Markus 12

To pangngarig maipanggep kadito dake̍c nga makisugsugpun

Mat. 21:33-46; Luk. 20:9-19

1Ket itun, nagpangngarig nge̍ Je̍sus nga kinunen na igida, “Uwed isa nga toley nga nagmula ka adu nga ubas. Inalad na to nagmulaan na, se̍ nagkorob pe̍ ka inariman na nga pagpespessan ka ubas. Nangipasikad pe̍ ka nangudu nga pagedyanan agbantay. Ket ito nalpas nan, nipasugpun na to kaubasan na kadiya agwangwangel ka laplapug, se̍ nawe̍ ka sabali nga ili yin.

2“Ket ito nadatngan ya panagbuburas ka ubas, nibon nito akin-kuwa ya isa nga tagabu na nga mawe̍ kadito makisugsugpun ito kaubasan, tasun ipaalac na ya bingay na nga ubas. 3Ngem dito makisugsugpun, tiniliw da met nga kinabil to tagabu, ket pinagawir da nga awan ne̍cde̍ da igina.

4“Ket to akin-kuwa ito kaubasan, nangibon ka sabali manin nga tagabu na. Ngem agten met latta, ta tinalingu da met ya ulu nito tagabu, se̍ niyal-alyew da met pe̍.

5“Ket nangibon manin to akin-kuwa ka sabali nga tagabu. Ket iyan nga tagabu, pinatey da mettin. Ket dake̍c met latta ya namaay da kadiya adu nga simarunu nga naibon, ta dito duduma igida, kinabil da, ket dito duduma, pinatey da met.

6“Ket is-isa ngas mettin ya mabalin nga ibon nito akin-kuwa, nga itu ya patpatgen na nga anac nga lalaki. Ket iya agten iyan, nibon na ngarud to anac na mettas nga mawe̍ ito edyan dito makisugsugpun, ta kunen na nga, ‘No anac ku mettas ya ibon ku, emmuc nga dayawen da met,’ kunen na.

7“Ngem dito makisugsugpun, nagtetebbar da nga kinunen da lugud, ‘Ala, igina yani ya agtawid! Tidan! Patayen tida lugudin, ket dactida nad ya agtagikuwa iya tawiden nan,’ kunen da. 8Ket tiniliw da ngarud to anac, se̍ da met pinatey, se̍ da nitemsit ngas iya laskig nito kaubasanin,” kunen ne̍ Je̍sus.

9Ket kinunen manin ne̍ Je̍sus, “Ket ita, nagan ngarud ya wanglen nito akin-kuwa ito kaubasan? Mawe̍ na ngarud pukawen dito makisugsugpun, se̍ na italec ka sabali to kaubasanin. 10Arig nga madi nu pekkem nabasa to naisurat iya Bibliya nga kunen na,

‘Iyan mettas nga batu

nga nitemsit ngas dito nangpatdec,

itu met ya nagbalin nga

kangrunaan nga panuli yin.

11Ket gapu mettas iya pannakabalin niya Apu,

itu ya nagbalinan na,

ket ibilang tida ngarud nga nakaskasdaaw,’

kunen na iya Bibliya,” kunen ne̍ Je̍sus.

12Ket dito pangulu diya Hudyu, gabay da nga ipatkem nge̍ Je̍susin, ta emmu da nga igida mettas to pakaiturungan niyan nga pangngarig na. Ngem gapu ta mansing da kadito toltoley, pinanawan da ngas nge̍ Je̍susin.

To saludsud maipanggep iya panagbayad ka buis

Mat. 22:15-22; Luk. 20:20-26

13Ket uwed da met duduma nga nibon dito pangpangulu diya Hudyu ito edyan ne̍ Je̍sus, nga Parisiyu se̍ toley nito Ari He̍rude̍s, tasun agsapul da ka rasun nga pangtiliwan da igina gapu iya kagiyen na. 14Ket dito naibon, nawe̍ da ngarud ito edyan na, ket kinunen da igina, “Mistru, emmu mi nga napudnu ka, se̍ bekken nga ya kapanunutan niya toley ya ikasum, orey nagan na nga toley. Ta awan idumdumam nga saad toley, no di lugud isursurum ya pudnu nga paglinteggan ne̍ Apu Diyus. Dikad pe̍ ibagam kay no maikuntra iya Linteg nito Muyse̍s winno bekken ya panagbayad ka buis e̍ Ari Se̍sar. Agbayad kami kadi, winno bekken?” kunen da.

15Ngem nadlaw ngarud ne̍ Je̍sus to sikap da, itu nga kinunen na igida, “Ape̍ nga sigsigiren dac? E̍cdan dac kay ka isa nga diplata, ta singec,” kunen na.

