2 Reyes 22

Josias Juda la'aka luwo̧ ö̧jina jawa

1Juda la'aka luwo̧ baibenama, jelemutjö wapötakwa o̧biya ujuna̧linobe Josiasma, ja̧danö la'aka luwo̧ babibajo̧, treinta y un o̧biya baledibanö Jerusalen comunidadnö ja̧nö webö ö̧jinobe. Josias ojo'doma, Jedida mikwuju, Boscat comunidad jojo Adaia mikwo̧ itjiju. 2Ja̧danö, Juda la'aka luwo̧ ja̧nö, Isabenö Jo̧ öba a'otjö otiwanö ja̧bö ö̧jinobe Josiasma. A'dömine David ja̧bö ö̧jinadanö, Josiasbi jalachibökönö, jwaikwöda Dios wei̧ a̧ja̧kwö ö̧jinobe.

Dios wei̧ wȩyukwa'ye tjöbadekwajina jawa

3Josias ida̧ökö dieciocho o̧biya baledibanö Juda la'aka luwo̧ webö ö̧jenama, iteda ömöayo̧ secretario otido̧ Safan mikwo̧nö#22:3 ajayi tjiwenenö, Azalia itji̧, ja̧danö Mesulam ö̧'dö̧. weinobe, Dios ejube i̧'yobö, baikwö: 4—Diostjö jojodötjö inesö ö'weje pjabato̧ Hilcias ö̧jobekwö 'ya̧nö, jo̧banö abebö kwa̧ja̧kwo, –Jojodö Isabenö Jo̧ ejube ichibö, Dios eju apjude teada̧ladönö tjiyina baladama, dokwa nöinö tjo̧ko̧kodinada? –jö̧ba̧lö abebö kwa̧ja̧kwo. 5Ja̧danö, ju'wibi jo̧banö weköbo, ja̧ balada Dios eju 'yayinö otikwa luwedönö iyobö. Jobekwö iyajawö̧, jobadöma o̧do otidadönö tjimidakwedö, 6towi ötebiyatjö otidadönöbi, inawiyatjö otidadönöbi, ju'witjö otidadönöbi, tjotidobö. Ja̧danö ju'wibi ja̧ baladanö, otikwa jawa tjemakwedö, towi o'iyabi, inawiyabi, Dios eju 'yayinö tjotidakobetjö̧. 7Ja̧danö, jobadö otikwa luwedöma, jwaikwöda naukwökönö tjotido jö̧tja̧li̧danö otidadö, jo̧kwajabetjö̧ jobadönö balada iyijayonö, tjotidina 'dö̧tjȩkwina wȩyukwa'ye aebobö jwiena, —jö̧ba̧lö Hilciasnö yöa̧lobö weinobe Josiasma.

8Ja̧danö, Josias weaja̧danö Safan yöbawö i̧'yenama, ö'weje pjabato̧ Hilciasma Safannö yöawinobe: —Isabenö Jo̧ eju okwatjö, bi'ye Dios wei̧ wȩyukwa'ye chöbadekwajabeta, —jö̧ba̧lö. Ja̧danö, Hilciasma öbadekwaja'ye Safannö iyinobe, ja̧danö iyajökwe, wȩyukwa'ye yöa̧linobe Safanma. 9Ikenama, la'aka luwo̧ Josias ö̧jobekwö ȩwa̧bijö yöawinobe Safanma: —Chuluwo̧ Josias, kwömöayedöma Isabenö Jo̧ ejutjö ji̧ balada emibö, o̧do otikwa luwedönö tjiyajabe, o̧do 'yayinö tjotidobö wetjakobetjö̧, —jö̧ba̧lö. 10Ja̧danö jemi tupakwö ju'wibi yöawinobe, —Bi'ye chujuna̧la, Hilcias ötjönö iyaja'yema, —jö̧ba̧lö. Ja̧danö yöbawajo̧, Josias öba a'otjö Dios wei̧ wȩyukwa'ye yöa̧linobe Safanma.

11Ja̧danö, Safan Dios wȩi̧ wȩyukwa'ye yöa̧li̧ a̧ja̧kwö, o̧'wo tjo̧bekwibö ökamiji̧do̧ kȩ'ekwö loinobe Josiasma, —Ayö, Dios öba a'otjö wene juna̧ladösa, —jö̧ba̧lö. 12Ja̧danö a̧ja̧kwajo̧, ö'weje pjabato̧ Hilciasnöbi, Safan itji̧ Ahicamnöbi, Micaias itji̧ Acbornöbi, secretario Safannöbi, yöne ömöayo̧ Asaiasnöbi weinobe, baikwö: 13—Chömöayedö, Isabenö Jo̧nö abebö a̧ja̧kwö kwi̧'yaduwo, biya̧ kwiyalu'ye laebi̧ jawa, ötjönöbi, ju'wedö chömöledö Juda jojodönöbi baledakwa̧ döwaisakobetjö. Jau chömöayedö, da'dödöma bi'ye laebi̧ jawa, ja̧bö dö̧jobö weawa laebi̧ jawa a̧ja̧kwökönö sulabenö ja̧bö tjö̧jinobe, ja̧danö jobekwö sulabenö ja̧tjiökwe, ökwödönö dameakwo̧ Isabenö Jo̧ma, jo̧kwajabetjö̧ Isabenö Jo̧nö abebö a̧ja̧kwö kwi̧'yaduwo, —jö̧ba̧lö weinobe.

