ROMANOS 6

Eseya queamimishitii eba'epoquijji pojjeama pomeeca'yonaje Jesosaa

1Jamajjeya jjeya, ¿yajja eseya poaje? ¿A'a eseya queamimishitii ba'ecapoquijji Eyacuiñajjija eseya queapameneetii eapoquiajji? 2¡Chojja de! Jama ba'eme pobecaca'yoajja. Jjeya eseya emano'yo jayojja poani quea-esejamimishihuesha eba'epoqui'yojji ese queamimishitii eba'epoqui poanijje. Jamajjeya, ¿apiojji shai eseya queamimishitii ba'esapomajamajacapoquijji? ¡Apiojjipishana!#6.2 Nota: Jiquio ecua se mano'yomajje shajoshajo'yoajja poani jama pea-aiya eseya queamimishitii posapo'yoajja poani Jesosaja epeejji pomajje.* 3Jiquio ecua dejja enaojjojo iñajeanobiacani jama jayojja eseya Jesosa Quitonijje nequiani ojee ojaya'yo. Jamajjeya eseya Jesosa Quito jayojja pomajje ma ecua oya mano'yapoa jama pea-aiya eseya mano'yonaje jayojja. 4Bacue, eseya Quitonijje ojee nequi mano'yajo Eyacuiñajjiya eseya ehuananobia jaa jayojja meijjanijo bacanaje Quitonijjetii. Majoya Eyacuiñajji Echii-aiya queaca'aneetiiyajjejojoya Jesosa emano'yo jaa shequimeeca'yapoa. Oya jayojja pea-aiya eseya shequimeeca'yonaje queajjashahuabaquija'a eyacua eba'epoqui'yojji jjeya.

5Eseya Jesosa jayojja pea-ai mano'yome poanaje. Majoya oya jayojja pea-ai eseya shequi'yonaje ma ecua Jesosa shequimeeca'yapoa jama pea-aiya. 6Esejaya eba esejayanei ejjashahuabaquijjicuana ese queamimishi pomeejjitii chama'yo acanaje, mano'yonaje acui ecuiata'apeejo Quitonijje. Jamajjeya eseya jjeya queamimishitii ba'epoqui'yosapo-ajja. Jamaya eseya pomeecanaje Eyacuiñajjiya esejayanei ejjashahuabaquijjicuana ese queamimishi pomeejjitii epopoqui poanijje. 7Bacue, dejja emano'yo queamimishi pobeca'yoajja, chama'yo o queamimishi pomeejji. 8Eseya e'ejojonei Quito jayojja pea-ai mano'yome poanaje onijjetii. Esejaya eba jjeya se eshequi'yo nequiani onijje ojee. Jamajjeya eseya queapame ba'epoquije onijje. 9Esejaya eba Quito mano'yomajje shequi'yapoa emanobeca'yojjitii pojjeama. Jamajjeya o manomee'yojji ca'a-ama po'yonaje o manomeebeca'yojji epojji. 10Jesosa e'ejojonei oenei mano'yome poa eseja mimishijo. Oya manomeeca'yapoa Eyacuiñajjiya mimishi eseja yamijo nequi queaca'atii ese queamimishitii pomeejji enequipoqui poanijje. Jesosa emanobeca-ajja-ajja'yojjitii pojjeama poaje. Jjeya ca oya eshetii nequipoquiani Eyacuiñajjija echacojji eapoquiajjitii. 11Jiquio baneicue. Ma ecua Jesosa poa jama pea-aiya quiana jjabaqui'yocue emano'yo jayojja mimishijo. Eyacuiñajjiya quiana shequimeeca'yonaje Jesosa Quito eseja Emeshimeseneinijje queapame Eyacuiñajjija echacojji eapoquiajji.

12Jamajjeya oe, ¡a'a mimishi miquianaja yamijo nequi miquiana queamimishitii pomeejji ajji! Miquianaja eyaminei ma quijje manoje'yo miquiana queamimishitii pomeejji ¡a'a ajji! 13A'a oe miquianaja eyaminei quiajji queamimishitii epojji. Eyacuiñajji caca oe quiacajji ojo queapame eba'epoquijji. Jiquio ecua dejja mimishijo emano'yo poani jama oe pocue queamimishihuesha eba'epoqui'yojji. Eyacuiñajjijo eshequi'yo nequi jama popea-aicue quiana jjeya queaja'a eba'epoquijji. Majoya oe miquianaja eyaminei Eyacuiñajji quiacue ojaya echacojji queapame eapoquiajji. 14Bacue, Eyacuiñajjija esohui Moisesja tehuecuana miquianaja eajeyopoquiajji pojjeama mimishiama eba'epoquijji. Eyacuiñajjiya ca quiana ca oe queapamenee acapoquianitii Jesosajo miquianaya queapame eba'epoquijji. Jamajjeya jjeya mimishi miquiana queamimishitii pomeejji pojjeama po'yani, emiquianamesetii pojjeama po'yani.