16Ket ne̍cdan da ngarud ka diplata, ket kinunen na igida, “Nagan ya akin-ladawan se̍ akin-nagan iya nailanad idi?” kunen na.

Ket kinunen da igina, “E̍ Ari Se̍sar, a,” kunen da.

17Ket kinunen ne̍ Je̍sus igida, “No diya maipanggep e̍ Ari Se̍sar, ipaay nu da ngarud igina. Ket no diya maipanggep e̍ Apu Diyus, ipaay nu da mettas e̍ Apu Diyus,” kunen na. Ket iya agten iyan, nasnasdaaw da ngarud iginan.

To saludsud maipanggep iya panagungar

Mat. 22:23-33; Luk. 20:27-40

18Ket uwed da pe̍ Sadusiyu nga nawe̍ ito edyan ne̍ Je̍sus, nga igida didi diya madi mamati nga agungar nad diya natey. Ket dito Sadusiyu, uwed nisaludsud da e̍ Je̍sus nga kinunen da, 19“Mistru, nisurat nito Muyse̍s iya Linteg na dactida, nga no natey ya isa nga lalaki, nga di na pekkem napututan ya asawa na, ket rebbeng kanu niya kabsat nito lalaki nga asawaen ya balu nga ipag na. Asawaen na kuma kanu tasun aganac da ka pannakaanac nito natey nga kabsat na nga lalaki.

20“Ket agten idi nin: Kaspagarigan ta uwed pitu nga lalaki itun nga agkakabsat. Ket to inauna, nangasawa, ngem natey met nga awan pekkem putut na. 21Ket inasawa ngarud nito maikadduwa to balu, ngem natey met pe̍ nga awan putut na, se̍ agten met pe̍ to maikatlu nga lalaki. 22Ket iya agten iyan, nagsasarunu dito pitu nga agkakabsat nga nangasawa ito isa nga babey, ket natey da nga awan putut da. Ket natey met pe̍ to babey yin nga nod-odi ngem igida.

23“Ket agten idi ya saludsud mi: Nad no panagungar diya natey, nagan ngata igida nga pitu nga agkakabsat ya akin-asawa nad ito babey yin? Ta inasawa met dito pitu to babey,” kunen da.

24Ket kinunen ne̍ Je̍sus igida, “Ape̍ nga agten iyan ya saludsud nu? Nairradu kayu met iya panagpanpanunut nu, gapu ta madi nu ngamin emmu ya banbanag nga naisurat iya Bibliya, se̍ madi nu pe̍ emmu ya pannakabalin ne̍ Apu Diyus. 25Ta ya kinapudnu na, ket nad no agungar diya natey, madi da nad met mangasawa winno makiasawa ngin, no di lugud agten da kadiya anghe̍le̍s enna langitin. 26Ket no maipanggep iya panagungar diya natey, siguradu nga agungar da. Di nu pekkem aya nabasa ito libru nito Muyse̍s, ito istorya maipanggep ito kayu nga uwed gumilgilab nga apuy na? Ta itun, kinunen met ne̍ Apu Diyus ito Muyse̍s, ‘Iyaken ya Diyus ne̍ Abraham, se̍ ya Diyus ne̍ Isaac, se̍ ya Diyus ne̍ Hakub,’ kunen na. 27Ngarud, diya kameng ne̍ Apu Diyus, bekken da met nga maibilang nga natey, no di lugud maibilang da nga sibibiyag. Ta e̍ Apu Diyus, ket Diyus met diya sibibiyag. Itu nga nairradu kayu met nga tutu iya panagpanpanunut nu,” kunen na.

Ya kangrunaan nga bilin

Mat. 22:34-40; Luk. 10:25-28

28Ket uwed pe̍ ya isa nga manursuru iya Linteg, nga nawe̍ iyan. Nagicna na ngarud to pagdidiskutiran da, ket nadlaw na nga nalaing met to panagsungbat ne̍ Je̍sus kadito Sadusiyu. Itu nga nagsaludsud pe̍ e̍ Je̍sus nga kinunen na, “Nagan kad ya kangrunaan kadiya amin nga bilbilin nito Muyse̍s?” kunen na.

29Ket kinunen ne̍ Je̍sus, “Itu yani ya kangrunaan nga bilin: ‘Dakayu nga Israe̍lita, denggen nu ngarud yani: Ya Apu nga Diyus tida, igina ngas ya is-isa nga Apu. 30Ket ayatem ngarud ya Apu nga Diyus mu, iya amin nga kabaellam nga mangipateg nga uwed iya pusum, iya nakem mu, iya sirib mu, se̍ iya bileg mu.’ 31Ket idi ya maikadduwa nga bilin nga ipalagip ku ikew: ‘Ayatem ya padam nga toley, nga agten mettas iya panagayat mu iya beggim.’ Awan met napatpateg nga bilin ngem kadiyan,” kunen na.