14Weawö̧, ö'weje pjabato̧ Hilciasbi, Ahicambi, Acborbi, Safanbi, Asaiasbi Dios yöawi̧ yöbawuju Hulda mikwujunö abebö a̧ja̧kwö tji̧'yinobe. Jobuju Huldama, tjö̧ka̧mijido̧ otiwa̧do̧ teada̧lakwawa luwo̧ Salum#22:14 ajayi tjiwenenö, Ticva itji̧, ja̧danö Harhas ö̧'dö. mikwo̧ ilekwo, ja̧danö Jerusalen comunidadtjö 'yayinö tjotidinena jö̧jinobe, ja̧danö jejube ichibajadö, Huldakwö yötja̧lakwawinobe.

15Tjichibioko, jobadönö yöjawinobe Huldama: —Baikwö yöawobe Israel jojodö tjösödökwe Isabenö Jo̧ma: –Ötjönö abebö kwa̧ja̧kwaduwobö webajo̧ Josiasnö yökawaduwo baikwö: 16Isabenö Jo̧ma baikwö yöawobe, Isabenö yötawakwö, bemi comunidadbi, comunidadnö ju̧kwadönöbi isabenö labinö lȩtebakwo̧sa. Ökwö Juda la'aka luwo̧ma yöba̧lö kwedajabe, lȩtebakwa̧ wenema, ja̧danö isabenö yöka̧laja̧danö badekwachinö baledakobe. 17Bemi niji jojodöma isabenö ötjönö katjatibinobe, ja̧danö juwedö tjösödawö̧nö iyawa kwabö juwö tjiyinobe, ja̧danö jobekwö sulabenö ja̧bö, chödameakwinö sulabenö ja̧tjinobe. Isabenö jwiinö dameakwo̧sa bemi niji jojodönö, ja̧danö chödameakwi̧ söawökönö, isabenö lȩtebakwo̧sa, –jö̧ba̧lö Isabenö Jo̧ yöawi̧ yökawaduwo kwuluwo̧duwinö. 18Jo̧kwaijayonö, ju'wibi yökawaduwo Juda la'aka luwo̧, ötjönö abebö kwa̧ja̧kwaduwobö webajo̧nö, Isabenö Jo̧ jo̧ba Josiasnö baledakwa̧ yöawi̧ma: Baikwö yöawobe Israel tjösödökwe Isabenö Jo̧ Diosma: –Weti̧ wȩyukwa'ye laebi̧ kwa̧ja̧kwajabe, 19ja̧danö a̧ja̧kwajo̧, weti̧ öpöjödökönö, -Isabenö Dios wei̧ cha̧ja̧kwobö jö̧ba̧lo̧sa, -jö̧ba̧lö chöba a'o kwi̧sebajabe. Jau Josias, bemi niji söbebö loawobe baibanö lȩtebakwa̧ wenebi, bemi niji ju̧kwadönöbi inesö lȩtebakwawö̧ batjibanö lȩtebakwa̧ wenebi kwa̧ja̧kwenama, kwökamijido̧ kȩ'ekwö lobö, chöba a'otjö kwubudekwajabe, ja̧danö budekwö akebi̧ cha̧ja̧kwajabe Josias. 20Ja̧danö, a̧ja̧kwajo̧, baikwö yötawakwö, inesö lȩtebakwa̧ma kwedökakwo̧ja. Jau Josias, inesö lȩtebakwa̧ badekwachakwa̧ abönö, ina wene jwiinö kwö̧jaduwonö, ö'wö bakibakwo̧ja, ja̧danö ö'wö babibajo̧nö kwa'dödökwö otiwanö tjo̧tja̧kwo̧ja. Jo̧kwajabetjö̧, inesö lȩtebakwa̧ badekwachobö ji̧jayonö, ökwönö baledobö wetökakwo̧sa, ökwöma ina wene jwiinö kwö̧jaduwonö ö'wö bakibakwo̧ja, —jö̧ba̧lö Isabenö Jo̧ yöawi̧ yötjawobö wejinobe Huldama.

Ikenama, jobekwö yöjawawö̧, tjebachajö yötjawinobe la'aka luwo̧ Josiasnö.

Currently Selected:

2 Reyes 22: WPC

Highlight

Copy