APOCALIPSIS 2

Esohui Jesosaja epeejjicuana Éfeso meshijo jjachichaquipoquianija ebajji

1Majoya Jesosa enijje miminequinajetii jama ba'a: “Jiquio esohui tehuepea-aicue oja angelque ecuea epeejjicuana Éfeso meshijo jjachichaquipoquianija ebajji. Eyaya jiquio siete majametacuana ecuea ebañei mejje eiñanequia nequiya, jiquio siete oro cuaquijijisisi nequiajjicuanayiyesamaneijje poaequianiya jama aña ba'a: 2Ecuea quiana achajja ba'epoquiani eba. Miquianaya queahuiso chacochacopoquianitii Eyacuiñajjijo hueyahueyajjimanei. Queaca'atii ba'epoquiani quiana jamatii queacamajanee acani cuaa. Dejjacuana joya Eyacuiñajjija babaca poani ona sohuihuohuiquinequijji jjabaquianicuana baneineiaña quiaa. Ma dejjacuaaya esohui e'ejojonei pojjeama huohuicani banaje quiaa oya siajje poani esohuijo. Jamajjeya miquianaya jjapeequiajja ojjaña ma queamimishineetii poanicuananijje. 3Miquianaya queaca'atii ba'epoquiani jamatii queacamajanee acani cuaa ecuea epeejji poanijojoya. Jamatii Eyacuiñajjija esohui cajaa ajjima'nei quiaa aña, ojo chacochacopoquianitii. 4Jamatii eya miquianajo queayeno poani miquianaja ejjashahuabaquijji ejo jjeya ma ecua yahuajo jama pojjeama'yo aña bamajje. Yahuajo miquiaaya eya ejo jjashahuabaqui'yojeahuaa queajeanee anaje. Jjeya quiana ca quea-ejeapishana po'yani. 5Jamajjeya quiana oe jjabaquicue achajja yahuajo miquianajaya eya queajeanee poanaje jiquio ecua jjeya eya quianaja jama pojjeama'yo. Majoya oe pea jjashahuabaquime po-o'oyacue miquianaja mimishijo. Queapame oe ba'epoquio'oyacue ma ecua yahuajo quea-ejeanee poanaje jamaya. Miquianaya jama mipo-o'oyajo eya miquianaque poeje miquianaja cuaquijijisisi nequiajji majotii nequi jjeshe'yohua. 6Bacue, jjeya pea-ai eya queabihui poani miquianajo miquiaaya Nicolaitacuanaja mimishicuana cajaa añajojoya. Oya jayojja ma mimishicuana ecuea botiamanei poani pea-ai.#2.6 Nota: Bacue capítulo 2:14-15.* 7Joya shajja-ajjaneisapoaniya quiaa shajja-ajjaneicue ma Eyacuiñajjija Edojjoshahuapameya esohui huohuicaje Jesosaja epeejjicuana jjachichaquipoquianija ebajji jama ba'a: ‘Ojjaña joya mimishi cajaa ajji popoquijetiicuana eyaya Eyacuiñajjija meshi queapameneejo nequi acuijjajja eba'etiitii'yojji ijjiameeje.’ ” Mahuisoneiya eya tehuemeecanaje ojaya epeejjicuana Éfeso meshijo jjachichaquipoquianija ebajji.

