1 Samuel 7
7
1Jejenö yötjawiawö̧, Quiriat-jearim jojodötjö ju'wedö ichö tjeminobe Isabenö Jo̧ iteapjoma. Ja̧danö, emajadö, e'ewö tjȩwa̧jinobe Abinadab mikwo̧, mö'ösa'o ja'yuwa'onö jo̧ ejube. Ja̧danö jo̧ba ejunö junö, Abinadab itji̧ Eleazar mikwo̧nö 'da̧batö tjujuninobe, Isabenö Jo̧ iteapjo teada̧lo̧ baibanö.
2Ja̧danö, lekwe mölȩ Dios iteapjo jo̧ba Abinadab ejunöda ji̧nobe, veinte o̧bia baledibanö. Ja̧danö jobe jo̧nö, israel jojodöma tjo̧'wo tjo̧achö tjö̧jinobe, Isabenö Jo̧ma ökwödönö le'dedö loinobe jö̧ba̧lö.
Isabenö Jo̧ israel jojodönö pjaatina jawa
3Jemi ikenama, Samuelma okobe deinö israel jojodönö yöa̧linobe: —Isabenö jwaikwöda Isabenö Jo̧nö kwösödaduwitjö̧ma, okobe deinö ju'wedö tjösödawö̧ o̧'wo jawa kabatibö loköbaduwo, Asterot ötjaboko jo̧'wo jawabi, ju'wedö tjösödawö̧ tjo̧'wo jawabi. Ja̧danö, jobadönö kabatibajadö, yemidanö jwaikwöda Isabenö Jo̧nöda ösödö, jo̧ba wei̧da kwa̧ja̧kaduwitjö̧ma, isabenö ökwödönö pjaatakwo̧ Diosma, filisteo jojodö tjujulutjö kwö̧jibaduwinö, —jö̧ba̧lö. 4Samuel yöa̧lawö̧, israel jojodöma Baal ötjabökwe o̧'wo jawabi, Asterot ötjaboko jo̧'wo jawabi kabatibö lotjinobe, ja̧danö jwaikwöda Isabenö Jo̧nöda ösödö tjö̧jinobe, Isabenö Jo̧ wei̧ a̧ja̧kwö.
5Jemi ikenama Samuelma weinobe: —Okobe deinö ökwödö israel jojodöma Mizpa comunidadnö ko̧ko̧kwö kwö̧jaduwo, ja̧danö jobetjö Isabenö Jo̧nö atebocha ökwödönö, —jö̧ba̧lö. 6Weawö̧, israel jojodöma Mizpa comunidadbe ko̧ko̧kwö tji̧'yinobe. Jobe ko̧ko̧kwajadö, ojwiyo wabö Isabenö Jo̧ öba a'otjö totjebinobe, iyawa baibanö, ja̧danö möle baledibanö tju̧kwa̧ ö̧töchö tjö̧jinobe. Ja̧danö, jobe ja̧nö, jweinö yötjawinobe, —Isabenö Jo̧ öba a'otjö, isabenö sulabenö ja̧bö dö̧jajabe, —jö̧ba̧lö. Ja̧danö, jobe Mizpatjö, Samuelma israel jojodönö jwebaba̧lö yöbawö ö̧jinobe.
