ROMANOS 13

Emeshimese etii poanicuanaja esohuijo jjashajja-ajjaquicapoquijji

1Ojjaña meshijo ba'ecacuana oja etii poanicuanaja esohuijo jjashajja-ajjaquicapoquijji, ma bajjanicanaje cuanaja esohuijoya. Eyacuiñajji eojjañamesetii poani ojjañacuana huoojeapoquiajji poani. Jamajjeya ojjaña etii poanicuana Eyacuiñajjija nequimee, oyatii pojjeama nequiani. 2Jamajjeya ojjaña joya shajjama' jayojja poanicuana etii poanija esohuijo, Eyacuiñajjija esohuijo shajjama' jayojja pea-ai poani oya Eyacuiñajjija nequimeejjejojoya. Dejjacuana shajjama' jayojja poajo etii poanicuaa oya napameecaje oja mimishijo. 3Bacue, ojjaña joya queapame ba'epoquianicuana quea-emeshimese etiicuana yajja pojjeama poani. Joya queamimishi poanicuana caca oe queamete pocajji shajjama' jayojja poanijjejojoya. ¿A'a quiana meteama ba'esapoani emeshimese etii poanicuanajo? Queapame oe ba'epoquicue shajjama' jayojja pojjeama. Jamajjeya miquianaya jama poajo etii poanicuaa quiana queapame ba'e bacaje. 4Eyacuiñajjiya emeshimese etii poanicuana nequimeecani ese jaahuanapoquiajji epojji, ese queapame ojee ba'emeepoquiajji epojji pea-ai. Miquianaya shajjama' jayojja pomajje ca queamete poaje emeshimese etii poanicuanajo. Jamatii pojjeama emeshimese etii poanicuana nequiani, oya ca peacuana shajjama' jayojja poajo napameepoquiajji nequiani. E'ejojonei emeshimese etiicuana Eyacuiñajjija nequimee poani ojjaña shajjama' jayojjacuana napameejji epojji oja mimishijo. 5Jamajojoya aje se oe emeshimese etii poanicuanaja esohuijo jjashajja-ajjaquicapoquijji. Jamaya se pocajji ese ohua enapameeca poanijje. Majoneitii pojjeama. Eseya caca oe jamaya pocajji queaja'a jjashahuabaquime poanijjejojoya Eyacuiñajjija esohuijo. 6Jamajjeya quiaa bejjo pea-ai quiaña emeshimese etii poanicuanaja yajji cua ohua tehuemeecanaje huisotiiya. Mahuisotiiya oe quiacue etii poanicuana Eyacuiñajjija nequimeejojoya. Miquianaya ojee queapame ba'emeepoquiajjijo oya nequiani.

7Jamajjeya emeshimese etii poanicuana esejaya oya bejjo quiacajji ma ohua tehuemeecanaje huisotiiya. Emeshimese etii poanicuana queapame nequiani bacajji, oja esohuijo jjashajja-ajjaquipoquicue.

Achajja eseya peacuananijje ba'ecapoquijji tehuecanaje

8A'a aquianacuana queahuiso jjeshesa-ajji sosema' quijje miquianaja esosequia'yojji pojjeama. Miquianajaya cuentacuana sosequia'yocue. Ojjañacuana oe queajeaneetii apoquiacue jiquio ecua cuenta quiaa sosequiajeyo'yaña jama pea-ai. Jamajjeya joya dejjaa, eponacuaa pea-ai ojjaña onijje ba'ecacuana queajeaneetii apoquiamajje, comaya Eyacuiñajjija esohui Moisesja tehuecuana jayojja ba'epoquiani. 9Eyacuiñajjija esohui Moisesja tehuecuana jama poani ba'a: “A'a peacojjojji pojji, a'a peacuana quecua'yojji, a'a siipojji, a'a peaja aquiana jeabajji.” Ejaa pea esohui pea-ai etehue jama ba'a: “Mipejjejo ba'ecacuana queajeanee apoquiacue jiquio ecua miyanei queajea jjabaquipoquiani jama pea-aiya oya acue” jamaya ojaya esohui etehue jaa. 10E'e, eseyaya peacuana queajea amajje esejaya oya queatai eajji pojjeama. Majoya eseya Eyacuiñajjija esohui Moisesja tehuecuana jayojja ba'epoquije e'ejojonei peacuana queajeanee apoquiamajje.

11Jamaya se ba'ecapoquijji peacuananijje. A'a Jesosajo jjapajeaqui'yojji oya beshahuanei apoa epoeo'oyajji. A'a jamatii ba'epoquijji ecahuitii jayojja, o poeo'oyajjijo jjashahuabaquijjimatii ba'e. Ese Eyahuasijje poqui'yojji epojja poechipiani ma ecua yahuajopishana eseya Jesosajo jjashahuabacooqui'yapoa epojjajo jama pojjeama, jjeya queachipinee. 12Meca beshahuanei apoa, jjapojjaquijebeani jjeya. Jamajjeya a'a quea-aapo jayojjatii ba'epoquijji. Epojja jama oe quiana queaja'atii ba'epoquicue. Jiquio ecua soldadocuana apoa epo ejja-aquitii nequiani, jama pea-aiya quiana oe pocue. 13Jamajjeya jiquio ecua epojja queaja'a poani jama pea-aiya ba'epoquicue quiana queaja'a. A'a huoojji, a'a ona ishi-ishiquiyasijje poquijji ona queashajjaquijjo poequiyasijje. A'a peaja huanasenijje jaajji. A'a peacuananijje jjacuiaquijji quenequenemajje. A'a peaja aquianacuana jeabajji. 14Miquianaya ca oe jjapeequipoquicuetii Emeshimesenei Jesosa Quitonijje. Ojaya ejjashahuabaquijji jayojja apoquiacue. A'a miquianajanei ejjashahuabaquijji queamimishi epojji asa-ajji. Ma ecua yahuajonei soldadocuaa baajee daqui huoshocapoa oja yami queyajji jama pea-ai oe pocue miquianaya queapame ba'epoquimajje Jesosajo.

Currently Selected:

ROMANOS 13: ESE

Highlight

Compare

Copy