧ina jawa
1Isabenö Jo̧ma Davidnö ö̧jibinö pjaatinobe, Saultjöbi, okobe deinö ju'wedö David öpöjojodötjöbi. Ja̧danö, jejenö ö̧jibinö pjaatiökwe, Davidma Isabenö Jo̧nö ösödö lo̧inobe. 2Baikwö laebobe David lo̧inama:
—Chösödökwe Isabenö Jo̧ma inesö inawa tjöeba̧lawadanö tjöbeba̧lo̧, jo̧bakwö janö, 'diinö tjöekwena chö̧jobedanö ichejekwa, chö̧jibinö pjabata̧lö tjöbeba̧lo̧obetjö̧. 3Jo̧bama chuluwo̧ Dios, jo̧ba inesö juluwo̧ chuluwo̧ma tjöekwapi tjöeba̧li̧danö, tjöbeba̧linö chö̧jibinö pjabatajiobe.
Chöpöjojodö ötjönö tjujuluwo jö̧tja̧lenama, jo̧ba ö̧jobekwö döbibajö ö'öchakwawobe, ja̧danö jo̧bakwö ja̧nö, chöpöjojodötjö chö̧jibobe. Diosma isabenö chö̧jibinö pjabato̧, chöpöjojodö kwabö lotjapji jö̧ba̧lö. 4Jau, chöpöjojodö tjujuluwo jö̧tja̧lenama, Isabenö Jo̧nö, okobe deinö tjösödo jö̧tja̧lökwenö jwöbö atebobe, ja̧danö atebökwe, chöpöjojodö tjujulutjö chö̧jibinö pjabatajiobe.
5Balawa loidanö, woawama ötjönö juluwo jö̧a̧linobe, ojwe okwatibö söbebö loi̧danö, wene chujuna̧li̧ma söbebö loo jö̧a̧linobe. 6Wobalema ida̧ökö ötjönö nu'yö lödawobedanö ichejekwa, ja̧danö woawama chabönö 'daliwadanö ji̧nobe.
7Jemi ikenama, jwiinö cho̧'wo tjo̧achö jwöbö atebijatö chuluwo̧ Isabenö Jo̧ Diosnö, ja̧danö iteda ejunö ja̧nö, chiwene ökwöi̧ a̧ja̧kwinobe, pjaatobö atebökwe a̧ja̧kwinobe.
8Ikenama pjaatobö atebökwe, bö̧jema tjö̧awinobe, mölejȩ la'akabi tjö̧awinobe, yebabinö tjö̧awinobe ichejekwa, chösödökwema chöpöjojodönö ödameakwobetjö̧. 9Jwiinö ödameakwobetjö̧, i̧su̧tjö imiu'wo laebinobedanö ichejekwa, ja̧danö aatjö ökwöla, jwiinö ubolabi ökwöla ubö̧'a̧bi ubinö aatjö laebinobe ichejekwa, chöpöjojodönö söbebö loobö.
10Mölejȩ kȩ'ekwinö yutuajinobedanö ichejekwa, ömasapiya teebe, ojwiyo'wo inesö yȩa'wo ji̧nö. 11Inesö juluwo̧ angelnö wanö köbö ichinobedanö ichejekwa, jwa̧le'epo labinö jwa̧lȩ'ewinö juluwanö ichinobe.
12Ojwiyo'wo jwiinö yȩa'wo kwebatö, wamesa̧do̧danö kweatinobe, inesö ojwiyo'wo nöinö ojwiyo o̧bakwa'woma.
13Ichonö, inesö dewinö idejati̧tjö, ökwöla ubö̧'iya nötekwajö ubinobe.
14Mölejȩbetjö Isabenö Jo̧ma böba ökwöi̧danö ökwödinobe, okobe jwiinö juluwo̧ Dios iwene labinö ökwöi̧ tja̧ja̧kwinobe.
15Nayunö 'bötji̧danö, böba kwaidanö 'böijatö öpöjojodönö, tjipjelekwachinö jwiinö dötjibajinö chöpöjojodönö a'dewö loinobe.
16I̧su̧tjö pjubö, chöpöjojodönö labinö katjatibobö weenama, öba a'otjö jwaibalawabi döibajinobe ichejekwa, ja̧danö jwaibalawa la'akabi, bö̧jȩ la'akabi öwawachibanö pjuinobe, isabenö juluwo̧obetjö.
17Isabenö Jo̧ma mötjö ömamu debatö, ötjönö do̧batö emijatö, jwaibalawa da̧kwobe chö̧jajelö chö̧jibinö emijatö.