Eyacuiñajjiya eseya ojo echacochacopoquijji bacani jamajjeya queaja'atii ba'ecapoquijji

15Eyacuiñajjiya eseya queapamenee acapoquiani Jesosajo. Moisesja etehuecuanaja eseya ehuohuipoquiajjitii pojjeama po'yani mimishiama eba'epoquijji jjabaquimajje, ¿yajja eseya pocajji? ¿A'a queamimishitii ba'ecapoquijji jamatii Eyacuiñajjiya eseya queapamenee acapoquiani? ¡Chojja de! 16¿A'a miquianajaya eba cua miquiana chacochacosapoaje dejjajo maya miquiana chacomeejji poaje emiquianamese? Ojaya esohui shajja-ajjaje. Oya miquiana huoojeapoquiajji poaje. Oya jayojja pea-ai miquianaya queamimishitii ba'epoquianijo mimishi miquianaja yamijo nequi miquiana huoojeapoquiajjitii poaje, emiquianamesetii pea-ai poaje. Jama queamimishitii ba'epoquimajje quea-Eyacuiñajjihueshatii ba'epoquije'yo ejjasejjaqui'yotii ojo. Eyacuiñajjija esohuijo jjashajja-ajjaquiajo ca ohuaya quiana queapame ba'emeesahuacapoquije. 17Yahuajo miquianaya queamimishica'atii ba'epoquiapoa. Mimishi emiquianamese poa. Jjeya caca miquianaya jama pojjeama'yo ba'epoquiani. Jamajjeya oe Eyacuiñajji gracias acue ojaya esohuijo e'ejojonei miquianaya jjashahuabaqui'yonaje ma yahuajo peacuaa miquiana huohuicanaje esohuijoya. 18Mimishi miquianaja yamijo nequi miquiana huoojeapoquiajjitii pojjeama aca'yapoa Eyacuiñajjiya. Mimishi emiquianamese pojjeama po'yonaje. Jjeya caca miquianaya Eyacuiñajjijo echacochacopoquijji po'yani queapame eba'epoquijji. 19Eyaya oja esohui tehueaña jiquio papenijo miquianajaya queaja'anee ebajji, jiquio esohui queacamaja poani ebajeyojji. Jamajjeya eyaya esohuicuana aña echacojjijo, echacomeejjijo pea-ai miquianajaya queaja'a ebajji. Yahuajo miquianaja eyami quiapoa queamimishitii eba'epoquijji. Mimishi emiquianamese poa. Jjeya ca oe Eyacuiñajji miquianajaya eyami quiacue ojonei echacochacopoquijji. Oya emiquianamese pomeecue queapamenee.

20Yahuajo mimishi emiquianamese poajo Eyacuiñajjija jjashahuabaquijji jayojja ba'ejjima poa quiana. 21Queamimishica'a ba'yahua quiaa, ¿ae shai queapame jjeshepoquiapoa? Aepishana. Jjeya ca miquianaya queabicho poani ma yahuajo miquiaaya apoquiapoa mimishi shahuaba'yomajje. Ojjaña joya jama ba'epoquianicuana manoje'yo quea-Eyacuiñajjihueshatii enequi'yojji queamimishitii poanajejjejojoya. 22Jjeya ca mimishi emiquianamese pojjeama aca'yonaje Eyacuiñajjiya. Jjeya miquiana Eyacuiñajjijo echacochacopoquijjitii po'yonaje. Jama pomajjeya quiana jjeya mimishiama ba'epoquije Eyacuiñajjijo. Majoya quijje ba'etiitiije'yo onijje Eyajo. 23Ojjañacuana queamimishi epo manoje'yo queamimishi poanaje sosejje. Ojjaña joya Emeshimesenei Jesosa Quitoja'yo poanicuana ca Eyacuiñajjiya ba'etiitiimeecaje'yo Eyajo jamatii o queapame ba'epoquinaje sosejje pojjeama.

Currently Selected:

ROMANOS 6: ESE

Highlight

Compare

Copy