2 Reyes 15
15
Uzias Juda la'aka luwo̧ ö̧jina jawa
1Israel la'aka luwo̧ Jeroboan ö̧jayi, veintisiete o̧biya baledibanö ida̧ökö webö ö̧jenama, Juda la'aka luwo̧ Amasias itji̧ Uziasma Juda la'aka luwo̧ baibinobe#15:1 Öwawökö, abe'do ö'wö baibaja̧ ikena Uzias juluwanö la'aka luwo̧ baibinojobö, lekwe möle baledibaja̧ ikena baibinojobö jö̧ba̧lö. Israel la'aka luwo̧ Jeroboan la'aka luwo̧ baibaja̧ ikena, quince o̧biya ö̧jinobe Amasiasma, ö'wö baibenanö kabatö, ja̧danö biya versiculo laebobe, Jeroboan ida̧ökö veintisiete o̧biya baledibanö webö ö̧jenama, la'aka luwo̧ baibinobe Uziasma, jö̧ba̧lö. Ja̧ laebi̧ edö, ju'wedö waisachadö yötja̧lobe, Abe'do ö'wö baibenama, sule tjemu ja'yuwo̧ ö̧jinobe, ja̧danö Juda nijima la'aka luwo̧ deinö ji̧nena, dieciseis o̧biya ujuna̧lenanö baibanö, jö̧ba̧lö.. 2La'aka luwo̧ baibenama, dieciseis o̧biya ujuna̧linobe Uziasma, ja̧danö cincuenta y dos o̧biya baledibanö, Jerusalen comunidadnö ja̧nö webö ö̧jinobe. Uzias ojo'doma, Jerusalen comunidad jojosuju, Jecolias mikwuju.
3Abe'do Amasias ja̧bö ö̧jinadanö, Uziasbi bakwainö Isabenö Jo̧ ösödi̧danö ja̧bö ö̧jinobe. 4Jo̧kwaijayonö Uziasbi möemitenia jojodö kwabö juwö tjiyemi söbebö loinokobe, ja̧danö Jerusalennö jȩju Dios ejutjöda tjiyo jö̧tja̧lijayonö, ina möemiteniatjö kwabö juwö tjiyinobe, ja̧danö omewi̧ jawa tjujuwinobe.
5Ja̧danö, webö ö̧jemi ja'ötjö, Isabenö Jo̧ma weinobe, la'aka luwo̧ Uzias lepratjö 'dö̧achobö#15:5 2Cr 26:16-21laebobe ja̧ baledina wene. Uziasda Dios eju tebachö, omewi̧ jawa ujuwobö jwiinajayonö, Dios weina a̧ja̧kwökönö, iteda ujuwobö jö̧a̧linobe. Ja̧danö ujuwotö jö̧ba̧lö teachiökwe, jo̧banö lȩebinobe., ja̧danö jemi tupakwö ö'wö baibenanö kabatö, lepratjö 'dö̧achinobe Uziasma. Ja̧danö, lepratjö 'dö̧achobetjö̧, jeleju wainö jȩjunö ö̧jobö ji̧nobe. Jo̧kwajabetjö̧, Uzias ina la'aka luwo̧ ö̧jijayonö, itji̧ Jotam mikwo̧da la'aka luwedö ja̧jitjejunö ja̧nö, jobe ju̧kwadönöbi, ju'wedö Juda jojodönöbi webö ö̧jinobe.
6Jobekwö ja'yubenö laebobe Uzias la'aka luwo̧ ö̧jina jawama. Ju'wibi nöinö ja̧bö ö̧jinobe Uziasma, ja̧danö ja̧ Uzias ja̧bö ö̧jina jawama, Juda jojodö la'aka tjuluwedö tjö̧jina wȩyukwa'ye mikwa'yenö laebobe. 7Ja̧danö, Uziasma ö'wö baibinobe, ja̧danö ö'wö babibajo̧nö a'dödökwö tjo̧tjinobe, a'dö David itebo comunidad ötjabena. Ja̧danö, Uzias webö ö̧jinemi, itji̧ Jotamda Juda la'aka luwo̧ baibinobe.