Esohui Jesosaja epeejjicuana Esmirna meshijo jjachichaquipoquianija ebajji

8Majoya Jesosa enijje miminequinajetii jama ba'a: “Jiquio esohui tehuepea-aicue oja angelque ecuea epeejjicuana Esmirna meshijo jjachichaquipoquianija ebajji jama ba'a: Eya poani jiquio ma yahuajonei eanitiiapoaya, ma quijje anitiitiipoquijeya. Eya yahuajo mano'yapoa, majoya eya emano'yo jaa shequi'yapoa. Eyaya quiana huohuiaña jama ba'a: 9Ecuea eba miquianaya queacamajanee pomeecapoquiani cuaa Eyacuiñajjija esohuijo, aema'yo pea-ai jjeya. Jamatii aema'yo ba'e miquianaya e'ejojonei quea-aquianahuiso jayojja poanitii ejo. Iyehuiso Eyacuiñajjija babaca poso jjabaquianiya esohui miquianajo queatainee acani. Ma dejjacuana Eyacuiñajji bihuiapoquiajji poani poso jjabaquiani. Chojja, macuana caca oe ebionei eshahua Satanás bajjani bihuiapoquiajjitii poani. 10A'a quiana oe queamete pojji ma quijjepishana queacamajanee pomeecaje cuaa jjabaquimajje esohuijo. Bacue, edosiquiaa dejjacuana queamase miquiananijje nequimeecaje. Beca quiana jeanobiameecaje. Diez cahuime huiso miquiana queacamajanee pomeecaje cuaa majoya. Jamajjeya quiana oe queaja'a jjashahuabaquipoquicuetii ejo jamatii beca quiana e'ejojonei quecuacaje'yo cuaa. Majoya eyaya miquiana copocopo esapajo eiyajji corona bajjani queabihuineetii epojji quiaje eba'etiitii'yojji Eyahuasijje. 11Joya shajja-ajjasaneipoaniya quiaa shajja-ajjaneicue ma Eyacuiñajjija Edojjoshahuapameya esohui huohuicaje pea Jesosaja epeejjicuana jjachichaquipoquianija ebajji jama ba'a: ‘Ojjaña joya mimishi cajaa ajji popoquijetiicuana queaneeneetii epo'yojji pojjeama poaje Cuaqui-aiyasijje.’ ” Mahuisoya eya tehuemeecanaje ojaya epeejjicuana Esmirna meshijo jjachichaquipoquianija ebajji.

Esohui Jesosaja epeejjicuana Pérgamo meshijo jjachichaquipoquianija ebajji

12Majoya Jesosa enijje miminequinajetii jama ba'a: “Jiquio esohui tehuepea-aicue oja angelque ecuea epeejjicuana Pérgamo meshijo jjachichaquipoquianija ebajji jama ba'a: Joya baase'beca queashejjineejji poaniya jama acani ba'a: 13Ecuea ebanei miquianajaya meshi. Ebionei eshahua Satanás bajjaniya miquianaja meshijo ba'ecacuana queahuiso huoojeacapoquianitii queamimishi epojji jamatii miquianaya queaca'atii ba'epoquiani, e cajaa apojjima'. Ecuea eba yahuajo ecuea epeejji Antipas, ma ejo ona sohuihuohuipoquiajji poanajeya, miquianaja meshijo nequi quecuaca'yonaje cuaa. Jamatii Satanasya huoojeacapoquianitii meshijo nequicacuaa Antipas quecuaca'yonaje bamajje miquianaja eya cajaa a'yojjimatii poani. 14Jamatii eya queayeno poani miquianajo beca quiana Balaamja esohuijo jjashajja-ajjaquianitii bamajje. Yahuajonei Balaamya emeshimese Balac bajjani huohuicapoa israelitacuana queamimishi pomeejjijo. Ohuaya Balac huohuicapoa jama ba'a: ‘Eyacuiñajjinishocuana quia onaja iya bobicuana israelitacuana ijjiameecue. Peanijje ojahue pojjeamanijje, oja huanase pojjeamanijje pea-ai israelitacuana huohuicue ejaajjijo.’ Jama huohuimeya acapoa Balaamya. 15Miquiaaya becacuaa Nicolaitacuanaja ejjashahuabaquijjicuana oya mimishi eajjiya shajja-ajjapea-aiaña. 16Jamajjeya quiana oe pea jjashahuabaquime po-o'oyacue miquianaja mimishijo. Miquianaya jama mipo-o'oyajo eyaya baase'beca ecuea enabajje cuayaquianiya jehuije quiana. 17Joya shajja-ajjaneisapoaniya quiaa shajja-ajjaneicue ma Eyacuiñajjija Edojjoshahuapameya esohui huohuicaje pea Jesosaja epeejjicuana jjachichaquipoquianija ebajji jama ba'a: ‘Ojjaña joya mimishi cajaa ajji popoquijetiicuana eyaya maná bobijo bobiaje, joya eiyaquehua ani maná bobijo. Eyaya ojjaña macuanaya meioshe quiapea-aije. Ma meioshejoya oja bajjani eyacua eyaya tehueje, ma onaja bajjimanei oja bajjani. Ojjaña joya meioshe jjeshejji poajeneiya queaja'a bacaje ma bajjaniya.’ ” Mahuisoneiya eya tehuemeecanaje ojaya epeejjicuana Pérgamo meshijo jjachichaquipoquianija ebajji.

