ROMANOS 1

Pablohua esohui tehuecanaje Jesosaja epeejjicuana Roma meshijo ba'ecacuanahuasijje

1Eya Pablo Jesosa Quitojo chacochacopoquiani oja babaca ona sohuihuohuiquinequijji poani. Eyacuiñajjiya eya babacacapoa oja esohui queapame huohuipoquiajji epojji.

2Yahuajonei Eyacuiñajjiya oja esohuihuohuijji poa dejjacuana tehuemeecapoa quijje ohuaya oja esohui queapame quiacaje. Jiquio jjeya eya huohuiaña ma esohuitii oja quiaya. 3Jiquio Eyacuiñajjija esohui queapame poani Jesosa Quitojo oja Bacuaejjajo. Oya cuayapoa dejja jayojja pea-ai yamijji emeshimese Davidja osecua. 4Eyacuiñajji queaca'aneetii poaniyajjejojoya oya Jesosa shequimeeca'yapoa. Ohua o jama aca'yajo oja Edojjoshahuapameya ojjañacuana bameecapoa oya Jesosa e'ejojonei Eyacuiñajjija Bacuaejjanei poani. Oya esejaya Emeshimesenei poani, eojjañamese.

5Eyacuiñajjiya eya queapamenee acanaje Jesosa Quitojo, jamajjeya eya oja sohuihuohuiquinequijji epojji babacacapoa. Jamajjeya eya poquimajamajani queahuisocuana meshiyasijje esohui huohuiya Jesosajo oja huoojea. Majoya eya huohuiajje peajaajjicuana ojo jjashahuabaquije'yo, oja esohuijo jjashajja-ajjaquipoquije pea-ai. 6-7Miquianaya pea-ai Roma meshijo ba'eca Eyacuiñajjiya iyaacanaje Jesosa Quitoja epeejji epojji. Jamajjeya eyaya jiquio esohui tehueaña miquianajaya queaja'a ebajji Eyacuiñajjija quiana queajeanee poani. Ohuaya quiana bacapoquianitii ojaya'yo. Eseja Chii-ai Eyacuiñajjiya, Emeshimesenei Jesosa Quitohua pea-ai quiana queapamenee ca-acapoquiahua ojayanei ejjashahuabaquijjijo, queaquijijjijajinee capomeecahua quiana pea-ai.

Pablo poquisaneipoani Roma meshiyasijje Jesosaja epeejji majo ba'ecacuana baa

8Ojjaña meshijo ba'ecacuaa miquianaya e'ejojonei Jesosajo jjashahuabaqui'yonaje shajja-ajjacani. Jamajjeya eyaya Eyacuiñajji bihuiaña miquianajo eya Eyacuiñajjinijje mimianiya Jesosa Quitoja bajjanijo. 9Eya e'ejojonei chacochaconeipoquiani Eyacuiñajjiya bacani esohui queapame oja Bacuaejjajo eya huohuipoquiañajo. Eyacuiñajjiya eya bapea-aicani eya mimianitii onijje miquianajo. 10Eya Eyacuiñajjinijje mimipea-aiani e oja poquimeejjijo miquiana baa o jama sapoanijo. 11E'ejojonei eya miquiana baneineiquisapoani Edojjoshahuapameja quia esohui huohuiya miquiana queaca'a ba'epoquijjijo. 12Jamaya eseya queaca'a ba'epoquije oja esohuijo. Eya Eyacuiñajjija esohuijo queaja'a jjashahuabaquipoquianitii bamajje queaca'a quiana ba'epea-aipoquije. Oya jayojja eya queaca'a nequipoquije miquianaya queaja'a jjashahuabaquipoquianitii bamajje.