18Chöpöjojo juluwo̧ma ötjönö ujuluwo jö̧a̧linobe, ja̧danö ötjönö öpöjödadöma suli̧ tjöwaedo jö̧tja̧linobe, ötjö chujulutjö bajalekwönönö tjujuluwobetjö̧, jo̧kwaijayonö Isabenö Jo̧ma jobadötjö chö̧jibinö pjaatijatö, tjujuluwapji jö̧ba̧lö.
19Jau, wene chöbaledenama, jobadö chöpöjojodöma badedö tjölakwabikwawijatö ötjönö tjujuluwobö, jo̧kwaijayonö Isabenö Jo̧ma chö̧ji̧binö tjöeba̧lijatö. 20Ötjönö jwiinö ösödobetjö̧, chö̧jibinö chölakwabikwawelö laebijatö, jalobe wene jwiobe chö̧jobö.
21Otiwanö ja̧bö chö̧jiökwe, Isabenö Jo̧ma balekwa mikwa otiwanö pjaatijatö, öba a'otjö wene jwibö chö̧jinobetjö̧. 22Jau, Isabenö Jo̧ wei̧ ja̧bö chö̧jajabe, ja̧danö chösödökwe Diostjö sulabenö 'da̧bachibökönö jo̧bakwö otiwanö chö̧jajabe. 23Okobe jwiinö ja̧bö dö̧jobö wei̧ omukwatö ja̧ichobe, ja̧danö wei̧ öpöjödöma katatakwawokobe. 24Isabenö Jo̧ öba a'otjö wene jwiinö chö̧jajabe, ja̧danö teada̧lönö chö̧jajabe, jo̧ba weöködanö ja̧tapji jö̧ba̧lö.
25Jejenö ja̧bö chö̧jiökwe, balekwa mikwa otiwanö pjaatajabe Isabenö Jo̧ma, öba a'otjö otiwanö ja̧bö ja̧nö, wene jwiinö chö̧jiökwe balekwa mikwa otiwanö pjaatajabe.
26Jau chösödökwe Isabenö Jo̧, jojodönö lȩlöinö edadönö, ökwöbi lȩlöinö edo̧ja, ja̧danö otiwanö ja̧bö ju̧kwadönö, isabenö otiwanö pjabatö jo̧ja.
27Bakwainö tjusula jwibadönö, bakwainö dösölöjinö edö pjabato̧ja, jo̧kwaijayonö sulabedönö ölakwabikwawö jo̧ja.
28Usula jojodö mikwawöködösa jö̧ba̧lö omukwatadönö, tjö̧jibinö pjabato̧ja, jo̧kwaijayonö otiwadösa jö̧ba̧lö omukwatadönö eda̧loja, taba lö̧jawö tjö̧jakobetjö̧.
29Jau chuluwo̧ Isabenö Jo̧ Dios, ökwöma deju̧wa̧'yudanöbo̧ja, yȩa'wo okwa chö̧jenama otiwanö dejato̧ja.
30Isabenö pjabato̧ja, ökwö kwujulunö ba̧jȩkwadö ölakwabikwawa jojodönö chujuluwobe, ja̧danö pjakatonö, tjöekwemi wamenö dötobö jo̧be.
31Okobe jwiinö Chösödökwe Dios ja̧bö ö̧ji̧ma, bakwainö otiwanö ja̧bo̧, Isabenö Jo̧ yöa̧li̧ma, ba̧kwelöjatebö yöa̧li̧danö badekwachinö ja̧bo̧, ja̧danö okobe deinö jo̧ba ö̧jobekwö tjö̧jibobö döbibajadönö, tjöbeba̧lö pjabato̧.
32Jelo̧ Diosbo̧ma ö̧jenaji̧? Deobe, Isabenö Jo̧ Diosda, ja̧danö jo̧ba inawa tjöeba̧lawadanöbo̧ma deobe, dösödökwe Diosda. 33Isabenö jo̧ba dösödökwe Diosma chöpöjojodötjö chö̧jibobö 'diinö tjöekwi̧danöbo̧, ja̧danö jweinö otiwamanö kwetachobö öbibo̧. 34Jau, mösa'ijutjö kwetachenama, yama otiwanö mebökönö kweachi̧danö kwetachobö pjabato̧, möemi kwebachö, pjusachibobe metapji jö̧ba̧lö.
35Jo̧bama isabenö otiwanö ölakwabikwawa jawa ba̧ja̧do̧, 'böpö, inesö broncetjö otikwöpönöbi otiwanö 'bötenanö baibanö.