Zacarias Israel la'aka luwo̧ ö̧jina jawa
8Juda la'aka luwo̧ Uzias ö̧jayi, treinta y ocho o̧biya baledibanö ida̧ökö webö ö̧jenama, israel la'aka luwo̧ Jeroboan itji̧ Zacariasma israel la'aka luwo̧ baibinobe, ja̧danö jawo̧dö jelemutjö bakwo̧ baledibanö, Samaria comunidadnö ja̧nö webö ö̧jinobe. 9Ja̧danö, a'dödö sulabenö Isabenö Jo̧ öpöjödi̧ jawa sulabenö ja̧bö tjö̧jinadanö, Zacariasbi sulabenö Isabenö Jo̧ öpöjödi̧ jawa ja̧bö ö̧jinobe, ajayinö ji̧na Jeroboan o̧'wo jawa otidinawö̧nö kabatibökönö. Jeroboanma sulabenö o̧'wo jawa otidajo̧, israel jojodö otidajawö̧nö tjösödobö weinobe, ja̧danö Zacariasma jwaikwöda Jeroboan otidinawö̧nö sulabenö ösödö ö̧jinobe.
10Ja̧danö, Jabes itji̧ Salum mikwo̧ma omukwatö ujuninobe, uluwo̧ Zacariasnö kwabö loobö, ja̧danö Ibleam comunidadtjö jo̧banö kwabö loinobe, ja̧danö Zacarias webö ö̧jinemi, Salumda israel la'aka luwo̧ baibinobe.
11Jobekwö ja'yubenö laebobe Zacarias Israel la'aka luwo̧ ö̧jina jawa. Ju'wibi ja̧bö ö̧jinobe Zacariasma, ja̧danö ja̧ ja̧bö ö̧jina jawama, Israel la'aka luwedö tjö̧jina'ye mikwa'yenö laebobe.
12Ajayinö Zacarias a'dömine Jehu israel la'aka luwo̧ baibenama, Isabenö Jo̧ma Jehunö yöbawö ujuninobe, —Ökwö kwitji̧mu tupadanö jojodöbi luwedö tjö̧jobö wetakwo̧sa, kwitji̧bi, kwö̧'dö̧bi, kwö̧'dö itji̧bi, kwö̧'dö̧ ö̧'döbi inesö la'aka luwedö batjibanö, la'aka luwo̧ iteakanö tjöbamatobö chiyakwo̧sa, —jö̧ba̧lö yöbawö ujuninobe Isabenö Jo̧ma. Ja̧danö, Isabenö Jo̧ yöawi̧ badekwachinö, baledinobe.
Salum israel la'aka luwo̧ ö̧jina jawa
13Juda la'aka luwo̧ Uzias ö̧jayi, treinta y nueve o̧biya baledibanö ida̧ökö webö ö̧jenama, Jabes itji̧ Salum mikwo̧ma israel la'aka luwo̧ baibinobe, ja̧danö la'aka luwo̧ babibajo̧, sule jawo̧ bakwo̧da webö ö̧jinobe. 14Jawo̧ bakwo̧da baledaja̧ ikena, Gadi itji̧ Manahem mikwo̧ma, Tirsa comunidadtjö ichibö, Salumnö kwabö loinobe Samaria comunidadtjö, ja̧danö Salumnö kwabö lobajo̧, Manahemda israel la'aka luwo̧ baibinobe.
15Jobekwö laebobe Salum israel la'aka luwo̧ ö̧jina jawa. Ju'wibi ja̧bö ö̧jinobe Salumma, ja̧danö ju'wi ja̧bö ö̧jina jawabi, la'aka luwo̧ Zacariasnö kwabö loina jawabi, Israel la'aka luwedö tjö̧jina'ye mikwa'yenö laebobe.
16Ja̧danö, ju'wibi ja̧inobe Manahemma, ja̧ möle jenanö. Manahem Tirsa comunidadtjö ichenama, Tapua comunidad jojodöma comunidad apjude po̧bebö, Manahem ömöayedö batjibanö tjiyawobö tjöpöjödinobe. Jo̧kwajabetjö̧, tjöpöjödiökwe, jwiinö söbebö loinobe Tapua comunidadbi, ö'öbö nijibi, ja̧danö okobe deinö jobe ju̧kwadönö kwabawö loinobe, ja̧danö jobadötjö metu'wo ja̧dönö, tjimetukwa'iju solö loinobe.
Manahem israel la'aka luwo̧ ö̧jina jawa
17Juda la'aka luwo̧ Uzias ö̧jayi, treinta y nueve o̧biya baledibanö ida̧ökö webö ö̧jenama, Gadi itji̧ Manahem mikwo̧ma israel la'aka luwo̧ baibinobe, ja̧danö la'aka luwo̧ babibajo̧, domulataja o̧biya baledibanö, Samaria comunidadtjö webö ö̧jinobe. 18Mahanemma Isabenö Jo̧ öba a'otjö sulabenö ja̧bö ö̧jinobe, ja̧danö Jeroboan sulabenö ja̧bö ö̧jinadanö, Mahanembi sulabenö ja̧inobe. Jeroboanma sulabenö o̧'wo jawa otidajo̧, israel jojodö otidajawö̧nö tjösödobö weinobe, ja̧danö ö̧jemi baledibanö, Mahanembi Jeroboan otidinawö̧nö kabatibökönö, bakwainö israel jojodö sulabenö ja̧tjobö weinobe.