13Ecue dohuecuana, jjo'icuana pea-ai Jesosajo, bacue. Eya queahuiso miquiana baa epoquijji nishonei po-ajjanaje jamatii ecuea queacamajanee poanaje. Miquianaya majo ba'eca eyaya sohuihuohuiquisa-aña miquiana queaca'a ba'epoquijji. Eyaya judío pojjeamacuana pea meshijo ba'eca jjashahuabameesahuaquinaje Jesosaja epeejji epojji o queaca'a ba'epoquijji pea-ai. Jama pea-aiya quiana eyaya pomeesa-aña coma meshijo ba'eca. 14Eya jjabaquiani ma echacojji ecuea yajjijo ojjañacuana sohuihuohuiquiya epoquinequijji. Eyacuiñajjiya eya jama epojjiya nequimeecanaje. Ecuea ca ojjaña ba'ecuana huohuiquijjima so'o oja esohui jamajje ecuea chacojeyojjima. Jamajjeya ojjaña joya queahuesha ba'ecacuana, joya ojee chipinei ba'eca pea-ai, ojjaña joya papeni etehue ba pojjima'cuana, ojjaña peacuana joya papeni etehue ba epo pea-ai eyaya huohuiquisa-aña Eyacuiñajjija esohui. 15Jamajjeya eya poquisaneineipoani Eyacuiñajjija esohui queapame Quitojo huohuiquiya joya miquiana Roma meshijo ba'ecacuanahuasijje.

Eyacuiñajjija esohui queaca'anee poani

16Bacue, eyaya Eyacuiñajjija esohui e'ejojonei poani baña, jamajjeya eya bichoamanei poani oja esohui queapame Quitojo ehuohuiquijji. Eyacuiñajjija esohui queaca'aneetii poani ojjaña joya ojo jjashahuabaquije'yo huisotiicuana nahue'yojji. Jamajjeya eyaya judiocuana ebionei esohui huohuipoquiaje, majoya quijje judío pojjeamacuana pea-ai huohuipoquiaje. 17Jiquio esohui queapamenee Quitojo jama poani ba'a: Eyacuiñajjiya eseya bacani eseja mimishima'yo ese Jesosajo jjashahuabaqui'yonajejojoya. Mahuisojotiiya eseya mimishima'yo poani ohuaya bacapoquijetii. Eyacuiñajjija esohui etehue jama poani ba'a: “Joya Eyacuiñajjiya mimishima'yo bacani cuana queapame ba'etiitiipoquije'yo oya ojo jjashahuabaqui'yanijjejojoya.”

Ojjaña meshijo ba'ecacuana Eyacuiñajjiya queamimishi epojeyo bacani

18Bacue, Eyacuiñajjiya dejjacuana, eponacuana pea-ai joya oma' jayojjatii queamimishi ba'epoquianicuana queaneeneetii pomeecaje'yo Eyajo nequiya queaqueneya oja mimishicuana ojaya botiamanei poaniyajjejojoya. Macuaaya queamimishinee poaniyajjejojo esohui e'ejojonei huohuimeejjima acani. 19Ojjaña joya queaneeneetii poaje'yo cuanaja Eyacuiñajji queapameneetii poani, queaca'aneetii poani pea-ai bacapoquijji poanaje. Eyacuiñajjiya jjashahuabameequicanaje cuana oya Eyacuiñajji e'ejojonei enequi, jamajjeya macuanajaya queaja'a bacajji poanaje oya. 20Eyacuiñajji e'ejojonei poani. Oya queaca'aneetii nequipoquiani, oe po'yoajjanei. Eyacuiñajji oya eseja ecojjajo jjabameequiajjanei poani, jamatiiya oya bacajji poanaje cuanaja achajja oya nequipoquiani. Eyacuiñajjiya ojjaña aquiana panacapoa. Jamajjeya oja pana aquianacuana bamajje oya e'ejojonei nequiani ojjañacuanaja bacajji poanaje. Jamajjeya ojjañacuanaja Eyacuiñajji bajjima nisho yajji esohui aca-ajja. 21E'e, ojjañacuanaja eba poanaje Eyacuiñajji e'ejojonei nequiani, jamatii esohui queapame ojo ajjima' acapoquianitii cuaa. Oya gracias ajjima'nei apea-aicapoquianitii cuaa, oma' jayojjaneitii ba'ecapoquiani macuanaya. Queajjashahuabaquiquehuanee pocapoquianitii. Queasapaquehuanee pocapoquianitii macuanaya jiquio ecua meca quea-aapo poani jamaya pocapoquianitii cuana. 22Macuana jjabaquiani queasapaja'anee epopoquije poso jamatii queajjashahuabaquiquehuanee pocapoquianitii. 23Jamajjeya Eyacuiñajji queaca'aneetii queasajajanee poani ma nequitiitiianiya Eyacuiñajji bihuiapajeacanaje cuaa. Majoya oya dejja jayojja pea-ai poani poso acanaje, yamijji poso. Cuichojjicuana, meshijjepojjicuana, ijjiacajjicuana pea-ai bihuiacanaje cuaa Eyacuiñajji jama pea-ai posoya.