Esohui Jesosaja epeejjicuana Tiatira meshijo jjachichaquipoquianija ebajji

18Majoya Jesosa enijje miminequinajetii jama ba'a: “Jiquio esohui tehuepea-aicue oja angelque ecuea epeejjicuana Tiatira meshijo jjachichaquipoquianija ebajji jama ba'a: Eya ca iña Eyacuiñajjija Bacuaejja poani joya ecojja queajijisajajanee poaniya cuaquijiji jayojja. Ecuea ejeojji queasiyoja'anee poani baajee bronce queanahue equecuasiyonee jama. Eyaya quiana huohuiaña jama ba'a: 19Ecuea quiana ebanei achajja miquianaya ba'epoquiani. Miquiaaya peacuana queajeanee aña, ejo queaja'a jjashahuabaquipoquiani, ejo chacochacoani pea-ai. Miquiana queacamajanee pomeecajje esohuijo jamatii queaca'atii ba'epoquiani ejo. Jjeya pea-ai miquiana ejo queahuiso chacochacopoquiani ma ecua yahuajo oepojji chacochaconaje jama pojjeama. Jamaya epojjiya queapame. 20Jamatii eya queayeno poani beca miquianajo epona esohuihuohuijjinishoja Jezabel bajjanija esohuijo jjadasiameequiani bamajje. Jezabelya quiana queaquehuanee jjashahuabaquimeecani peaja ehuanasenijje ejaajjijo, peaja yahuenijje ejaajjijo pea-ai. Miquiana queaquehua jjashahuabaquimeecani eyacuiñajjinisho quia onaja iya bobicuana eijjiajjijo pea-ai. 21Eyaya Jezabel ishoajjanaje o pea jjashahuabaquime epo'yojji nisho oja mimishijo. Jamatii oja mimishi queanahue poanaje, ojahue pojjeama dejjacuananijje jaatiisapoani. 22Jamajjeya eyaya ma epona, ojjaña dejjacuana ma onijje jaanaje huisotii pea-ai queamanonee queaneenee pomeeje oya pea jjashahuabaquime oja mimishijo mipo'yajo. 23Ojjaña ma eponaja bacuacuana eyaya quijje manomeeje'yo pea-ai. Majoya ojjaña ecuea epeejjicuana joya Eyacuiñajjija esohuijo jjachichaquipoquianicuanaja eba poaje eyaya queaja'atii bapoquiaña ojjañacuanaja equijijji, ejjashahuabaquijjicuana oja esapajo nequi. Jamaya eyaya quiana queaneenee pomeeje'yo joya queamimishi ba'epoquinaje sosejje. 24Jesosaja epeejjiya Tiatira meshijo ba'eca iyehuiso quiaa ca Jezabelja esohui cajaa anaje. Ma Jezabel oeneija eba esohui, ebionei eshahua Satanás bajjanija esohuiya, miquiana maya shajja-ajjasapo-ajjanei poanaje. Jamajjeya eyaya mahuisoya miquiana huohuije ecuea esohui majo ejjashajja-ajjaquijji jama ba'a: 25Queaja'atii jjashahuabaquipoquicue quiana ecuea esohuijo e poeo'oyajo. 26Mimishi cajaa apoquiacuetii quiaa, ecuea esohuijo jjashajja-ajjaquipoquicue pea-ai e poeo'oyajo. Majoya quijje quiana eyaya enijje nequimeeje ojee ojjañajaajjicuana huoojeapoquiajji epojji. 27Ma ecua yahuajonei ecue Chiiya eya onijje ojee ojjaña meshijo ba'ecacuana huoojeapoquiajji epojji nequimeecapoa, jama pea-aiya miquiana enijje nequimeeje. Miquiaaya ojjaña cua Eyacuiñajjija esohuijo jjashajja-ajjaquisapo-ajjatii poanajecuana chama'yo pojeameeje jiquio ecua meshimisi baacuiya cuiapojojeacani jamaya aje'yo cuana. 28Eyaya quiana eshequihuiyejji poani majameta quiaje pea-ai. 29Joya shajja-ajjaneisapoaniya quiaa shajja-ajjaneicue ma Eyacuiñajjija Edojjoshahuapameya esohui huohuicaje pea Jesosaja epeejjicuana jjachichaquipoquianija ebajji.” Mahuisoneiya eya tehuemeecanaje ojaya epeejjicuana Tiatira meshijo jjachichaquipoquianija ebajji.

Currently Selected:

APOCALIPSIS 2: ESE

Highlight

Compare

Copy