19Manahem webö ö̧jonö, Asiria la'aka luwo̧ Tiglat Pileserma Israel nijibe ichibinobe, ölakwabikwawobö, ja̧danö ichibiökwe, Mahanemma jo̧banö treinta y cinco mil kilo plata jawa imidinobe, —Ajayitjö bajalekwönönö israel la'aka luwo̧ 'diinö jo̧ batibanö pjakatitjö̧ma, kwömöayo̧ babibö, bi̧ya chimidakwö, —jö̧ba̧lö. 20Ja̧ plata imidakobetjö̧, Mahanemma okobe deinö israel jojodötjö nöinö juna̧ladönö tjimidobö weinobe, bakwo̧nökwena cincuenta ö̧pibiya tjimidobö, ja̧danö tjimidaja̧ baladatjö Asiria luwo̧nö iyinobe. Ja̧danö, jobekwö iyajökwe, Israel jojodökwö ölakwabikwawökönö ȩwa̧jinobe itebobe.
21Jobekwö ja'yubenö laebobe Manahem israel la'aka luwo̧ ö̧jina jawa. Ju'wibi nöinö ja̧bö ö̧jinobe Mahanemma, ja̧danö ja̧ ja̧bö̧ ö̧jina wenema, Israel la'aka luwedö tjö̧jina'ye mikwa'yenö laebobe. 22Ja̧danö, Manahemma ö'wö baibinobe, ja̧danö Manahem webö ö̧jinemi, itji̧ Pekaiama israel la'aka luwo̧ baibinobe.
Pekaia israel la'aka luwo̧ ö̧jina jawa
23Juda la'aka luwo̧ Uzias ö̧jayi, cincuenta o̧biya baledibanö ida̧ökö webö ö̧jenama, Manahem itji̧ Pekaia mikwo̧ma israel la'aka luwo̧ baibinobe, ja̧danö la'aka luwo̧ babibajo̧, dötölataja o̧biya baledibanö, Samaria comunidadtjö webö ö̧jinobe. 24Pekaiama Isabenö Jo̧ öba a'otjö sulabenö ja̧bö ö̧jinobe, ajayinö ji̧na Jeroboan o̧'wo jawa otidinawö̧nö kabatibökönö. Jeroboanma sulabenö o̧'wo jawa otidajo̧, israel jojodö otidajawö̧nö tjösödobö weinobe, ja̧danö Pekaiabi Jeroboan otidinawö̧nö kabatibökönö, bakwainö israel jojodö sulabenö ja̧tjobö weinobe.
25Ja̧danö, dötölataja o̧biya baledibanö webö ö̧jemi ja'ötjö, ömöayo̧ ölakwabikwawadötjö luwo̧ Peka#15:25 Remalias itji̧ Pekamikwo̧bi, ju'wedö ömöayedö Galaad jojodötjö cincuentabedöbi omukwatö tjujuninobe, tjuluwo̧ Pekaianö kwabö lotjobö. Ja̧danö, omukwatö tjujunaja̧danö, Pekaia Samaria comunidadnö iteda eju 'diinö tjöekwobe ö̧jemi ja'ötjö, tjuluwo̧ Pekaianö kwabö lotjinobe. Jobekwö iteda uluwo̧nö kwabö loinobe Pekama, ja̧danö uluwo̧nö kwabö lobajo̧, webö ö̧jinemi Pekada israel la'aka luwo̧ baibinobe.
26Jobekwö ja'yubenö laebobe Pekaia israel la'aka luwo̧ ö̧jina jawa. Ju'wibi nöinö ja̧bö ö̧jinobe Pekaiama, ja̧danö ja̧ ja̧bö̧ ö̧jina wenema, Israel la'aka luwedö tjö̧jina'ye mikwa'yenö laebobe.
Peka israel la'aka luwo̧ ö̧jina jawa
27Juda la'aka luwo̧ Uzias ö̧jayi, cincuenta y dos o̧biya baledibanö ida̧ökö webö ö̧jenama, Remalias itji̧ Peka mikwo̧ma israel la'aka luwo̧ baibinobe, ja̧danö la'aka luwo̧ babibajo̧, veinte o̧biya baledibanö, Samaria comunidadtjö webö ö̧jinobe. 28Pekama Isabenö Jo̧ öba a'otjö sulabenö ja̧bö ö̧jinobe, ajayinö ji̧na Jeroboan o̧'wo jawa otidinawö̧nö kabatibökönö. Jeroboanma sulabenö o̧'wo jawa otidajo̧, israel jojodö otidajawö̧nö tjösödobö weinobe, ja̧danö Pekabi Jeroboan otidinawö̧nö kabatibökönö, bakwainö israel jojodö sulabenö ja̧tjobö weinobe.