24Majoya aje macuana queaquehuaneetii poani bamajje Eyacuiñajjiya oja ejjashahuabaquijji queamimishineejo nahuepajeacanaje cuana. Jamajojoya aje macuanaya queamimishinee pocapoquianitii onijjejaajjicuananijje bichoamanei. 25Eyacuiñajjija esohui cajaa amajje esohui e'ejojonei pojjeama shajja-ajjacapoqui'yonaje. Majoya Eyacuiñajjija panacuana bihuiacapoqui'yonaje cuaa. Eyacuiñajji eojjaña-aquianacuanamese ca bihuiajjimanei acapoqui'yanitii cuaa. Eyacuiñajjinei caca oe bihuiatiitiicapoquijji poanaje ojjañacuanaja. Jamaya acapoquijji poanaje ojjañacuanaja.

26Jamajojoya aje Eyacuiñajjiya dejjacuana, eponacuana pea-ai oja ejjashahuabaquijji queamimishineejo nahuepajeacanaje oya queamimishineetii epopoquijji. Majoya quijje eponacuana Eyacuiñajjija esohui cajaa amajje pea jjashahuabaquime poanaje queamimishinee epojjijo. Onijje eponanijje ojahuenijje jayojja jaanaje. Jama ca poca-ajjaneinei. 27Oya jayojja pea-aiya dejjacuana Eyacuiñajjija esohui cajaa amajje pea jjashahuabaquime poanaje queamimishinee epojjijo eponacuana jayojja pea-aiya. Dejjacuana eponacuananijje jaapajeanaje onijje dejja jeabamajje ejaajji onijje. Oja huanase jayojja acanaje cuaa onijje dejja. Jamajjeya dejjacuana pea onijje dejjanijje queamimishinee ba'ecapoquinaje. Jamajojoya aje Eyacuiñajjiya oja yami queanee, queamano pea-ai pomeecanaje oja mimishicuanajo.

28Eyacuiñajji shahuabasapo-ajjanei pocapoquianitii cuana. Jamajojoya aje Eyacuiñajjiya macuanaja ejjashahuabaquijji queamimishineejo nahuejjima acanaje. Cua queatainee epojji aca-ajja macuaaya acapoquinaje. 29Jamajjeya macuanaya queamimishihuisonee ba'ecapoquinaje, jjeyanei pea-aitiiya jama ba'a: Queamimishitii acapoquiani cuaa. Peaja aquianacuana jeabajji poani, pea queatainee ajji poani pea-ai. Quenequenecuajimajje jjacuiaquiani cuana, pea dejja quecua'yojji poani pea-ai. Queajjashahuabaquitainee poani, mimijajijji, jjaniñebaquijji, jjadasiaquijji pea-ai poani cuana. 30Pea niñebajji poani, Eyacuiñajji botiamanei ajji poani, jjamata-aquijji poani pea-ai cuana. Oyaneitii queaca'a poani poso jjabaquijji poanicuana pea-ai. Oyanei queapame poani poso jjabaquijji cuana pea-ai. Pea mimishicuana onaja ajjima' acoojji poani pea-ai. Oja chiija, oja naeja esohuijo jjashajja-ajjaquisapo-ajjanei pea-ai poani cuana. 31Jjabahuejjaquisapo-ajja poani cuana peaa huohuicanijo. Oja esohui jayojja ajeyoajja pea-ai poani cuana. Peacuana queajea a-ajja pea-ai poani cuana. Pea queanee poajo jjashahuabaquiajja poani cuana o yenoama epomeejjijo. 32Macuanajaya eba Eyacuiñajjija esohui etehue jama poani ba'a: “Ojjaña joya jamaya queamimishitii ba'epoquianicuana manoje'yo quea-ohueshatii enequipoqui'yojji.” Oja esohui etehue jama poani ebajotiiya jamatii queamimishihuiso ba'ecapoquiani cuana. Peacuana queamimishinee ba'yani bamajje queabihuinee pea-ai poani cuana onijje.

Currently Selected:

ROMANOS 1: ESE

Highlight

Compare

Copy