36Jau chuluwo̧, tjöekwapidanö inesö ji̧bakwawa kwiyajabe, chö̧jibobö, ja̧danö ötjönö dösölö̧jinö edö, inesö juluwo̧, okobe deinö tja̧ja̧kwökwe batibobö pjakatajabe.
37Kwetachenama, otiwama jalamanö kwetachobö ökibajabe, pjusachibö metapji jö̧ba̧lö.
38Jo̧kwajabetjö̧ chöpöjojodönö lubö, söbebö lotijatö, jobadönö lubö katatijökötö, okobe deinö chöpöjojodönö söbebö lotenanö kabatö. 39Jwiinö jobadönö chujuluwijatö, kwölöteonö jobadönö titatijatö, ja̧danö chömasapiya teebe batjibanö metji̧nobe, yemidanö tja̧la̧ibökenanö.
40Jau chuluwo̧, ökwöda chujulu kwiyijatö, ölakwabikwawö chö̧jobö, ja̧danö ökwöda chöpöjojodö, ötjönö tjujuluwo jö̧ba̧ladö chiteebe batjibobö ja̧köbijatö. 41Chöpöjojodö chöba a'otjö dötjibajobö ja̧köbijatö, ja̧danö jobadönö söbebö lotijatö. 42Tjö̧jibinö pjaatakwo̧nö tjisakwijatö, jo̧kwaijayonö bakwo̧bi pjabato̧ma deinobe. Jau, ökwö Isabenö Jo̧nöbi jwötjinobe, jo̧kwaijayonö jobadönö pjakatijökötö, Bidöma David öpöjojodö jö̧ba̧lö. 43Jo̧kwajabetjö̧ nijiso̧pja batjibi̧danö jwiinö jobadönö söbebö lotijatö, mananö 'ya̧nö lete'o tjö̧jati̧danö, jobadönö söbebö lotijatö.
44Ja̧danö chuluwo̧, ötjö chömöledö israel jojodökwö ölakwabikwawö chö̧jenabi, chö̧jibinö pjakatijatö, ja̧danö ba̧jȩkwadö tjitebokwena jojodö tjuluwo̧ chö̧bobö kwujunijatö, ja̧danö jojodö ajayinö wajwitinawö̧ma, chömöayedö batjibanö weti̧ tjotidijatö. 45Jau, ju'wedö tjitebo jojodöma, yebabinö chöba a'o bȩtjachibinobe, ötjönö tja̧ja̧kwenama, juluwanö weti̧ a̧ja̧kwö tjotidinobe. 46Ötjönö a̧ja̧kwö, juluwanö jwiinö yetjaibinobe, ja̧danö yebabinö tjö̧bawö, tju̧ju̧kwawelö latjebinobe, chömöayedö batjibanö.
47Chuluwo̧ Isabenö Jo̧, isabenö 'yaba̧lo̧ja, ökwö inesö inawadanöbo̧nö chösödakwö. Ökwö inawadanöbo̧ chö̧jibinö pjabato̧ Diosnö chösödakwö, isabenö inesö otiwo̧ja jö̧ba̧lö. 48Jau chuluwo̧ Dios, ökwödaja chöpöjojodönö chömöayedö batjibanö chujuluwobö pjabato̧ma, 49Ökwödaja chöpöjojodötjö chö̧jibobö pjabato̧ma, ötjönö kwabö lotjobö jö̧tja̧lijayonö, chujuluwobö pjabatinaja, ja̧danö tjuluwo̧ batibanö juninaja.
50Jo̧kwajabetjö̧ inesö otiwanö pjakatina wene omukwatö, ökwö Isabenö Jo̧nö chösödocha, tjitebokwena jojodö tjö̧'da̧de ja̧nö ökwönö ösödö yöta̧locha, ja̧danö ökwönö ösödö lo̧tocha, –Chösödökwe Isabenö Jo̧ma otiwo̧, –jö̧ba̧lö.
51Jau, isabenö iteda omudawö ujuninökwe la'aka luwo̧, ötjö Davidnö otiwanö chö̧jibinö pjabato̧ Isabenö Jo̧ma, kabatökönö dösölö̧jinö edö pjabato̧, ötjö Davidnöbi, chitji̧mu tupadanö jojodönöbi, isabenö otiwo̧ Isabenö Jo̧ma,
—jö̧ba̧lö lo̧inobe Davidma, Isabenö Jo̧nö ösödö.
Currently Selected:
2 Samuel 22: WPC
Highlight
Share
Compare
Copy
Want to have your highlights saved across all your devices? Sign up or sign in
©2021, All Rights Reserved