29Ja̧danö, Peka israel la'aka luwo̧ öjonö, Asiria la'aka luwo̧ Tiglat-pileser mikwo̧ma israel nijibe ölakwabikwawö ichinobe, ja̧danö ichibajo̧ Ijon comunidadbi, Abel-bet-maaca comunidadbi, Janoa comunidadbi, Cedes comunidadbi, Hazor comunidadbi, Galaad nijibi, Galilea nijibi, okobe jwiinö Neftalisaso nijibi mebibö ujuluwinobe. Ja̧danö, juluwajo̧, jobe ju̧kwinadönö do̧batö, tjitebotjö labebö öibinobe jobadönö, iteda itebo Asiriabe.
30Jemi ikenama Ela itji̧ Oseas mikwo̧ma omukwatö ujuninobe, uluwo̧ Pekanö kwabö loobö, ja̧danö omukwatö junajo̧, uluwo̧bajo̧ Pekanö kwabö loinobe, ja̧danö Peka webö ö̧jinemi, Oseasda Israel la'aka luwo̧ baibinobe. Ja̧ baledina mölema, Juda la'aka luwo̧ Uzias itji̧ Jotam mikwo̧ webö ö̧jonö baledinobe, Jotamma ida̧ökö veinte o̧biya baledibanö webö ö̧jenama.
31Jobekwö ja'yubenö laebobe Peka israel la'aka luwo̧ ö̧jina jawa. Ju'wibi nöinö ja̧bö ö̧jinobe Pekama, ja̧danö ja̧ ja̧bö̧ ö̧jina wenema, Israel la'aka luwedö tjö̧jina'ye mikwa'yenö laebobe.
Jotam Juda la'aka luwo̧ ö̧jina jawa
32Israel la'aka luwo̧ Peka ö̧jayi, dötölataja o̧biya baledibanö i̧da̧ökö webö ö̧jenama, Juda la'aka luwo̧ Uzias itji̧ Jotam mikwo̧ma Juda la'aka luwo̧ baibinobe. 33Jotam la'aka luwo̧ baibenama, veinticinco o̧biya ujuna̧linobe, ja̧danö dieciseis o̧biya baledibanö Jerusalen comunidadtjö webö ö̧jinobe. Jotam ojo'doma Sadoc itjiju Jerusa mikwuju. 34Abe'do Uzias Isabenö Jo̧ öba a'o otiwanö ja̧bö ö̧jinadanö, Jotambi bakwainö otiwanö ja̧bö ö̧jinobe. 35Ja̧danö, la'aka luwo̧ ö̧jonö, Isabenö Jo̧ eju apjude, u'dakwöchobe apjude otidinobe Jotamma. Jo̧kwaijayonö, ju'wi jaye otiwanö ja̧bö̧ ö̧jijayonö, möemitenia jojodö kwabö juwö tjiyemi söbebö loinokobe, ja̧danö Jerusalennö jȩju Dios ejutjöda tjiyo jö̧tja̧lijayonö, ina möemiteniatjö kwabö juwö tjiyinobe, ja̧danö omewi̧ jawa tjujuwinobe.
36Jobekwö ja'yubenö laebobe Jotam Juda la'aka luwo̧ ö̧jina jawa. Ju'wibi nöinö ja̧bö ö̧jinobe Jotamma, ja̧danö ja̧ ja̧bö ö̧jina wenema, Juda la'aka luwedö tjö̧jina'ye mikwa'yenö laebobe. 37Ju'wibi, Jotam la'aka luwo̧ ö̧jonö, Isabenö Jo̧ jamatö weinobe, Siria la'aka luwo̧ Rezin mikwo̧bi, Israel la'aka luwo̧ Peka mikwo̧bi Juda nijibe ichö tjölakwabikwawobö.
38Ja̧danö, Jotamma ö'wö baibinobe, ja̧danö ö'wö babibajo̧nö a'dödökwö tjo̧tjinobe, a'dö David itebo comunidad ötjabena. Ja̧danö, webö ö̧jinemi Jotam itji̧ Acaz mikwo̧da Juda la'aka luwo̧ baibinobe.
Currently Selected:
2 Reyes 15: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