32Ket kinunen nito manursuru iya Linteg, “Mayat met ya nisungbat mu, Mistru. Ta pudnu ya kunem nga is-isa ya Apu, nga awan sabali no di ngas ig-igina. 33Se̍ napateg nga tutu ya panagayat tida igina iya amin nga kabaellan tida nga mangipateg nga uwed iya pusu tida, iya sirib tida se̍ iya bileg tida. Ket napateg ngarud pe̍ ya panagayat tida kadiya kapada tida nga agten mettas iya panagayat tida iya beggi tida. Ngarud, napatpateg nga unay ya panangtungpal tida kadiyan nga duwa nga bilin ngem iya amin nga mapooran nga beggi animal winno duduma pe̍ nga maidatun e̍ Apu Diyus,” kunen na.

34Ket nibilang ngarud ne̍ Je̍sus nga mayat to nisungbat nito manursuru iya Linteg. Itu nga kinunen ne̍ Je̍sus igina, “Denni ngarud ya panangituray ne̍ Apu Diyus ikew win,” kunen na.

Ket kalpasan niyan, awan nakaitured nga nagsaludsud e̍ Je̍susin.

Maipanggep iya Kristu

Mat. 22:41-46; Luk. 20:41-44

35Ket ito mangisursuru pekkem nge̍ Je̍sus enna Te̍mplu, nagsaludsud kadito aggigicna, nga kinunen na, “Ape̍ ngata nga kunen diya manursuru iya Linteg nga ya Kristu, ket kapututan nito Ari Dabid? 36Nagan ya kunen nu maipanggep ito kinunen nito Dabid, ito niturung niya Ispiritu Santu, ta kinunen na nga,

‘Kinunen niya Apu iya Apuc,

“Agtugew ka idi nga madiwanan ku

agingga nga mapasukuc diya gumurgura ikew,

nga arig nga ipatey ku ya sakam igida,”’

kunen nito Dabid itun.

37“Ket no ‘Apuc’ to kunen mettas nito Ari Dabid maipanggep iya Kristu, kumaan na ngarud nga kapututan na ya Kristu?” kunen ne̍ Je̍sus. Ket siaanggem ngarud dito adu nga toltoley nga naggigicna e̍ Je̍sus.

To panangdellaw ne̍ Je̍sus kadito manursuru iya Linteg

Mat. 23:1-36; Luk. 20:45-47

38Ket bayat nito panangisursuru ne̍ Je̍sus, kinunen na, “Annadan nu ngarud diya manursuru iya Linteg. Magustuwan da ya agpaspasyar nga nakasutana, se̍ magustuwan da met ya makabkablaawan nga sidadayaw no uwed da iya tindaan. 39Paggugustu da met pe̍ ya agtugew kadiya kadayawan nga tugtugew iya gigimungan, se̍ ya kangrunaan nga pagtugawan kadiya padaya. 40Agawen da met diya baley diya balbalu nga babey, se̍ da met agkarkararag ka mabayag, ta panglinged da diya karkararag da kadiya wangwangel da nga dake̍c. Ngem nadagsen nad ngarud ya dusa diyan nga toley,” kunen na.

To panange̍cde̍ nito balu

Luk. 21:1-4

41Ket nawe̍ nge̍ Je̍sus nagtugew itun iya lugar nga masalupac na dito pipisukan ka pagdatun nga kuwarta iya Te̍mplu. Ket nasiputan na ya panagipisuc diya toltoley kadiya kuwarta da. Ket adu diya babacnang nga nawe̍ nangipisuc ka adu nga kuwarta.

42Ket uwed met itun isa nga balu nga babey nga napanglaw nga imadenni pe̍ iyan. Nawe̍ nangipisuc to babey ka duwa ngas nga be̍be̍teng nga diplata nga agpateg ngas ka siping.

43Ket pinaadenni ne̍ Je̍sus dito adalan na, ket kinunen na igida, “Pudnu met nga naibilang nga napatpateg ya nipisuc niyan nga panglaw nga balu ngem kadiya amin nga nipisuc dito duduma nga nangipay iya pipisukan. 44Ta igida, ne̍cde̍ da ngas ya subra niya kinabacnang da. Ngem ya balu nga iyan, orey napanglaw, ne̍cde̍ na nga gennung ya amin nga uwed igina, nga itu ya mabalin na nga pagbiyag,” kunen na.

Currently Selected:

Markus 12: YBT

Highlight

Copy