7Ja̧danö, jobe Mizpanö tjö̧jonö, filisteo jojodöma tja̧ja̧kwinobe, —Israel jojodöma Mizpanö ko̧ko̧kwö ju̧kwadötö, —jö̧ba̧lö, ja̧danö jejenö a̧ja̧kwajadö, filisteo jojodö la'aka tjuluwedöma tjömöayedö ölakwabikwawa jojodökwö Mizpabe tji̧'yinobe, jobadönö tjujuluwobö. Jejenö tjichiawö, yetjaibinobe israel jojodöma, 8ja̧danö Samuelnö atjebinobe: —Kabatibökönö Duluwo̧ Isabenö Jo̧ Diosnö akebo ökwödönö, idö filisteo jojodötjö dö̧jibinö pjaatakobetjö̧, —jö̧ba̧lö. 9Atjebökwe, Samuelma obeja ja'yuwo̧ ina o̧do'mi owayo̧nö do̧batö, kwabö juwö okobe jwiinö ubinö iyinobe Isabenö Jo̧nö, ja̧danö juwö iyö, Isabenö Jo̧nö aebinobe, pjaatobö. Ja̧danö, jejenö aebökwe, Isabenö Jo̧ma israel jojodönö pjaatinobe, baikwö laeba pjaatina wenema:
10Samuel kwabö juwö Diosnö iyonö, filisteo jojodöma yö̧ne tjichibinobe, israel jojodönö metjibotö jö̧ba̧lö, jo̧kwaijayonö yö̧ne tjichibiökwe, Isabenö Jo̧ma böba labinö ökwöi̧danö, mölejȩbetjö labinö ökwödinobe, dakwö ja̧dakwajö jö̧ba̧lö filisteo jojodö yetjaibanö. Ja̧danö, yebabinö dakwö ja̧dakwajö jö̧ba̧lö ja̧badönö, tjujuluwinobe israel jojodöma. 11Israel jojodö tjöba a'otjö dötjibajinobe filisteo jojodöma, ja̧danö Mizpatjö labebö, israel jojodöma filisteo jojodönö lubö kwabö lotjinobe, Bet-car comunidad tupakwönönö tjichibenanö kabatö.
12Ikenama Samuelma inawa nöawa emö, Mizpa comunidadbi Sen comunidadbi 'da̧de ödinobe, ja̧danö lödajo̧ jawa #7:12 Ebenezer jö̧ba̧löma inawa pjaatakwawa jö̧ba̧lö laebobe israel jojodö tjiwenenö Ebenezer jö̧ba̧lö imidinobe, —Ba̧kwelöjatebö pjabataiadanö babebi pjaatajabe Isabenö Jo̧ma, —jö̧ba̧lö.
13Jejenö baledinobe filisteo jojodönö tjujuluwinama, ja̧danö jemi tupakwö lekwe möle yemidanö israel niji tetjachibinokobe filisteo jojodöma. Ja̧danö, Samuel ina 'ya̧alayi baledibanö, Isabenö Jo̧ma isabenö israel jojodönö pjaatinobe, filisteo jojodönö tjujuluwobö. 14Ja̧danö, ajayinö filisteo jojodö israeltjö 'dötjebina comunidadma, yemidanö israel jojodöma 'döbebö tjujuluwinobe, jemi jojodönö filisteo jojodö tjujulutjö tjö̧jibinö. Gatbi, Ecrónbi 'da̧de comunidadbiya ajayinö filisteo jojodö tjujuluwina comunidadma, israel jojodöma filisteo jojodötjö 'dötjebinobe, yemidanö israel niji baibanö. Ja̧danö ju'wibi, ja̧ möle israel jojodökwö, amorreo jojodökwö wene tjujuna̧lakwawinokobe.
15Samuel ya̧alayi baledibanö, israel jojodönö jwebebö yöawinobe Samuelma. 16O̧bakwena, Samuelma Betel comunidadbebi, Guilgal comunidadbebi, Mizpa comunidadbebi 'yi̧ainobe, israel jojodönö jobetjö jwebebö yöawobö, ja̧danö jwebebö yöbawajo̧, 17iteda ejube ȩwa̧jiainobe, Rama comunidadbe. Ja̧danö, jobe Ramatjöbi israel jojodönö jwebebö yöbawiainobe Samuelma, ja̧danö ju'wibi Ramatjö Isabenö Jo̧nö iyawöte mesasöte otidö ujuninobe Samuelma, jobe Ramatjö Diosnö kwabö juwö iyobö.
Currently Selected:
1 Samuel 7: WPC
Highlight
Share
Compare
Copy
Want to have your highlights saved across all your devices? Sign up or sign in
©2021, All Rights Reserved
